Wase e 84

Na iColacola me Dua e Mai Tisaipeli

NI SA biuta mai ko Jisu na nona vale na Farisi kilai ka rairai lewe ni Sanadrini, sa tomana sara yani o koya na nona i lakolako vaka ki Jerusalemi. E lewe vuqa sara era muri koya yani. Ia a cava mada na i naki ni lomadra? Na cava sara mada e vauci ena nona yaco e dua me nona i muri dina?

Ni ra sa lako tiko, e qai vuki yani ko Jisu vei ira na lewe vuqa ka rairai era kidacalataka ena nona kaya: “Kevaka e dua sa lako mai vei au ka sega ni cata na tamana, kei tinana, kei na watina, kei ira na luvena, kei ira na tuakana kei na tacina, kei ira na ganena kei na nona bula tale ga, e na sega ni rawa me noqu tisaipeli.”

Na cava mada e vakaibalebaletaka tiko ko Jisu? E sega ni kaya tiko e ke ko Jisu vei ira na nona i muri me ra cati ira dina na wekadra vakayago. Ia na kena i balebale dodonu, a ya me lailai na nodra lomani ira, me ra lomani Jisu vakalevu cake. Na i tubutubu i Jisu ko Jekope e tukuni ni “cati” Lia ka lomani Rejeli, na kena i balebale ni lailai nona lomani Lia ni veiduitaitaki vata kei Rejeli na tacina.

Me nanumi talega, ni a kaya ko Jisu ni gadrevi vua e dua e nona tisaipeli me cata “na nona bula.” E vakaibalebaletaka tale e ke ko Jisu ni tisaipeli dina e dodonu me lomani Koya vakalevu mai na nona lomana na nona bula. E vakabibitaka e ke ko Jisu ni sa i lesilesi bibi dina me dua e mai nona tisaipeli. E sega kina ni dodonu me caka oqo ni se bera mada ni bau vakasamataki vinaka e liu.

Ena sotava na veika dredre kei na veivakacacani o ira era tisaipeli i Jisu, me vaka e qai vakatakila: “O koya tale ga e sega ni colata na nona kau ni veivakararawataki ka muri au, e na sega ni rawa me noqu tisaipeli.” Sa dodonu vua na tisaipeli dina me na tu vakarau me sotava na veivakalialiai a vosota ko Jisu, ka okati sara ga kina na nona rawa ni mate ena ligadra na meca ni Kalou, ka sa voleka ni sotava oqo ko Jisu.

Ena vuku ni ka o ya, na nona yaco e dua me tisaipeli i Karisito e vinakati kina vei ira na lewe vuqa era muri koya yani me ra vakasamataka matua sara. Sa qai vakabibitaka na dina ni ka oqo ko Jisu ena dua na vosa vakatautauvata. E kaya o koya, “Ko cei vei kemuni e via tara e dua na vale cecere, me na sega ni tiko sobu mada e liu ka cakacakataka na kena i sau, se na rauta na ka e tu vua me vakaotia kina se sega? De lakolako e na qai cakava rawa wale ga na kena yavu ka sa oti na i lavo. Era na qai vakalialiai koya ko ira kecega ka raica, ka ra kaya, E a tekivu tara vale na tamata oqo, ia sa sega ni rawa ni vakaotia.”

O koya oqo, sa vakaraitaka tiko ko Jisu vei ira na lewe vuqa era muri koya yani, ni se bera ni ra mai nona tisaipeli, sa dodonu me ra nakita dei e lomadra ni ra na vakayacora rawa na veika era sa lalawataka, me vakataki koya ga na tamata e via tara e dua na vale cecere, ni bera ni tekivuna, me kila deivaki mada ni tu vua na veika e gadrevi me tara vakaoti kina. E tomana ko Jisu ena nona tukuna e dua tale na vosa vakatautauvata:

“Se ko cei na tui e la’ki vala kaya e dua tale na tui, me na sega ni tiko sobu mada e liu ka vakasamataka, se sa na rawa vua kei na nona lewe tini na udolu, me ra vala kaya na nona meca kei na nona ruasagavulu na udolu se sega? Ia kevaka e sega, e na tala ko koya e dua na mata ni sa yawa sara yani ko koya ka dua, me vakamasuta me rau veisaututaki.”

Sa qai vakabibitaka ko Jisu na tikina e kauta cake mai ena nona vosa vakatautauvata e rua oqo, ka kaya: “O koya gona e na sega kina ni rawa me noqu tisaipeli e dua vei kemuni kevaka e sega ni biuta tani na veika kece e tu vua.” Sa i koya oqori na ka me ra lomasoli ni cakava o ira era a muri koya tiko ka vakakina o ira kece era vulici Karisito. Sa dodonu me ra tu vakarau me ra cabora na veika kece e tu vei ira​—⁠na nodra i yau kece, okati talega kina na bula⁠—​kevaka me ra mai nona tisaipeli. O tu vakarau li mo vakayacora na veika oqo?

“E ka vinaka na masima,” e tomana nona vosa ko Jisu. Ena nona i Vunau mai na Ulunivanua, e kaya o koya ni o ira na nona tisaipeli era “masima kei vuravura,” sa kena i balebale ni tu vei ira na i gu me ra taqomaka na tamata, me vaka ga na masima e daumaroroya na kakana me tu dede. “Ia kevaka sa seavu mai na masima e na kena tuituina, e na qai vakatuituinataki tale e na cava? Sa na qai sega ni yaga e na dua na ka,” sa qai tinia ko Jisu. “Ka ra sa na biuta tani ga na tamata. O koya e vakadaligana me rogo kina, me rogoca sara.”

E vakaraitaka gona ko Jisu ni ko ira era sa mai nona tisaipeli tiko ena loma ni dua na gauna me ra kakua ni malumu sobu ena nodra nakita dei e lomadra me ra toso tikoga ki liu. Ke na yaco me ra na vakakina, era na tawayaga sara, era na ka ni veivakalialiai ki na vuravura oqo ka sega ni vakadonui ena mata ni Kalou, ena yaco me vosa vakacacataki kina na Kalou. O koya gona, me vaka na masima sa takali mai na kena kaukauwa, ka vakadukadukalitaki, era na qai biu tani yani ki tautuba, io me ra vakarusai. Luke 14:25-35; Vakatekivu 29:30-33; Maciu 5:13.

▪ Na cava na kena i balebale mo “cati” ira na wekamu kei na nomu cati iko?

▪ Na vosa vakatautauvata cava e rua ka solia ko Jisu, ia na cava e rau vakaibalebaletaka?

▪ Na tikina bibi cava ka mai tinia ko Jisu ena nona i vakamacala me baleta na masima?