Wase e 63

Vakuri na Veivunauci ni Veivakadodonutaki

NI RATOU se tiko voli ga ena vale mai Kapenaumi ko Jisu kei iratou na nona i apositolo, e veivosakitaki e dua tale na ka mai na kena e baleta na veileti se o cei e levu vei iratou. E rairai a yaco talega na ka oqo ena nodratou lesu tiko ki Kapenaumi, ena gauna a sega ni tiko vata kei iratou ko Jisu. Sa qai tukuna na i apositolo ko Joni: “Keitou a raica e dua na tamata ni vakasavi ira tani na tevoro e na yacamuni, ka keitou a via tarovi koya, ni sega ni dua vei kedatou ko koya.”

E kena i rairai ni dikeva ko Joni ni soli vakatabakidua ga vei iratou na i lawalawa apositolo na veivakabulai. E nanuma kina o koya ni sega ni dodonu vua na tamata o ya me cakava na cakamana ni sega ni lewe ni nodratou i lawalawa.

Ia, sa qai veivunauci kina ko Jisu: “Dou kakua ni tarovi koya: ni sega ni dua e cakava rawa e dua na cakacaka mana ena yacaqu me na qai vosacataki au tale. Ni sa noda i to ko koya e sega ni noda meca. Ni’u sa kaya vakaidina vei kemudou, o ira yadua e na solia vei kemudou e dua na bilo wai mo dou gunuva, ni dou sa i tokani i Karisito, e na sega ni yali vei ira na kedra i sau.”

E sega ni gadrevi vua na tamata oqo, me mai salavata sara tiko kei Jisu, me qai rawa ni to kina vua. Na i vavakoso lotu va-Karisito e se bera ni tauyavu ena gauna o ya, o koya gona na nona sega ni lewena na nodratou i lawalawa e sega ni kena i balebale ni tawase tani na i vavakoso e lako mai kina. E vakabauta na yaca i Jisu na tamata oqo ka vakasavi ira rawa kina na timoni. E cakava tiko o koya na ka e lakovata vinaka kei na ka e tukuna ko Jisu ni dodonu me soli kina na kena i sau. Sa vakaraitaka ko Jisu, ena nona cakava na ka oqo, ena sega ni yali kina vua na kena i sau.

Ia ena vakacava kevaka e mani vakacalai koya na tamata oqo na vosa se veika eratou vakayacora na i apositolo? Oqo e rui bibi sara! E kaya ko Jisu: “Ia, ko koya sa vakacala e dua vei ira na lalai oqo era sa vakabauti au, sa vinaka vua kevaka ka vakarubeci e domona e dua na i qaqi vatu levu ka vakadromutaki e na wasaliwa titobu.”

Sa qai kaya ko Jisu ni dodonu vei iratou na nona i muri me ratou kauta tani mai na nodratou bula na veika eratou lomana vakalevu me vaka na liga, na yava, se na mata ka na rawa ni vakacalai iratou. E daumaka cake me muduki tani na veika e mareqeti oqo me na qai curumi rawa kina na Matanitu ni Kalou ka ca ga ni ra maroroi tiko, me qai ulataki yani ki Qiena (na i benubenu levu e dauvakamai ka koto volekati Jerusalemi), e vakatakarakarataka na rusa tawamudu.

E vakasalataka talega ko Jisu: “Dou qarauna mo dou kakua ni beca e dua vei ira na lalai oqo; ni’u sa kaya vei kemudou, ni ra sa dau raica tiko ga na mata i Tamaqu mai lomalagi ko ira na nodra agilosi.” Sa qai vakaraitaka na nodra talei “na lalai” ni tukuna e dua na tamata e taukena e dua na drau na sipi sa qai vakayalia e dua. E vakamacalataka ko Jisu na nona biuti ira tu yani na 99 oqori me vakasaqarai koya sa yali, ni sa kunea ena rekitaka dina vakalevu oqori mai vei ira na 99. Sa qai tinia ko Jisu: “E sega tale ga ni vaka kina na lomana na Tamamudou mai lomalagi a ya me yali e dua vei ira na lalai oqo.”

Ena nona nanuma lesu beka na nodratou a veileti vakataki iratou na nona i apositolo, sa qai uqeta ko Jisu: “Me tu ga ena lomamudou na masima, dou veilomani talega vakai kemudou.” Na kakana velavela e kana vinaka me vakamasima. Sa vakakina, na masima i vakatakarakara e vakavuna me ciqomi rawarawa na veika e tukuna e dua. Ni tiko na masima oqori ena vukea me taqomaka na veilomani.

Ia ena vuku ni kakadigadiga vakatamata e dauyaco ena so na gauna na veisei. Sa vakaraitaka talega ko Jisu na sala me vakameautaki rawa kina. E kaya ko Jisu: “Kevaka sa i valavala ca vei iko na wekamu, la’ki vunauca ni drau sa tiko vaka i kemudrau ga. Kevaka e vakarorogo, ko sa rawai koya na wekamu.” Kevaka e sega ni via vakarorogo, sa qai vakasalataka ko Jisu, “me qai lewe dua se lewe rua tale mo kauta vata kei iko, me vakadinadinataki na vosa kecega e na gusu ni dautukutuku e le rua se le tolu.”

Na i otioti duadua ni veivukei, sa qai kaya ko Jisu, mo qai kauta na ka oqo ki “na i soqosoqo lewe ni lotu,” vei ira na i vakatawa era vakacolati ena i vavakoso e rawa ni ra vakatauca na lewa. Kevaka ena sega ni via rogoca na nodratou vakataulewa o koya na tamata i valavala ca, e tinia ko Jisu, “me qai vaka na tawa-lotu kei koya sa kumuna nai vakacavacava vei iko ko koya.”

Ena vakatauci ni lewa vakaoqori, sa vinakati vei ira na i vakatawa me ra muria voleka sara na i vakasala mai na Vosa i Jiova. O koya gona, ni ra dikeva ni cala na tamata oqori ka dodonu me totogitaki, ‘sa na vauci oti mai lomalagi’ na tau ni lewa. Ia ena gauna era “sereka e vuravura,” sa i koya na nona dikevi e dua ni dodonu, sa na yaco oti nona “sereki mai lomalagi.” Ena soqoni vata vaka o ya me ia kina na vakataulewa, e kaya kina ko Jisu, “na tikina sa soqoni vata kina e lewe rua, se lewe tolu e na yacaqu, au sa tiko kina e na kedratou maliwa.” Maciu 18:6-20; Marika 9:38-50; Luke 9:49, 50.

▪ Na cava a sega ni gadrevi kina ena gauna i Jisu me salavata vata kei koya e dua?

▪ E vakacava na bibi ni nodra vakacalai na lalai, ia e qai vakatautauvatataka vakacava ko Jisu na nodra bibi na lalai vaka o ya?

▪ Na cava e rairai vakavuna me vakayaloqaqataki iratou kina na nona i apositolo ko Jisu me tiko e lomadratou na masima?

▪ Na cava na i balebale ni ‘vauca’ kei na ‘sereka’?