Wase e 81

Sagai Tale me Vakamatei ko Jisu

ME VAKA ni donumaka na vula i liliwa, e lako voli ko Jisu ena varada e kilai ni nei Solomoni. E toka ena yasa ni valenisoro. Na vanua oqo era sa qai sosovi koya yani kina na Jiu ka vakatekivu me ra kaya vua: “A cava soti na kena dede ko laiva me vakatataro tikoga kina na loma i keimami? Kevaka sa i iko dina na Karisito, mo tukuna vakamacala vei keimami.”

E sauma ko Jisu, “Au a sa tukuna oti vei kemuni ko ni qai sega ni vakabauta.” A sega ni tukuna vakadodonu vei ira ko Jisu ni sa i koya na Karisito, me vaka na nona a tukuna vua na yalewa ni Samaria mai na tobu ni wai. Ia, a vaka ga e vakaraitaka vakadodonu se o cei o koya ena nona vakamacalataka vei ira ni a lako mai cake, ka a bula tu ni se bera ko Eparaama.

Ia, e saga ko Jisu me ra tinimaka ga vakataki ira ni o koya dina na Karisito ena nodra vakatauvatana na nona cakacaka kei na veika e sa tukuna tu mai vakailiu na i Vola Tabu me na vakayacora na Karisito. Oqori na vuna a tukuna oti kina vei ira na nona tisaipeli me ra kakua ni tukuna vua e dua ni sa i koya na Karisito. Ia oqori talega na vuna e tomana ena nona tukuna vei ira na Jiu era dau veivorati: “Na veicakacaka au a sa cakava e na yaca i Tamaqu, era sa vakadinadinataki au. Ia ko ni sega ga ni vakabauta.”

A cava na vuna era sega ni vakabauta kina? E lailai beka na i vakadinadina me vakaraitaka ni ko Jisu dina na Karisito? E sega, ia na vuna e sa qai tukuna vei ira ko Jisu ena nona kaya: “Me vaka ni ko ni sega ni noqu sipi. Era sa rogoca na noqu vosa ko ira na noqu sipi, ka’u sa kilai ira, ka ra sa muri au. Au sa solia vei ira na bula tawamudu; ka ra na sega sara ni rusa, se me dua e kaliraki ira mai ligaqu. Ni a soli ira mai vei au ko Tamaqu, o koya ka a tu vua na kaukauwa kece ga; sa sega ni dua e rawata me kaliraki ira mai na liga i Tamaqu.”

Sa qai vakamacalataka ko Jisu na nodrau veiwekani voleka kei Tamana, ena nona kaya: “Keirau sa duabau ga kei Tamaqu.” Me vaka ni tiko voli oqo ko Jisu e vuravura ka tiko mai lomalagi ko Tamana, e macala vinaka ni sega ni kaya tiko ni o koya kei Tamana e rau duabau dina vakayago. E vakaibalebaletaka ga o koya ni rau duabau ena i naki, ni rau dau duavata.

Nodra cudru ena vosa i Jisu, sa ra qai tomitomika na vatu na Jiu me ra vakamatei koya, me vaka era a vakayacora mada e liu, donumaka na Solevu ni Vale Vakacevaceva, se Vale Taba ni Kau. Ena yalodoudou sa qai vosa ko Jisu vei ira era via labati koya, ka kaya: “Au sa vakaraitaka oti vei kemuni e vuqa na cakacaka vinaka mai vei Tamaqu; e vei vei ira na cakacaka koya ko ni via vakaviriki au kina?”

Era sauma, “Keimami sega ni via vakaviriki iko e na vuku ni cakacaka vinaka ia e na nomu vosa vakacacataka ga na Kalou; kei na nomu qisi iko mo [dua na] Kalou, ni ko sa tamata ga.” Me vaka ni sega ni bau vakacavutaki koya me kalou ko Jisu, ena vuku ni cava era kaya kina vakaoqo na Jiu?

Ena vuku beka ni vakaibalebaletaka vua ko Jisu na kaukauwa era vakabauta o ira ni nona vakatabakidua ga na Kalou. Me kena i vakaraitaki mada, e kaya o koya me baleti ira na “sipi,” “au na solia vei ira na bula tawamudu,” na ka e sega ni vakayacora rawa e dua na tamata. Ia, era raibaleta na Jiu ni a sa vakadinadinataka ko Jisu ni soli mai vei Tamana na nona kaukauwa.

Na nona vakadinati koya ko Jisu ni lailai sobu mai vua na Kalou, e vakaraitaka ena nona taro: “E sega li ni volai tu ena nomuni Lawa [ena Same 82:6], ni kaya na Kalou, ko ni sa kalou? Kevaka sa vakatokai ira ko koya me ra kalou, ko ira ka tau tiko vei ira na vosa ni Kalou, . . . ko ni kaya rawa li vei koya ka lesia ko Tamaqu ka tala ki vuravura ni sa vosa vakacacataka na Kalou ena vuku ni noqu a kaya, Ko i au na Luve ni Kalou”?

Me vaka e vakatokai ira na turaganilewa tawayalododonu na i Vola Tabu ni ra “kalou,” na cala cava e rawa ni ra beitaki Jisu kina na Jiu e na nona kaya, “Ko i au na Luve ni Kalou”? Sa qai tomana ko Jisu: “Kevaka au sega ni cakava tiko na cakacaka i Tamaqu, ni kakua ni vakabauti au. Ia kevaka au sa cakava tiko, ko ni sega ni vakabauti au, ni vakadinata mada ga na noqu cakacaka mo ni kila rawa kina, ka vakadinata ni sa tiko vei au ko Tamaqu, ka’u sa tiko vei Tamaqu ko i au.”

Ena gauna e tukuna kina na veika oqo ko Jisu, era saga tale na Jiu me ra tauri koya. Ia e mani dro rawa tale, me vaka ga a vakayacora e liu ena Solevu ni Vale Vakacevaceva. Sa biuti Jerusalemi ka lako yani ki na tai kadua ni Joritani ki na vanua ka dauveipapitaisotaki kina ko Joni, volekata ni va na yabaki yani ki liu. Na vanua oqo e rairai sega soti ni yawa mai na baravi ena ceva ni Wasawasa ko Kalili, ka rairai taura e rua beka na siga na kena taubaletaki mai Jerusalemi.

Era lako mai vua e lewe vuqa ena vanua oqo ka ra kaya vua: “Sa sega ni kitaka e dua na ka-mana ko Joni: ia sa dina ga na ka kecega sa vosataka ko Joni e na vuku ni tamata oqo.” Sa yaco kina e lewe vuqa me ra vakabauti Jisu ena vanua oqo. Joni 10:22-42; 4:26; 8:23, 58; Maciu 16:20.

▪ Na sala cava e gadrevi ira kina na tamata ko Jisu me ra kila ni o koya na Karisito?

▪ E yaco vakacava me duabau ga ko Jisu kei Tamana?

▪ Ena vuku sara beka ni cava era kaya kina na Jiu ni via qisi koya ko Jisu me kalou?

▪ E vakaraitaka vakacava ko Jisu ena nona cavuqaqataka na Same ni sega ni vakadinati koya me tautauvata kei na Kalou?