Wase e 70

Vakabulai na Tamata Sucu Mataboko

NA NODRA via virilaki Jisu na Jiu, a sega ni biuti Jerusalemi sara o koya. E muri, ena Siga ni Vakacecegu, sa qai lako yani kei ira na nona tisaipeli ena loma ni koro ka ra raica e dua na tamata a sucu mataboko. Era sa qai tarogi Jisu na nona tisaipeli: “Vakavuvuli, ko cei e i valavala ca, ka mani sucu mataboko kina na tamata oqo, ko koya se ko i rau na nona qase?”

E rairai tautauvata na nodra vakabauta na tisaipeli kei na nodra qasenivuli ni lawa na Jiu, ni rawa ni i valavala ca e dua na tamata mai na kete i tinana. Ia e qai sauma ko Jisu: “E a sega ni i valavala ca ko koya oqo, se ko i rau na nona qase, ia sa mataboko ga me na vakatakilai ga kina na cakacaka yaco ni Kalou e na vukuna.” Na nona mataboko na tamata oqo e sega ni bale ki na nodratou caka cala se i valavala ca, o koya se o i rau na nona i tubutubu. Na i valavala ca i Atama na i matai ni tamata ka vakadewa me ra i valavala ca kecega na tamata, e vakavuna na bulicaki vakaca me vaka na sucu mataboko. Na bulicaki vakaca ni tamata oqo e dolava e dua na sala vei Jisu me vakaraitaka na cakacaka ni Kalou.

E vakabibitaka ko Jisu ni vakatotolotaki na veicakacaka oqo. “Sa dodonu me da cakava tiko na cakacaka i koya ka talai au mai ni se siga toka,” e kaya o koya. “Sa voleka mai na bogi, e na sega ni cakacaka rawa kina e dua na tamata. Ni’u sa tiko e vuravura, au sa rarama kei vuravura.” Ena sega ni dede sa na mate ko Jisu ka lako sobu ki na vanua butobuto ni i bulubulu na vanua ena sega ni laki cakava rawa kina e dua na ka. Ena gauna mada ga oqo e vu tiko ni rarama kei vuravura o koya.

Ni sa vosataka oti na veika oqo, sa qai kasivita na qele, ka ulia na qele ena i kasivi. Sa qai boroya kina na mata ni tamata mataboko ka kaya: “Laki tavoi e na i Silisili ko Sailoama.” Sa vakayacora vakakina na tamata. Ia ni sa muria, sa rai rawa o koya! Sa wacava na levu ni reki e tuburi koya ni sa lesu mai, na i matai ni gauna ena nona bula me qai rai rawa!

Era sa kurabui o ira era yasayasa vata ka ra kilai koya. “E sega li ni ko koya oqo na tamata ka a dau kerekere dabedabe tiko?” era taroga. “O koya dina oqo,” era sauma mai na so. Ia e so tale era sega ni vakabauta: “E segai, e vakataki koya ga.” Sa qai sauma na tamata: “Sai au ga.”

“O a qai rai rawa ga vakacava?” era via kila na tamata.

“Na tamata ka yacana ko Jisu, e ulia na qele e na kasivi, ka boroya kina na mataqu, ka kaya vei au, Lako ki Sailoama ka la’ki tavoi kina. Ia ni’u sa tavoi oti, au sa rai rawa sara.”

“Evei ko koya?” era taroga.

“Au sega ni kila,” e sauma yani.

Era sa kauti koya yani na tamata a mataboko tu e liu vei ira na nodra i liuliu vakalotu, na Farisi. Era vakatarogi koya talega ko ira oqo se rai rawa vakacava. “E a boroya na mataqu ko koya e na qele, ka’u tavoi, ka’u sa mani rai rawa,” e vakamacalataka yani na tamata vei ira.

E dodonu vakaidina me ra reki na Farisi ni sa vakabulai na daukerekere! Ia na kena veibasai sara ga, era sa qai vosa vakacacataki Jisu. “E sega ni lako mai vua na Kalou na tamata oqo,” era kaya. A cava me ra kaya kina vakaoqo? “Ni sega ni vakatabuya na Siga ni Vakacecegu.” Ia, e so tale vei ira na Farisi era vakananuma e lomadra: “E cakava rawa ga vakaevei na cakacaka mana vaka oqo e dua na tamata i valavala ca?” Sa qai tubu na veisei ena kedra maliwa.

Sa ra qai tarogi koya na tamata: “Me vaka ni a vakabulai iko ko koya mai na nomu mataboko, a cava sara mada ko kaya ko iko me baleti koya?”

“O koya e dua na parofita,” e sauma yani.

Era sega ni via vakadinata na Farisi na ka oqo. Era vakabauta ni rau a veidinadinati vuni ko Jisu kei na tamata oqo me rau lawakitaki ira kina na tamata. Me tauri rawa na kena dina, sa ra qai kacivi rau mai na i tubutubu ni tamata daukerekere me rau mai vakatarogi. Joni 8:59; 9:1-18.

▪ Na cava e vakavuna na nona mataboko na tamata o ya, ia na cava e a sega ni vakavuna?

▪ Na cava li na bogi ena sega ni cakacaka rawa kina e dua na tamata?

▪ Ni sa vakabulai na tamata, e qai vakacava na i tovo ni lomadra o ira era kilai koya?

▪ E yaco vakacava me tubu na veisei ena kedra maliwa na Farisi ni sa vakabulai na tamata?