Wase e 71

Nodra Tawavakabauta Nakita na Farisi

ERAU rere na i tubutubu ni tamata a mataboko tu e liu ni rau kacivi yani ena matadra na Farisi. E rau kila ni sa nakiti oti kevaka me tukuna e dua ni vakabauti Jisu ena vakatabui mai na valenilotu. Na nona muduki tani vakaoqori e dua mai na nona veimaliwai kei ira na so era vakaitikotiko vata ena sotavi na leqa levu, vakauasivi vua na vuvale dravudravua. E rau qaqarauni matua kina na i tubutubu.

“Oqo li na luvemudrau, ko drau kaya ni a sucu mataboko?” era taroga na Farisi. “Ia, sa qai rai rawa vakacava oqo?”

“Keirau kila ni luve i keirau oqo, ka kila tale ga ni a sucu mataboko,” e rau vakadeitaka na i tubutubu. “Ia na nona sa qai rai oqo, keirau sega ni kila. Keirau sega tale ga ni kila se ko cei ka a vakabulai koya mai na nona mataboko.” Sa na tukuna vakaidina vei rau na veika kece a yaco na luvedrau, ia e rau yaloqaseqase ena nodrau kaya na i tubutubu: “Ni tarogi koya ga. Sa tamata bula ko koya ka na rawa ni vakamacalataka ga vaka i koya.”

Ena vuku ni ka oqo, era sa qai kaciva tale mai na tamata oqo o ira na Farisi. Era tovolea ena gauna oqo me ra vakarerei koya ena nodra vakaraitaka toka ni ra sa vakasoqona vata mai na i vakadinadina me beitaki kina ko Jisu ena nona vakacalai. “Vakarokorokotaka na Kalou,” era vakarota vakaukauwa. “Keitou sa kila sa tamata i valavala ca ko koya oqori.”

E sega ni via vakalasuya na tamata a mataboko na veibeitaki, ena nona kaya: “Au sega mada ni kila se tamata i valavala ca ko koya oqo se sega.” Ia sa qai tomana: “A ka ga au kila, ni’u a mataboko e liu, ia oqo au sa rai rawa.”

Era tovolea tale me ra kunea na ka me vakacalai kina na nona i tukutuku, era baci taroga tale na Farisi: “A cava sara mada e cakava vei iko ko koya? E cakava vakacava mo rai kina?”

E kaya ena vosa kudrukudru na tamata oqo, “Au a sa tukuna oti vei kemuni ko ni qai sega ni vakarogoca. Ko ni via rogoca tale e na vuku ni cava?” Ena nona veivakadiloi, sa qai taroga na tamata oqo: “Ko ni sa via nona tisaipeli tale beka ga?”

Na i sau oqo e vakacudrui ira sara na Farisi. “O iko ga o nona tisaipeli,” era beitaki koya kina, “o i keimami na tisaipeli i Mosese. Keimami kila ni a vosa vei Mosese na Kalou. Ia, na tamata ga oqo, keimami sega ni kila se a lako mai vei.”

Nona kidacalataka, sa qai sauma yani na daukerekere yalomalumalumu oqo: “Sa qai dua na ka veivakurabuitaki oqo! O ni sega ni kila na vanua e lako mai kina ko koya, ia e qai vakabulai au ga mai na noqu mataboko!” Na cava e dodonu me tinimaki ena ka oqo? Sa qai dusimaka na ka dina oqo: “Eda kila ni sega ni dau rogoci ira na tamata i valavala ca na Kalou. E dau rogoci ira ga era dau qaravi koya ka dau cakava na lomana. Mai na i tekivu kei vuravura e sega ni sa bau rogoci mada me dua na tamata me vakabula, me rai rawa tale, na yaloka ni mata ni dua na tamata a sucu mataboko.” Sa dodonu me matata vinaka na kena macala: “Kevaka e a sega ni lako mai vua na Kalou na tamata oqo, ke a sega ni rawata e dua na ka.”

Era sega ni sauma rawa na Farisi na i le matata ka dodonu oqo. E sega ni ra ciqoma rawa na ka dina oqo, sa ra qai vosacataki koya na tamata: “O iko o a sucu tu mai e na i valavala ca; o qai mai via vakatavulici keimami?” Sa ra qai cemuri koya na tamata oqo, rairai beka ena nodra vakatabui koya mai na valenilotu.

Ni sa rogoca ko Jisu na veika era cakava, sa qai qarai koya na tamata oqo ka kaya vua: “Ko sa vakabauta li na Luve ni Kalou?”

E sauma na mataboko ka daukerekere e liu, ka vaka: “Ko cei ko koya, Turaga, me rawa ni’u bau vakabauti koya?”

“Sa i koya ko drau sa veivosaki vata tiko,” e sauma yani ko Jisu.

Ena gauna vata ga o ya, sa qai cuva na tamata vei Jisu ka kaya: “Turaga, au sa vakabauta.”

Sa qai vakamacalataka ko Jisu: “Au sa lako mai oqo ki vuravura me’u veilewai, a ya me ra rai ko ira era sega tu ni rai, ka me ra mataboko ko ira ka rai.”

O ira na Farisi ka ra vakarorogo tiko era qai taroga: “Keitou sa mataboko tale beka ga ko i keitou?” Kevaka era vakadinata ni mataboko nodra vakasama, ena rawa ni vakaulubaletaki na nodra tusaqati Jisu tiko. Me vaka e qai tukuna vei ira ko Jisu: “Kevaka dou a mataboko ke a sega na nomudou cala.” Ia, ena kaukauwa ni lomadra era tukuna tikoga ni sega ni ra mataboko ka ra sega ni gadreva na veivakararamataki vakayalo. Sa qai kaya gona ko Jisu: “Oqo ni dou sa kaya, Sa rai na mata i keitou e sa tiko ga kina na nomudou cala.” Joni 9:​19-41.

▪ E rau rere ena vuku ni cava na i tubutubu i koya a mataboko tu e liu ni rau sa kacivi mai me rau mai tu ena matadra na Farisi, ia e vakacava na i valavala ni nodrau qaqarauni matua ena saumi taro?

▪ Era vakarerei koya vakacava a mataboko tu e liu na Farisi?

▪ Na i le cava e kauta cake mai na tamata ka vakacudrui ira na Farisi?

▪ Ena vuku ni cava e sega kina na nodra ulubale na Farisi ena nodra tusaqati Jisu?