Veiveisau na Rorogo ni Domomu

ENA rawarawa nodra kila na vakarorogo na ka o tukuna ke vakilai na ka o vakaibalebaletaka ena rorogo ni domomu. Ia, ena taleitaki sara ke veiveisau na kena rorogo, kei na kena totolo. Kena ilutua ni na vakaraitaka vei ira na vakarorogo ni o taleitaka dina na ka o tukuna tiko. Ke da taleitaka na ka eda tukuna, era na taleitaka tale ga na vakarorogo, ke da sega ni taleitaka, era na sega tale ga ni taleitaka na vakarorogo. Oqo e bibi meda vakasamataka, se da vosa mai na buturara, se veivosaki ena cakacaka vakaitalatala.

E duidui na rorogo ni domoda, duidui tale ga na kena ivakavakayagataki. Ni o vakayagataka vinaka na domomu, e rawa ni bulabula nomu ivakamacala, na ka o tukuna e rawa ni tara na lomadra na vakarogoci iko, e rawa tale ga ni uqeti ira mera muria na nomu ivakasala. Ia, o na sega ni rawata oqo ena nomu makataka e so na vanua ena nomu tikidua ni vosa mo vakaraitaka kina na vanua me veisau kina na rorogo ni domomu, vanua me vakatotolo kina se vakaberabera, se vanua me rogo kaukaua mai kina se rogo malumu. Ke o makataka vaka oqo, ena rogo mawi na nomu vosa, ena sega ni bulabula, ena vakavu veilecayaki ga vei ira na vakarorogo. Na veiveisau ni rorogo ni domomu e dodonu me vu mai lomamu.

Ni vakayagataki vinaka, ena sega ni gole tale nodra vakasama na vakarorogo vei koya e vosa, e sa na gole sara ga ina ka e tukuna.

Rogo Levu se Rogo Lailai. Ena taleitaki nomu vosa ke o dau veiveisautaka na rorogo ni domomu. Ia, na nomu veiveisautaka na rorogo ni domomu—me rogo levu se rogo lailai—e dodonu me vakaibalebale. Ke sega, ena rawa ni vakavu veilecayaki na ka o tukuna. Ena votivoti tale ga vei ira na vakarorogo ke sa rogolevu tu ga na domomu.

Na rorogo ni domomu e dodonu me ganita na ka o vakamacalataka. Ena veiganiti me kaukaua toka ke o wilika na ivakaro me vaka e volai ena Vakatakila 14:6, 7 se Vakatakila 18:4, se vosa ni veivakadreti me vaka e volai ena Lako Yani 14:13, 14. Ke o wilika tale ga e dua na itukutuku ni vakatauitotogi mai na iVolatabu, me vaka na kena e volai ena Jeremaia 25:27-38, e bibi me tiko na gauna me rogo levu mai kina na domomu me rawa ni vakilai kina na ka o via vakabibitaka.

Vakasamataka tale ga na nomu inaki. O via veivakauqeti? O via vakabibitaka e dua na ka? O na vakayacora rawa oqo ke kaukaua cake na domomu, ia mo qarauna. Baleta e rawa nira sega ni taleitaka oqo na vakarorogo, e rawa ni vakayalolailaitaki ira. So na gauna o na rawa ni vakauqeti ira na vakarorogo se vakabibitaka vei ira e dua na ka ke o vosa ga vakamalua o qai vakaraitaka ni vu dina mai lomamu na ka o tukuna. Oqo eda na qai raica ena Lesoni 11.

Era na via kila sara ga na vakarorogo na ka o vakarau tukuna ke o veisautaka na domomu me rogo lailai. Ia, vakalevu me mana na kena iwalewale oqo ke oti ga oya me rogo levu sara mai na domomu. Na domo e rogo lailai qai tau bi e rawa ni vakayagataki me vakaibalebaletaka na taqaya se rere. Na domo tale ga e rogo lailai e rawa ni vakayagataki me vakaraitaka ni ka e tukuni e sega ni bibi sara ni vakatauvatani kei na tikina tale e so. Ia, ke sa dau rogo lailai tu ga na domomu, e rawa ni nanumi ni o lomalomaruataka na ka o tukuna, o sega ni kauaitaka, se o sega ni nuitaki iko. E macala gona ni dodonu mo qarauna sara ke o veisautaka na domomu me rogo lailai.

Totolo se Berabera. Nida veivosaki e veisiga, sa dau taladrodro ga mai na vosa. Nida marau vakalevu se taqaya, eda dau vosa vakatotolo. Nida vinakata me nanumi na ka eda tukuna, eda dau vosa vakamalua.

Ia, e levu era vou ena vosa mai na buturara era sega ni dau veisautaka na nodra vosa me totolo cake, se berabera vakalailai, sa dau duadua tu ga. Ena vuku ni cava? Era sa rui leqataka na vosa mera cavuta. Era vola sara beka ga vakamatailalai. E so tale era vola e liu na nodra vosa, sa ra qai lai saga mera wiligusutaka mai. Oqo e vakavuna me sa duadua tu ga na rorogo ni domodra. Ena vakavinakataki na tikina oqo ke vulica e dua me vakarautaka ga nona suinivosa, me qai lai sereka ga mai ni sa tu ena buturara.

Kua ni malua tu ga na nomu vosa o qai vakatotolotaka vakasauri, me vaka beka e dua na pusi e taubale tu vakavucesa qai cariba vakasauri ni raica e dua na koli. Kua tale ga ni rui cameme de lai vaka tale o kana uvi katakata.

Noda vosa vakatotolo se vakaberabera e sega ni caka vakaveitalia. Ena sega ni vakaibalebale ke o cakava oqo. Na totolo se berabera ni nomu vosa e dodonu me vakatau ena ka o tukuna kei na kena inaki. Me veirauti na totolo ni nomu vosa—me kua ni totolo sivia se rui yabe tale. Vosa vakatotolo ke o via vakaraitaka na yalo ni rere se marau, me vaka ga o dau cakava ni o veivosaki e veisiga. E veiganiti mo vosa tale ga vakatotolo ke o tukuna tiko e so na ka e sega soti ni bibi. Oqo ena bulabula kina nomu vunau, ena sega tale ga ni vakavucesa. Ena yasana adua, ena veiganiti me malua na nomu vosa ni o vakadeitaka e dua na ile titobu se dua na tikina bibi, kei na itinitini ni nomu vosa.

Kaukaua Cake se Malumu Sobu. Kaya mada ke dua e qiri qita tiko me dua na aua, se sivia. Ia, ena loma ni gauna kece oqo e qiria tiko ga e dua na wa—e qiria me rogo levu, oti me rogo lailai, so na gauna e qiria vakatotolo, so na gauna e vakaberabera. E veiveisau na totolo ni nona qiriqiri, so na gauna e rogo levu, oti veisau me rogo lailai, ia eda vucesa na rogoca baleta ni dua ga na wa e qiria tiko, e sega ni veiveisau na kena rorogo. Ena rogorogo ca tale ga na domoda ke sa dua tu ga na kena rorogo, sega ni veisau.

Ia, me nanumi tiko ni veiveisau ni rorogo e rawa ni duidui na ka e cakava ena dui vosa. So na vosa serevaki me vaka na vosa vakajaina, ena veisau na ibalebale ni dua tiko ga na vosa ke veisau wale ga na kena rorogo. Ia, ena vosa mada ga vaka oqo, se tiko ga e so na ka e rawa ni cakava e dua me kua kina ni matemate nona vosa.

Ena so mada ga vosa ni vanua e sega ni vaka na vosa vakajaina, na veisau ni rorogo ni domo e rawa ni veisautaka na ibalebale ni dua na iyatuvosa. Me kena ivakaraitaki, nona tosoya cake na domona e dua me rogo levu, lako vata kei na kena kaukaua, e rawa ni vakaraitaka ni via vakabibitaka tiko e dua na vakasama. Na kaukaua cake tale ga ni domo e rawa ni tukuna na levu ni dua na ka se kena yawa. Na tubucake ni domo ena itinitini ni iyatuvosa e rawa ni tukuna na taro. Ena so tale na vanua, e vakatakilai na taro ni lutu sobu na rorogo ni domo.

Na yalomarau kei na yalogu e dau vakaraitaki ena domo levu. Na yalobibi kei na yalorarawa e dau vakaraitaki ena lutu sobu ni rorogo ni domo. Ke ra vakila na vakarorogo na yalomarau se na yalorarawa ena irogorogo ni domomu, ena tarai ira sara ga na ka o tukuna. Era na vakila ni o sega ni cavuta wale tu ga na vosa, ia e vu dina mai lomamu.

Vakarautaka na Yavu. Ena nomu saga me veiveisau na rorogo ni domomu, na cava mo cakava e liu? Tekivu ena nomu digia na lewe ni nomu ivakamacala. Ke na vakatabakidua tiko ga na nomu vosa ena nomu vakadinadinataka e dua na ile, se o veivakadreti tu ga, sa na dua tiko ga na ivakarau ni nomu ivakamacala. E vinakati kina mo raica vinaka nomu suinivosa, vakadeitaka ni o na vakayagataka na veika era na vakabulabulataka nomu vosa.

Vakacava ke vakacagau tiko na nomu vosa, o qai liaca ni vaka e matemate? Na cava mo cakava? Veisautaka na ivakarau ni nomu ivakamacala. O na cakava vakacava? Dua na kena icakacaka mo dolava na iVolatabu, uqeti ira na vakarorogo mera dolava na nodra, qai wilika e dua na tikinivolatabu, mo sa kua ni vosa tiko ga. Se moica e so na itukutuku me taro, qai cegu vakalekaleka mo vakabibitaka kina na ka o taroga. Se vakacuruma e dua na vosa vakatautauvata rawarawa. Na veika oqo era dau cakava o ira era kenadau ena vosa. O rawa ni tovolea tale ga oqo ni o vakarautaka nomu ivakamacala. Ke o sega ni matau kina, kua ni yalolailai, tovolea tiko ga.

E rawa ni tukuni ni isaluaki ni vosa na veiveisau ni domo. Ke vakayagataki vinaka ena kena gauna dodonu, ena rogo vinaka na nomu vosa, era na taleitaka tale ga na vakarorogo.