Yaco na Veivorati ena Vuravura ni Yalo

Era vinaka kece na yago vakayalo e bulia o Jiova. Ia a qai lako vakaca e dua na agilosi. O Setani na Tevoro. E vinakata o Setani mera sokaloutaki koya na lewe i vuravura, mera kua ni sokaloutaki Jiova. E tekivu vaka oqo:

E levu sara na vunikau ena were o Iteni e kana vinaka na vuadra. E tukuna o Jiova vei Atama kei na watina o Ivi ni tara me rau kana mai kina. Ia a dua ga na vunikau e kaya na Kalou me rau kua ni kania na vuana. E kaya ni rau na mate vakaidina ke rau kana mai kina.—Vakatekivu 2:9, 16, 17.

Dua na siga ni tiko duadua o Ivi, sa qai vosa vua e dua na gata. Ia a sega ni vosa dina tiko na gata; o Setani ga na Tevoro e vakavuna me vaka me vosa tiko na gata oya. E kaya vei Ivi o Setani ni na vuku me vaka na Kalou kevaka e kania na vuanikau tabu. A kaya tale ga ni na sega ni mate. Na nona vosa ruarua e lasu. Ia, a vakabauti Setani o Ivi qai kania na vuanikau. Mani kana tale ga o Atama ni sa lai solia yani vua e so o Ivi.—Vakatekivu 3:1-6.

Eda raica mai na italanoa dina oqo ni o Setani e dauveivorati e lasulasu tale ga. E kaya vei Ivi ni na sega ni mate ke talaidredre vua na Kalou. Na lasu oya. A qai mate dina o Ivi vaka tale ga kina o Atama. O Setani a sega ni mate ena gauna oya, ia ena qai mate tale ga baleta ni sa valavala ca. Ia ena gauna oqo e se bula tiko, e se vakacala tiko ga na kawatamata. E se dau lasulasu tiko ga, qai saga me vecei ira na tamata mera beca na lawa ni Kalou.—Joni 8:44.

Veivorati e So Tale na Agilosi

Era qai lako vakaca e muri e so tale na agilosi. O ira na agilosi oqo era raica mai na yalewa matavinaka e vuravura ra qai via veiyacovi kei ira. Era mani lako mai vakatamata i vuravura ra mai tokara na yago vakatagane. Era veiyacovi sara kei ira na yalewa. Na ka oqo e veicalati kei na inaki ni Kalou.—Vakatekivu 6:1, 2; Juta 6.

E sota kaya kina na kawatamata e levu sara na leqa. Era vakaluveni na watidra na agilosi oya, ia na luvedra era gone duatani. Era tubu cake mera tuawa yalo ca qai voravora sara nodra itovo. Ni sa sinai o vuravura ena itovo kaukaua, e lewa o Jiova me sa vakarusai ira na tamata ca ena dua na waluvu levu. Na tamata ga e qai bula na turaga yalododonu o Noa kei na nona vuvale.—Vakatekivu 6:4, 11; 7:23.

Era lesu tale ina vuravura ni yalo na agilosi ca; era sega ni mate. Ia era totogitaki. Era sa sega ni okati tale mera lewenivuvale agilosi yalododonu ni Kalou. Sa vakatabui ira o Jiova mera tokara tale na yago vakatamata. Era na qai mate vakadua ni sa na yaco na siga ni lewa.—2 Pita 2:4; Juta 6.

Kolotaki Mai Lomalagi o Setani

Rauta na itekivu ni noda senitiuri oqo, e tubu na ivalu mai lomalagi. E vakamacalataki ena Vakatakila na ka e yaco: “Sa tubu nai valu mai lomalagi; o Maikeli [o Jisu Karisito ni sa vakaturi] kei ira na nona agilose [vinaka] era sa veivala kei na gata levu [o Setani]; a sa ia vata nai valu na gata levu kei ira na nona agilose [ca], a ra sa sega ni gumatua: a sa sega tale ni kune e dua na nodra tikina mai lomalagi. A sa biu tani na gata levu, na gata makawa, a yacana na Tevoro, kei Setani, o koya sa temaki ira kecega na kai vuravura: a sa biu ki vuravura, a ra sa biu vata kaya na nona agilose [ca].”

Na cava sa qai yaco? Eda wilika tale: “O koya oqo mo reki kina na lomalagi, kei kemudou sa tiko kina”! Era reki na agilosi vinaka baleta ni sa yali mai lomalagi o Setani kei ira nona agilosi ca, se o ira na yago vakayalo ca. Vakacava ga o ira na tamata e vuravura? E kaya na iVolatabu: “Dou na ca koi kemudou sa tiko e vuravura kei na wasawasa: ni sa lako sobu vei kemudou na tevoro, a sa cudru vakalevu, ni sa kila ko koya ena sega ni dede na nona gauna.”—Vakatakila 12:7-9, 12.

Io, o Setani kei ira nona itokani ca era vakacalai ira tiko ga na lewe i vuravura ra qai vakararawataki ira vakalevu. Era vakatokai na agilosi ca oqo mera timoni. Era meca ni Kalou. E ca sara na nodra ivakarau.