Bulabula

E TALEITAKI na vunau e bulabula. E dina ni bibi me momona na noda vunau, ia na kena taleitaki e vakatau ena kena bulabula. Se vanua cava ga eda susu mai kina, itovo cava ga e matau vei keda, e rawa nida saga kece ga me bulabula noda vosa.

Me Laurai ni Tarai Keda na Ka Eda Tukuna. A kaya o Jisu vua na yalewa ni Samaria erau veivosaki ni o ira era qaravi Jiova e dodonu mera qaravi koya “vakayalo ka vakaidina.” (Joni 4:24) E dodonu me ka ni marau vei ira na nodra veiqaravi, me salasalavata tale ga kei na ka dina mai na Vosa ni Kalou. O koya e qarava na Kalou ena kilai ena nona ivosavosa ni marautaka dina na nona veiqaravi. Ena gu na lomana me tukuna yani na veika vivinaka e vakarautaka o Jiova. Ena kilai ena irairai ni matana ni tarai koya sara ga na ka e tukuna, ena kilai tale ga ena nona ivukivuki, kei na rorogo ni domona.

Ia, e so era lomani Jiova, e sega soti ni dau bulabula nodra vosa nira vakaitavi, veitalia sara mada ga ke ra vakabauta dina na ka era tukuna. Na cava beka e vakavuna? E bibi mera vakarautaka vinaka na ka mera tukuna, ia, e sega ni o koya ga oya. E dodonu me tarai ira na ka era vakamacalataka, mera vakila sara ga. Kaya mada ke lesi e dua me vosa me baleta na isoro ni veivoli i Jisu Karisito. Me kua ni vakasinaiti wale ga na nona vakasama ena levu na itukutuku, o koya sara mada ga vakataki koya e dodonu me tara na lomana na nona solia o Jisu na nona bula ena vukuna, kei na vukudra na vakarogoci koya. Me vakaraitaka sara ga mai vu ni lomana nona vakamuduo vua na Kalou o Jiova kei Jisu Karisito, ena vuku ni isolisoli uasivi oqo. E dodonu me vakasamataka ni isoro ga oqo e dolavi rawa kina vua na kawatamata e dua na inuinui totoka—na bula tawamudu ena vuravura ena vukici me parataisi! O koya gona, na veika oqo e dodonu me tara sara ga na lomana.

E tukuna na iVolatabu me baleti Esera, e dua na ivakavuvuli e Isireli, ni ‘vakarautaka na lomana me vakasaqaqara ena vunau i Jiova, me cakava tale ga, qai vakavulica e Isireli.’ (Esera 7:10) Ke da cakava tale ga oqo ena noda vakarautaka na ka eda na tukuna, vakauasivi noda vakarautaka na lomada, ena kilai sara ga ni vu mai lomada na ka eda tukuna. Ena vakavuna mera vakamareqeta na ka dina o ira eda vosa vei ira.

Nanumi Ira na Rogoci Iko. Ena bulabula tale ga na nomu vosa ke dei e lomamu ni ka o tukuna ena yaga sara ga vei ira na vakarorogo. Kena ibalebale ni sega ni veirauti mo vakarautaka wale ga na ka mo tukuna, e bibi tale ga mo masuti Jiova me vukei iko ena kena itukutukuni me yaga kina vei ira na vakarorogo. (Same 32:8; Maciu 7:7, 8) Vakadeitaka e lomamu na vuna e bibi kina vei ira na vakarorogo na ka o na tukuna, na kena yaga vei ira, kei na kena itukutukuni mera raica kina na kena bibi.

Ni o vakarautaka nomu itavi, dikeva e so na tikina e tarai iko, o na vinakata sara ga mo wasea. E sega beka ni ka vou sara na veitikina o sa kunea oqori, ia o raica e so na kena ivakamacala vou. E dodonu me bulabula nomu vosa ke o vakarautaka e dua na tikina ena vukei ira na vakarorogo me qaqaco nodra veiwekani kei Jiova, mera doka na veika e solia, mera vosota na drakidrakita ni bula ena gauna oqo, se sala me vuavuaivinaka kina na nodra cakacaka vakaitalatala.

Vakacava ke o lesi mo wilivola e matanalevu? Saga me bulabula. Ia, oqo e sega ni vakatau wale ga ena nomu cavuta vinaka na vosa, se nomu cavuta vata na matavosa e dodonu mera cavuti vata. E dodonu mo vulica na ka mo na wilika. Ke o na wilika e dua na wase ni iVolatabu, vakekeli mada mo kila e so tale na kena ivakamacala. Me matata vei iko na kena ibalebale. Dikeva se na yaga vakacava vei iko kei ira na vakarorogo, qai wilika ena sala mo vakadewataka kina oqo vei ira.

Vakacava ke o vakavakarau mo lako ena cakacaka vakavunau? Railesuva na tikina o na via veivosakitaka kei na tikinivolatabu o nanuma mo na vakayagataka. Vakasamataka tale ga na ka ena tiko e lomadra na itaukeinivale. Na itukutuku cava e kacivaki tiko vakalevu ena walesi, retioyaloyalo, se volai ena niusiveva? Na leqa vakacava era sotava tiko? Ke o vakarautaki iko vinaka mo lai vakaraitaka vei ira na itaukeinivale ni tu ga ena Vosa ni Kalou na iwali ni nodra leqa, ena gu na yalomu mo vakamacalataka, ena gauna vata oya, e sa na bulabula ga mai na nomu vosa.

Kemu iRairai kei na Rorogo ni Domomu. Ena kilai tale ga na bulabula ni nomu vosa ena ka o cakava. Oqo e dodonu me laurai e matamu. Me kilai tale ga ena irogorogo ni domomu ni o vakabauta dina na ka o tukuna, o sega ni vosa wale tu ga.

E vinakati i ke na qaqarauni. Baleta e so era nanuma ni na bulabula nodra vosa kevaka era vosa vakaukaua se kurau. De vinaka me vakaraitaki vei ira ni oqo e rawa ni vakavuna mera kauaitaki ga o ira, sega ni kauaitaki na nodra itukutuku. Ena yasana adua, e dodonu mera vukei na mamadua mera vakaraitaka ena kedra irairai kei na irogorogo ni domodra ni tarai ira na ka era tukuna.

Ke o raici ira na vakarorogo ni o vosa, qai bulabula nomu ivakamacala, era na lai bulabula tale ga na vakarorogo. E dau bula nona ivakamacala o Apolosa, a tukuni kina ni matai ena vosa. Ke uqeti iko na yalo tabu ni Kalou, o qai vosa vakabulabula, era na guta na vakarogoci iko mera muria nomu ivakasala.—Caka. 18:24, 25, VV; Roma 12:11.

Me Ganita na Nomu iVakamacala. E so era nanuma ni bulabula ni vosa e kena ibalebale mera vosa vakaukaua se kurau. Sa qai dau kaukaua tu na nodra vosa, ra kurau tu ga ni tekivu me yacova ni tini nodra itavi. Ia, oqo era na tikotiko ca ga kina na vakarorogo. E rawa ni vakavuna tale ga mera vuturi, me rogo ca vei ira na ka o tukuna. Ni o vakarautaka gona na nomu itavi, e bibi mo vakasamataka na veimataqali iwalewale ni vosa o rawa ni vakayagataka. Tovolea me kua ni dua dua tu ga na ivakarau ni nomu vosa. O na taleitaka dina na ulutaga o vosa tiko kina ke o digia vinaka na veitikina mo na vakamacalataka. Ia nanuma tiko ni so na vanua ena nomu vosa ena vinakati kina me bulabula mai na nomu ivakamacala, so na vanua e sega soti, na vanua vaka oqo me na caka vakamatau sara.

Na veitikina bibi e dodonu sara ga me bula duadua kina nomu ivakamacala, baleta ni vanua sara ga oqo o na saga kina mo tara na lomadra na vakarorogo. Nira sa taura rawa na vakarorogo na ka o vakamacalataka, sa na qai gadrevi mo vakauqeti ira, mo vakaraitaka vei ira na yaga ni nodra muria na ka o tukuna. Na bulabula ni vosa e sega tale nida bulia, e sega ni gadrevi meda kurau se kara me qai bulabula kina. Sa na bulabula ga ke vu mai lomada na noda ivakamacala.