Veivakani Vakacakamana, iVakasala me Baleta na Leveni

Dua na ilala levu era tabili yani vei Jisu ena Tikapoli, ena tokalau ni Wasa o Kalili. Era via rogoci koya, mera vakabulai tale ga. Era kauta yani na basikete lelevu ni veika mera lai vakayagataka ena nodra tiko voli e kea.

Ia e kaya o Jisu vei ratou nona tisaipeli: “Au sa lomani ira na ilala levu, ni sa tolu na siga nodra tiko vata kei au, ia era sega ni kania e dua na ka. Keu vakasukai ira ina nodra vale nira waloloi tu, era na bale koso e gaunisala, ni levu era lako mai vakayawa.” Eratou taroga sara na tisaipeli: “E vanua lala qo, me kau mai vei na madrai me rauti ira kece?”—Marika 8:2-4.

E sauma o Jisu: “E vica na ibuli e tu qori?” Eratou kaya na tisaipeli: “E vitu kei na vica na ika lalai.” (Maciu 15:34) Sa qai vakarota o Jisu mera dabe na lewenivanua. E taura sara na madrai kei na ika, e masu vua na Kalou qai solia vei ratou na nona tisaipeli me ratou wasea. E kurabuitaki nira kana kece, era mamau. Era kana tiko qo e 4,000 na tagane wili kina na yalewa kei na gone, ia na ivovo ni kakana e kumuni e vakasinaiti tale kina e vitu na basikete!

Ni talaci ira oti na ilala levu o Jisu, e vodo i waqa kei ratou na tisaipeli ratou qai soko ina yasayasa vakaMakitala ena vuaira ni baravi ni Wasa o Kalili. Era gole yani e keri na Farisi kei na Setoki mera vakatovolei Jisu, era kerea me vakaraitaka e dua na ivakatakilakila mai lomalagi.

Ni kila rawa o Jisu nodra inaki, e kaya: “Ni karobo mai, oni dau kaya, ‘Ena draki vinaka ni botaira na vanua,’ ena mataka oni kaya, ‘ena batabata qai tau na uca nikua ni botaicake na vanua qai buto na lomalagi.’ Oni kila rawa na irairai ni lomalagi, ia oni sega ni kila na ivakatakilakila ni gauna.” (Maciu 16:2, 3) Sa qai kaya o Jisu vei ira na Farisi kei na Setoki ni na sega ni vakaraitaka vei ira e dua na ivakatakilakila, na ivakatakilakila ga i Jona.

Eratou vodo tale i waqa o Jisu kei na nona tisaipeli me ratou soko i Peciseita, ena tai adua ni wasawasa. Eratou qai kidava na tisaipeli ni ratou sa soko tiko, ni ratou kauta tiko ga e dua na ibuli madrai. Se nanuma vinaka tiko o Jisu na ka era cakava na Farisi kei na Setoki era ito i Eroti, e veivakasalataki kina: “Me rai tiko na matamudou, dou qarauna na nodra leveni na Farisi kei na nodra leveni na ito i Eroti.” Eratou nanuma na tisaipeli ni vakaibalebaletaka tiko o Jisu nodratou guilecava na madrai. Ni kila ni cala nodratou rai, e kaya o Jisu: “Na cava dou veivosakitaka tiko kina nomudou sega ni kau madrai mai?”—Marika 8:15-17.

E se qai vakani ira oti ga e vica na udolu o Jisu ena dua na gauna e liu, e dodonu gona mera kila ni sega ni leqataka tiko o koya na lailai ni madrai. E tarogi ratou: “Dou sa guilecava tale niu a tikitikica na lima na madrai vei ira na 5,000 na tagane? E sinai e vica na basikete ena kena vo?” Eratou kaya vua: “E Tinikarua.” E tomana o Jisu: “Niu tikitikica na vitu na ibuli vei ira na 4,000 na tagane, e vica na basikete dou vakasinaita kina na ivovo ni ka e tikici tu?” Eratou kaya vua: “E vitu.”—Marika 8:18-20.

E taroga o Jisu: “Dou sega ni taura rawa vakacava niu sega ni vakamacalataka tiko vei kemudou na madrai?” E tomana: “Dou qarauni kemudou ga mai na nodra leveni na Farisi kei ira na Setoki.”—Maciu 16:11.

Eratou sa qai taura rawa na tisaipeli na ka e tukuna o Jisu. E dau vakayagataki na leveni me tubu kina na madrai. E cavuta o Jisu na leveni me vakatayaloyalotaka na ka e ca. E vakasalataki ratou na nona tisaipeli me ratou qarauna na “nodra ivakavuvuli na Farisi kei na Setoki,” ni rawa ni vakaleqai ratou.—Maciu 16:12.