Qo na ‘Siga ni iTukutuku Vinaka’ Me Kua ni Vagolei Tani na Lomada

ERATOU vakasamataka e va na vukavuka na ka me ratou cakava. A sega ni dua e soli iloloma vei ratou ena matamatanikoro. A bukudruadrua tiko na mataivalu ni Siria qai sega ni vakatara me kau na kakana e Samaria. A sega sara ga ni yaga na curu ina koro ni sa rewailagi na isau ni kakana. Sa rogoci tale ga e dua na itukutuku ni veikanikani.​—2 Tui 6:24-29.

‘Vakacava me datou gole ina nodra keba na kai Siria?’ ratou kaya na vukavuka. ‘Ena bau vinaka toka.’ Ni sa buto na vanua qai dredre ni ratou laurai, ratou sasaga sara ina keba. Ni ratou yaco yani, ratou sega ni bau rogoca e dua na ka. Era yali na yadra, era vesu tu na ose kei na asa, ia a sega na sotia. Ratou rai sara ena loma ni dua na valelaca. E lala tu qai levu kina na kakana kei na wai. Ratou kana qai gunu. Ratou raica tale ga na koula, siliva, isulu, kei na iyaya vakamareqeti. Ratou qoqona qai lai vunia, oti ratou mai kauta tale eso. A lala sara tu ga na keba. A vakavuna o Jiova mera rogoca na sotia ni Siria na rorogo ni mataivalu ni volekati ira tiko yani. Era nanuma ni sa kabakoro mai e dua na mataivalu, ra qai dui veiseyaki. A biu tu mai na ka kece!

Eratou lai vunitaka na vukavuka na iyaya vakamareqeti. Ia, e tekivu vakaleqa nodratou lewaeloma ni ratou vakasamataka na nodra via kana tu na lewe i Samaria. Ratou kaya: “Sa sega ni dodonu na ka edatou sa cakava: a siga ni rogorogo vinaka na siga oqo”! Ratou lesu totolo i Samaria qai lai tukuna na itukutuku vinaka ni veika ratou raica.​—2 Tui 7:1-11.

Eda sa bula tale tiko ga ena gauna e rawa ni tukuni ni “siga ni rogorogo vinaka.” E tukuna o Jisu e dua na cakacaka e tiki ni “ivakatakilakila e dusia . . . na ivakataotioti ni veika vakavuravura,” ena nona kaya: “Ena vunautaki mada e vuravura taucoko nai tukutuku-vinaka oqo kei na matanitu, mei vakadinadina ki na veivanua kecega; sa na qai yaco emuri nai vakataotioti.” (Maciu 24:3, NW, 14) Meda raica vakacava na tikina qo?

Rawa ni Vakalatilati Noda Leqataka na Veika e Baleti Keda

Ena levu ni nodratou marau na vukavuka, ratou guilecavi Samaria kina. Ratou vakasamataka mada ga eliu na ka me yaga vei ratou. E rawa beka ni yaco qori vei keda? Na “leqa ni kakana” e tiki ni ivakatakilakila ni ivakataotioti ni veisiga. (Luke 21:7, 11, NW) E vakadreti ira nona tisaipeli o Jisu: “Dou qarauni kemudou vinaka, de dua na siga sa bibi kina na yalomudou e na daukana, kei na daumateni, kei na lomaocaoca e na veika ni bula oqo.” (Luke 21:34) Nida lotu vaKarisito, meda qarauna me kua ni vakalatilati na noda leqataka na veika me baleti keda nida na lecava kina nida bula tu qo ena “siga ni rogorogo vinaka.”

E dua na marama lotu vaKarisito o Blessing, a sega ni laiva me vakalatilati na veika e baleti koya. A veiqaravi vakapainia, a vakaotia e dua na vuli ni qasenivuli, qai vakamau kei na dua a veiqaravi e Peceli, oti sa qai lewenivuvale e Peceli e Benin. E kaya: “Au lesi meu dau sasamaki, au qai taleitaka vakalevu.” E marau o Blessing ena nona veiqaravi voli vakatabakidua me 12 na yabaki, qai vakavinavinaka ni a raica dei toka ga na “siga ni rogorogo vinaka” eda bula tu kina qo.

Qarauna na Ka e Kania na Gauna

Ni talai ira e 70 nona tisaipeli, e kaya o Jisu: “E dina sa vakalewe na yabaki, a ra sa lewe lailai ga nai vakatau-ni-were [“tamata cakacaka,” VV]; o koya mo dou qai masuti koya nai Taukei ni were, me tala yani eso nai vakatau-ni-were [“tamata cakacaka”] ki na nona were.” (Luke 10:2) Me vaka ga ni na ca na itei ke bera na tatamusuki, ena rawa tale ga nira mate eso ke da vakaweleweletaka na cakacaka vakavunau. E tomana kina o Jisu: “Kakua ni veikidavaki kaya e dua e na gau-ni-sala.” (Luke 10:4) Na vosa taumada ni “veikidavaki” e sega ni yalani ga ena veivakabulataki. Rawa ni okati kina na veimokomoko kei na veivosaki balavu ena gauna rau sota kina e rua na itokani. E dusimaki ira kina nona imuri o Jisu mera kua ni vakaogai ira ena ka e kania na gauna, mera vakayagataka vinaka ga na nodra gauna. Ni rui bibi dina na itukutuku mera vunautaka.

Vakasamataka na levu ni gauna e taura na veika e rawa ni vakaogai keda. Ena vica vata na yabaki, e dau taura vakalevu na gauna na sara tivi ena levu na vanua. Ia, vakacava na mobile phone kei na kompiuta? Ena dua na vakadidike mai Peritania, era a vakatarogi kina e 1,000 na uabula. E laurai “ena loma ni dua ga na siga e vakayagataka e dua na lewenivanua e Peritania e 88 na miniti ena nona qiri ena talevoni, e 62 na miniti ena mobile phone, e 53 na miniti na vakauitukutuku ena kompiuta, kei na 22 na miniti na vakauitukutuku ena mobile phone.” Ni soqoni vata na gauna kece qori, e laurai ni vakaruataki na levu ni gauna qo ni vakatauvatani kei na gauna e vakayagataka e dua na painia veivuke ena dua na siga! E vakacava na levu ni gauna o vakayagataka ena veika qori?

Erau vakayagataka vakavuku o Ernst kei Hildegard Seliger na nodrau gauna. E 40 taucoko na yabaki rau vesu tu kina ena keba ni veivakararawataki nei Itala kei na valeniveivesu ni Kominisi. Ni rau sa sereki, rau veiqaravi vakapainia me yacova nodrau mate.

E levu era a vinakata mera volavola vei rau na veiwatini qo. A rawa sara ga ni rau vakayagataka na gauna ena nodrau vakawilika na ivola qai volavola tale ga. Ia, a bibi duadua vei rau na nodrau qaravi Jiova.

Eda dau taleitaka kece nira volavola se qiri mai na noda itokani, e sega ni dua na kena leqa ya. E yaga na noda digia vinaka na ka meda dau cakava e veisiga. Ia, e ka vakayalomatua meda kua ni vakaogai keda ena ka e kania vakalevu na gauna, vakauasivi ni sa kena gauna qo meda vunautaka kina na itukutuku vinaka.

Vunautaka Vakavinaka Sara na iTukutuku Vinaka

Eda kalougata dina nida bula tu qo ena “siga ni rogorogo vinaka.” Meda kua ni vakaogai keda ena so tale na ka, me vaka ratou cakava taumada na va na vukavuka. Nanuma ni ratou kaya: “Sa sega ni dodonu na ka edatou sa cakava.” E sega ni donu ke da vakaliuca na veika e baleti keda se vakaogai keda ena ka e kania na gauna, e lai vakavuna meda sega ni vakaitavi vakalevu ena cakacaka vakavunau.

E ivakaraitaki vinaka vei keda ena tikina qo na yapositolo o Paula. Ni vakasamataka na imatai ni 20 na yabaki ni nona cakacaka vakaitalatala, e vola: “Au vunautaka kina vakavinaka sara na itukutuku vinaka me baleti Karisito.” (Roma 15:19, NW) A qarauna o Paula me kua ni dua na ka e vakaleqa na nona vunau. Me vakataki koya, meda gumatua tale ga na vunautaka na itukutuku ni Matanitu ni Kalou ena gauna qo, na “siga ni rogorogo vinaka.”

[iYaloyalo ena tabana e 28]

A sega ni vinakata o Blessing me vakalatilati na veika e baleti koya, me rawa ni veiqaravi tiko ga vakatabakidua

[iYaloyalo ena tabana e 29]

Rau qarauna na veiwatini na Seliger me rau vakayagataka vakavuku nodrau gauna