Toso Tiko Ga

ENA gauna o se qai tekivu vulica kina na ivakavakayagataki ni so na ivakavuvuli vakaivolatabu, o sa veisautaka sara ga e so na ka sa vakawakana tu vei iko me vaka na ka o dau vakasamataka, nomu ivosavosa, kei na ivakarau ni nomu bula. Levu na veisau oqo e yaco ni o se bera mada ga ni curu ena Koronivuli ni Vuli Vunau. De dua o sa yalataka na nomu bula vei Jiova ena gauna oqo. Sa na cava beka e ke na nomu toso? Sega. Na nomu papitaiso e itekitekivu ga ni nomu toso.

Na tisaipeli mada ga o Timoci a sa qase ni ivavakoso tu qai tukuna vua o Paula me “dauvakananuma” na ka e vakasalataki kina kei na itavi ni veiqaravi e vakacolati vua—“me rawai koya sara”—“mera raica kina na tamata kece ga na nona toso.” (1 Tim. 4:12-15) Me tiko ga vei iko na yalo ni toso, se o se qai saga tiko mo bulataka na ivakarau ni bula vakarisito, se o sa bulataka tu mai ena dua na gauna balavu.

Kila kei na Veisau

Ena Efeso 3:14-19, eda wilika kina nona masu na yapositolo o Paula mera “kila vata” na nona itokani ena vakabauta na ‘raba, balavu, titobu, kei na cere’ ni ka dina. Oqo sara ga na vuna e vakarautaka kina o Jisu na isolisoli tamata mera veivakavulici, veivakadodonutaki, mera tara cake tale ga na ivavakoso. Eda na “tubu cake” vakayalo ke da vakananuma na veika e volai ena Vosa ni Kalou, me salavata kei na nodra veituberi na qasenivuli matua.—Efeso 4:11-15.

Na noda tubu oqo e okati kina na ‘vakavoui ni lomada kei na noda vakasama.’ Kena ibalebale oqo meda veisautaka sara ga na noda vakasama me salasalavata kei na loma ni Kalou kei Karisito. Ia, oqo ena vinakati kina meda kilai rau vinaka, meda kila na nodrau vakasama, me rawa kina nida ‘vakaisulu ena itovo vou.’ (Efeso 4:23, 24, VV) Ni o vulica na Kosipeli, o raica beka na bula i Jisu me ivakarau ni bula sara ga o na via vakatotomuria? O dau raica beka na sala e so e vakaraitaka kina o Jisu na itovo talei e tu vua, o qai saga mo vakaraitaka tale ga oqo ena nomu bula?—1 Pita 2:21.

Ena kilai na toso o sa cakava mai na veika o dau veivosakitaka. O ira era sa vakaisulu ena itovo vou era sega ni dau cavuta na vosa ni veidabui, vosa ca, vosa vakasisila, se vosa sakasaka. Era qarauna nodra vosa me “vinaka me ia kina na veivakatataki . . . me yaco kina na vinaka vei ira era sa rogoca.” (Efeso 4:25, 26, 29, 31; 5:3, 4; Juta 16) E kilai ena nodra ivakamacala kei na nodra vosa ena veisiga, vaka kina ena ivavakoso, ni sa veisautaka tiko na nodra bula na ka dina.

Ena kilai tale ga na nomu toso ke o sega ni “veitosoyaki ka veikauyaki e na cagi kecega ni vakavuvuli.” (Efeso 4:14) Me kena ivakaraitaki, na cava o na cakava ke tevuka e matamu o vuravura na veimataqali vakasama vovou, na veimataqali ka ni veivakamarautaki, kei na veimataqali sasaga mo tokona? O na tikica beka e so na gauna o dau vakayagataka ena ka vakayalo mo golevi ira kina na veika oqo? O na vakamatea nomu toso vakayalo ke o cakava oqo. E vinaka cake mo vakalevutaka na gauna o solia ena qarai ni veika vakayalo!—Efeso 5:15, 16.

Ena kilai tale ga na nomu toso vakayalo ena nomu veimaliwai. O dau “veinanumi ka veivosoti” ena nomu veimaliwai kei ira na tacimu vakayalo?—Efeso 4:32, VV.

E dodonu me laurai ena ivavakoso, vaka kina mai vale, ni o saga tiko ga mo muria na veidusimaki i Jiova. E dodonu me laurai tale ga oqo e koronivuli, ena noda itikotiko, vaka kina ena nomu vanua ni cakacaka. (Efeso 5:21–6:9) Ke o vakaraitaka tiko na itovo vakalou ena veivanua kece oqo, sa na qai rawa ni tukuni ni sa laurai na nomu toso.

Vakayagataka na Nomu iSolisoli

O keda kece e tu na ka eda kenadau kina se noda taledi e vakalougatataki keda kina o Jiova. E namaka o Jiova meda vakayagataki ira na isolisoli oqo meda vakayarayarataki ira mai kina na tani mera mai vakila tale ga na nona yalololoma. E vola ena vuku ni ka oqo na yapositolo o Pita: “Me vaka dou sa dui rawata nai solisoli, mo dou dui solia vakakina vakai kemudou, me vaka na dauniyau vakayalo e na loloma e vakavuqa ni Kalou.” (1 Pita 4:10) O sa vakayacora tiko vakacava nomu cakacaka vakadauniyau?

E tomana o Pita: “Kevaka e dua sa vosa, me ia me vaka na vosa ni Kalou.” (1 Pita 4:11) E vakabibitaki ena tikinivolatabu oqo ni dodonu me salasalavata kei na Vosa ni Kalou na vosa eda cavuta, me vakalagilagi ga kina na Kalou. Na itautau tale ga ni noda vosa e dodonu me vakalagilagi kina o Jiova. Oqo sara ga na inaki ni Koronivuli ni Vuli Vunau—meda vukei ira na tani ena noda vosa, ia me vakalagilagi tiko ga kina o Jiova. Ena laurai vakacava na nomu toso ena koronivuli ke vaka oya na nomu inaki?

Me kua ni nomu inaki me levu wale ga na lesoni o cakacaka kina, se me levu wale ga na mataqali itavi e soli vei iko, e bibi ga mo raica se sa vakarautaki iko vakacava na koronivuli mo maqosa cake kina ena nomu cabora nomu isoro ni vakavinavinaka. E vakarautaki keda na koronivuli me vuavuaivinaka cake noda cakacaka vakaitalatala. Tarogi iko gona: ‘Au dau vakarautaka na ka meu lai tukuna ena cakacaka vakavunau? Au sa vulica meu dau kauaitaki ira au vakamacala vei ira? Au dau vakarautaka beka e dua na yavu ni veisikovi lesu ena noqu laiva e dua na taro me qai dikevi ena veisiko e tarava? Keu vakavulica tiko e dua ena iVolatabu, au saga tiko beka meu vakavinakataka noqu veivakavulici, me tara na loma i gonevuli noqu veivakavulici?’

Kua ni nanuma ni nomu toso e vakatau ena levu ni nomu itavi. E vakatau ga ena ka o cakava ena nomu itavi. Ke a lesi vei iko e dua na itavi ni veivakavulici, tarogi iko mada: ‘Au a solia beka kina na noqu vinaka kece? E tarai ira beka na vakarorogo na noqu itavi?’

Noda vakadreti meda vakayagataka vinaka na noda dui isolisoli ena vinakati kina na sasaga. O dau saga mo cakacaka vata kei ira e so ena cakacaka vakaitalatala? O dau saga mo vukei ira na lewe ni ivavakoso vou, ira na gone, kei ira na sa qase? O dau bole mo vakaitavi ena samaki ni Kingdom Hall se mo bolecakacaka ena soqo ni tikina se soqo ni tabacakacaka? E rawa beka mo painia veivuke ena so na gauna? E rawa beka ni o painia tudei se mo lai veivuke ena so na vanua e gadrevi kina vakalevu na cakacaka? Ke o tagane papitaiso, o sa saga tiko mo rawata na ivakatagedegede vakaivolatabu ni dauveiveiqaravi vakaitalatala kei na qase? Nomu tu vakarau mo veivuke se cola itavi e sa ivakaraitaki ni nomu toso.—Same 110:3.

Vuli ena Ka Eda Sotava

Ke o nanuma ni o se bera ni vuku sara se matua vakayalo, kua ni yalolailai. Na Vosa ni Kalou e rawa ni “vakavukui ira era sa sega ni vuku.” (Same 19:7; 119:130; Vkai. 1:1-4) Nida taurivaka na ivakasala vakaivolatabu, eda na vakila na yaga ni vuku lagilagi i Jiova—na vuku e uasivia na ka e rawa ni vulica e dua ena nona bula taucoko. Ia, e levu na ka eda sotava eda rawa ni vuli kina nida toso tiko ga ena noda qaravi Jiova. Na sala cava meda na vakayagataka vinaka kina na veika eda vulica?

Ena rawa ni kaya e dua e sa levu na ka e sotava ena nona bula: ‘Qori sa matau vei au. Au kila na ka meu cakava.’ E ka vakayalomatua beka meda cakava oqo? E vakaroti keda na Vosa Vakaibalebale 3:7: “Mo kakua ni nanuma ni ko sa vuku.” Na veika eda sotava ena veiyabaki sa oti e dodonu me vakarabailevutaka noda rai nida vakatulewataka na ka meda cakava ena gauna oqo. Ia, na tamata e toso tiko vakayalo ena vakadeitaka tale ga e lomana kei na nona vakasama ni mana ni nona sasaga e vu ga mai na veivakalougatataki i Jiova. O koya gona, e sega ni laurai noda toso ena noda yatedei nida sotava e so na ituvaki, e laurai ga ena noda dau vakararavi vei Jiova me dusimaki keda. E laurai ena noda lomani koya, nuitaki koya tale tiko ga, nida nuidei ni na sega ni yaco vei keda e dua na ka ke sega ni vakatara na Tamada vakalomalagi.

Tadolova Tiko ga na Ka e Liu

E qase matua vakayalo na yapositolo o Paula, e lotu Vakarisito lumuti tale ga, ia e kila ni dodonu me “tadolova na ka e liu” ke via rawata na inuinui ni bula. (Fpai. 3:13-16) O duavata kei koya?

Me yacova mai oqo, e sa vakacava na nomu toso? O na kila na nomu toso ke o dikeva se vakacava na taucoko ni nomu vakaisulu ena itovo vou, nomu vakamalumalumutaki iko ina veiliutaki cecere i Jiova, kei na nomu vakayagataka na nomu taledi mo vakalagilagi Jiova kina. E dodonu me laurai ena nomu vosa kei na nomu veivakavulici na itovo e so e vakabibitaki ena Vosa ni Kalou kevaka e sa yaga vei iko na Koronivuli ni Vuli Vunau. Nanuma tiko na veitikina ena kilai kina na nomu toso. Solia kina nomu vinaka kece, ena qai laurai nomu toso vei ira na tamata kece ga.