Wase e 68

Vakuri na Veivakatavulici ena iKavitu ni Siga

NA I OTIOTI ni siga ni Solevu ni Vale Vakacevaceva, na i kavitu ni siga e se vakacagau tikoga. E veivakatavulici voli ko Jisu ena dua na yasa ni valenisoro ka vakatokai me “vale ni yau.” E rairai vanua talega oqo e vakatokai me Nodra Lomanibai na Marama ka tiko kina e so na kato ni i lavo me ra tauca kina na nodra cau.

Ena veibogi kece ni solevu, ena dua na yasa ni valenisoro, e daulavotaki na tikina o ya me vakacilai tu kina na rarama. E duri tu e ke e va na tutu ni cina kadrala lelevu, ka va na beseni lelevu e sinai tu ena waiwai. Na rarama mai na tutu ni cina oqori ni ra vakama tiko na waiwai ena 16 na beseni lelevu e kovuta yani e dua na vanua yawa ena bogi. Na ka e tukuna oqo ko Jisu ena vakalesuya tale beka mai vei ira na vakarorogo na ka era dau raica o ya. “Oi au na rarama kei vuravura,” e kacivaka yani ko Jisu. “Ko koya e muri au e na sega ni lako e na butobuto, ia e na tiko ga vua na rarama ni bula.”

Sa ra qai tusaqati koya na Farisi: “O iko o tukuni iko tiko ga; e sega ni dina na nomu i tukutuku.”

Sa qai sauma lesu ko Jisu ka vaka: “Kevaka sara mada ga au tukuni au tiko ga, e na dina ga na noqu i tukutuku; ni’u kila na vanua au lako mai kina, kei na vanua au lako tiko kina; ia ko i kemuni ko ni sega ni kila na vanua au a lako mai kina se na vanua au lako tiko kina.” Sa qai vakuria o koya: “Ko i au, au sa tukuni au, ka sa tukuni au tale ga ko Tamaqu, o koya ka a talai au mai.”

“E vei ko Tamamu?” era via kila na Farisi.

“Ko ni sa sega ni kilai au se Tamaqu,” e sauma ko Jisu. “Kevaka ko ni sa kilai au, ko ni na kilai Tamaqu tale ga.” E dina ga ni ra vinakata na Farisi me ra vesuki Jisu, e sega ni dua e rawa ni tarai koya.

“Au sa lako tiko e na noqu i lakolako,” e kaya tale ko Jisu. “Ko ni na sega ni lako rawa ki na vanua au sa lako tiko kina.”

Era sa vakatekivu kurabui na Jiu ena vuku ni ka oqo: “E na vakamatei koya beka vakai koya, me vaka ni kaya, Ko ni na sega ni lako rawa ki na vanua au sa lako tiko kina.”

“O i kemuni, o ni lewe ni vuravura ka tiko oqo e ra,” e vakamacalataka ko Jisu. “O i au, au lako mai cake. O i kemuni, o ni lako mai na vuravura oqo, ia o i au, au sega ni lako mai kina.” Sa qai vakuria: “Kevaka dou sa sega ni vakadinata ni sai au, dou na mate e na nomudoui valavala ca.”

E tukuna tiko ko Jisu na nona bula ni se bera nona mai sucu vakatamata, ka sa i koya na Mesaia yalataki, se Karisito. Ia, era qai taroga, ka sega ni vakabekataki ni salavata kei na veibeci levu: “O cei o iko?”

Ena nodra sega ni vakabauti koya, e qai sauma kina vakaoqo ko Jisu: “Na cava na vuna meu mai vosa tiko kina vei kemuni?” Ia e tomana yani ena nona kaya: “Sa dina ko koya ka a talai au mai; ka’u sa tukuna ki vuravura na ka ga au a rogoca mai vua.” E tomana na nona vosa ko Jisu: “Ni dou na laveta cake oti na Luve ni tamata, dou na qai kila ni sai au, ni’u sa sega talega ni kitaka e dua na ka vakai au; ia na ka ga sa vakatavulici au kina ko Tamaqu, sai koya ka’u sa vosataka. Ia sa tiko vata kei au ko koya sa talai au mai: sa sega ni biuti au ko Tamaqu me’u tiko duaduaga: ni’u sa kitaka tikoga na ka sa vinakata ko koya.”

Ni sa vosataka na veika oqo ko Jisu, sa lewe vuqa sara era sa vakabauti koya. Sa qai kaya vei ira ko koya: “Kevaka ko ni muria tiko ga na noqu vosa, ko ni sa qai noqu tisaipeli dina; ka ko ni na kila na ka dina, ka na sereki kemuni na ka dina.”

Era sauma mai ko ira era tusaqati koya: “O i keimami na kawa i Eparaama ka sega e dua keimami a bobula kina e na dua na gauna; ko sa kaya vakacava, Dou na sereki?”

E dina ga ni ra daulewai mai vei ira na veimatanitu tani na Jiu, ia era sega ga ni via soro me ra tukuna ni nodra turaga o ira era butuki ira sobu tu. Era cata ni bau vakatokai me ra bobula. Ia sa qai dusimaka yani ko Jisu ni ra bobula dina tu. Ena sala cava? E kaya ko Jisu: “Au sa tukuna vakadodonu sara vei kemuni, ko koya ga sa i valavala ca sa bobula ki na i valavala ca.”

Nodra sega ni ciqoma na nodra bobula ki na i valavala ca e sa biuti ira na Jiu ki na dua na vanua rerevaki sara. “E na dua na vuvale, e sega ni lewe ni vuvale tu dei na bobula,” e vakamacalataka ko Jisu. “Na luve ni i taukei ni vale ga e lewe ni vuvale ko ya ka tawa mudu.” Me vaka ni sega ni tu na dodonu vua na bobula me taukena na i votavota i yau vakavuvale, sa rawa me vakasukai tani ena dua ga na gauna. Na luvena o koya ga a sucu se a susugi ka wiliki ena loma ni vuvale ena tikoga kina me “tawa mudu,” a ya ena gauna ni nona bula kece.

E tomana ko Jisu: “O koya gona kevaka sa sereki kemuni na Luvena ko ni sa na qai sereki dina sara.” Na ka dina ena sereki ira na tamata e baleti koya na Luvena, ko Jisu Karisito. Ena vuku duadua ga ni i soro ni nona bula savasava, sa rawa me sereka e dua mai na i valavala ca e dauveivakamatei. Joni 8:12-36.

▪ E vei na vanua ka veivakatavulici voli kina ko Jisu ena i kavitu ni siga? Na cava e qai yaco ena bogi mai kea, ia e laki duavata vakacava oqo kei na veivakatavulici i Jisu?

▪ Na cava e tukuna ko Jisu me baleta na vanua e lako mai kina, ia e vakatakila vakacava oqo se o cei o koya?

▪ Ena sala cava era bobula voli kina na Jiu, ia na cava na ka dina ena qai sereki ira?