Wase e 61

Vakabulai na Cauravou Curumi

ENA gauna eratou se tiko voli kina ko Jisu, Pita, Jemesa, kei Joni mai na tokaitua ni Ului Erimoni, era sotava tiko e dua na leqa na tisaipeli. Ni lesu mai ko Jisu, e raica totolo sara na leqa. Era sa vakavolivoliti ira na nona tisaipeli ko ira na lewe vuqa, ka ra veileti tiko kei ira na vunivola. Era kurabui vakalevu na lewe vuqa ni ra sa raici Jisu, era cici yani ka veitavaki kaya. “A cava ko ni veiletitaka tiko kei iratou oqo?” e taroga o koya.

Sa qai toro mai liu e dua na tagane mai vei ira na lewe vuqa, ka mai tekiduru vei Jisu ka vakamacalataka: “Na i Vakavuvuli, au a kauta mai na luvequ tagane vei kemuni ni curumi koya tiko e dua na yalo velavela, ka galu tu. E na gauna kece e curumi koya kina, e dau bitalaki koya ki ra; ka vuso na gusuna ka vakasequruquru bati, ka mai wadokau tu yani. Au sa kerei iratou oti na nomuni tisaipeli me ratou vakasava tani, ka ratou sega ni rawata.”

E vaka me ra vakadiloya sara vakalevu na vunivola na nodra sega ni vakabula rawa na cauravou o ira na tisaipeli, e rairai ra vakasewasewana na nodra sasaga. Ni donumaka na gauna sara ga oqo, sa basika mai ko Jisu. “Na i tabatamata tawavakabauta,” e kaya o koya, “a cava soti na dede ni gauna me’u tiko vata voli kina kei kemudou, ka vosoti kemudou tiko?”

E rairai vosa kece tiko vei ira era tiko voli e kea ko Jisu, ia e sega ni vakatitiqataki ni vosa vakadodonu tiko vei ira na vunivola, era via vakaleqai ira na nona tisaipeli. E tarava, na nona sa qai kaya me baleti koya na cauravou ko Jisu: “Kauta mai ki ke na luvemu!” Ia ni sa lako yani na cauravou vei Jisu, na timoni ka curumi koya tiko sa qai bitabitalaki koya ka viritaki koya yani vakaukauwa ka sakaviyanini. Sa qai vatoqiqi yani na cauravou ka tuburi vuso na gusuna.

“A cava na dede ni gauna sa yacovi koya tiko kina na ka oqo?” e taroga ko Jisu.

“E tekivu sara ni a sa gone lailai,” e sauma ko tamana. “Sa dau biuti koya wasoma ki na buka, ki na wai tale ga, me vakamatei koya kina.” Sa qai vakamamasu ko tamana: “Ia kevaka ko ni rawata kina e dua na ka, mo ni lomani keirau ka vukei keirau.”

Rairai a vakasaqara voli na veivukei o tamana ena vuqa na yabaki. Ia, ni ra sega ni vakabula rawa oqo na tisaipeli, e luvuci koya vakalevu na nuiqawaqawa. Ena nona vosa lesu ena vakamamasu a tauca na tagane, a tukuna ena veivakauqeti ko Jisu: “Na vosa oqori, ‘kevaka ko ni rawata.’ Ni sa rawa na ka kece ga vei koya sa vakabauta.”

“Au sa vakabauta,” sa tabalaka cake vakasauri na domona na tama ni gone, ka vakamamasu: “Ni vukei au mada e na lailai ni noqu vakabauta!”

Ni sa raica ko Jisu na nodra tabili vata yani na lewe vuqa, sa qai vunauca na timoni: “O iko na yalo galu ka didivara, au sa vakaroti iko mo lako tani mai vua, ka kakua sara ni curumi koya tale.” Ni sa lako tani na timoni, e baci vakavuna tale me qoqolou ka bitabitalaki koya me sakaviyanini vakalevu sara. Sa qai davo koto ka sega ni yavala na cauravou, ka ra veikayaka kina na lewe vuqa vei ira na tamata: “Sa mate ko koya.” Ia sa qai taura na ligana na cauravou ko Jisu, ka sa duri cake o koya.

Ena gauna e liu ena nodra a talai yani na tisaipeli me ra laki vunau, era a vakasavi ira tani na timoni. Ia oqo, ni ra sa curu ki na dua na vale, era sa qai tarogi Jisu vuni: “A cava keitou a sega ni vakasava tani rawa kina na yalo velavela?”

Ena nona vakatakila ni a vu oqo mai na lailai ni nodra vakabauta, sa qai sauma ko Jisu: “E sega ni dau vakasavi tani rawa e na dua tale na ka na kena mataqali koya, e na masu duadua ga.” Sa kena i rairai ni gadrevi na vakavakarau me vakasavi tani na mataqali timoni kaukauwa me vaka na kena oqo. E vinakati na vakabauta kaukauwa kei na masu me kerei rawa kina na i gu veivukei ni Kalou.

Sa qai tomana ko Jisu: “Ni’u sa kaya vakaidina vei kemudou, kevaka e tu vei kemudou na vakabauta me vaka na sore ni musita, dou na kaya ki na ulunivanua oqo, Toro tani ki kea, ka na toro tani, ka na sega na ka e dredre vei kemudou.” Sa dua na ka na kena kaukauwa na vakabauta!

Na veika era vakasugusugu tu ka vakaleqa na toso ena qaravi Jiova era na rairai dredre me ra vakamalumalumutaki ka tawayavalati rawa me ra vaka e dua dina na ulunivanua levu. Ia, e vakaraitaka ko Jisu ni kevaka eda teivaka na vakabauta ena lomada, vakasuasuataka ka vakataudeitaka me tubu, ena tete yani ka matua, eda na qai rawa ni vakamalumalumutaka na veika era vakasugusugu tu ka veivakaleqai me vaka na ulunivanua. Marika 9:14-29; Maciu 17:19, 20; Luke 9:37-43.

▪ A cava na i tuvaki e sotava ko Jisu ena nona lesu mai na Ului Erimoni?

▪ Na veivakayaloqaqataki cava e solia ko Jisu vua na tama ka curumi luvena tagane na timoni?

▪ Ena vuku ni cava era sega ni vakasava rawa kina na timoni na tisaipeli?

▪ E vakaraitaka ko Jisu ni rawa me vakacava na levu ni kaukauwa ni vakabauta?