Wase Tinikaciwa

Vakavotui na Veivakaisini!

Aisea 58:1-14

1. Rau raica vakacava na veivakaisini o Jisu kei Jiova? E laurai votu vakacava na veivakaisini ena gauna i Aisea?

“DOU sa rairai etaudaku vei ira na tamata me tamata dodonu,” e tukuna o Jisu vei ira na iliuliu ni lotu ena nona gauna, “ia eloma dou sa sinai e na dauveivakaisini kei na ka e sega ni dodonu.” (Maciu 23:28) E vakaraitaka o Jisu na rai i Tamana vakalomalagi ni vakacala na veivakaisini. E vakavotui ena ika58 ni wase ni parofisai i Aisea na veivakaisini e yaco tiko e Juta. E laurai votu na veisisivotaki, veivakalolomataki, kei na ivakarau voravora, qai vakatatabutaki ni Siga ni Vakacecegu me ka vakarairai ga. E caka ga me rawa na nodra qaravi Jiova na lewenivanua qai ka ga vakarairai na nodra dau lolo. Sa rauta me vakavotui ira o Jiova!

‘Vakatakila na Nodra iValavala Ca na Tamata’

2. Na mataqali yalo cava a tu vei Aisea ni kacivaka na itukutuku i Jiova? O cei era vakataki koya nikua?

² Dina ga ni vakasisila vei Jiova na ivalavala i Juta, e se kerea ga na matanitu oya me veivutuni. Ia a sega ni vinakata o Jiova me tauri cala na nona veivunauci. Oya na vuna e vakaroti Aisea kina: “Mo kaci vakadomoi levu, kakua ni vakacegu, tabalaka na domomu me vaka na davui, ka vakatakila vei ira na noqu tamata na nodra talaidredre, ia ki na mataqali i Jekope na nodrai valavala ca.” (Aisea 58:1) Era rairai cati Aisea na tamata ena nona tukuna vakadodonu na vosa i Jiova, ia e sega ni vakasuka o koya. E se tu ga vua na yalo a tu vua ena gauna a kaya kina: “Koi au oqo; mo ni talai au.” (Aisea 6:8) E ivakaraitaki vinaka dina ni dauvosota o Aisea vei keda na iVakadinadina i Jiova ena gauna oqo, baleta nida vakaroti meda vunautaka na Vosa ni Kalou da qai vakavotuya tale ga na veivakaisini ni lotu!​—Same 118:6; 2 Timoci 4:1-5.

3, 4. (a) Era veivakaisini vakacava na tamata ena gauna i Aisea? (b) Na cava e yaco dina tiko e Juta?

³ E kena irairai nira vakasaqarai Jiova na tamata ena gauna i Aisea, ra marautaka tale ga nona dau tauca na lewa dodonu. Eda wilika kina na vosa oqo i Jiova: “Era sa vakasaqarai au tiko e na veisiga; era sa reki ni ra kila na noqu sala, me vaka na matanitu sa daucaka dodonu, ka sa sega ni biuta na lewa ni nodra Kalou; era sa tarogi au e na vuku ni veilewai dodonu, era sa marau me ra torovi koya na Kalou.” (Aisea 58:2) Ia, e ka dina beka na nodra marautaka na sala i Jiova? Sega. E ka vakarairai wale na nodra “vaka na matanitu sa daucaka dodonu.” E vakadinadinataki ga nira “biuta na lewa ni nodra Kalou.”

⁴ Na ka era cakava e via tautauvata kei na veika e qai vakaraitaki e muri vua na parofita o Isikeli. E tukuna vei Isikeli o Jiova nira veikayaka tiko na Jiu: “Tou mai rogoca mada, se vosa cava sa yaco maivei Jiova.” Ia e vakaraitaka vei Isikeli o Jiova na nodra veivakaisini ni kaya: “Ra sa lako mai vei iko, . . . ka ra rogoca na nomu vosa, ka ra sa sega ni cakava: ni sa tiko e na gusudra na vosa vakayalololoma, ia na lomadra sa muria na nodra daukocokoco ga. Ka raica, ko sa tautauvata vei ira kei na nona meke ni veilomani e dua sa domo vinaka, ka sa qiria vakavinaka nai qiriqiri: ni ra sa rogoca na nomu vosa, ka sega ni cakava.” (Isikeli 33:30-32) Era kaya tale ga na bula vata kei Aisea nira vakasaqarai Jiova, ia era sega ga ni muria na nona vosa.

Veivakaisini Nira Lolo

5. Era saga vakacava na Jiu me vakadonui ira na Kalou? Na cava e tukuna vei ira o Jiova?

⁵ Era vakamuria na Jiu na ivalavala ni lolo nira saga me vakadonui ira na Kalou, ia sa qai yawaki ira ga o Jiova baleta ni veivakaisini na nodra lolo. Na levu ni nodra viavia yalododonu era sega ni taura rawa se cava e yawaki ira kina o Jiova, ra mani tarogi koya: “A cava keimami sa lolo kina, ka ko ni sa sega ni raica? ka vakararawataki keimami kina, ka ko ni sa sega ni kila?” E sauma vakadodonu o Jiova: “Raica, e na nomudou siga ni lolo dou sa goleva na marau, ia dou sa vakasautaka na nomudou tamata cakacaka kecega. Raica, dou sa lolo ka sa tubu kina na veileti kei na veicudruvi, ka me veivacu kina e na ligai valavala ca: dou na sega ni lolo me vaka e na siga edaidai, me rogo kina kicake na domomudou. Me vaka li oqo na lolo ka’u sa vinakata, na siga me vakamalumalumutaki koya kina na tamata? me sa vakacuva li na uluna me vaka na kuta, ka tevuka nai sulu taga kei na dravusa me nonai davodavo? ko na vakatoka li na ka oqo na lolo, na siga sa vinakata ko Jiova?”​—Aisea 58:3-5.

6. Na cava era dau cakava na Jiu e vakaraitaka ni veivakaisini na nodra lolo?

⁶ Era rairai me vaka na tamata dodonu ena gauna ni lolo, era bau kerea tale ga me lewai ira vakadodonu o Jiova, ia ena gauna oqori era dau vakaliuca ga kina na veika era gadreva kei na nodra bisinisi. Era veicati, era veivakalolomataki, ra qai dau vakayacora na itovo voravora. Era saga mera vunitaka na nodra itovo ca oya ena nodra vakaloloku vakarairai. Era vakacuva na uludra me vaka na vu ni kuta, nira dabeca na isulu taga kei na dravusa me vakaraitaka nira sa veivutunitaka na nodra ivalavala ca. E yaga beka na ka era cakava oya ke ra be tiko ga? Era sega mada ga ni rarawa se veivutuni me vaka e dau vakilai ena gauna ni lolo dina. Dina ga ni rogo levu na nodra tagi, ia e sega ni rogoci mai lomalagi.

7. Era veivakaisini vakacava na Jiu ena gauna i Jisu? Era veivakaisini vakacava e levu na tamata ena gauna oqo?

⁷ O ira na Jiu ena gauna i Jisu era dau lolo tale ga vakarairai, e so era lolo vakarua ena dua na macawa. (Maciu 6:16-18; Luke 18:11, 12) E levu tale ga na iliuliu ni lotu era vakataki ira ena gauna i Aisea nira ivalavala kaukaua ra qai dau veivakasaurarataki. Sa rauta me vakavotui ira na iliuliu ni lotu dau veivakaisini ena nona gauna o Jisu ni tukuna vei ira ni tawayaga na nodra lotu. (Maciu 15:7-9) E vaka kina nikua, era vicavata na milioni “era kaya ni ra kila na Kalou, ia era sa cakitaki koya e na nodra i tovo. Era sa tamata vakasisila, dau talaidredre ka sega ni rawa me ra cakava rawa e dua na ka vinaka.” (Taito 1:16, VV) Era namaka me lomani ira na Kalou, ia e vakaraitaka na nodra itovo nira sega ni lomadina. Ena yasana adua, eda qarava dina tiko na Kalou na iVakadinadina i Jiova da qai veilomani dina vakamataveitacini.​—Joni 13:35.

Na Veivutuni Dina

8, 9. Na cakacaka cava e salavata kei na veivutuni dina?

⁸ E sega ni vinakata wale ga o Jiova mera lolovaka na nodra ivalavala ca na nona tamata; e vinakata ga mera veivutunitaka. Ena qai rawa kina me vakadonui ira. (Isikeli 18:23, 32) E vakaraitaka o koya ni dodonu me veivutunitaki na ivalavala ca ra qai saumaki mai me qai rawa kina ni vakaibalebale na lolo. Vakasamataka mada na veitaro e taroga oqo o Jiova mera liaci ira kina: “Sa sega li ni vakaoqo na lolo ka’u sa vinakata? mo dou sereka nai vesu sa sega ni dodonu, ka luvata nai kaukau bibi, ka sereki ira na bobula me ra lalaga, ka mo dou musuka kece talega nai vua?”​—Aisea 58:6.

⁹ Na ivesu kei na ikaukau, se ivua bibi erau vakatakarakarataka vinaka na veivakabobulataki. E veicalati dina nodra dau lolo na Isireli ra qai vakararawataki ira tiko na wekadra era vakabauta vata. E dodonu ga mera muria na ivakaro: “Mo lomani koya ga na kai nomu me vaka ko sa lomani iko.” (Vunau ni Soro 19:18) Mera sereki ira kece sara era vakararawataki ira ra qai vesuki ira tiko vakatawadodonu mera nodra bobula.a E sega ni rawa ni sosomitaka na lolo vakarairai na sokalou dina kei na veilomani vakamataveitacini. E vola na parofita o Maika, a bula tale tiko ga ena gauna i Aisea: “Cava tale sa taroga maivei iko ko Jiova, mo caka dodonu ga, ka mo vinakata na yalololoma, ka mo yalomalumalumu talega ni drau lako vata kaya na nomu Kalou?”​—Maika 6:8.

10, 11. (a) Na cava e vinaka cake mai na nodra dau lolo na Jiu? (b) Eda na muria vakacava na lotu Vakarisito ena gauna oqo na ivakasala i Jiova vei ira na Jiu?

¹⁰ Dodonu me laurai nodra caka dodonu, yalololoma kei na yalomalumalumu ena nodra dau caka vinaka vei ira na tani, ni oya na ka e yavutaki kina na Lawa i Jiova. (Maciu 7:12) A vinaka cake mera wasea na nodra iyau vei ira na dravudravua mai na nodra dau lolo. A taroga o Jiova: “Sa vakane [na lolo au vinakata] .  . ., me soli madrai vua sa viakana? ia ko ira sa rarawa ka luveniyali mo kauta ga ki na nomu vale; ni ko sa kunea e dua sa luvawale, mo vakasulumi koya, ia mo kakua ni vunitaki iko mai vua na wekamu dina?” (Aisea 58:7) Io, e vinaka cake mai na nodra lolo vakarairai na nodra solia na kakana, isulu, kei na vale vei ira na lewe i Juta era vakaloloma tu, nira wekadra dina.

¹¹ A sega ni baleti ira ga na Jiu ena gauna i Aisea na ivakasala ni veilomani vakamataveitacini e vakarota oya o Jiova. E baleti keda tale ga na lotu Vakarisito. Oya na vuna e vola kina na yapositolo o Paula: “O koya oqo, ni sa rawa, me da caka vinaka vei ira na tamata kecega, ka vakalevu vei ira era veitokani e na vakabauta.” (Kalatia 6:10) Me kilai tani na ivavakoso Vakarisito me vanua ni vakacegu kei na veilomani baleta nida sa bula tiko ena gauna lewalewai dredre.​—2 Timoci 3:1, NW; Jemesa 1:27.

Era Vakalougatataki na Talairawarawa

12. Na cava ena cakava o Jiova ke ra talairawarawa na nona tamata?

¹² Mera bau talairawarawa mada ga ina ivakasala loloma i Jiova na nona tamata! E kaya o Jiova: “Ena qai kida mai na nomu rarama me vaka na mataka; ka na tubu vakasauri mai na nomu bula vinaka: ena qai liutaki iko na nomu cakacaka dodonu, ia nai ukuuku i Jiova ena kemui murimuri: ko na qai masu, ka na rogoci iko ko Jiova; ko na qai tagi, ka na kaya mai ko Jiova, Koi au oqo!” (Aisea 58:8, 9a) E veivakauqeti dina na vosa oya! O Jiova e dau vakalougatataki ira qai taqomaki ira tale ga na vinakata na ivalavala dodonu kei na yalololoma. Ke ra veivutunitaka na nodra itovo ca kei na nodra veivakaisini na tamata i Jiova ra qai talairawarawa vua, ena qai vinaka cake na kedra ituvaki. Ena qai vakabula vakayago, vakayalo na matanitu oya o Jiova. Ena taqomaki ira tale ga, me vaka e cakava vei ira na tukadra nira biuti Ijipita mai. Ena totolo nona rogoca na nodra tagi kei na nodra kere veivuke.​—Lako Yani 14:19, 20, 31.

13. Era na vakalougatataki vakacava na Jiu ke ra muria na ivakasala i Jiova?

¹³ E qai kuria o Jiova na ivakasala sa solia oti: “Kevaka ko biuta tani e na kemudou maliwa nai vua [na veivakabobulataki vakasaurara], na dusi qaqalo [oqo e rairai veibeitaki vakailasu], kei na vosa ca; ia kevaka ko daulomasoli vua sa viakana, ka sa vakamamautaka na yalo i koya sa rarawa; ena qai cadra na nomu rarama e na butobuto, kei na nomu bogi loaloa me vaka na siga levu.” (Aisea 58:9b, 10) Na daunanumi keda ga kei na yalokaukaua ena vakaleqai keda, ena cudruvi keda tale ga kina o Jiova. Ia ena vakalougatataka o Jiova na noda yalovinaka kei na noda dau lomasoli vei ira era viakana se rarawa. Ke ra muria mada ga na Jiu na ivakasala oya! Era na vutuniyau ra qai rarama vakayalo me vaka na siga levu, era na sega ni butobuto. Ia na ka e bibi cake, ena rokovi qai vakalagilagi kina o Jiova baleta ni vu sara ga mai vua na nodra vakalougatataki.​—1 Tui 8:41-43.

Vakatikori Tale na Matanitu

14. (a) Era raica vakacava na vosa i Aisea na tamata era bula vata? (b) Na cava e yalataka o Jiova?

¹⁴ E ka ni rarawa ni a sega ni muria na ivakasala i Jiova na matanitu oya ni a qai ca ga vakalevu. Mani vakatara o Jiova mera kau vakabobula, me vaka ga a vakarota. (Vakarua 28:15, 36, 37, 64, 65) Ia, e veivakacegui na vosa i Jiova e tarava ena gusu i Aisea. A yalataka na Kalou nira na veivutuni e dua na ilawalawa lailai ra na qai lesu ena marau ina vanua o Juta, dina ga ni sa laladidi tu.

15. Na veivakatikori marautaki cava e parofisaitaka o Jiova?

¹⁵ Ni dusia tiko nodra vakatikori lesu na nona tamata ena 537 B.S.K., e kaya o Jiova ena gusu i Aisea: “O Jiova ena tuberi iko tikoga, ka vakamamautaka na yalomu e na dausiga; ka vakaukauwataka na suimu; ia ko na vaka na were sa vakasuasuataki, ka vaka nai vurevure sa sega ni yali na kena wai.” (Aisea 58:11) Ena veisautaka o Jiova na nodra vanua na Isireli mai na vanua dravuisiga me vanua bulabula. Ena vakalougatataki ira tale ga na nona tamata era veivutuni ni vakabula na ‘suidra’ mai na nodra mate tu vakayalo me bulabula vinaka tale. (Isikeli 37:1-14) Era na yaco na tamata mera vaka “na were sa vakasuasuataki” e bini kina na vuanikau vakayalo.

16. Ena vakatikori tale vakacava na vanua?

¹⁶ Na veivakatikori oqo ena okati kina na kena tara vou na koro era vakarusa na kai Papiloni ena 607 B.S.K. “Ia ko ira na nomu era na tara tale na veikoro sa lala makawa; ko na tauyavutaka tale na yavu ni tabatamata eliu sara; ia ko na vakatokai, O koya ka vakavinakataka na tikina sa kabasu, O koya ka vakavinakataka tale, na sala me tawa na vanua.” (Aisea 58:12) Na rua na malanivosa “na veikoro sa lala makawa” kei “na yavu ni tabatamata eliu sara” (se, na veiyavu sa lala tu ena vica na itabatamata) e vakaraitaka nira na tara tale na veikoro e Juta era sa rusa tu, vakauasivi o Jerusalemi, o ira na kena vo era suka tale i Juta. (Niemaia 2:5; 12:27; Aisea 44:28) Era na vakavinakataka “na tikina sa kabasu,” na veivanua e kaca ena bai kei Jerusalemi kei na veikoro tale e so.​—Jeremaia 31:38-40; Emosi 9:14.

Yaga ni Vakatatabutaki ni Siga ni Vakacecegu

17. E kerei ira vakacava na nona tamata o Jiova mera talairawarawa ina lawa ni Siga ni Vakacecegu?

¹⁷ Na Siga ni Vakacecegu e ivakaraitaki ni nona kauaitaka vakabibi na Kalou na nodra bula vakayago kei na nodra bula vakayalo na nona tamata. E kaya o Jisu: “E a caka na Siga ni Vakacecegu me baleta na tamata.” (Marika 2:27, VV) E rawa mera vakaraitaka na Isireli na nodra lomana na Kalou ena siga e vakatabuya o Jiova. Ia, donuya na gauna i Aisea sa yacana wale ga na vakatatabutaki ni Sigatabu se Siga ni Vakacecegu, a siga era dui caka nodra ga kina na tamata. Sa rauta me baci vakadodonutaki ira tale na nona tamata o Jiova. E saga tale me tara na lomadra. E kaya: “Kevaka ko na tarova na yavamu e na siga tabu, mo kakua ni cakava na ka ko sa vinakata ga e na noqu siga tabu; ka sa vakatoka na siga tabu me ka e rekitaki, na siga tabu sa nei Jiova na siga me dokai; ka dokai koya, ka sega ni cakava kina na nomu cakacaka, se muria kina na ka ko sa vinakata, se vosa wale kina; ko na qai rekitaki Jiova; ia ka’u na kauti iko mo lako voli e na veiyasana cecere kei vuravura, ka vakani iko e nai votavota i Jekope na tamamu: ni sa cavuta na ka oqo na gusu i Jiova.”​—Aisea 58:13, 14.

18. Na cava ena yaco ni sega ni vakatatabutaka o Juta na Siga ni Vakacecegu?

¹⁸ Na Siga ni Vakacecegu e siga me dau vakasamataki kina na veika vakayalo, e siga ni masu, kei na sokalou vakavuvale. E dodonu me vukei ira na Jiu mera vakasamataka kina na veika vinaka e cakava ena vukudra o Jiova kei na kena vakaraitaki ena nona Lawa na nona loloma kei na nona dodonu. Ke ra vakatatabutaka gona na Siga ni Vakacecegu era na veivolekati sara kei na nodra Kalou. Ia, na kena veibasai ga e yaco. Era vakatanitaka na lawa ni Siga ni Vakacecegu, ra sega ni tauca kina na veivakalougatataki i Jiova.​—Vunau ni Soro 26:34; 2 Veigauna 36:21.

19. Era na vakalougatataki vakacava na tamata ni Kalou ke ra vakatatabutaka tale na Siga ni Vakacecegu?

¹⁹ Ia, kevaka era veisautaki ira na Jiu mera vakatatabutaka na Siga ni Vakacecegu, era na vakalougatataki vakalevu. Era na vakila ena veibasoga ni nodra bula na yaga ni sokalou dina kei na nodra vakatatabutaka na Siga ni Vakacecegu. (Vakarua 28:1-13; Same 19:7-11) Me kena ivakaraitaki, ena kauti ira na nona tamata o Jiova mera “lako voli e na veiyasana cecere.” Na vosa oqori e vakaraitaka nira na taqomaki ra qai qaqa tale ga vei ira na nodra meca. A dau kena ivalavala ena gauna oya ni o koya e lewa na veivanua cecere, me vaka na veidelana kei na ulunivanua, e dau lewa na vanua taucoko. (Vakarua 32:13; 33:29) Ena dua na gauna e talairawarawa kina o Isireli vei Jiova, e taqomaki ira o koya ra qai rerevaki ira ka dokai ira na Isireli na veimatanitu. (Josua 2:9-11; 1 Tui 4:20, 21) Ke ra talairawarawa tale vei Jiova, era na vakila tale na ituvaki lagilagi oya. Ena solia kece o Jiova “nai votavota i Jekope” vei ira na nona tamata, oya na veivakalougatataki a yalataka vei ira na tukadra, vakauasivi na nodra taukena na Vanua Yalataki.​—Same 105:8-11.

20. Na cava e noda ‘ ivakavakacegu’ na lotu Vakarisito?

²⁰ Na cava eda vulica kina na lotu Vakarisito? Sa bokoci na Lawa i Mosese ena gauna e mate kina o Jisu Karisito, okati kina na vakatatabutaki ni Siga ni Vakacecegu. (Kolosa 2:16, 17) Ia, na vakatatabutaki ni Siga ni Vakacecegu a tiko na kena inaki, oya mera vakaliuca o ira na Juta na veika vakayalo, mera toro volekati Jiova tale ga. E se inaki tiko ga ni noda qaravi Jiova edaidai. (Maciu 6:33; Jemesa 4:8) E vola tale ga o Paula ena nona ivola vei ira na Iperiu: “Sa vo tiko e dua nai vakavakacegu me nodra na tamata ni Kalou.” Eda curu ina ‘ivakavakacegu’ oqo na lotu Vakarisito nida talairawarawa vei Jiova da qai muria na yalododonu e yavutaki ena noda vakabauta na dra i Jisu Karisito e liviraki ena vukuda. (Iperiu 3:12, 18, 19; 4:6, 9-11, 14-16) O koya gona, noda siga ni vakacecegu na lotu Vakarisito e sega ni dua ga na siga ena dua na macawa, e veisiga kece ni noda bula.​—Kolosa 3:23, 24.

‘Lako Voli ena Veiyasana Cecere’ o Isireli Vakayalo

21, 22. E vukei ira vakacava na Isireli ni Kalou o Jiova mera ‘lako voli ena veiyasana cecere’?

²¹ Me tekivu mai na gauna era sereki kina vei Papiloni na Ka Levu ena 1919, era sa muria vinaka tiko na lotu Vakarisito lumuti na ka e vakatakarakarataki ena Siga ni Vakacecegu. Oqo e vakavuna me ‘kauti ira voli kina ena veiyasana cecere kei vuravura’ o Jiova. E cakava vakacava? Ena 1513 B.S.K., a yalataka kina o Jiova vei ira na kawa i Eparama ni kevaka era vakarorogo vua, era na yaco mera matanitu bete ra qai matanitu tabu. (Lako Yani 19:5, 6) E maroroi ira voli o Jiova ena 40 na yabaki era tu kina ena vanualiwa, me vaka e maroroya na luvena na ikeli, e solia tale ga vakayauyau o Jiova na veika era gadreva. (Vakarua 32:10-12) Ni toso na veiyabaki era sega ni dei ena nodra vakabauti Jiova na lewe ni matanitu, e sega kina ni soli vei ira na itavi dokai kece e rawa ni nodra. Ia e se tiko ga nikua e dua na matanitu bete e nei Jiova. E vakatokai me Isireli vakayalo, se Isireli ni Kalou.​—Kalatia 6:16; 1 Pita 2:9.

²² Ena “gauna ni vakataotioti” oqo, sa cakava tiko na matanitu vakayalo oqo na veika e sega ni cakava rawa o Isireli makawa. E vakabauti Jiova tiko ga. (Taniela 8:17) Nira muria na ivakatagedegede cecere i Jiova na lewe ni matanitu oqo, e vaka sara ga e biuti ira ena yasana cecere o Jiova. (Vosa Vakaibalebale 4:4, 5, 8; Vakatakila 11:12) Era marautaka tu e dua na ivakatagedegede ni bula uasivi baleta nira taqomaki mai na veika dukadukali. Era sega ni vakaunodra, era “rekitaki Jiova” ga nira muria na nona Vosa. (Same 37:4) E taqomaki ira tiko ga vakayalo o Jiova dina ga nira cati ena veiyasa i vuravura. Me tekivu mai na 1919 sa sega ni vakaleqai tale na nodra “vanua” vakayalo. (Aisea 66:8) Era se matataka tiko ga na yacana cecere, na yaca era kacivaka tiko ena marau e veiyasa i vuravura. (Vakarua 32:3; Cakacaka 15:14) Era sa tomani ira tiko ena gauna oqo e dua na ilawalawa levu era yalomalumalumu mai na veimatanitu kece. Era kalougata tale ga o ira oqo ni vakavulici ira tiko o Jiova, mera rawa kina ni muria tiko na nona sala.

23. E vakani ira vakacava nona dauveiqaravi lumuti o Jiova “e nai votavota i Jekope”?

²³ E vakani ira nona dauveiqaravi lumuti o Jiova “e nai votavota i Jekope.” Ni vosa vakalougatataki Jekope, sega ni o Iso, na peteriaki o Aisake, a parofisaitaka nira na vakalougatataki kece sara o ira na vakabauta na Kawa yalataki i Eparama. (Vakatekivu 27:27-​29; Kalatia 3:16, 17) Era vakataki Jekope, sega ni o Iso, na lotu Vakarisito lumuti kei ira na nodra itokani nira vakavinavinakataka “na ka tabu,” vakauasivi na kakana vakayalo e solia tiko mai vakayauyau na Kalou. (Iperiu 12:16, 17; Maciu 4:4) Na kakana vakayalo oqo, e okati kina na nodra kila na veika sa cakava tiko o Jiova ena nona vakayagataka tiko na Kawa Yalataki kei ira na nona ilawalawa, e vakaukauataki ira, qai vakabulabulataki ira me rawa nira bulabula tiko kina vakayalo. E bibi gona mera dau vakayagataka na kakana vakayalo oqo ena nodra wilika ra qai vakasamataka vakatitobu na Vosa ni Kalou. (Same 1:1-3) E bibi tale ga mera dau veimaliwai kei ira era vakabauta vata ena veisoqoni vakarisito. E dodonu tale ga mera dei toka ga ena ivakatagedegede cecere ni sokalou dina nira wasea tiko na kakana vakayalo vei ira e so tale.

24. Me vakacava na nodra ivalavala na lotu Vakarisito nikua?

²⁴ Mera biuta tani mada ga na veivakaisini kece ga na lotu Vakarisito nira waraka tiko na veika e yalataka o Jiova. Mera taqomaki vakayalo tiko mada ga “e na veiyasana cecere kei vuravura” nira vakani tiko “e nai votavota i Jekope.”

[iVakamacala e ra]

[iYaloyalo ena tabana e 278]

Era lolo ra qai vakacuva na uludra na Jiu me vaka era veivutuni​—ia era sega ni veisautaka na nodra ivalavala

[iYaloyalo ena tabana e 283]

O ira na tu vei ira na iyau era vakavaletaki ira, vakasulumi ira, se vakani ira na vakaleqai

[iYaloyalo ena tabana e 286]

Ke veivutuni o Juta, ena tara tale na nona koro sa vakarusai