Me Sauma na iVolatabu

Na Cava e Tiko Kina na Nona iSoqosoqo na Kalou?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. Na cava e tuvanaki ira kina na Isireli na Kalou?

Na Kalou a tuvanaki ira na kawa ni peteriaki o Eparama me dua na matanitu qai vakarautaka na lawa mera muria. A vakatoka na matanitu qori me o Isireli qai lesi ira mera taqomaka na sokalou dina kei na nona Vosa na iVolatabu. (Same 147:19, 20) Era sa vakila kina na veimatanitu na kena yaga.​—Wilika Vakatekivu 22:18.

A digitaki ira na Isireli na Kalou mera nona ivakadinadina. Nira talairawarawa ena nona lawa, era vakila na kena yaga. (Vakarua 4:6) Eda rawa ni kila e levu tale na ka me baleta na Kalou nida vulica na kedra ivolatukutuku na Isireli.​—Wilika Aisea 43:10, 12.

2. Na cava era tuvanaki kina na lotu vaKarisito dina?

A sega ni vakadonui ira na Isireli na Kalou ni toso na gauna, qai sosomitaka o Jiova na matanitu oya ena ivavakoso vaKarisito. (Maciu 21:43; 23:37, 38) Era ivakadinadina e liu ni Kalou na Isreli, ia nikua era sa ivakadinadina i Jiova na lotu vaKarisito dina.​—Wilika Cakacaka 15:14, 17.

A tuvanaki ira na nona imuri o Jisu mera vunautaka na veika me baleti Jiova, mera veivakatisaipelitaki tale ga ena veimatanitu. (Maciu 10:7, 11; 24:14; 28:19, 20) Sa voleka sara ni cava na cakacaka qo. E se qai bau vakadua me veivakaduavatataki o Jiova ena sokalou dina vei ira e milioni vakacaca mai na veimatanitu. (Vakatakila 7:9, 10) A vakaroti ira na lotu vaKarisito dina o Jisu mera cakacaka vata me rawa nira veivakauqeti, ra veivukei tale ga. E tautauvata na ivakarau ni nodra vulica na iVolatabu ena nodra soqoni e veiyasa i vuravura.​—Wilika Iperiu 10:24, 25.

3. A tekivu vakacava na isoqosoqo era lewena ena gauna qo na iVakadinadina i Jiova?

A tekivu ena veiyabaki ni 1870 na isoqosoqo era lewena ena gauna qo na iVakadinadina i Jiova. Era vulica tale na ka dina ena iVolatabu sa yali tu vakadede e dua na ilawalawa lailai ni gonevuli ni iVolatabu. Era kila ni tuvanaka o Jisu mera vunau na lewe ni ivavakoso vaKarisito, era mani vunautaka sara e veiyasa i vuravura na Matanitu ni Kalou. Era qai vakatokayacataki ena 1931 mera iVakadinadina i Jiova.​—Wilika Cakacaka 1:8; 2:1, 4; 5:42.

4. Era tuvanaki vakacava ena gauna qo na iVakadinadina i Jiova?

Ena imatai ni senitiuri, a veidusimaki ena ivavakoso vaKarisito ena veivanua na ilawalawa dauvakatulewa e ciqomi Jisu me ulu ni ivavakoso. (Cakacaka 16:4, 5) O ira tale ga na iVakadinadina i Jiova nikua era ciqomi Jisu me nodra iLiuliu. (Maciu 23:9, 10) Era vakila na yaga ni veidusimaki ni iLawalawa Dauvakatulewa era lewena na qase ni ivavakoso era matua, era veivakayaloqaqataki ra veidusimaki tale ga ena iVolatabu ena sivia na 100,000 na ivavakoso. Era tiko ena ivavakoso kece na tagane era rawata na ivakatagedegede mera qase ni ivavakoso se ivakatawa. O ira na tagane qori era qarava ena yalololoma na qele ni sipi ni Kalou.​—Wilika 1 Pita 5:2, 3.

Era tuvanaki na iVakadinadina i Jiova mera vunautaka na itukutuku vinaka ra qai veivakatisaipelitaki. Era vakadewataka, tabaka, qai veisoliyaka na ivola me vulici kina na iVolatabu ena sivia na 500 na vosa mera veivuke kina e veiyasa i vuravura. Era dau vunau e veivale me vakataki ratou na yapositolo. (Cakacaka 20:20) Era lomasoli mera veivakavulici ena iVolatabu vei ira e vu mai lomadra na nodra taleitaka na ka dina. E vakilai na marau ena isoqosoqo era lewena nira vakaliuca na nodra vakamarautaka na Kalou kei na nodra vukei ira eso tale.​—Wilika Same 33:12; Cakacaka 20:35.

Me ikuri ni ivakamacala, raica na wase 19 ni ivola Na Cava Sara Mada e Kaya na iVolatabu?, tabaka na iVakadinadina i Jiova.