Lesson 14

Nodra iSoqosoqo na iVakadinadina i Jiova

Era tauyavu enaica ena noda gauna oqo na iVakadinadina i Jiova? (1)

E dau cicivaki vakacava nodra soqoni na iVakadinadina i Jiova? (2)

E dau saumi vakacava na veika vakailavo? (3)

O cei e liutaka na cakacaka ena ivavakoso yadua? (4)

Na soqo lelevu cava e dau caka e veiyabaki? (5)

Na cava e caka ena nodra itikotiko liu kei na nodra valenivolavola ni tabana? (6)

1. Ena noda gauna oqo era tauyavu tale na iVakadinadina i Jiova ena veiyabaki ni 1870. Era vakatokai mada e liu mera Gonevuli ni iVolatabu (Bible Students). Ia ena 1931 era sa ciqoma na yaca vakaivolatabu na iVakadinadina i Jiova. (Aisea 43:10) Mai na itekitekivu lailai oya, sa tubu na isoqosoqo ni iVakadinadina oqo mera sa lewe vica na milioni, era ogaoga sara vakalevu ena cakacaka vakavunau ena 230 vakacaca na vanua.

2. E levu na ivavakoso ni iVakadinadina i Jiova era dau soqoni vakatolu ena dua na macawa. Mai tiko mada ena dua vei ira na soqoni oqo. (Iperiu 10:24, 25) E yavutaki ena iVolatabu na ka e vulici. E tekivu na soqoni ena masu, e tini tale ga ena masu. Ena levu na soqoni e dau lagati kina na “sere vakayalo” era lagata na ivavakoso mai vu ni lomadra. (Efeso 5:18, 19, NW) E sega ni dua na ilavo mo sauma mo mai tiko ena soqoni, e sega tale ga ni dau kau wavoki na veleti ni soli.​—Maciu 10:8.

3. E levu na ivavakoso era dau soqoni ena Kingdom Hall. Oqo era vale e sega soti ni vereverea na kedra itaratara, era tara wale na iVakadinadina. O na sega ni raica e dua na ivakatakarakara, se kauveilatai, se dua tale na ka e vaka oya ena Kingdom Hall. Na veika me saumi e saumi ena ilavo e cautaki ena lomasoli. Ke ra via cau e so, ena tiko e dua na kato ni cau mera biuta kina nodra cau.​—2 Korinica 9:7.

4. Era tiko ena ivavakoso yadua na qase, se o ira na ivakatawa. Era liutaka na veivakavulici ena ivavakoso. (1 Timoci 3:1-7; 5:17) Dau nodra ivukevuke na dauveiqaravi vakaitalatala. (1 Timoci 3:8-10, 12, 13) O ira na tagane oqo era sega ni cecere cake mai vei ira na kena vo ena loma ni ivavakoso. (2 Korinica 1:24, VV) Era sega ni vakatokai ena so na icavuti rogo bibi. (Maciu 23:8-10) E sega ni duatani tu na nodra isulusulu mera kilai tani kina. Era sega tale ga ni saumi ena nodra cakacaka. Ena nodra vakani vakayalo na lewe ni ivavakoso, e kune vei ira na qase na yalomamakutu mera cakava na itavi oya. Era na dau vu ni veivakacegui, ra dau veidusimaki tale ga ena gauna ni leqa.​—Jemesa 5:14-​16; 1 Pita 5:2, 3.

5. Ra dau vakayaco soqo lelevu tale ga ena veiyabaki na iVakadinadina i Jiova. Era na soqo vata mai e levu na ivavakoso ena gauna vaka oqo mera rogoca e dua na porokaramu bibi ni vuli iVolatabu. Sa dau kena ivakarau tale ga ena soqo lelevu vaka oqo mera papitaisotaki kina na tisaipeli vou.​—Maciu 3:13-17; 28:19, 20.

6. E tiko mai Niu Yoka na nodra itikotiko liu na iVakadinadina i Jiova. E tiko e kea na iLawalawa Dauvakatulewa, oqo e so na qase matua era qarava na ivavakoso e vuravura raraba. E tiko tale ga ena veiyasa i vuravura e sivia na 100 na valenivolavola ni tabana. Ena vanua vaka oqo, era veiqaravi kina na bole cakacaka yani mera tabaka na ivola vakaivolatabu ra qai dau vakauta. E dusimaki tale ga mai kina na cakacaka vakavunau. Vakacava mo lalawataka mo sikova na valenivolavola ni tabana o voleka kina?