Raivotutaki na Lomalagi

SE MANI vakacava na dede ni nomu wanonova na lomalagi, o na sega ni raica e dua na kabula vakayalo. O na sega ni bau rogoca tale ga e dua. Ia o rairai vakabauta nira bula dina tiko. Era vuku qai kaukaua, e duidui tale ga na yacadra kei na nodra itovo. Eso era via vukei keda, ia eso tale era via vakararawataki keda ga. Na kabula vakayalo kece qo era kauaitaki keda.

E yalo na Kalou dina. (Joni 4:24) Na yacana lagilagi o Jiova, me vakaduiduitaki koya mai na levu na kalou lasu. (Same 83:18) A vola na daunisame: “Ni sa levu ko Jiova, ka sa dodonu me vakavinavinakataki vakalevu: Me rerevaki vakalevu talega ka vakalailai na kalou kecega. Ni ra sa matakau walega na nodra, kalou na veimatanitu: Ia ko Jiova ga sa bulia na lomalagi. A vakarokoroko kei na ka vakaturaga sa tiko e matana: A kaukauwa kei na lagilagi sa tiko e nona vale tabu.”​—Same 96:​4-6.

Raivotutaki na Kalou Dina

E tukuna vei keda na iVolatabu: “E sega ni dua na tamata e se bau raica na Kalou.” (Joni 1:18) Eda sega gona ni kila rawa na kena irairai kei na nona lagilagi, me vaka ga na nona sega ni kila na roka e dua e sucu mataboko. Ia me vaka ga na qasenivuli vinaka e vakamacalataka na lesoni vereverea ena sala me kila kina o gonevuli, na Kalou e vakayagataka na nona Vosa me vakamacalataka na veika eda raica meda kila kina na veika e tawarairai. Ena nodra raivotu vakalou na tamata yalodina ena gauna makawa, e vukei keda kina o Jiova meda raitayaloyalotaka na lomalagi, meda kila tale ga na noda veiwekani kei ira era tiko e kea.

Me kena ivakaraitaki na raivotu a raica na parofita o Isikeli e vakatauvatana na serau ni lagilagi i Jiova ina bukawaqa, vatu safaia kei na drodrolagi. Ena dua tale na raivotu a raici Jiova ena nona itikotiko vakaturaga na yapositolo o Joni, qai kaya ni Kalou “e vaka na vatu jasipa kei na satiusa na kena irairai,” e kuria ni “wavokita na idabedabe vakaturaga na drodrolagi e vaka na emeralita na kena irairai.” Eda kila ena ivakamacala oya ni itikotiko i Jiova e duatani duadua, e totoka vakaoti, qai vakilai kina na vakacegu kei na sautu.​—Vakatakila 4:​2, 3; Isikeli 1:​26-28.

A raivotutaka tale ga na itikotiko i Jiova na parofita o Taniela, e raica kina e “oba vakaoba [na agilosi] sa wavu tu e matana [Jiova].” (Taniela 7:10) E veivakurabuitaki dina na raivotu oya! Ni o raica mada ga e dua na agilosi sa na bau vakatubuqoroqoro dina, ia vakasamataka mada ke o raica e oba vakaoba na agilosi!

E voleka ni cavuti vaka 400 ena iVolatabu na vosa agilosi, e tukuni tale ga kina na nodra itavi me vaka na serafimi kei na jerupi. Na vosa vaKirisi vaka kina na vosa vakaIperiu ni “agilosi” e vakadewataki ena iVolatabu me “italai.” Koya gona era dau veivosaki na agilosi, era dau veitaratara tale ga kei ira na tamata ena veigauna sa sivi. Era sega ni bau bula e vuravura na agilosi qo. Ni bera sara ni buli na tamata, sa buli ira oti tu o Jiova.​—Jope 38:​4-7.

Ena raivotu i Taniela era soqoni vata e dua na iwiliwili levu ni agilosi mera vakadinadinataka e dua na ka vakatubuqoroqoro ena caka. E raica o Taniela “e dua sa vaka . . . na Luve ni tamata” e torova na itikotiko vakaturaga i Jiova me soli vua “na lewa, kei na vakarokoroko, kei na matanitu, me ra qaravi koya ko ira na tamata kece, kei na veivanua, kei na dui vosavosa.” (Taniela 7:​13, 14) Na “Luve ni tamata” o Jisu Karisito e tiko na nona itavi bibi mai lomalagi, e soli vua na lewa me liutaka na vuravura taucoko. Sa vakarau sosomitaka kece na matanitu vakatamata na nona veiliutaki me vakaotia kina na tauvimate, rarawa, veivakalolomataki, bula dravudravua, kei na mate sara mada ga.​—Taniela 2:44.

Na nona vakadaberi vakatui o Jisu e vakavu marau vakalevu vei ira na iwiliwili ni agilosi yalodina era via vukei keda. E ca dina ni sega ni o ira kece na kabula vakayalo era kauaitaki keda va oya.

Meca ni Kalou kei na Kawatamata

Ena itekivu ni bula ni kawatamata a rawai na lomana e dua na agilosi ni vinakata me sokaloutaki, a vorati Jiova, qai vukici koya me o Setani, na kena ibalebale “Dauveivorati.” E vu ni ca kece ga o Setani, e saqati Jiova na Kalou dauloloma. Era tomani Setani ena nona veivorati eso tale na agilosi. E vakatokai ira na iVolatabu mera timoni. Me vakataki Setani ga, era vuki na timoni mera meca nabadua ni kawatamata. Ena nodra veivakamuai, e levu kina na rarawa e vuravura, na cakacaka tawadodonu, tauvimate, dravudravua, kei na ivalu.

E levu na lotu ni Veivanua vaKarisito era sa sega ni dau veivosakitaki Setani me vaka era dau cakava eliu, ia ena ivola na Jope eda kila kina na nona itovo kei na nona inaki na agilosi dauveivorati qo. E kaya: “Sa dua na siga era sa lako mai kina na luve ni Kalou me vakaraitaki ira e na mata i Jiova, a sa lako talega mai kei ira ko Setani.” Ena veivosaki qo e beitaki Jope o Setani ni qarava tiko ga na Kalou ena veika e rawata kina. Me vakadinadinataka o Setani na ka e tukuna, a vakararawataki Jope ena nona vakamatea na nona qelenimanumanu kei ratou kece na tini na luvena. Oti qai yaviti Jope ena vidikoso me tekivu mai na qeteqeteniyavana me yacova na buradelana. A sega ni mana na sasaga kece i Setani.​—Jope 1:​6-19; 2:7.

E tiko na vuna vinaka e vakatara kina o Jiova me cakanona tiko o Setani, ia ena yaco na gauna me na muduki kina ena nona na vakarusai. Sa tekivu vakayacori tiko qai vakamatatataki ena Vakatakila na veika tawarairai a yaco mai lomalagi. E kaya: “E qai tubu na ivalu mai lomalagi: o Maikeli [Jisu sa vakaturi oti] kei ira na nona agilosi era vala kei na gata, na gata kei ira na nona agilosi era vala kei ira, ia era sega ni qaqa, e sega tale ga ni kune mai lomalagi e dua na nodra tikina. Sa qai kolotaki sobu na gata levu, na gata makawa, e vakatokai na Tevoro se o Setani, o koya e vakacala tiko na vuravura taucoko; e kolotaki sobu i vuravura kei ira na nona agilosi.”​—Vakatakila 12:​7-9.

E tukuni ni o Setani e “vakacala tiko na vuravura taucoko.” E vakacala tiko na kawatamata ena nona uqeta na ivakavuvuli lasu vakalotu mera kua ni qaravi Jiova, mera kua tale ga ni muria na nona Vosa. E dua na ivakavuvuli lasu e kilailevu nikua nida mate eda lako i lomalagi. E levu tale tu na basoga ni ivakavuvuli qo. Me kena ivakaraitaki, e levu mai Aferika kei Esia era vakabauta ni mate e dua ena lai bula tale tiko na yalona ena vuravura ni yalo era tu kina na nodra qase. Na ivakavuvuli ni puregatorio kei eli e yavutaki ena vakasama ni mate na tamata e bula tale tiko e dua na ka.

Nida Mate​—Eda na Lai Bula i Lomalagi?

Ia vakacava na ka era vakabauta e milioni e veiyasa i vuravura ni tamata vinaka kece era lako i lomalagi? Io eso na tamata vinaka era lako i lomalagi, ia e iwiliwili lailai ni vakatauvatani kei ira na bilioni vakacaca era sa takali. E vakatakila na iVolatabu nira le 144,000 era “voli mai vuravura” era na veiqaravi ‘vakabete’ ra qai “tui, mera liutaka na vuravura.” (Vakatakila 5:​9, 10; 14:​1, 3) O ira qo era na veiliutaki vata kei na Luve ni tamata o Jisu Karisito ena Matanitu vakalomalagi ni Kalou. Na matanitu ena vakarusai Setani kei ira na nona timoni, qai veisautaka na vuravura me parataisi. E levu era sa takali era na vakaturi ena gauna se bera mai mera bula tawamudu ena vuravura Parataisi.​—Luke 23:43.

E macala gona ni dua na iwiliwili levu ni agilosi era bula tiko mai lomalagi. Na Kalou Dauveibuli o Jiova e Cecere Duadua vei ira. Era qaravi koya voli ena yalodina e oba vakaoba na agilosi. Eso tale na agilosi e liutaki ira o Setani era saqati Jiova ra qai vakacalai keda tiko. Kuria qo e dua na iwiliwili lailai era “voli,” se digitaki e vuravura mera qarava na itavi bibi mai lomalagi. Meda raica mada se da na veitaratara kei cei e lomalagi, eda na cakava vakacava.