Cakamana i Jisu Mai Kapenaumi

Sa sureta o Jisu e va na tisaipeli​—o Pita, Adriu, Jemesa, kei Joni me ratou gonedau ni tamata. Eratou gole kece ena Siga ni Vakacecegu ina valenilotu e Kapenaumi. E veivakavulici sara e kea o Jisu ra qai kurabuitaka na lewenivanua na iwalewale ni nona veivakavulici. E vakayacora qori me vaka e tu vua na lewa, e sega ni vakataki ira na vunivola.

E tiko tale ga ena Siga ni Vakacecegu qori e dua na tagane e curumi timoni. E kailavaka na turaga qori e valenilotu: “Me icavai vei keimami nomu lako mai, Jisu na kai Nasareci? O mai vakarusai keimami? Au kilai iko vinaka, o iko na Yalosavasava ni Kalou!” E cudruva na timoni o Jisu ni kaya: “Galu, lako tani vua!”​—Marika 1:24, 25.

E bitalaka ina qele na tagane ya na timoni qai kaila ena domona taucoko. Oti sa qai lako tani vua na timoni, “e sega ga ni vakamavoataki koya.” (Luke 4:35) Era kurabui kece na tu e yasana ena valenilotu! Era taroga: “Na cava qo? . . . E vakaroti ira mada ga na yalo velavela ra qai talairawarawa vua.” (Marika 1:27) Sega ni bera sa robota na yasayasa taucoko o Kalili na irogorogo ni ka vakatubuqoroqoro qori.

Eratou biuta na valenilotu o Jisu kei na nona tisaipeli me ratou gole ina vale i Saimoni se o Pita. E davo bibi tiko e keri na tinai wati Pita ni katakata sivia na yagona, ratou mani kerei Jisu me vukei koya. E lai tu volekati koya o Jisu, taura na ligana qai vakaduri koya. Ni oti ga nona katakata, sa vakarautaka tale na kedratou kakana o Jisu kei na nona tisaipeli.

Ena yakavi, era kau yani ina vale i Pita na lewe ni veivanua era tauvimate. Era kumuni e matanivale na lewenikoro kece nira vinakata mera vakabulai. “Era qai kau yani vua na lewenivanua e tauvi ira na veimataqali mate. E tabaki ira kece e ligana, ra mani vakabulai.” (Luke 4:40) Se mani mate cava e tauvi ira, e vukei ira o Jisu me vaka ga e parofisaitaki. (Aisea 53:4) E vakabulai ira mada ga na curumi yalo velavela. Nira lako tani na timoni e curumi ira tu e levu, era kacivaka: “O iko na Luve ni Kalou.” (Luke 4:41) E vunauci ira o Jisu qai sega ni vakatara mera vosa. Era kila na timoni ni o Jisu na Karisito, e sega tale ga ni vinakata me vakarairai nodra qarava na Kalou dina na timoni.