Lesoni 11

Na Vakabauta kei na iTovo Vakavanua e Sega ni Taleitaka na Kalou

Na vakabauta kei na itovo vakavanua cava soti e cala? (1)

Ena donu ke ra vakabauta na lotu Vakarisito ni Kalou na Letoluvakalou? (2)

Na cava era sega ni dau solevutaka kina na lotu Vakarisito dina na Kirisimasi, na Easter, se nona siganisucu e dua? (3, 4)

Vakacava o ira na sa mate, e rawa nira vakaleqai ira na se bula tiko? (5)

A mate o Jisu ena kauveilatai? (6)

E vakacava na bibi ni noda vakamarautaka na Kalou? (7)

1. E sega ni ca na ka kece ga eda vakabauta kei na itovo vakavanua eda muria. Ia ena vakatabuya ga na Kalou ke ra vu tiko mai na lotu lasu se ra veicoqacoqa kei na ivakavuvuli vakaivolatabu.​—Maciu 15:6.

2. Letoluvakalou: E tiki beka ni Letoluvakalou o Jiova​—me tolu na vatuka ena dua ga na Kalou? Sega! Na Tamada o Jiova, na “Kalou dina duaduaga.” (Joni 17:3; Marika 12:29) O Jisu na Luvena ulumatua, e vakarorogo vua na Kalou. (1 Korinica 11:3) E uasivi Luvena na Tamana. (Joni 14:28) E sega ni vakavatuka na yalo tabu me vaka na Kalou; e igu yavala ga ni Kalou.​—Vakatekivu 1:2; Cakacaka 2:18.

3. Na Kirisimasi kei na Easter: A sega ni sucu o Jisu ena 25 ni Tiseba. E sucu ena gauna era vakatawa sipi tiko kina e tautuba ena bogi na ivakatawa, rauta toka na 1 ni Okotova. (Luke 2:8-12) E sega ni vakarota vakadua o Jisu mera dau solevutaka nona siganisucu na lotu Vakarisito. E kaya ga vei ira nona tisaipeli mera dau vakananuma na nona mate. (Luke 22:19, 20) Na Kirisimasi kei na veika e so e dau caka kina e vu mai na lotu lasu makawa. E dina tale ga oqo me baleta na veika e dau okati vata kei na solevu ni Easter me vaka na yaloka kei na ravete. Era sega ni dau solevutaka na Kirisimasi se Easter na lotu Vakarisito taumada, se o ira na lotu Vakarisito dina nikua.

4. Siganisucu: Na rua na siganisucu e cavuti ena iVolatabu e nodrau siganisucu e rua erau sega ni qaravi Jiova. (Vakatekivu 40:20-22; Marika 6:21, 22, 24-27) O ira na lotu Vakarisito taumada era sega ni solevutaka na siganisucu. Na solevutaki ni siganisucu e vu mai na lotu lasu makawa. Era dau marau vata ra qai dau soli ka ni loloma na lotu Vakarisito dina ena veigauna tale e so ena loma ni yabaki.

5. Rerevaki Ira na Mate: O ira na mate era sega ni cakava rawa, se vakila e dua na ka. Sa oti na noda rawa ni vukei ira, e sega tale ni rawa nira vakamavoataki keda. (Same 146:4; Dauvunau 9:5, 10) E mate na soulu; e sega ni bula tale tiko ni sa mate e dua. (Isikeli 18:4, NW) Ia so na gauna era dau vakalecaleca na agilosi ca, era vakatokai mera timoni, me nanumi kina nira yalodra na sa mate. E cala na itovo vakavanua cava ga e uqeta mera rerevaki na mate se mera sokaloutaki.​—Aisea 8:19.

6. Kauveilatai: A sega ni mate o Jisu ena kauveilatai. E mate ena dua na tolonikau. Na vosa vakirisi e vakadewataki ena levu na iVolatabu me “kauveilatai” e vakaibalebaletaki ina dua ga na tolonikau. Na kauveilatai e vu mai na lotu lasu makawa. Era a sega ni vakayagataka se ra sokaloutaka na kauveilatai na lotu Vakarisito taumada. O koya gona, o nanuma ni dodonu ke vakayagataki na kauveilatai ena noda sokalou?​—Vakarua 7:26; 1 Korinica 10:14.

7. De na bau ka ni sasaga toka mo biuta tani na veika o dau vakabauta tu se so na itovo o dau muria tu. De ra na saga na wekamu kei na nomu itokani mera moici iko mo kua ni veisautaka nomu vakabauta. Ia e bibi ga mo vakamarautaka na Kalou, sega ni tamata.​—Vosa Vakaibalebale 29:25; Maciu 10:36, 37.

[iYaloyalo ena tabana e 22]

Na Kalou e sega ni tiki ni Letoluvakalou

[iYayalo ena tabana e 23]

Na Kirisimasi kei na Easter erau vu mai na lotu lasu makawa

[iYaloyalo ena tabana e 23]

E sega na betena meda sokaloutaki ira na mate se meda rerevaki ira