Wase e 92
Vakabulai e Lewe Tini na Vukavuka ena iOtioti ni iLakolako i Jisu ki Jerusalemi
E VAKATAWAYAGATAKA ko Jisu na sasaga ni Sanadrini me ra vakamatei koya ni sa biuti Jerusalemi ka lako yani ki na koro ko Ifireimi, ka 24 na kilomita beka ga vaka ki na mata ni vuarara kei Jerusalemi. E laki tiko kina o koya kei ira nona tisaipeli, me ra yawa mai vei ira na nona meca.
Ia, sa voleka na Lakosivia ni 33 S.K., e sega ni dede sa lako tale yani ko Jisu. E lakova yani na loma i Samaria ka cabe cake sara ki Kalili. Na i otioti ni gauna me lakova na vanua oqo ni bera nona mate. Ni tiko voli mai Kalili, e rairai salavata yani kei ira tale na so o koya kei ira nona tisaipeli ena i lakolako ni kena solevutaki na Lakosivia ki Jerusalemi. Era muria na sala ena yasayasa vaka-Peria, ena tokalau ni Uciwai na Joritani.
Ni sa curuma yani ko Jisu e dua na koro rairai beka e Samaria se mai Kalili, era qai sotavi koya e lewe tini na tamata ka tauvi vukavuka. Na mate rerevaki oqo e daukania vakamalua na yago ni tamata—na i qaqalo ni ligana, i qaqalo ni yavana, daligana, na ucuna, kei na tebenigusuna. Me ra taqomaki na tani me kakua ni dewavi ira, e tukuna na Lawa ni Kalou ena vukuna na vukavuka: “Me tabonaka na tebenigusuna ecake, ka me qai kacivaka ko koya, Au sega ni savasava! au sega ni savasava! A veisiga kecega sa mate kina ko koya ena sega ni savasava . . . me tiko ga vakai koya.”
O iratou na lewe tini na vukavuka oqo eratou muria na Lawa ni vakatatabu me baleti ira na vukavuka ka ra tu tani kina vakayawa sara mai vei Jisu. Ia, eratou kaci ga yani vakadomoilevu: “I Jisu, na Turaga, ni lomani keitou mai!”
Ni sa raici iratou tu yani vakayawa, sa qai vakarota ko Jisu: “Dou lako ka vakaraitaki kemudou vei ira na bete.” E tukuna oqo ko Jisu baleta ni Lawa ni Kalou e solia na kaukauwa vei ira na bete me ra tukuna ni sa vakabulai na vukavuka ka takali mai vei ira na nodra tauvimate. Ena sala oqo era vakadonui kina me ra laki tiko tale kei ira era bula vinaka.
Eratou nuidei na lewe tini na vukavuka ena kaukauwa ni cakamana i Jisu. Sa ratou lako vakusakusa yani me ratou laki raici ira na bete, e dina ga ni ratou se bera ni vakabulai. Ena nodratou i lakolako, sa yaco me vakaicovitaki na nodratou vakabauti Jisu. Sa tekivu me ratou raica ka vakila ni sa bulabula tale na yagodratou!
Eratou tomana yani na nodratou i lakolako na lewe ciwa, ia e dua tale na vukavuka, na kai Samaria, e lesu tale mai ka laki vakasaqarai Jisu. Ena vuku ni cava? Baleta ni rui ka levu na nona vakavinavinaka ena veika sa yaco vua. E vakacaucautaka na Kalou ena domolevu, ia ena gauna sa sotavi Jisu kina, sa cuva sobu ena matana, ka vakavinavinaka vua.
E sauma yani ko Jisu: “Era sega li ni lewe tini sa vakasavasavataki? ia sa evei na lewe ciwa? sa sega ni kune e dua me lesu tale mai me vakarokorokotaka na Kalou, ko koya duaduaga na kai tani oqo?”
Sa qai tukuna vua na kai Samaria: “Tucake, mo lako ga; sa vakabulai iko na nomu vakabauta.”
Ni da wilika na nona vakabulai iratou na lewe tini na vukavuka ko Jisu, sa dodonu me da vakasamataka vakatitobu na ka ni vuli bibi ena veika e vauca na nona taro: “Sa evei na lewe ciwa?” Na nodratou sega ni vakavinavinaka na lewe ciwa e dua na cala bibi sara. Eda na vakataki koya beka na kai Samaria, me da vakavinavinakataka na veika eda rawata mai vua na Kalou, e vauca na i vakadei ni vosa ni yalayala me baleta na bula tawamudu ena nona vuravura vou ni yalododonu na Kalou? Joni 11:54, 55; Luke 17:11-19; Vunau Ni Soro 13:16, 17, 45, 46; Vakatakila 21:3, 4.
▪ E vakatawayagataka vakacava ko Jisu na nona sagai me vakamatei?
▪ E lako tale yani ki na koro cava ko Jisu, ia na vanua cava me laki yaco kina?
▪ Na cava eratou tu yani kina vakayawa na vukavuka, ia a cava e kaya kina ko Jisu me ratou lako kina vei ira na bete?
▪ Na ka ni vuli bibi cava e dodonu me da taura mai na veika e sotavi oqo?