Tukutuku ni Matanitu Nb. 35

Era na Veilomani Rawa na Tamata Kece?

Sa Batabata Mai na Loloma

E VICAVATA na milioni era nuiqawaqawa era galili, qai sega ni dua me vakacegui ira. E kaya e dua na marama daucakabisinisi e liu: ‘Dua na yakavi, mai tukituki e noqu katuba e dua na yada keirau vakaitikotiko ena tabavale vata ga, e kaya ni galili. Au vosa vakamalua vua, au qai tukuna vakadodonu niu osooso. Kere veivosoti sara o koya ni mai vakasosataki au, a lesu tale.’

Ka ni rarawa ni bogi ga oya, a vakamatei koya ga vakataki koya na yada oya. E muri, sa qai kaya na marama daucakabisinisi ni sa “bau vuli sara ga mai kina.”

Dau yaco na leqa ni sega na loloma. Ena veivala vakaduikaikai mai Bosnia kei Herzegovina, rau a tiki ni vanua tu e liu kei Yugoslavia, e sivia na duanamilioni era cemuri mai nodra vale, ra qai vakamatei e vicasagavulu na udolu. O cei era vakayacora oya? “O ira ga keimami dau bula vata tu e liu,” e kaya ena rarawa e dua na goneyalewa e cemuri mai na nona koro. “Keimami kilai ira vinaka.”

E vicavata na udolu era labati mai Ruada, ia o ira na veilabati era a dau bula vata tu ga e liu. “Era [bula] vata na Hutu kei na Tutsi, era vakawati veicurumaki, a sega ni bibi vei ira era sega tale ga ni via vakawa se o cei e Hutu se o cei e Tutsi,” e kaya na New York Times. “Ia vakasauri ga, sega ni macala se cava e vakavuna,” sa “carubi na veilabalabati.”

Era bula veitikivi tale ga vaka oya mai Isireli na Jiu kei ira na kai Arapea, ia e levu era veicati. E sega ni duidui oqo kei na veika e yacovi ira tiko na Katolika kei na lotu Jaji mai Ailadi kei na levu tale na matatamata ena veivanua tale e so. Na noda gauna e ca duadua ni vakatauvatani kei na veigauna sa sivi ena lailai ni loloma.

Na Cava e sa Batabata Kina na Loloma?

Na isau ni taro oqo e tiko vua na Daubulibuli. Na nona Vosa, na iVolatabu, e vakatoka na veisiga eda bula tu kina oqo me “veisiga mai muri.” Oqo na gauna e kaya na parofisai vakaivolatabu nira na “sega ni tovo vakatamata” kina na tamata. Sa tukuna tu mai o Jisu Karisito ni na “batabata mai na nodra loloma na lewe vuqa” ena “veigauna dredre” oqo, e vakatokai tale ga ena iVolatabu me “vakataotioti kei vuravura.”​—2 Timoci 3:1-5, VV; Maciu 24:3, 12.

Na lailai ni loloma nikua sa vakadinadinataka sara tu ga nida sa bula donuya na iotioti ni veisiga ni vuravura oqo. Ka ni marau ni vakadinadinataka tale ga ni sa na vakarau kau laivi na vuravura tawavakalou oqo qai kena isosomi na kawatamata yalododonu era liutaki ena loloma.​—Maciu 24:3-14; 2 Pita 2:5; 3:7, 13.

Ia e tiko beka na yavu vinaka meda vakabauta kina ni na yaco dina na veisau​—mera vulica na tamata kece ga mera veilomani ra qai bula veisaututaki?

Ena Vakavatukana na Veilomani Dina

“KO CEI na kai noqu?” e tarogi Jisu e dua na loya ena imatai ni senitiuri. Sega ni vakataratutu ni a kila ni na cavuta ga o Jisu, ‘O ira na wekamu na Jiu.’ Ia ena italanoa me baleta na kai Samaria dauloloma, sa qai vakaraitaka kina o Jisu nira kai noda na tamata ni veivanua kece ga.​—Luke 10:29-37; Joni 4:7-9.

E vakabibitaka o Jisu ni dodonu me tarava na noda lomana na Kalou na noda lomani ira na kai noda. (Maciu 22:34-40) Ia sa bau dua oti na ilawalawa tamata me laurai vei ira nira lomani ira dina na kai nodra? Io, o ira na lotu Vakarisito taumada! Era kilai tani ena nodra dau lomani ira na tani.​—Joni 13:34, 35.

Vakacava nikua? Era tu beka o ira e kune vei ira na loloma vakarisito? E kaya na Encyclopedia Canadiana: “Ena nodra cakacaka na iVakadinadina i Jiova, e raici kina na kena vakabulabulataki kei na kena tauyavutaki tale na lotu Vakarisito taumada eratou a tekivutaka o Jisu kei na nona tisaipeli . . . Na tamata kece ga era veitacini.”

Na cava e vakaibalebaletaki tiko e kea? Na yalo ni veicati vakaduikaikai, duidui vanua, se yavusa ena sega ni rawai ira vakadua na iVakadinadina i Jiova mera cata na kai nodra. Nira sa tukitukia oti vakaivakatakarakara na nodra iseleiwau me batinisiviyara kei na nodra moto me isele ni sasamaki, era na sega tale kina ni veivakamatei. (Aisea 2:4) Na ka ga era kilai tani kina na iVakadinadina oya nira dau vakaliuliu mera vukei ira na kai nodra.​—Kalatia 6:10.

Sa rauta me vola oqo na edita ni Sacramento Union mai Kelifonia: “Vakalekaleka ga, kevaka me muria o vuravura taucoko na nodra ivakavuvuli na iVakadinadina i Jiova, sa na oti vakadua na vakadavedra kei na veicati, ia e sa na ivakarau ni bula na loloma.” E kaya e dua na dauvolavola ena ivoladraurau ni Hungary na Ring: “Noqu nanuma ni kevaka mera sa iVakadinadina i Jiova kece na lewe i vuravura, sa na mudu vakadua e kea na ivalu, sa na nodra cakacaka ga na ovisa mera lewa vakamatau na veitosoyaki ni motoka kei na veisoliyaki ni pasipote.”

Ia sa macala ga ni na vinakati e dua na veisau vakaitamera e vuravura raraba kevaka mera veilomani na tamata kece ga. Ena yaco vakacava na veisau oya? (Raica mada na taqana e sau.)

Nira sa Veilomani na Tamata Kece

Na masu ivakavuvuli e cavuta o Jisu Karisito e vakaraitaka ni sa voleka oqo e dua na veisau levu. Ena nona ivunau rogo, na Vunau ena Ulunivanua, e vakavulici keda kina o Jisu meda masuta: “Me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.”​—Maciu 6:10, Vakavakadewa Vou.

Na cava na Matanitu ni Kalou? Na Matanitu ni Kalou e dua dina na matanitu, ena veiliutaki mai lomalagi. Oya na vuna e vakatokai kina me “matanitu vakalomalagi.” Sa lesi Jisu, na “Tui ni Sautu,” na Tamana me kena iliuliu.​—Maciu 10:7; Aisea 9:6, 7; Same 72:1-8.

Ni sa lako mai na Matanitu ni Kalou, na cava ena yacova na vuravura oqo sa kena ivakarau levu tu na veicati? “Na matanitu” oya ena “vurumemeataka ga ka vakaotia” na veimatanitu dauveivakalaboci kece ga ni vuravura oqo. (Taniela 2:44) E kaya na iVolatabu: “Ko vuravura sa lako tani yani . . . , ia ko koya sa cakava na ka sa vinakata na Kalou, sa tu dei ga ka sega ni mudu.”​—1 Joni 2:17.

E kaya na iVolatabu me baleta na vuravura vou ni Kalou: “Era na taukena na vanua ko ira na yalododonu, ka tiko kina ka sega ni mudu.” (Same 37:9-11, 29; Vosa Vakaibalebale 2:21, 22) Sa na dua dina na gauna lagilagi oya! “Sa na sega tale na mate; sa na sega tale ga na rarawa se na tagi se na vutugu.” (Vakatakila 21:4, VV) O ira mada ga na sa mate tu era na bula tale, kei na vuravura taucoko sa na veisau me parataisi.​—Aisea 11:6-9; 35:1, 2; Luke 23:43; Cakacaka 24:15.

Ke da via bula ena vuravura vou ni Kalou, e dodonu meda veilomani, me vaka ni vakavulici keda kina na Kalou. (1 Cesalonaika 4:9) E kaya e dua e vuli iVolatabu tiko mai Esia: “Au rai vakanamata tu oqo ina gauna e yalataka na iVolatabu nira na veilomani kina na tamata kece ga.” Ia meda kila tiko, ni ka sa yalataka na Kalou ena sega sara ni daro! “Ka’u sa cavuta,” e kaya, “ka’u na vakayacora talega.”​—Aisea 46:11.

Ia ke oni via marautaka na bula ni sa veiliutaki na Matanitu ni Kalou, e dodonu mo ni vulica na iVolatabu me vaka era sa cakava tiko e vicavata na milioni na tamata yalorawarawa e veiyasa i vuravura kece. (Joni 17:3) Ena yaga mo ni vulica na ivola e 32 na taqana Na Cava e Loma ni Kalou vei Keda? Me dua nomu lavelave, vakalewena na fomu ni kerekere ena taqana e 3 qai vakauta ina neitou itikotiko liu e voleka duadua vei kemuni.

□Au vinakata me dua noqu ivola Na Cava e Loma ni Kalou vei Keda?

□Au kerea me dua me mai vakavulici au wale e vale ena iVolatabu.

[iTaba ni Credit Line ena tabana e 2]

Sniper and funeral in Bosnia: Reuters/Corbis-Bettmann