Wase e 89

iLakolako ni Veivakacegui ki Jutia

ENA vica na macawa sa oti, ena gauna sa caka kina na Solevu ni Vakatabui mai Jerusalemi, era a saga na Jiu me ra vakamatei Jisu. Sa qai lako yani ena nona i lakolako vaka ki na vualiku, rairai na vanua ka sega ni yawa sara mai na Wasawasa ko Kalili.

A se qai lako ga yani vaka ki na ceva ki Jerusalemi, ka vunau voli ena nona i lakolako ena veikorokoro mai Peria, e dua na yasana ka koto mai na tokalau ni Uciwai na Joritani. Ni tukuna oti nona vosa vakatautauvata me baleta na vutuniyau kei Lasarusa, sa qai tomana nona vakatavulici iratou na nona tisaipeli ena veika a vakatavulica ena dua na gauna e liu ena nodratou a tiko voli mai Kalili.

Me kena i vakaraitaki a kaya o koya, ni na vinaka cake vua e dua na tamata “kevaka e a vakarubeci e domona e dua na vatuiqaqi levu, ka biu ki wasawasa” mai na nona vakatarabetaka “e dua vei ira na lalai” ni Kalou. A vakabibitaka talega o koya ni gadrevi na veivosoti, sa qai vakamacalataka: “Kevaka sa cala vakavitu vei iko [na tacimu] e na siga e dua, ka saumaki vakavitu vei iko, ka kaya, Au sa veivutuni; kakua ni cudruvi koya.”

Ni ratou kerea gona na tisaipeli, “Ni vakalevutaka na neitou vakabauta,” sa qai sauma ko Jisu: “Kevaka e tu vei kemudou na vakabauta lailai sara me vaka na sore ni musita, e rawa mo dou kaya ki na vuni lolo oqo, Cavu i vuvu mai, ka la’ki tei e na loma ni wasawasa, e na talairawarawa vei kemudou.” Sa vakatalega kina na vakabauta lailai e rawa ni vakayacora na ka vakaitamera.

E talanoataka tarava ko Jisu na i tuvaki e vaka sara ga na kena e dauyaco dina e vakaraitaka mai na i tovo ni rai e dodonu me dautiko vua na tamata ni Kalou kaukauwa duadua. E kaya ko Jisu: “E na dua beka vei kemudou e siviyara tiko na nona tamata, se vakatawa sipi, e na kaya vua ni sa lesu mai e na cakacaka, Lako sara mai, ka dabe mo kana! E na sega beka ni kaya vua, Vakarautaka na qau i vakayakavi, vauca na wa ni tolomu, ka qaravi au me’u kana mada ka gunu, ka oti ko na qai kana ka gunu? E na vakavinavinaka li ko koya vua na tamata koya ni sa vakayacora na ka e vakaroti vua? Me vaka tale ga kina ko i kemudou, ni dou sa vakayacora na ka kece ga ka a vakaroti vei kemudou, dou kaya, E sega na ka keitou uasivi cake kina ko i keitou mai vei ira na kena vo ni tamata; ni keitou sa vakayacora ga na ka sa neitou i tavi me keitou cakava.” Sa vakakina o ira na dauveiqaravi ni Kalou me ra kakua ni nanuma ni ra sa vakayacora tiko vua na Kalou na veivuke ena nodra qaravi koya. Ia, e dodonu ga me ra daunanuma tiko ni dua na cakacaka lavotaki dina na nodra dausokalou tiko vua me vaka ni ra lewe ni nona vuvale yalodina.

Rairai sega soti ni dede mai na nona tukuna na vosa vakatautauvata oqo ko Jisu ni a qai yaco mai e dua na daukauitukutuku. A talai koya mai ko Meri kei Marica, oi rau na ganei Lasarusa, eratou tiko voli mai Pecani e Jutia. “Turaga, raica, ko koya ko sa lomana sa tauvi-mate,” e tukuna na daukauitukutuku.

Sa qai sauma ko Jisu: “Ena sega ni ciba e na mate oqo ko koya, ia ena vakarokorokotaki kina na Kalou, ena vakarokorokotaki talega kina na Luve ni Kalou.” Ni oti e rua na siga nona tiko voli ga e kea, sa qai kaya vei iratou na nona tisaipeli ko Jisu: “Me da lako tale ki Jutia.” Ia, eratou qai tukuna lesu vua: “Vakavuvuli, ena dua wale ga na gauna e sa qai oti oqo era a via vakaviriki kemuni ko ira na Jiu; ia mo ni sa baci lako tale kina?”

“E sega li ni tinikarua na aua e na dua na siga?” e taroga ko Jisu. “Kevaka e lako e dua na tamata e na loma ni siga, e na sega ni tarabe, ni sa raica tiko na rarama ni vuravura oqo. Ia kevaka e lako e dua e na bogi, e na tarabe, ni sega ni tiko vua na rarama.”

Rairai e vakaibalebaletaka tiko ko Jisu ni “aua e na dua na siga,” se gauna e yalana na Kalou me vakayacora voli kina ko Jisu na nona cakacaka vakaitalatala e vuravura e se vo tu, ena sega kina ni vakamavoataki koya rawa e dua na tamata vakavo ga ke sa oti oqori. Sa gadreva o koya me vakayagataka vinaka sara na gauna lekaleka ena “loma ni siga” e se vo tiko vua, ni oti oqori ena qai yaco mai na “bogi” era na qai vakamatei koya kina na nona meca.

Sa qai vakuria ko Jisu: “Sa moce na wekada ko Lasarusa; ia ka’u sa lako me’u vakayadrati koya.”

Ena nodra rairai nanuma ni moce tu ga ko Lasarusa ka i vakatakilakila dina oqo ni rawa me bula vinaka cake tale, era qai sauma na tisaipeli: “Turaga, kevaka e moce wale ga, ia e na bula vinaka tale.”

Sa qai tukuna vakamacala vei ira ko Jisu: “Sa mate ko Lasarusa: ia ka’u sa reki e na vukumudou ni’u a sega ni tiko kina, mo dou vakabauta; ia me da lako ga vua.”

Ni kila ko Tomasi ni rawa me vakamatei mai Jutia ko Jisu, ia e gadreva ga me tokoni koya, sa qai uqeti ira kina na nona i tokani tisaipeli: “Me da lako talega, me da mate vata kaya.” E dina ni na rawa ni vakaleqai kina na nodra bula, ia era tomani Jisu yani na tisaipeli ena i lakolako ni veivakacegui oqo ki Jutia. Luke 13:22; 17:1-10; Joni 10:22, 31, 40-42; 11:1-16.

▪ A se qai vunau oti ga mai vei ko Jisu?

▪ Na veivakavuvuli cava e cavuta tale ko Jisu, ia na i tuvaki cava e vaka sara ga na kena e dauyaco dina e vakamacalataka o koya, ia me vakaraitaka na tikina bibi cava?

▪ Na i tukutuku cava e vakasavui vei Jisu, ia na cava e vakaibalebaletaka o koya ena “loma ni siga” kei na “bogi”?

▪ Na cava e vakaibalebaletaka ko Tomasi ena gauna e kaya kina, “Me da lako talega, me da mate vata kaya”?