iVola e Veisoliyaki Vakalevu Duadua e Vuravura
“Na ivola e wiliki vakalevu duadua ena itukutuku ni veigauna na iVolatabu. . . . Sega tale ni dua na ivola e sivia na iVolatabu ena kena veisoliyaki vakalevu. E sega ni dua tale ga na ivola e sivia na iVolatabu ena levu ni gauna kei na vosa e vakadewataki kina.”—“The World Book Encyclopedia.”1
E RAWA ni kainaki ni ivola e vakataki keda ga na tamata. Era basika mai, era tubu mera taleitaki, ia yaco na gauna mera sa madra ra tawayaga. Ia e bula tu ga e vica wale sara na ivola era ivolaqoroi (classics). Vakalevu ga me vaka era ibulubulu ni ivola na valeniwilivola, mera maroroi kina na ivola makawa sa ra sega ni wiliki, e rawa ni kainaki nira sa “mate” tu.
Ia vei ira na ivola era vakatokai nira ivolaqoroi, e uasiviti ira kece na iVolatabu. Se tekivu volai sara ena 3,500 na yabaki sa oti, ia se “bula” tiko ga ena gauna oqo. E ivola veisoliyaki vakalevu duadua e vuravura.a E veiyabaki, e veisoliyaki e rauta ni 60 na milioni na iVolatabu, oqo na iVolatabu taucoko se dua na kena iwase. Na isevu ni ilavelave e taba ena misini ni itabaivola a tabaka o Johannes Gutenberg, na daubulimisini ni Jamani ena 1455. Mai na gauna oya, e vakabauti ni sa tabaki (ivola taucoko se vakatikina) e vanabilioni na kena ilavelave. Se sega ni dua tale na ivola, ivola vakalotu se ivola cava ga, me bau volekata na iwiliwili oqori.
Ena itukutuku ni veigauna, na iVolatabu tale ga e ivola e vakadewataki vakalevu duadua. Na iVolatabu taucoko se so na kena wase e vakadewataki ena 2,100 vakacaca na vosa.b E sivia ni 90 na pasede ni kawatamata e tiko e dua nodra iVolatabu ena nodra vosa, se ivola taucoko se dua na kena iwase.2 E ulabaleta gona na iVolatabu na iyala ni vanua, na duidui vakayavusa se vakamatatamata.
De na sega ni uqeti iko na matanifika vaka oqo mo lai vakadikeva kina na iVolatabu. Ia, e veivakadrukai na levu ni kena tabaki kei na kena vakadewataki, sa ivakadei ga ni taleitaki e vuravura raraba na iVolatabu. Ni ivola voli vakalevu duadua qai veisoliyaki vakalevu duadua tale ga ena itukutuku ni veigauna, ena vinaka kina mo vakadikeva.
[iVakamacala e ra]
a E vakabauti ni ikarua ni ivola me veisoliyaki vakalevu na ivola lailai waqa damudamu na Quotations From the Works of Mao Tse-tung. Nanumi ni veisoliyaki se volitaki e rauta ni 800 na milioni na kena ilavelave.
b Na iwiliwili oqo e yavutaki ena ka e tabaka na United Bible Societies.
[iYaloyalo ena tabana e 6]
Na Gutenberg Bible ena vosa vakalatina, na isevu ni dua taucoko na ivola e taba ena misini