Wase e 130

Ena Wasawasa ko Kalili

OQO eratou sa lesu yani ki Kalili na i apositolo, me vaka a vakaroti iratou taumada kina ko Jisu. Ia eratou lecava na ka e dodonu me ratou laki cakava kina. Dede ga vakalailai, sa tukuna sara ko Pita vei Tomasi, Nacanieli, Jemesa kei Joni na tacina, kei na lewe rua tale na i apositolo: “Au sa lako mada ki qoli.”

“Keitou na lako tale ga yani,” eratou sauma lesu na lewe ono.

Ena loma ni bogi taucoko, eratou sega ni bau rawata e dua na ika. Ia, ni sa rarama mai na vanua, sa rairai mai matasawa ko Jisu, ia eratou sega tiko ni kila na i apositolo ni sa i Jisu. E kaci yani o koya: “Ragone, sa tu vei kemudou na kakana, se segai?”

“Sa segai,” eratou kacivaka lesu vua.

“Dou viritaka na lawa ki nai matau ni waqa, ka dou na kunea kina,” e kaya o koya. Ia ni ratou sa balata kina, eratou sa sega ni yavia rawa na lawa ni sa ka levu sara na ika.

“Na Turaga bagi oqo!” e kacivaka ko Joni.

Ni rogoca oqori ko Saimoni Pita, a daramaka sara na nona i sulu e cake, ni sa luvata tani tu na nona i sulu, ka rika yani ki wasawasa. Sa qalo yani o koya e rauta ni 90 na mita na kena yawa ki matasawa. Eratou sa qai muri yani na vo ni apositolo ena waqa lailai ka dreta yani ki vanua na lawa sa sinai tu ena ika.

Ni ratou sobu yani sa waqa tu na qilaiso ka tavu tu kina na ika, ka tu talega na madrai. “Kauta mai eso na ika dou sa qai rawata,” e kaya ko Jisu. E lako yani ki waqa ko Pita ka yavia mai vanua na lawa. E rauta ni 153 na ika lelevu era coko tu kina!

“Dou mai katalau,” e sureti iratou ko Jisu.

E sega ni dua vei iratou e bau doudou me taroga, “O cei koi kemuni?” baleta ni ratou kila ni sa i Jisu. Oqo e i kavitu ni nona rairai ena nona tu cake mai na mate, ka i katolu ni rairai vei iratou na i lawalawa i apositolo ni ratou tiko vata voli. E vakarautaka na kedratou i katalau, ka solia yadua vei iratou e so na madrai kei na ika.

Ni ratou sa kana oti, e rairai vakaraica ko Jisu na levu ni ika eratou rawata, sa qai tarogi Pita: “Saimoni, na luve i Jona, ko sa lomani au vakalevu, ka vakalailai ko iratou oqo?” E sega ni vakabekataki ni tukuna tiko, o lomana vakalevu cake li na cakacaka vagonedau mai na cakacaka au sa vakarautaka mo vakayacora?

“Ko ni sa kila ni’u sa lomani kemuni,” e sauma yani ko Pita.

“Vakani ira na noqu lami,” e sauma yani ko Jisu.

Ena i karua ni gauna, e baci taroga tale o koya: “Saimoni, na luve i Jona, ko sa lomani au, se sega?”

“Io, na Turaga; ko ni sa kila ni’u sa lomani kemuni,” e sauma ena lomadina ko Pita.

“Vakatawana na noqu sipi,” e baci vakarota tale ko Jisu.

Ia e baci tarogi koya tale ena i katolu ni gauna: “Saimoni, na luve i Jona, ko sa lomani au, se segai?”

E rarawataka dina ko Pita na ka oqo. E rairai nanuma ni vakatitiqataka ko Jisu na nona yalodina. Me cava tale ena gauna a lewai kina na bula i Jisu, a cakitaki koya vakatolu ko Pita ni sega ni bau kilai koya. Sa qai kaya ko Pita: “Kemuni na Turaga, ko ni sa kila na ka kecega; ko ni sa kila ni’u sa lomani kemuni.”

“Vakani ira na noqu sipi,” e vakarota ko Jisu ena i katolu ni gauna.

E taurivaki Pita ko Jisu me i dewadewa ni nona vakabibitaka vei iratou na kena vo na veika e gadreva o koya me ratou vakayacora. Ena sega ni dede sa na biuta na vuravura, ka gadreva me ratou liutaka na kedra qaravi o ira era na vakayarayarataki mai ki na bai ni sipi ni Kalou.

Me vaka ni a vesuki ka vakamatei ko Jisu ni vakayacora na cakacaka a lesia vua na Kalou me vakayacora, sa qai vakatakila ena gauna oqo ni na sotava ko Pita na rarawa vata ga o ya. “Ni ko a gone,” e tukuna vua ko Jisu, “ko a dauvauci iko, ka lako veitalia voli ga: ia ni ko sa qase mai, ko na dodoka na ligamu, ka na vauci iko e dua tani, ka kauti iko ki na tikina ko na sega ni vinakata.” Veitalia ga na mate vakararawa sa waraki Pita, e uqeti koya ko Jisu: “Muri au.”

Ni vuki ko Pita, e raici Joni sara ka qai taroga: “Turaga, ena vakaevei ko koya oqo?”

“Kevaka ka’u sa vinakata me bula tikoga ko koya ka yacova na siga ka’u na lako tale mai kina,” e sauma ko Jisu, “a cava oqo vei iko? ko iko, mo muri au.” Era raica tu e vuqa na tisaipeli ni vosa oqo i Jisu e vakaibalebaletaka ni na sega ni mate vakadua ko Joni. Ia, me vaka e qai vakamacalataka e muri na i apositolo ko Joni, ni a sega ni kaya ko Jisu ni na sega ni mate, ia a kaya ga: “Kevaka ka’u sa vinakata me bula tikoga ko koya ka yacova na siga ka’u na lako tale mai kina, a cava oqo vei iko?”

E muri a qai kauta cake talega mai ko Joni na vakasama titobu oqo: “Sa vuqa talega na ka tani sa cakava ko Jisu, ia kevaka sa volai kecega, au sa vakasama ni na oso ko vuravura e na veivola ena volai.” Joni 21:1-25; Maciu 26:32; 28:7, 10.

▪ Na cava e vakaraitaka ni ratou lecava na i apositolo na veika e dodonu me vakayacori mai Kalili?

▪ Eratou kilai Jisu vakacava na i apositolo mai na Wasawasa ko Kalili?

▪ Sa rairai vakavica oqo ko Jisu me tekivu mai na nona vakaturi?

▪ E vakabibitaka vakacava ko Jisu na ka e vinakata me ratou cakava na i apositolo?

▪ E vakaraitaka vakacava ko Jisu na i valavala ni mate i Pita?

▪ Na cava na i vakamacala i Jisu me baleti Joni era nanuma cala kina e vuqa na tisaipeli?