Cava Era Sega ni Solevutaka Kina na Easter na iVakadinadina i Jiova?
Eso na nanuma cala
Ka era tukuna e levu: Era sega ni solevutaka na iVakadinadina i Jiova na Easter nira sega ni lotu vaKarisito.
Kena dina: Keimami vakabauta ni noda iVakabula o Jisu Karisito, qai keimami saga ena neimami vinaka taucoko me keimami “muria na weniyavana.”—1 Pita 2:21; Luke 2:11.
Ka era tukuna e levu: Oni sega ni vakabauta ni vakaturi mai na mate o Jisu.
Kena dina: Keimami vakabauta ni a vakaturi o Jisu; keimami kila tale ga ni qori e dua na tiki bibi ni noda vakabauta vaKarisito qai vakabibitaki qo ena neimami cakacaka vakaitalatala.—1 Korinica 15:3, 4, 12-15.
Ka era kaya e levu: Kemuni sega ni kauaitaka ke ra calata na luvemuni na marau ni olodei ni Easter.
Kena dina: Keimami lomani ira na luvei keimami—keimami gumatua gona na vakavulici ira qai vukei ira mera marau.—Taito 2:4.
Cava era sega ni solevutaka kina na Easter na iVakadinadina i Jiova?
E sega ni yavutaki ena iVolatabu na solevutaki ni Easter.
E vakarota o Jisu meda vakananuma na nona mate, sega ni nona vakaturi. Koya gona e veiyabaki keimami dau Vakananuma na mate i Jisu, ni keimami muria na ivolanivula ena iVolatabu.—Luke 22:19, 20.
Keimami vakabauta ni sega ni vakadonuya na Kalou na solevutaki ni Easter baleta e yavutaki mai na ivalavala butobuto ni vakatubukawa. E vinakata na Kalou me ‘qaravi duadua ga’ qai vakacudrui koya na sokalou e okati kina na ivalavala e sega ni vakadonuya.—Lako Yani 20:5; 1 Tui 18:21.
E yavutaki ena iVolatabu na neimami vakatulewa, ni uqeti keda meda ‘taura matua na vuku kei na raiyawa’ sega ni vakamumuri wale tu ga. (Vosa Vakaibalebale 3:21; Maciu 15:3) Keimami na vakaraitaka vakadodonu na neimami vakabauta me baleta na Easter, ia ena gauna vata qori, keimami doka na vakatulewa ni tamata yadua me baleta na tikina qo.—1 Pita 3:15.