“Se Sega ni Yaco Mai na Nona Gauna”

“E a sega ga ni bau dua e tarai koya, ni a se sega ni yaco mai na nona gauna.”​—JONI 7:​30, VV.

1. E vakatau ena rua na ituvaki cava na cakacaka a mai cakava o Jisu?

“ME VAKA sa sega ni lako mai na Luve ni tamata me qaravi, ka me dauveiqaravi ga, ka me solia na nona bula me kedrai voli e lewe vuqa,” e kaya o Jisu Karisito vei iratou nona yapositolo. (Maciu 20:28) E tukuna vua na kovana ni Roma o Ponitio Pailato: “A ka oqo ka’u sa sucu mai kina, ia na ka oqo ka’u sa lako mai kina ki vuravura oqo, meu dautukuna na ka dina.” (Joni 18:37) A kila vinaka tu o Jisu na vuna me mai mate kina kei na cakacaka e dodonu me cakava ni se bera ni mate. E vaka kina nona sa kila tu na gauna e se vo me vakacavara kina na nona itavi. Na nona ilesilesi ni Mesaia e vuravura e tolu veimama ga na yabaki. A tekivu ena nona papitaiso ena uciwai na Joritani (ena 29 S.K.), ena itekitekivu ni ika70 ni wiki ivakatakarakara sa vosa ni yalayalataki oti, e qai cava ena nona mate ena kaunirarawa ena veimama ni wiki (ena 33 S.K.). (Taniela 9:​24-​27; Maciu 3:​16, 17; 20:​17-​19) E vakatau gona ena rua na ituvaki na cakacaka kece i Jisu ena nona mai bula e vuravura: na kena inaki kei na loma ni gauna me vakayacora kina.

2. E volatukutukutaki vakacava o Jisu Karisito ena Kosipeli, qai vakaraitaka vakacava o koya ni kila vinaka tu na ka e talai mai kina?

² E volatukutukutaki ena Kosipeli ni turaga dauyavala o Jisu Karisito ni vakalakova na vanua o Palesitaina, ena nona kacivaka voli na itukutuku vinaka ni Matanitu ni Kalou kei na nona vakayacora e vuqa na cakacaka veivakurabuitaki. E vakamacalataki ena itekitekivu ni nona cakacaka vagumatua vakaitalatala: “Se sega ni yaco mai na nona gauna.” E kaya sara ga vakataki koya o Jisu: “Sa sega ni yaco sara mai na noqu gauna.” Ia ni sa voleka ni mai cava na nona ilesilesi vakaitalatala sa qai vakayagataka kina o koya na matavosa “sa qai yaco mai na gauna.” (Joni 7:​8, 30, VV; 12:​23, VV) E vakayacoka vei Jisu na ka e cakava se tukuna ni kila vinaka tu na veitaravi ni veika me caka, se na gauna me cakava kina na nona ilesilesi, wili kina na nona mai mate vakaisoro. Nida kila na vuna sa na qai matata kina vei keda se mataqali tamata sara mada vakacava o koya kei na ivakarau ni nona vakasama, me na vukei keda meda “muria [sara vakavoleka] na we ni yavana.”​—1 Pita 2:​21.

Dei me Cakava na Loma ni Kalou

3, 4. (a) Na cava e yaco ena dua na soqo ni vakamau mai Kena? (b) Na cava a saqata kina na Luve ni Kalou na vakatutu nei Meri me cakava o koya e dua na ka ni sa oti koso na waini, na cava eda vulica rawa kina?

³ Donuya oqo na yabaki 29 S.K. E se qai oti ga e vica na siga mai na nona digitaki iratou na imatai ni nona tisaipeli o Jisu. Eratou lako kece ina koro o Kena ena vanua o Kalili ena dua na soqo ni vakamau. E tiko tale ga ena soqo oqo o Meri na tina i Jisu. Sa oti koso na waini. Ena nona vakatura me cakava kina e dua na ka e qai kaya o Meri vei luvena: “Sa oti vei ira oqo na waini.” Sa qai sauma o Jisu: “A cava e mai nodaru kina, nau? E se bera ni yaco mai na noqu gauna.”​—Joni 1:​35-​51, VV; 2:1-4, VV.

⁴ Na nona sauma o Jisu, “A cava e mai nodaru kina, nau?” e dua na ivakarau ni vosa ni gauna oya e vakaraitaka ni sega ni vakadonui na ka e vakaturi. Na cava a saqata kina o Jisu na vakatutu nei Meri? Sa yabaki 30 oqo o Jisu. E se qai papitaiso ga ena vica na macawa yani i liu, a lumuti kina ena yalo tabu, qai vakamacalataki koya o Joni na dauveipapitaiso me “Lami ni Kalou, o koya sa kauta tani na nodra i valavala ca na kai vuravura!” (Joni 1:​29-​34, VV; Luke 3:​21-​23) O koya gona sa na qai vakarorogo ga oqo ina nona ivakaro na Turaga Levu Duadua o koya a talai koya mai. (1 Korinica 11:3) E sega ni dua, wili kina o iratou na lewe ni nona vuvale, e vakatarai me vakataotaka na cakacaka i Jisu e vuravura. E vakaraitaka na isau ni taro i Jisu vei Meri na nona dei me cakava tiko ga na loma i Tamana! Meda vaka mada ga kina o keda ena noda dei ni vakayacora na noda “[i]tavi taucoko” vua na Kalou.​—Dauvunau 12:13.

5. Na cakamana cava a vakayacora mai Kena o Jisu Karisito, e vakayacoka vakacava vei ira na tani?

⁵ Ni siqema rawa o Meri na ibalebale ni vosa i luvena, sa mani vagalala kina qai vakasalataki ira na dauveivukei: “Na ka kece ga e kaya vei kemudou ko koya, dou cakava.” E qai walia na leqa oya o Jisu. Sa qai kaya vei ira na dauveivukei mera vakasinaita na saqa ena wai, qai vukica o koya na wai me waini vinaka dina. Oqo na itekitekivu ni cakamana i Jisu, sa ivakadinadina ni vakayacoka tiko vua na kaukaua ni yalo tabu ni Kalou. E vaqaqacotaka na nodra vakabauta na nona tisaipeli vou na cakamana oqo.​—Joni 2:​5-​11, VV.

Gumatuataka na Vale i Jiova

6. Na cava e raica ena valenisoro mai Jerusalemi o Jisu e vakavuna na nona yalokatakata, na cava e qai cakava kina?

⁶ Sa vulaitubutubu ni yabaki 30 S.K., eratou sa gole o Jisu kei iratou na nona ilawalawa i Jerusalemi ina solevu ni Lakosivia. Eratou raica e kea na tisaipeli ni duatani na ivukivuki ni nodratou iLiuliu mai na nodratou kilai koya. Era volitaki manumanu ni vakacaboisoro ena loma sara ga ni valenisoro o ira na dauveivoli Jiu lomakocokoco. Era qai lavaka na ilavo levu mera sauma na Jiu yalodina. Sa qai yavala o Jisu ni sa curumi koya na yalokatakata. E cakava e dua na kuita wa qaliqali qai cemuri ira kina na dauveivoli. E sovaraka na nodra ilavo na dauveisauilavo qai vukica na nodra teveli. “Kauta tani na veika oqo” e vakaroti ira na volitaki ruve tiko. Ni ratou raica na tisaipeli na nona yalogu, eratou sa qai nanuma na parofisai a volai tu me baleta na Luve ni Kalou: “Sa kani au na loloma katakata ki na nomuni vale.” (Joni 2:​13-​17; Same 69:9) Meda yalogu tale ga vaka oya o keda me kua ni vakadukadukalitaka na noda sokalou na ivalavala kei vuravura.

7. (a) Na cava e uqeti Nikotimo me lai sikova kina na Mesaia? (b) Na cava eda vulica ena nona soli ivakadinadina o Jisu vua e dua na yalewa ni Samaria?

⁷ A vakayacora o Jisu e levu na cakacaka veivakurabuitaki ena nona tiko voli e Jerusalemi, era vakabauti koya kina e vuqa na tamata. A dokai Jisu sara mada ga vakalevu o Nikotimo, e dua na lewe ni Sanadrini, se na mataveilewai levu vakajiu, e qai sikovi koya ena bogi ena nona via lai kila tale e so na ka. E mani tiko o Jisu kei iratou na nona tisaipeli ena “vanua o Jutia” me rauta ni walu na vula, ena nodratou vunau voli qai vakayaco tisaipeli. Eratou qai biuti Jutia me ratou gole i Kalili ena gauna sa vesu kina o Joni na Dauveipapitaiso. Ena nodratou takosova na vanua o Samaria, e qai sotava kina o Jisu e dua na ituvaki veiganiti me soli ivakadinadina vinaka sara kina vua e dua na yalewa ni Samaria. Oqo e dolava na sala mera vakabauta kina e vuqa na kai Samaria. Meda dau tu vakarau tale ga o keda ena noda soli ivakadinadina me baleta na Matanitu ni Kalou ena gauna veiganiti.​—Joni 2:​23; 3:​1-​22; 4:​1-​42; Marika 1:​14.

Roboti Kalili Nona Cakacaka ni Veivakavulici

8. Na cakacaka cava a tekivutaka mai Kalili o Jisu?

⁸ Ni se bera na “gauna” ni mate i Jisu, sa bau levu dina na ka me cakava ena vuku ni cakacaka i Tamana vakalomalagi. E tekivutaka e Kalili na cakacaka vakaitalatala levu sara ni vakatauvatani kei na kena a cakava mai Jutia kei Jerusalemi. Sa qai veilakoyaki voli “e Kaleli taucoko ko Jisu, ka veivakatavulici e na nodra veivalenilotu, ka vunautaka na i Tukutuku Vinaka ni matanitu, ka vakabulai ira na tamata mai na veimate kece ga kei na malumalumu kece ga.” (Maciu 4:​23, VV) E kuruseta na vanua oya na nona vosa veivakauqeti: “Mo ni veivutuni ni sa voleka na matanitu vakalomalagi.” (Maciu 4:​17, VV) Ni oti ga e vica na vula, ena nodrau mai vaqaqa e rua na tisaipeli i Joni na Dauveipapitaiso na itukutuku matata kei Jisu, e qai kaya vei rau: “Drau lako, ka tukuna vei Joni na veika drau sa raica ka rogoca; ni ra sa rai na mataboko, sa lako na lokiloki, sa vakasavasavataki na vukavuka, sa rogo na didivara, sa vakaturi cake tale na mate, sa vunautaki nai tukutuku-vinaka vei ira na dravudravua: a sa kalougata ko koya ena sega ni tarabe e na vukuqu.”​—Luke 7:​22, 23.

9. Na cava era tabili yani kina vei Jisu Karisito na lewe vuqa, na lesoni cava e rawa nida vulica mai kina?

⁹ ‘A sa rogovaki yani na itukutuku kei Jisu ena veivanua kece e tu vakavolivolita,’ era lewe vuqa sara sa muri koya mai Kalili, kei Tikapoli, kei Jerusalemi, kei Jutia, kei na tai kadua ni uciwai na Joritani. (Luke 4:​14, 15, VV; Maciu 4:​24, 25) Era tabili yani vua, sega ni baleta wale ga na nona veivakabulai vakacakamana, ena vuku tale ga ni veivakurabuitaki ni nona veivakavulici. E rogo vinaka qai veiuqeti na nona ivakamacala. (Maciu 5:1–​7:​27) E tauci ena loloma na vosa i Jisu. (Luke 4:​22, VV) Era sa “qoroqoro sara na lewe vuqa e na nona i vakavuvuli,” ni vakamacala tiko mai na iVolatabu me vaka e dua sa nona na lewa. (Maciu 7:​28, 29, VV; Luke 4:​32, VV) O cei me na sega ni rawai ena mataqali veivakavulici vaka oya? Meda vakamatautaki keda mada ga ena iwalewale ni nona veivakavulici me rawa nida rawai ira na tamata ina ka dina.

10. Na cava era via vakamatei Jisu kina na kai Nasareci, ia era guce ga ena vuku ni cava?

¹⁰ Ia, e sega ga ni o ira kece na rogoci Jisu era vakabauta. Ena itekitekivu mada ga ni nona cakacaka vakaitalatala ena valenilotu ni nona koro o Nasareci, era sasagataka e so mera vakamatei koya. Dina ga nira qoroya na lewenikoro na nona “vosa vinaka,” era via raica ga na nona cakamana. A sega ni via cakava e kea o Jisu e vuqa na cakamana veivakurabuitaki, ia, e vakavotuya ga na nodra yalokocokoco kei na lailai ni nodra vakabauta. E sa qai curumi ira na cudru na tiko oya e valenilotu, era tu mera vesuki Jisu, era via biligi koya mai barinisavu. Ia a mani dro bula rawa qai lako yani vakatikitiki. E se bera ni yaco mai na nona “gauna” me mate kina.​—Luke 4:​16-​30.

11. (a) Na cava era mai rogoci Jisu kina e so na iliuliu ni lotu? (b) Na cava e beitaki kina o Jisu ni beca na lawa ni Siga ni Vakacecegu?

¹¹ O ira na iliuliu ni lotu​—na vunivola, na Farisi, na Setoki kei ira tale na so​—era dau tiko tale ga ena veivanua e dau vunau voli kina o Jisu. E sega ni inaki ni nodra muri koya voli e vuqa mera vuli mai vua, ia era via vaqara cala ga ra qai tovolea mera viria na kena dai. (Maciu 12:38; 16:1; Luke 5:​17; 6:​1, 2) Me kena ivakaraitaki, ena nona lako yani i Jerusalemi o Jisu ina solevu ni Lakosivia ena 31 S.K., a vakabula kina e dua a tauvimate tu ena loma ni 38 na yabaki. Era beitaki Jisu kina na iliuliu ni lotu Jiu ni beca na lawa ni Siga ni Vakacecegu. E qai kaya kina: “Sa cakacaka tikoga ko Tamaqu, koi au talega, au sa cakacaka.” Era sa qai beitaki koya na Jiu ni vosa vakacacataka na Kalou ena nona kaya ni o koya na Luve ni Kalou, e Tamana na Kalou. Era via vakamatei Jisu, ia e mani biuti Jerusalemi kina o koya kei iratou nona tisaipeli me ratou gole yani i Kalili. Meda vaka tale ga kina o keda, meda kua ni dauveileti kei ira na dauveitusaqati nida vunautaka voli na Matanitu ni Kalou kei na noda vakayaco tisaipeli.​—Joni 5:​1-​18; 6:1.

12. E vakacava na levu ni cakacaka e cakava mai Kalili o Jisu?

¹² E vunau voli ga o Jisu e Kalili ena loma ni dua veimama na yabaki e tarava, qai dau lako ga i Jerusalemi me tikova na tolu na nodra solevu vakayabaki na Jiu. E tolu taucoko na nona ilakolako vakadaukaulotu e Kalili: na imatai ena nodratou salavata kei na le va na nona tisaipeli vou, na ikarua ni ratou salavata kei na nona yapositolo le 12, kei na kena e rabailevu sara ena nona talai iratou yani na nona yapositolo ni sa vakavulici iratou oti. E robota na vanua o Kalili na ivakavuvuli ni ka dina ena vuku ni ivakadinadina levu e caka kina!​—Maciu 4:​18-​25; Luke 8:​1-3; 9:​1-6.

Vunau Ena Yalodoudou e Jutia Kei Peria

13, 14. (a) Donuya na gauna cava era a via vesuki Jisu kina na Jiu? (b) Na cava ga era sega ni vesuki Jisu rawa kina na ovisa?

¹³ Sa vulaitubutubu ni yabaki 32 S.K., e se bera ga ni yaco mai na “gauna” i Jisu. Sa voleka na solevu ni Vale Vakacevaceva. Eratou uqeti Jisu na tacina vakacabecabe: “Lako tani e ke, ka lako ki Jiutia.” Eratou vinakata me lai cakava o Jisu na cakamana veivakurabuitaki vei ira na lai tikova na solevu e Jerusalemi. Ia, sa kila vinaka tiko o Jisu na leqa ena yaco kina. E qai kaya vei iratou na tacina: “Au na sega mada ni lako ki na Solevu oqo; ka ni sa sega ni yaco sara mai na noqu gauna.”​—Joni 7:​1-8, VV.

¹⁴ A mani tiko tale vakalailai e Kalili o Jisu, oti sa qai “lako vakavuni ga” i Jerusalemi. Era qai vakasaqarai koya dina na Jiu ena gauna ni solevu, era taroga: “E vei mada ko koya?” Ni sa vakacagau tiko na solevu, e qai curu ina valenisoro o Jisu me tekivu veivakavulici ena yalodoudou. Era qai via vesuki koya, ena nodra via biuti koya e valeniveivesu se mera vakamatei koya. Ia, era sega ni rawati koya rawa me vaka ni ‘se sega ni yaco mai na nona gauna.’ E le levu era sa qai vakabauti Jisu kina. O ira mada ga na ovisa era a talai mai vei ira na Farisi mera lai vesuki koya, era qai lesu lala, era qai kaya: “E sega ni se bau dua na tamata e vosa me vaka na tamata ko ya.”​—Joni 7:​9-​14, 30-​46, VV.

15. Na cava era via vakaviriki Jisu kina ena vatu o ira na Jiu, kei na cakacaka vakavunau vakaitamera cava e qai tuvanaka tarava?

¹⁵ Ni vakacagau tiko na solevu, era saqati Jisu tiko ga o ira na Jiu era kena meca ena nona vakatavuvulitaki Tamana tiko e valenisoro. Ena iotioti ni siga ni solevu, era qai via vakaviriki Jisu ena vatu o ira na Jiu ena nodra katakatataka na nona tukuna ni a bula tu e liu ni se bera ni mai sucu vakatamata. Ia e vunitaki koya o Jisu era qai sega ni tarai koya rawa. (Joni 8:​12-​59) E mani tiko voli ga ena saula kei Jerusalemi o Jisu, sa qai tosoya kina e dua na cakacaka vakavunau vakaitamera e Jutia. E digitaka e 70 na nona tisaipeli, ia ni sa vakavulici ira oti, sa qai talai ira yarurua yani ina yalava ni vunau. Era liu yani ena veivanua kei na veikoro kece sa tuvanaka tu o Jisu me qai muria yani kei iratou na nona yapositolo.​—Luke 10:​1-​24.

16. Na ituvaki leqataki cava a drotaka rawa o Jisu ena solevu ni Vakatabui ni Valenisoro, na cakacaka cava sa baci vakaogai koya tale kina?

¹⁶ E sa vulaililiwa ni yabaki 32 S.K., sa qai roro mai na “gauna” i Jisu. E lako i Jerusalemi me baleta na solevu ni Vakatabui ni Valenisoro. Era se vaqarai koya voli ga na Jiu mera vakamatei koya. Era wavoliti koya e loma ni valenisoro donuya na varada nei Solomoni. Era baci via vakaviriki koya ena vatu ena nodra beitaki koya tale ni vosavakacacataka na Kalou. Ia e dro rawa o Jisu me vaka ga ena vica na gauna e liu. Sega ni dede sa baci tomana tale na nona vunau voli, oqo ena veikorolelevu kei na veikorolalai ena vanua o Peria, ena taikadua ni Joritani veibasai kei Jutia. E levu era vakabauti koya mai kea. Ia na itukutuku vakatotolotaki baleta na nona itokani vakamareqeti o Lasarusa e kauti koya lesu tale ina vanua o Jutia.​—Luke 13:33; Joni 10:​20-​42, VV.

17. (a) Na itukutuku vakatotolotaki cava e yaco yani vei Jisu ena nona vunau voli e Peria? (b) Na cava e vakaraitaka ni kila vinaka tu o Jisu na ka me na cakava kei na gauna me cakava kina?

¹⁷ Erau a vakauta mai na ganei Lasarusa, o Marica kei Meri, mai Pecani e Jutia na itukutuku vakatotolotaki oya. “Turaga, sa tauvimate ko koya ko ni sa dau lomana,” e kaya o koya na italai. “E na sega ni mate ko koya e na nona tauvimate oqo,” e sauma o Jisu, “ia e na vakalagilagi ga kina na Kalou, me qai vakalagilagi kina na Luve ni Kalou.” Me na rawa ni vakayacori na inaki oqo, sa qai nakita o Jisu me tiko tale mada ena vanua oya me siga rua. E qai tukuna vei iratou na nona tisaipeli: “Me datou lako tale mada ki Jiutia.” Eratou sega ni duavata kina ratou qai vakasalataki koya: “Vakavuvuli, e na dua wale ga na gauna e sa qai oti oqo era a via vakaviriki kemuni ko ira na Jiu; ia mo ni sa baci lako tale kina?” Ia e kila vinaka tu o Jisu ni sa voleka ni cava na vo ni “loma ni siga” e yalataka vua na Kalou ena nona cakacaka vakaitalatala e vuravura. E dei vinaka sara tu ga o koya ena ka me cakava kei na vuna me cakava kina.​—Joni 11:​1-​10, VV.

Na Cakamana Kilai Levu

18. Na cava sa vakayacori tiko e Pecani ni sa yaco yani kina o Jisu, na cava e qai yaco tarava?

¹⁸ E mai tavaki Jisu o Marica ena nona tadu yani i Pecani, e kaya sara vua: “Turaga, kevaka ko ni a tiko e ke, ke a sega ni mate na ganequ.” E qai muri mai o Meri kei ira kece era tiko ena nodratou vale. Era sa tagi kece ga. “E vei na vanua ko ni buluti koya kina?” e taroga o Jisu. Era sauma: “Turaga, ni mai raica.” Nira sa yaco ina ibulubulu​—e dua na qaravatu e sogolati tu ena vatu​—sa qai vakarota o Jisu: “Ni kauta tani na vatu!” Ni sega ni kila na ka ena vakayacora o Jisu, e qai vakalatilati o Marica: “Turaga, oqo e sa na bona na yagona; ni sa oti e va na bogi na nona mate.” E qai taroga o Jisu: “Au a sega li ni kaya vei iko, ni ko na raica ga na kaukauwa ni Kalou kevaka ko vakabauta?”​—Joni 11:​17-​40, VV.

19. Na cava e masu kina ena matanalevu o Jisu ni se bera ni vakaturi Lasarusa mai na mate?

¹⁹ Ni sa vaqiqici tani na vatu e isogo ni ibulubulu kei Lasarusa, sa qai masu vakadomoilevu o Jisu me rawa nira kila na tamata ni ka e sa vakarau cakava ena rawa wale ga ena vuku ni kaukaua ni Kalou. Sa qai kaci vaka domoilevu: “Lasarusa, lako mai!” Sa qai lako mai tuba o Lasarusa ni se viviraki tu ga ena yavana kei na ligana na isole ni mate kei na uluna ena dua na ivau. “Ni sereki koya, ka laiva me lako,” e kaya o Jisu.​—Joni 11:​41-​44, VV.

20. E vakayacoka vakacava vei ira era raica na nona a vakaturi Lasarusa o Jisu?

²⁰ Ena nodra raica na cakamana oqo, era sa vakabauti Jisu e levu vei ira na Jiu era mai vosa ni veivakacegui vei rau o Marica kei Meri. E so era kauta na itukutuku ni veika era raica vei ira na Farisi. Na cava era qai cakava? Era duavata kei ira na bete levu ena nodra kaciva ena gauna sara ga oya e dua na bose vakatotolotaki ni Sanadrini. E tuburi ira na veilecayaki era qai olevaka: “Na cava me da cakava? Ni sa vuqa na veicakacaka mana sa cakava na tamata oqo. Kevaka eda vakalaivi koya tiko ga vaka oqo, era na vakabauti koya na tamata kece ga, ka ra na qai lako mai na kai Roma ka kauta tani ruarua na noda i tikotiko tabu kei na noda matanitu.” Ia sa qai kaya vei ira o Kaiafa, na Bete Levu: “E sega li ni ko ni kila ni vinaka cake me mate e dua na tamata e na vukudra na lewe ni vanua, ka ca ni mai vakarusai na matanitu taucoko?” Me tekivu mai na siga oya ka lako mai, era sa dau bosea se mera na vakamatei koya rawa vakacava.​—Joni 11:​45-​53, VV.

21. Na veisau levu cava e dusia na cakamana ni nona vakaturi o Lasarusa?

²¹ Io, eda sa raica ni nona lokuyarataka na nona yaco yani i Pecani o Jisu e vakayacora rawa kina e dua na cakamana kilailevu. Ena kaukaua soli vakalou, a vakatura tale o Jisu e dua na tamata mate sa bogi va oti ena ibulubulu. E ka ni voraki vei ira na lewe ni mataveilewai cecere na Sanadrini na nodra vakabauta na ka e yaco, era sa qai vakatulewataka me vakamatei na Daucakamana oqo! Na cakamana oqo e dusia e dua na veisau levu ena cakacaka vakaitalatala i Jisu​—na veisau mai na ituvaki ni “se sega ni yaco mai na nona gauna” ina kena ni “sa yaco mai na gauna.”

O na Sauma Vakacava?

• A vakaraitaka vakacava o Jisu ni dei tu o koya ena nona ilesilesi soli vakalou?

• Na cava a saqata kina o Jisu na vakatutu nei tinana me baleta na waini?

• Na cava eda vulica mai na ivalavala ni nona walia o Jisu na leqa era vakavuna na dauveitusaqati?

• Na cava na vu ni lokuyara i Jisu ni sa taura na itukutuku vakatotolotaki ni tauvimate o Lasarusa?

[iYaloyalo ena tabana e 12]

A vakayacora ena nona igu o Jisu na nona ilesilesi soli vakalou