Sega ni Bula e Liu e Vuravura na Yalo Ra Qai Mate

Era bula tu na yago vakayalo! Ena vuravura ni yalo tawarairai, era tiko kina na yalo era vinaka kei na yalo era sega ni vinaka. O ira beka oqo era a tamata e liu e vuravura ra qai mate?

E sega. Ni sa mate na tamata, e sega ni lako yani ina vuravura ni yalo, me vaka era vakabauta e levu. Eda kila vakacava? Baleta ni tukuna na iVolatabu. Na iVolatabu na ivola ni ka dina e vu mai vua na Kalou dina duadua ga, na yacana o Jiova. O Jiova e bulia na tamata; e kila vinaka na ka e yacovi keda nida sa mate.—Same 83:18; 2 Timoci 3:16.

E kaya na iVolatabu ni Kalou e buli Atama, na imatai ni tamata “mai na kuvu ni qele.” (Vakatekivu 2:7) E vakatikori koya na Kalou ena Parataisi, na were o Iteni. Ke a talairawarawa ina lawa i Jiova o Atama, ke a sega ni mate; ke a se bula tu ga e vuravura nikua. Ia ni sa nakita o Atama me beca na lawa ni Kalou, e kaya vua na Kalou: “Ko na suka tale . . . ki na qele; ni ko a buli maikina eliu: ni ko sa kuvu ni qele ga, ia ko na suka tale mo kuvu ni qele.”—Vakatekivu 3:19.

Na cava na kena ibalebale oya? Io, a tu mada mai vei o Atama ni se bera ni buli koya o Jiova mai na kuvuniqele? Sega ni dua na vanua. A sega ni dua tu na yalo mai lomalagi me na qai mai kunekunetaki. E sega sara tu ga ni bula ena dua na vanua. Ni sa kaya gona vei Atama o Jiova ni na ‘suka ki na qele’ e kaya tiko ni na mate o Atama. A sega ni dewa yani ina vuravura ni yalo. Ni sa mate o Atama, sa sega ni bula tale tiko, sa sega ni qai vakila e dua na ka. Na mate na veibasai ni bula.

Ia vakacava o ira na vo ni tamata era mate? Era sa sega ni vakila tale ga e dua na ka? E sauma na iVolatabu:

• “Era sa lako kece [na tamata kei na manumanu] ki na dua bauga na tikina; era sa kuvu-ni-soso kecega, ka ra sa suka tale kecega me kuvu-ni-soso.”—Dauvunau 3:20.

• “Ko ira na mate era sa sega ni kila e dua na ka.”—Dauvunau 9:5.

• “Na nodra loloma, kei na nodra veicati, kei na nodra vuvu, sa qai yali.”—Dauvunau 9:6.

• “Sa sega na cakacaka, se na vakasama, se na kila ka, se na vuku, e nai bulubulu, o koya ko sa lako tiko kina.”—Dauvunau 9:10.

• “Sa lako tani na nonai cegu [na tamata], a sa suka ko koya ki na kena qele; e na siga dina ko ya sa oti na ka e vakanananu kina.”—Same 146:4.

Vakaevei, e dredre mo vakabauta na veitikinivolatabu oqo? Ke vaka kina, tei vakasamataka mada oqo: Ena levu na vuvale, e cakacaka na tagane me ratou bula kina nona veitinani. Ke sa mate o tagane, ena tatadredre nodratou bula nona vuvale. So na gauna ena lailai sara na ilavo me ratou voli kedratou kina nona veitinani. De ra tiko na kena meca na tagane era na qai dau vakatotogani iratou nona veitinani. Ia tarogi iko mada: ‘Ke bula tiko ena vuravura ni yalo na tagane oya, na cava ga e sega ni kauaitaki iratou mai kina nona vuvale? Na cava e sega ni taqomaki iratou kina mai vei ira na tamata ca?’ Na vuna e baleta ga ni dina na iVolatabu. Ni sega ni qai bula tale tiko na tamata, sa sega ni cakava rawa tale e dua na ka.—Same 115:17.

Kena ibalebale oqo nira na sega ni bula tale na mate? E sega ni vaka kina. Eda na qai veivosakitaka malua na veivakaturi. Ia e dua na ka e macala, nira sa sega ni vakila e dua na ka na mate. Era sega ni raici iko rawa, rogoci iko, se vosa vei iko. Mo kua ni rerevaki ira. Era sega ni vukei iko rawa, se cakava vei iko e dua na ka.—Dauvunau 9:4; Aisea 26:14.