Kua ni Leqataka na Vosa mo Cavuta

DE DUA o sa vakarautaka vinaka nomu vunau. O vakadeitaka me yaga. Ra veitaravi vinaka na vakasama o vakarautaka. E taladrodro nomu vosa ni o sa lai vakamacala. Ia, ke ra sega ni vakarogoci iko vinaka na vakarorogo—era rogoca beka ga vakatikina na nomu ivakamacala baleta ni goletani tale tiko nodra vakasama ina so tale na ka—ena vakacava sara mada na yaga ni nomu itavi? Ke sega ni gole tiko nodra vakasama ina ka o tukuna, ena tara beka na lomadra nomu ivakamacala?

Cava beka e rawa ni vu ni leqa oqo? Rawa ni levu na vuna. Ia, vakalevu me dau vu ena nomu sega ni vakayagataka na vosa sara ga o dau cavuta e veisiga. Rui wasoma beka nomu raica nomu suinivosa, se sa rui vakarokoroko tale vakasivia na itautau ni nomu vosa. Ia, na leqa oqo e vakatau ena vakarautaki ni suinivosa.

Ke o vola e liu na nomu itavi me vaka na vunau wiliki, oti o qai veisautaka mo vola ga na kena tikina bibi, e rawa mo vakila ni dredre mo vakayagataka na suinivosa oqori ni o na leqataka tiko ga na vosa mo cavuta. Ena vuku ni cava? Baleta ni o sa digitaka oti na vosa mo na cavuta. Ke o vakayagataka mada ga na suinivosa, o na saga tiko ga mo nanuma na vosa o a vola ena vunau o a vakarautaka taumada. Ena duatani ga na ituvatuva ni vosa ena gauna eda volavola kina, ena vereverea, ena sega ni vaka na vosa ni veisiga. Ena sega ni rogo vinaka nomu vosa ke o muria na ituvatuva ni vosa oqo.

Kua ni vola na vosa yadua mo cavuta ni o vakarautaka tiko nomu vosa. Tovolea ga na kena iwalewale oqo: (1) Digitaka na nomu ulutaga levu kei na ulutaga lalai o na vakayagataka mo vakamatatataka kina na ulutaga oqori. Na vunau lekaleka e rawa ni rua ga na kena ulutaga lalai. Na vunau e balavu toka e rawa ni va se lima. (2) Vola ena ruku ni ulutaga lalai kece na tikinivolatabu o na vakayagataka me vakamatatataki kina na ulutaga oqori, vaka kina na vosa vakatautauvata kei na ile o na vakayagataka. (3) Vakasamataka se mo na tekivuna vakacava nomu vosa. O rawa ni vola sara ga na imatai ni dua se rua na iyatuvosa o na cavuta. Vakarautaka tale ga na itinitini ni nomu vosa.

E bibi mo vakarautaka na nomu sa na tucake sara ga ena buturara mo vosa. Ia, kua ni taleva vakavica nomu vunau ena nomu saga mo wiligusutaka sara ga na vosa mo cavuta. Kena sega ni leqataki na vosa me cavuti e kena ibalebale me vakarautaki ga vakavinaka na vakasama me na vakadewataki. Ni o qai vakaitavi, e sa na taladrodro ga mai na vosa ke sa matata vei iko na vakasama. Ke o sa vakarautaka vinaka nomu suinivosa, tuvani vinaka na kena vakasama, e sa na rawarawa ga nomu vakamacala.

Mo Kila na Kena Yaga. Na yaga ni nomu sega ni vola se wiligusutaka na ka o tukuna oya ni na taleitaki nomu ivakamacala ni o vosa sara tu ga ena ivakarau ga ni nomu vosa e veisiga. Ena bulabula nomu vosa, era na rogoci iko matua na vakarorogo.

Na ivakarau ni vosa oqo o na dau raici ira sara ga kina vakalevu na vakarorogo, o ira tale ga era na raici iko, ra rogoci iko. Era na kila na vakarorogo ni o kila vinaka na ka o tukuna tiko, o vakabauta dina tale ga baleta ni o sega ni raica tiko ena nomu tikidua na iyatuvosa yadua o cavuta. Na ivakarau ni vosa vaka oqo e veivakauqeti, e rogo matau, qai tara sara ga na lomadra na vakarorogo.

Ena rawarawa tale ga ni o veiveisautaka nomu ivakamacala ni o sega ni vola se wiligusutaka na ka mo na tukuna. E sega ni sa lewai rawa na iyatuvosa yadua mo cavuta me dredre kina nomu veisau. Kaya mada ke mataka sara ga ni siga mo na vunau kina o qai rogoca e dua na itukutuku ena walesi e lako vata sara ga kei na ka o na vunautaka. Sega li ni na yaga mo okata ena nomu vunau na itukutuku oqori? Se o raica ena gauna o vunau tiko kina ni levu sara na itabagone era vakarorogo tiko. Ena daumaka sara mo moica vakalailai nomu vosa vakatautauvata kei na nomu ivakamacala me ganiti ira mera kila kina ni na yaga vei ira na nomu ivakamacala!

E yaga tale ga na nomu sega ni vola se wiligusutaka na ka mo na tukuna ni na yavalata tiko nomu vakasama. Ni o raica nira bulabula na vakarorogo, ra kauai ina nomu vunau, o lai bulabula tale ga kina o iko. O vakarabailevutaka e so na ka o vakamacalataka, se o lesuva e so na tikina o via vakabibitaka. Ke o raica ni vaka era sa sega ni kauaitaki iko na vakarorogo, o rawa ni tovolea sara mo walia na leqa oqo, o na sega ni vosa tu ga!

Ka Mo Qarauna. E tiko tale ga na ka me qarauni ni o sega ni vola se wiligusutaka na ka o tukuna. Kena imatai na nomu rawa ni vosa tiko ga ni sa oti na gauna e lesi vei iko. E rawa ni yaco oqo ke rui sivia na ka o vakacuruma me ikuri ni nomu ivakamacala ena gauna o vunau tiko kina. Ena sega ni yaco na leqa oqo ke o vakatakilakilataka ena iwasewase yadua na balavu ni gauna mo na vakayagataka kina. Oti mo muria sara.

Me qarauni tale ga na vakawelewele, vakauasivi vei ira era sa dau matau ena vunau. Era na raica beka ni sega ni dredre nodra biuta vata ga e so na ivakamacala sa rawa nira bulia kina e dua na vosa ena loma ni gauna e soli vei ira. Ia na yalomalumalumu, lako vata kei na noda kila nida vakaitavi tiko ena dua na porokaramu ni veituberi e kena Qasenivuli Uasivi o Jiova, ena uqeti keda meda raica vakabibi na noda ilesilesi, da vakarautaka vakavinaka, da masulaka tale ga.—Aisea 30:20, NW; Roma 12:6-8, VV.

E so era dau vinakata me volai yadua sara ga na vosa mera cavuta nira taqayataka de ra guilecava e so na ka era na via kaya. Kua ni vakalaiva na lomataqaya oqo me tarovi iko ena nomu tadolova yani na ivakarau ni veivakavulici yaga eda vulica tiko oqo. Vakavakarau vinaka, qai kerea vei Jiova na veivuke ni yalona tabu.—Joni 14:26.

E so tale era leqataka na vosa era na cavuta. Ena sega sara beka ni titobu qai tuvani vakamaqosa na nomu vosa ni vakatauvatani kei na vunau wiliki, ia ena veivakauqeti ni o vosa me vaka sara ga na nomu dau vosa e veisiga. E dau taleitaki vakalevu na ivakamacala e cavuti kina na vosa rawarawa, kei na iyatuvosa e sega ni vereverea. Ke o vakavakarau vinaka, ena rogo vinaka nomu iyatuvosa baleta ni sa matata vinaka vei iko na vakasama o via vakadewataka. Ia, ena rogo vinaka nomu vosa mai na buturara ke sa nomu ivalavala ga mo dau vosa vakavinaka e veisiga.

Levu ni Ka Mo Vola. Ni toso na gauna, o vakaitavi tale ga vakawasoma, o na raica ni na lailai sara na ka o vola ena nomu suinivosa. Na veika o na vola oqo kei na tikinivolatabu o na wilika e rawa nira volai ena dua na tikiniveva se card, me rawarawa nomu raica. Ena cakacaka vakavunau, o na raica ni vakalevu ga o na dau vakasamataka na ka mo tukuna. Ke o sa vakarautaka vinaka e dua na ulutaga mo vakayagataka ena veisikovi lesu, o rawa ni vola na kena veitikina bibi ena dua na tikiniveva, ciqira sara ena loma ni nomu iVolatabu. De rawa mo vakayagataka ga na ka e sa vakarautaki tu ena “Usutu Vakaivolatabu me Veivosakitaki” se ivakamacala era tiko ena Reasoning From the Scriptures.

Ia, ke veitarataravi nomu itavi ena loma ga ni vica na macawa, lesi tale beka ga vei iko na vunau soqovi levu, ena vinaka beka me levu cake vakalailai na ka o vola. Cava na vuna? Me vakamatatataka e nomu vakasama na ka o na vakamacalataka ni bera na gauna yadua mo vakaitavi kina. Ia, me kua ga ni sivia nomu raica nomu suinivosa ena gauna o vakamacala tiko kina, ni o na sega ni vakila kina na yaga ni ka e vakabibitaki tiko ena lesoni oqo. Ke levu cake vakalailai na ka o vola, makataka ga na vosa o rawa ni raica yani o toboka sara na kena vakasama, kei na tikinivolatabu mo na vakamacalataka.

E dina ni o koya e sa matau ena vunau ena sega ni vola yadua na vosa me cavuta se wiligusutaka na nona itavi, ia ena vinaka me vola e so na tiki ni nona vunau. Vakabibi oqo ena nona ikaunivosa kei na kena itinitini. E macala ni bibi me raici ira tiko ga na vakarorogo, ia e daumaka me cavuti ena gauna e rua oqo na vosa e vakavure vakasama, e titobu. O koya gona me na digitaki vinaka na vosa me na cavuti, me rawa ni tarai ira sara ga na vakarorogo. Ni vakasavui e so na itukutuku tabaki mai na dua na ivola, na fika, nodra vosa e so, se tikinivolatabu, e yaga mera wiliki na itukutuku vaka oqo me rawa kina ni veivakauqeti.

Ni O Tarogi. So na gauna ena gadrevi meda vakamacalataka noda vakabauta, e dina nida na sega ni vakarau tu. E kauta cake beka mai e dua na ile e dua eda sotava ena cakacaka vakavunau. Rawa ni yaco tale mada ga oqo nida tiko maliwai ira na wekada, ira eda cakacaka vata, se e koronivuli. De dua ena tarogi keda e dua na vakailesilesi vakamatanitu meda vakamacalataka noda vakabauta kei na noda cakacaka. E veivakauqeti na iVolatabu: “Mo ni dau vakarau tu e na veigauna kece ga mo ni vakamacalataka vua na tamata yadua e via kila na i nuinui sa tu vei kemuni. Ia mo ni kitaka e na yalo malumalumu kei na vakarokoroko.”—1 Pita 3:15, 16, VV.

Raica mada oqo nodrau sauma o Pita kei Joni nodra ile na lewe ni Sanadrini me vaka e tukuni ena Cakacaka 4:19, 20. Erau sauma vakamatata nodra ile ena rua ga na iyatuvosa. Erau qai moica nodrau ivakamacala me ganiti ira vinaka na rogoci rau—rau vakaraitaka kina ni ka era nanuma me rau saumitaro kina e dodonu tale ga me saumitaro kina na mataveilewai. E muri a qai beitaki vakailasu o Sitiveni, kau tale ga ina mataveilewai oqo. Wilika na ivakamacala momona e qai biuta o koya ena gauna sara ga e tarogi kina, me vaka e volai ena Cakacaka 7:2-53. E tuvana vakacava nona ivakamacala? A vakamacalataka e liu na veitaravi ni ka e yaco. Dua na vanua e loma, sa qai raica o koya ni veiganiti me vakamatatataka na yalo ni veivorati a vakaraitaka na matanitu o Isireli. Sa qai tinia ena nona vakaraitaka ni yalo vata sara ga oya era vakaraitaka tiko na Sanadrini ena nodra lewa me vakamatei na Luve ni Kalou.

Ke o kacivi vakasauri mo vakamacalataka nomu vakabauta, na cava mo cakava me yaga kina nomu ivakamacala? Vakatotomuri Niemaia, ni a masu lo ni bera ni sauma na taro e taroga vua o Tui Atakisekise. (Niem. 2:4) Ni o masu oti, vakasamataka vakatotolo sara na veitaravi ni ka mo na tukuna. E rawa ni vaka oqo na kena veitaravi: (1) Digia e dua se rua na tikina bibi mo na vakamacalataka (rawa ni o vakayagataka na ivakamacala mai na Reasoning From the Scriptures). (2) Raica se tikinivolatabu cava o na vakayagataka me tokona na tikina bibi oqori. (3) Vakasamataka na itautau maqosa ni nomu ikau ni vosa me taleitaka kina na vakarorogo o koya e taro. Oti, qai tekivu vosa.

Ia, ena rawa beka mo vakamacala vinaka ke o sega tu ni namaka na ka e tarogi? A kaya o Jisu vei iratou nona imuri: “Dou kakua ni lomaleqataka se dou na vosa vaka e vei, se cava mo dou kaya; ni na soli vei kemudou na tiki ni gauna ko ya na ka mo dou kaya. Dou na sega ni vosa ko i kemudou, ia e na vosa ga na Yalo ni Tamamudou e na lomamudou.” (Maciu 10:19, 20, VV) Sega ni kena ibalebale oqo ni na soli vei iko na “vosa ni vuku” a soli vei ira na lotu Vakarisito ena imatai ni senitiuri. (1 Kor. 12:8) Ia, ke o dau tiko o qai vakaitavi ena soqoni vakaivavakoso e vakarautaka o Jiova mera vakavulici kina nona tamata, ena vukei iko na yalona tabu mo nanuma lesu na itukutuku bibi e so ena gauna e gadrevi kina.—Aisea 50:4.

E macala ni na mana sara na vunau e sega ni volai yadua na kena vosa se cavuqaqataki. Ke o dau tovolea mo cakava oqo ena itavi e soli vei iko ena ivavakoso, ena sega ni dredre mo vakamacala ena gauna o tarogi vakasauri kina mo vakamacala, baleta ni via tautauvata ga na kena icakacaka. Kua ni lomalomaruataka tale. Ena laulau sara nomu cakacaka vakavunau ke o vulica mo dau cavuta sara ga na nomu ivakamacala, o sega ni vola na vosa matailalai mo cavuta se cavuqaqataka. Ke o qai lesi mo vunau ena ivavakoso, era na vakatudaliga matua vei iko na vakarorogo, ena tara na lomadra nomu ivakamacala.