Wase e 58

Na iBuli Madrai kei na Leveni

E DUA na i lawalawa levu sara era soqo vata yani vei Jisu mai na Tikapoli. Era lako vakayawa sara mai e lewe vuqa na tamata ki na yasayasa oqo, ka tawani ga vakalevu vei ira na kai Matanitu Tani, me ra mai rogoci koya ka vakabulai talega mai na mate e dui tauvi ira. Era kauta vata mai kei ira e so na ketekete se sova lelevu, ka dau nodra i valavala me ra dauvakatawana kina na veiyaya era via kauta ena nodra lako kosova yani na nodra vanua na Veimatanitu Tani.

Sa qai kacivi ira mai na nona tisaipeli ko Jisu, ka vaka: “Au sa lomani ira dina na tamata oqo, ni sa siga tolu mai oqo na neimami tiko vata, ka sa sega na ka me ra kania. Ia kevaka au vakasukai ira ki na nodra veivale ni ra viakana tu, era na la’ki rebo e gaunisala, ka ni so vei ira era lako sara mai vakayawa.”

“E na rawa li mai vei na kakana e na vanua lala oqo me rauti ira na tamata oqo?” era taroga na tisaipeli.

Sa qai tarogi ira ko Jisu: “E vica na i buli madrai e tiko vei kemudou?”

“E vitu,” era sauma mai, “ka vica ga na ika lalai.”

Sa qai vakaroti ira na lewe vuqa me ra dabe sobu e ra, sa qai taura ko Jisu na madrai kei na ika, ka masulaka vua na Kalou, ka dovia, ka vakatekivu me solia vei ira na nona tisaipeli. Era sa qai wasea yani vei ira na tamata, era kana kece ka mamau vinaka. Ni oti oqori sa qai tomitomiki kece na vo ni kakana, ka vakasinaiti ena vitu tale na sova me sinai vinaka kece, e dina ga ni ra kana oti e rauta beka ni ra lewe 4,000 na tagane, vakatalega kina na yalewa kei na gone!

Sa qai talai ira yani na lewe vuqa ko Jisu, ka vodoka e dua na waqa vata kei ira na nona tisaipeli, era soko yani ki na yasayasa vaka ra ni baravi ena Wasawasa ko Kalili. Era tu voli e ke na Farisi, sa ra qai salavata mai kei ira na i lawalawa vakalotu i Setoki, era via mai temaki Jisu ena nodra kerei koya me vakaraitaka mada e dua na i vakatakilakila mai lomalagi.

Nona kila rawa na nodra via temaki koya, e mani sauma ko Jisu: “Ni sa yakavi mai, dou dau kaya, E na draki vinaka, ni damudamu tu na lomalagi, ia ena mataka lailai, Ena draki ca, ni damudamu tu ka loaloa mai na lomalagi. Dou sa vakaibalebaletaka rawa na i rairai ni lomalagi, ia, dou sa sega ga ni kila rawa na veivakatakilakila ni veigauna oqo.”

Ni oti oqo sa qai vakatokai ira ko Jisu me ra i tabatamata daucaka ca ka dauyalewa ka vakasalataki ira, me vaka ga sa vakaroti ira kina e liu na Farisi, ni na sega ni soli vei ira e dua na i vakatakilakila ka vakavo ga na i vakatakilakila i Jona. Sa biuti ira ka lako yani kei ira na nona tisaipeli ka vodo ki waqa me ra soko yani vaka ki Peciseita ki na baravi ena yasayasa vaka tokalau-vualiku ni Wasawasa ko Kalili. Nodra soko voli yani oqo era qai kila na tisaipeli ni ra a guilecava tu yani na madrai, ia e tiko wale sara ga e dua na i buli madrai vei ira.

Ni tiko voli e lomana na veika a se qai sotava oti ga kei ira na Farisi kei na Setoki era dautokoni Eroti, sa vakadreti ira kina ko Jisu: “Dou raica, dou qarauni kemudou mai na nodra leveni na Farisi, kei na leveni nei Eroti.” Ena nona cavuta na leveni era nanuma na tisaipeli ni vakaibalebaletaka ko Jisu na nodra guilecava tu yani na madrai, era sa qai veiletitaka na ka oqo. Ni kila ko Jisu na nodra lecaika, e qai kaya: “A cava dou veivosakitaka tiko kina ni sega vei kemudou na madrai?”

A sega soti ni dede na nona solia vakacakamana na madrai ko Jisu vei ira e lewe udolu na tamata, ka se qai vakayacori oti beka ga ena dua se rua na siga sa oti. Sa dodonu me ra kila ni sega ni kauwaitaka o koya na lailai ni madrai vakayago. “Dou sa sega tale ni nanuma rawa,” e tukuna me ra nanuma lesu kina, “ni’u a dovidovia na i buli madrai e lima vei ira na lewe lima na udolu? E vica na i sova dou a vakasinaita e na i dovidovi ni madrai?”

“E tinikarua,” era sauma yani.

“Ni a vitu na i buli vei ira na le va na udolu, e a vica na sova dou a vakasinaita e na i dovidovi ni madrai?”

“E vitu,” era sauma.

“Dou sa sega tiko ga ni kila rawa?” e taroga ko Jisu. “Ni’u sa sega ni vosataka na madrai, na nodra leveni ga na Farisi kei ira na Setoki, mo dou qarauni kemudou mai kina.”

Sa ra qai tauri koya rawa na tisaipeli. Na leveni, na ka e dauvakavuna me tubu na madrai o ya na vosa a dautaurivaki me vakaraitaka na kena sa ca e dua na ka. Sa ra qai kila na tisaipeli ni vosa vakaibalebale tiko ko Jisu ka vakasalataki ira me ra qarauna vinaka “na nodra i vakavuvuli ga na Farisi kei na Setoki,” ni i vakavuvuli oqori e cakayaco na kena veivakacacani. Marika 8:1-21; Maciu 15:32–16:12.

▪ Na cava na vuna era daukauta voli kina na ketekete lelevu na tamata?

▪ Ni sa vakanadakui na Tikapoli, na i lakolako cava e waqa e qai muria ko Jisu?

▪ Na cava na nanuma cala e tu vei ira na tisaipeli ena i vakamacala i Jisu me baleta na leveni?

▪ Na cava li e vakaibalebaletaka ko Jisu me baleta na “nodra leveni ga na Farisi kei ira na Setoki”?