Rogoci Vinaka

KE SEGA ni rogoci vinaka na domo i koya e vosa mai na buturara, e rawa nira sosovu e so na vakarorogo. Ke rui rogo lailai na domona e dua na dautukutuku e cakacaka vakavunau, e rawa ni sega ni kauaitaka o itaukeinivale na ka e tukuna. Ena sega tale ga ni veivakauqeti na noda soqoni ke rogo lailai na domodra na lewe ni ivavakoso nira dau vakamacala. (Iper. 10:24, 25, VV) Ena yasana kadua, ke karakara o koya e vosa, era na tikotikoca na vakarorogo, rawa nira madua tale ga.—Vkai. 27:14.

Nanumi Ira na Vakarorogo. O vosa tiko vei cei? le dua ga? dua na vuvale? ira era sota mera vakavakarau ina cakacaka vakavunau? na ivavakoso taucoko? se dua na soqo ni tikina? E macala ni rorogo ni domo e ganita e dua na ituvaki oqo ena sega ni ganita e dua tale.

Sa ra dau vosa na tamata ni Kalou ena vanua e soqovi vakalevu. Kaya mada na gauna e vakatabui kina na valenisoro donui Solomoni. A se sega na misininivosa ena gauna oya, ia a tucake o Solomoni ena dua na vanua cecere qai vosa “e na domo levu” me vakalougatataki ira na tamata. (1 Tui 8:55; 2 Vei. 6:13) Oti e vica tale na senitiuri, ni sovaraki oti na yalo tabu ena Penitiko 33 S.K., era a soqo wavokiti iratou e dua na ilawalawa lotu Vakarisito mai Jerusalemi e dua na ilala levu—e so era via vakarorogo, e so era veivakalialiai ga. Ena kauai nei Pita, sa qai “tu cake . . . ka sa tabalaka cake na domona.” (Caka. 2:14) Dua na vosa vinaka e cakava ena siga oya.

O na kila vakacava ni rorogo ni domomu e sa ganita na ituvaki o vosa tiko kina? Dua na sala vinaka o na kila kina ena nomu raici ira na vakarorogo. Ke o siqema ni so ena ivavakoso e dredre tiko nodra rogoci iko, e dodonu mo vosa i cake.

Se da vosa tiko vua e dua se dua na ilawalawa, e bibi meda kauaitaka na kedra ituvaki na vakarorogo. Ke da vosa vua e dua e sega ni dau rogoca vinaka na ka, e dodonu meda vosa i cake. Ia, meda nanuma tiko ni so era sega ni didivara, e berabera ga nodra tobotobo nira sa qase. Noda vosa tale ga vakadomoilevu e rawa ni ivakaraitaki ni veibeci. Ena so na vanua, e vakaraitaka na cudru se nona sega ni rawa ni wawa e dua.

Kauaitaka Tale ga na Rorogo e Rawa ni Vakasosa. Ni o vakaitavi ena cakacaka vakavunau, o na sotava na dui ituvaki ena vinakati kina me veiveisau na rorogo ni domomu. Ena vakasosa beka na rorogo ni lori, kosakosa ni gone, kodro ni koli, se domo ni ivakatagi kei na retioyaloyalo. Ena yasana adua, ke ra rui veivolekati na vale, ena rawa ni ca vua na itaukeinivale ke o vosa tu i cake mera lai rogoca tale na ka o tukuna na veivale voleka.

O ira tale ga na tagane era vunau ena ivavakoso se soqo ni tikina e duidui na ituvaki era na sotava. E duidui na vosa e tautuba kei na vosa ena lomanivale e vakarautaki kina na gusunivosa. Mai Latin America, e caka e dua na soqoni ni ivavakoso ena varada ni nona vale e dua na tataleitaki erau vunau kina e rua na tacida, voleka ga e kea na vanua e cacabolobolo tiko mai kina na rokete ni caka tiko e dua na soqo levu, e yasa ni vale e sega tale ga ni cegu na tagi tiko ni dua na toa tagane!

Ni vakacagau tiko e dua na vunau, ena rogoci beka e dua na rorogo ena gadrevi kina me cegu mada vakalailai o koya e vosa qai tomana tale, se na vinakati me vosa i cake. Kena ivakaraitaki, ke caka tiko na soqoni ena dua na vale delakava, oti qai tau vakasauri na uca, sa na dredre sara ga me rogoci o koya e vosa. Na tagi ni gone, na nodra yaco bera tale ga yani e so ena rawa ni vakavuleqa ena soqoni. Dau vosa i cake ena gauna vaka oqo me rawa ni yaga tiko ga vei ira na vakarorogo na ka o talaucaka.

Ena yaga sara ke tiko na misininivosa, ia sega ni kena ibalebale me sa na vakawelewele o koya e vosa ni na tiko na gauna ena vinakati kina me vosa i cake. So na vanua e dau kena ivakarau me boko wasoma na livaliva, na vanua vaka oqo e sa na vosa tu ga kina o koya e vosa, e dina ni sa na sega ni rogo na gusunivosa.

Vakasamataka na Lewe ni iVakamacala. Ena vakatau tale ga na rorogo ni domomu ena lewe ni nomu ivakamacala. Ke vinakati ena nomu ivakamacala me kaukaua na domomu, kua ni vosa vakamalua qai malumu. Me kena ivakaraitaki, ke o wilika tiko ena iVolatabu na itukutuku ni vakatau itotogi, e dodonu me kaukaua na domomu ni vakatauvatani kei na nomu wilika na itukutuku ni loloma. Me ganita na nomu ivakamacala na rogorogo ni domomu, ia cakava ena kena icakacaka me dokai tiko ga kina na nomu itukutuku.

Vakasamataka na Nomu iNaki. Ena vinakati beka me kaukaua toka na domomu ke o via vakauqeti ira na vakarorogo mera gumatuataka e dua na cakacaka. Ke o via veisautaka nodra vakasama, me kua ni rogo kaukaua na domomu, nira na sega tale kina ni via rogoca na nomu ivakamacala. Ke o via vakaceguya e dua e lomabibi, ena vinaka me malumu sara na rorogo ni domomu.

Kila na Gauna me Rogo Levu Kina na Domomu. Ni o kaciva tiko e dua e osooso qai sega ni rai mai, o na kaci vakalailai i cake. Era kila oqo na itubutubu, oya na vuna era dau kacivi ira kina i cake na luvedra ni sa kena gauna me rauta na qito. Ena via vaka tale ga oqo na ka ena cakava na jeameni ena ivavakoso se jeameni ni soqo cokovata ni vakaraitaka me tekivu na porokaramu ni caka tiko na veitalanoa. Nira cakacaka vakavunau tiko e so, era na kaci beka yani i cake vei ira na cakacaka voli e tautuba nira vakabula.

Ni o sa rawata e dua mo drau veivosaki, se bibi tiko ga me veirauti na rorogo ni domomu. Ena nanumi ni sega ni vakavakarau vinaka, se sega ni yalodei e dua, ke rui rogo lailai na domona ni vosa.

Ni o veivakaroti, ena veivakauqeti na ka o tukuna ke kaukaua toka na domomu. (Caka. 14:9, 10) Na domo kaukaua tale ga e rawa ni veivakabulai ena gauna ni leqa. Dua na gauna a via vakamatei koya e dua na ivakatawa ni valeniveivesu mai Filipai ni nanuma nira sa dro na kaivesu a vakatawai ira tiko. “A sa kaci e na domo levu ko Paula, ka kaya, Kakua ni ko vakacacani iko: keitou sa tiko kecega eke”! Ke sega ke a vakamatei koya sara ga. Sa qai vunau o Paula kei Sailasa vua na ivakatawa ni valeniveivesu kei na nona vuvale, tini sara me ratou vakabauta vakavuvale na ka dina.—Caka. 16:27-33.

Ka Mo Cakava me Rogoci Vinaka Kina na Domomu. E so ena ka ni sasaga sara vei ira nodra tovolea me rogoci vinaka na domodra, e so ena sega soti. E so e dau rogo lailai na domodra nira domo rogo malumu ga. Ia, e dina nira na domo rogo malumu, ena rawa ga nira vakavinakataka ke ra saga. Dau kauaitaka na nomu cegu, vaka kina nomu idabedabe se itutucake ni o vosa. Ni o dabe, dabe vakadodonu, ke o tucake, tucake vakadodonu. Dreta i muri na vatuvatu ni tabamu qai cegu sara vakavinaka. Saga mo vakatawana vinaka na boto ni nomu yatevuso. Na cagi sara ga oqo e rawa ni o vakayagataka vinaka mo lewa vinaka kina na irogorogo ni domomu.

E so tale e nodra leqa ni rui dau kaukaua na domodra. Rairai vu oqo ena nodra dau cakacaka e tautuba se nodra cakacaka ena vanua kosakosa, sa matau kina vei ira mera dau vosa i cake. Se ra susu ena vuvale e sa matau kina na veikaraci, se ra dau sega ni veirogoci. Era nanuma kina ni na qai rogoci ga na domodra ke ra vosa i cake. Nira toso ena nodra muria na ivakavuvuli vakaivolatabu mera vakaisulu “e na yalo dauloloma, e na yalovinaka, e na yalomalumalumu, e na yalomalua, e na dauvosota vakadede,” sa na laurai sara oqo ena rorogo ni domodra ena nodra veivosaki.—Kolo. 3:12.

Ena qai veiganiti na rorogo ni domomu ena dui ituvaki o vosa kina ke o dau vakavakarau vinaka, o dau vakaitavi wasoma ena cakacaka vakavunau, vaka kina ena nomu dau kere veivuke vei Jiova. Se o vosa mai na buturara se veivosaki ena cakacaka vakaitalatala, saga mo vakadeitaka ni sa rogoci vinaka tiko na domomu me rawa ni yaga kina na ka o tukuna.—Vkai. 18:21.