Sala Mo Maqosa Cake Kina ena Veivosaki

E DAU rawarawa beka vei iko na veivosaki? E levu e dau ka dredre sara vei ira na veivosaki, vakauasivi ke tukuni mera veivosaki kei na dua era sega ni veikilai. E rairai vu oqo ena nodra mamadua. Era na kaya beka: ‘Na cava meu veivosakitaka? Meu na tekivuna vakacava na veivosaki? Na cava meu cakava me tomani tiko ga kina?’ Ni caka na veivosaki, era dau vosa tiko ga vakalevu o ira na tamata doudou ra qai yalodei. Ena bau ka ni sasaga vei ira mera dau vakarorogo mera uqeti ira na tani mera vosa mai. O koya gona, o keda kece, ke da tamata mamadua se doudou, e dodonu meda saga meda maqosa ena veivosaki.

Tekivu e Vale

Meda maqosa ena veivosaki, vakaevei meda tekivu sara ga e vale? Na veivosaki e veivakayaloqaqataki ena rawa ni kuria na marau ena dua na matavuvale.

Na veivosaki vaka oqo e kena dina ga na veikauaitaki. (Vkru. 6:6, 7; Vkai. 4:1-4) Nida kauaitaka e dua, eda na veivosaki vata kei koya, eda na rogoci koya tale ga ni via tukuna e dua na ka. E ka bibi tale ga me tiko e so na ka yaga me rawa nida okata ena noda veivosaki. Ke sa tiko e dua na gauna tudei eda dau wili iVolatabu kina, eda vuli tale ga, ena levu sara na ka eda rawa ni veivosakitaka. E rawa tale ga ni ivurevure vinaka ni veivosaki na Dikeva na iVolatabu e Veisiga. Ena loma ni siga, e totoka sara beka na ka eda sotava ena cakacaka vakavunau. Eda wilika beka e dua na itukutuku vou, se itukutuku lasa. Meda saga mada ga meda dau wasea na veika oqo nida veivosaki vakavuvale. Oqo ena vukei keda tale ga meda dau veivosaki kei ira era sega ni lewe ni noda matavuvale.

Veivosaki kei na Dua Eda Sega ni Veikilai

Levu era sega ni rawata mera veivosaki kei na dua era sega ni veikilai. Ia, nira lomana na Kalou na iVakadinadina i Jiova, ra lomani ira tale ga na tani, era vulica kina vagumatua na iwalewale ni veivosaki me rawa nira vota yani na ka dina mai na iVolatabu. Na cava o rawa ni cakava mo maqosa kina ena tikina oqo?

E yaga dina na ivakavuvuli ena Filipai 2:4. Eda vakauqeti meda ‘kua ni nanuma na noda ka ga o keda, meda nanuma tale ga na nodra ka na tani.’ Vakasamataka mada vaka oqo: O na vulagi vua e dua ke o se sega ni sotavi koya vakadua. Na cava mo cakava me kua kina ni taqaya? Ena yaga vakalevu nomu matamamarau kei na nomu vakabula. Ia, e vica tale na tikina me nanumi.

O vosa beka yani ni vakasamataka tiko e so na ka. Ke o via talaucaka ga yani na nomu vakasama o qai sega ni kauaitaka na ka e tiko ena nona vakasama, o nanuma ni na kauai vakalevu ena nomu vosa? Na cava a cakava o Jisu ni sotava e dua na marama ena tobu mai Samaria? A tiko na nona vakasama na marama oya ena taki wai. Oqori sara ga na vanua e yavutaka kina o Jisu nodrau veivosaki, sega ni dede sa taladrodro nodrau veivosaki, rau lai tara sara na veika titobu vakayalo.—Joni 4:7-26.

Ke o dau kauai, o na rawa ni siqema na ka beka ena vakasamataka tiko e dua. E marau na kena irairai se rarawa? E sa qase sara beka, lokiloki? O na kila beka mai na irairai ni vale nira tiko kina na gone? E kena irairai beka ni tamata rawati koya, se dua e cumuwaqara voli ena nona saga me bula rawa? Ni o raica na iukuuku ni vale se veika e taukena o itaukeinivale, e vakaraitaka beka ni tamata dau lotu? Ke o vakasamataka tiko na veika oqo ni o tekivu vosa vua, ena rawa ni raica ni o kauaitaki koya.

Ke drau sega ni veirai mata kei itaukeinivale, e loka tu ga nona katuba o qai vosa tiko yani i tuba, na cava beka o rawa ni kila e kea? E rairai taqaya voli. De dua o rawa ni vakayagataka oya me tekivu kina nomudrau veivosaki?

Ena so na vanua, ena rawarawa nomu uqeta e dua me vosa mai ke o tukuna vua na ka e baleti iko—o cei o iko, na vuna o lako yani kina i nona vale, na vuna o vakabauta kina na Kalou, na vuna o tekivu vulica kina na iVolatabu, kei na yaga ni iVolatabu vei iko. (Caka. 26:4-23) Ia, me na salavata kei na yalomatua nomu cakava oqo, me na matata tale ga na vuna o via cakava kina. Oqo e rawa ni uqeti koya me tukuni koya, me vakaraitaka tale ga na nona rai.

So na vanua sa kena ivalavala ga mera dau kauaitaki na vulagi. O na sureti sara beka i vale mo lai dabe. Ni o sa dabe, kevaka o taroga ena yalo vakarokoroko se ratou vakaevei tiko na lewenivale o qai vakarorogo vinaka ni saumi mai na taro, ena rawa tale ga ni vakarorogo vinaka o itaukeinivale ina nomu ivakamacala. E so era kauaitaki ira vakalevu sara na vulagi, ena rawa ni balavu toka kina na veikidavaki. Ena veikidavaki oqo, de dua era na raica ni so na ka oni tautauvata kina. Oqo e rawa ni idewadewa ina dua na veivosaki yaga vakayalo.

Vakacava ke ra tiko ena nomu itikotiko e so era vosataka na vosa tani? O na veivosaki vakacava kei ira? Ke o vulica mada ga e so na vosa rawarawa ni vakabula era vosataka na duikaikai oqori, era na kila kina ni o kauaitaki ira. Oqo e rawa ni idewadewa ina dua sara na veivosaki vinaka.

Sala me Tomani Tiko ga Kina na Veivosaki

E bibi mo kauaitaka na nanuma i koya drau veivosaki tiko me rawa ni tomani tiko ga kina na veivosaki. Uqeti koya me vosa mai ke vinakata. Ena yaga sara i ke na taro e vakasamataki vinaka. E vinaka duadua na taro ena tarogi kina na nona vakasama o koya drau veivosaki, baleta ni na sega ni saumi ga mai ena io se sega. Me kena ivakaraitaki, ni o tukuna e dua na leqa e yaco ena itikotiko, o rawa ni taroga: “Na cava oni nanuma ni vakavuna na ka qo?” se “Cava oni nanuma ni kena iwali?”

Ni o taroga e dua na taro, rogoca vinaka na kena isau. Vakaraitaka ena kemu irairai, ena nomu deguvacu, kei na nomu vosa ni o vakarorogo tiko. Kua ni takosovi koya ni vosa tiko. Dolava nomu vakasama, vakananuma na ka e tukuna. ‘Kusarawa mo vakarorogo, mo berabera ena vosa.’ (Jeme. 1:19) Ia, ni o sa vosa, vakaraitaka ni o a vakarogoca dina tiko na ka e tukuna.

Ia, mo nanuma ni tiko e so era na sega ni sauma nomu taro. E so, na isau beka ga ni nomu taro na deguvacu, se matadredredre. E so tale era na sauma beka ga ena io se sega. Kua ni yalolailai. Tauri iko vakamalua. Kua ni surevaki iko yani ena veivosaki. Ke via vakarorogo, vakayagataka na gauna oqori mo wasea kina vua na vakasama momona e so mai na iVolatabu. Vakalailai sa na qai rawa ni douvaki iko o koya. Sa na qai rawa beka ni talaucaka mai vakarawarawa na lomana.

Ni o veivosaki kei na dua, nanuma tiko na gauna mai muri. Ke taroga e so na taro, sauma e so, ia vakavoca e dua se rua mo drau qai veivosakitaka ena dua tale na siga. Tukuna ni o na lai vakekeli, o na qai lai tukuna vua na kena macala. Ke sega ni tarogi iko ena dua na taro, o rawa ni tinia na nomudrau veivosaki ena dua na taro o nanuma ni na kauai kina. Tukuna ni o na via vakamacalataka sara ga oqori ena gauna tarava drau na sota kina. E levu sara na itukutuku e rawa ni kunei ena ivola na Reasoning From the Scriptures, na brochure Na Cava e Loma ni Kalou Vei Keda?, kei na itabataba vovou ni Vale ni Vakatawa kei na Yadra!

Ni O Veimaliwai kei Ira na Tacimu Vakayalo

Ni drau qai sota vakadua kei na dua tale na iVakadinadina i Jiova, o dau vakaliuliu ena nomu saga mo drau veikilai? Se o tu taudua tu ga? Noda lomani ira na tacida ena uqeti keda meda dau via kilai ira. (Joni 13:35) Na cava mo cakava? Rawa ni o tukuna mada ga na yacamu, taroga tale ga na yacana. Nomu tarogi koya mada ga se mai kila vakacava na dina ena rawa ni tini sara ena dua na veivosaki vinaka, drau na veikilai vinaka tale ga kina. Ke tatao mada ga na nomu vosa, na nomu sasaga ena vakaraitaka vua ni o kauaitaki koya, oqo ga na ka bibi.

O na tekivuna vakacava e dua na veivosaki yaga kei na dua na lewe ni nomu ivavakoso? Vakaraitaka ni o kauaitaki koya dina kei na nona matavuvale. Se qai oti beka ga na soqoni? Tukuna na tikina o rogoca e lauti iko. Oqo e rawa ni yaga vei kemudrau ruarua. De dua o na via cavuta e dua na tikina o marautaka o raica ena dua vei ira na Vale ni Vakatawa se Yadra! vou. Kua ni cakava oqo me ka ni veivakadrukai wale ga se mo vakatovolea kina na ka e kila. Cakava mo vota kina vua e so na tikina o taleitaka vakalevu. Rawa ni drau veivosakitaka na itavi e lesi vei iko se vei koya ena Koronivuli ni Vuli Vunau, drau soli vakasama tale ga ena kena icakacaka drau rawa ni vakayagataka. Rawa ni o talanoataka tale ga e so na ka o sotava ena cakacaka vakaitalatala.

E macala ni noda kauaitaki ira na tani e vakavuna meda dau okati ira ena noda veitalanoa, meda cavuta na ka era tukuna kei na ka era cakava. Na veiwali e rawa ni tiki tale ga ni noda veivosaki. Ena veitarai cake beka na ka eda tukuna? Ke da katona i lomada na ivakasala mai na Vosa ni Kalou, qai tu vei keda na loloma dina, e macala ga ni na veitarai cake na noda vosa.—Vkai. 16:27, 28; Efeso 4:25, 29; 5:3, 4; Jeme. 1:26.

Eda dau vakavakarau ni bera nida lako ina cakacaka vakaitalatala. Me vaka tale mada ga oya na noda vakarautaka e so na itukutuku leleka me rawa nida veitalanoataka kei ira na noda itokani. Ni o wilika se rogoca e so na itukutuku matalia, saga sara mo nanuma e so na tikina o na rawa ni wasea. Lakolako sa na rawa ni levu na ka o veivosakitaka. Oqo ena levu kina na ka o rawa ni tukuna ena nomu veivosaki, o na sega ni veivosakitaka tiko ga na ka e dau sotavi e veisiga. Ia, na kena e uasivi duadua, me kilai mada ga mai na ka o tukuna ni ka talei vei iko na Vosa ni Kalou!—Same 139:17.