Rogo Matau

EDA dau vakacegu nida veitalanoa kei ira noda itokani. Na veika eda cavuta e sa lako ga mai. So era dau tatavosavosa; so era vosa toka ga vakamalua. Ia, e totoka ni cavuti ga na vosa ni veisiga, e rogo matau.

Ena yasana adua, e sega ni ka vukutaki meda vakatautaukeni keda nida veivosaki kei ira eda sega ni veikilai. Kena ivalavala kina ena levu na vanua me dau tau na vosa ni vakarokoroko nira kidavaki na vulagi. Ni oti na veikidavaki, sa na qai vakatau ke ganita me tosoi tiko ga na vosa ni vakarokoroko, se kua.

E dodonu tale ga mo qaqarauni ni o vosa mai na buturara. Ke o sa rui vakatautaukeni iko tale, ena rawa ni tauri vakamamada na soqoni vakarisito, ena vakawaletaki na ka o tukuna. Ena so na vanua, sa tiko ga na vosa e dodonu me cavuti vei ira na itabaqase, qasenivuli, vakailesilesi ni matanitu se itubutubu. (Dikeva mada na vosa e vakayagataki ena Cakacaka 7:2 kei na 13:16, VV.) Duatani ga na vosa eda na vakayagataka nida vosa vua na watida, se noda itokani dredre. Me kua ni rogorogo bibi tale vakasivia na itautau ni noda vosa nida vosa mai na buturara, ena yasana adua, eda na saga tiko ga me rakorako.

Ia, e tiko e so na ka e rawa ni vakavuna me sega ni rogo matau na nona vosa e dua—me sega ni vaka na ivakarau dina ni nona vosa. Dua vei ira oqo na ituvatuva ni iyatuvosa. Rawa ni basika na leqa ke muria sara ga o koya e vosa tiko na ituvatuva ni vosa e volai. Vakalevu me dau duatani ga na ivakarau ni volavola duatani noda ivosavosa. Io, e dau yavutaki noda vosa se ivakamacala ena ivola tabaki e so. Rawa ni yavutaki noda vunau ena dua na kena tikidua. Ia, ke o vakasavuya nomu itukutuku ena kena ivolavolai sara ga e tabaki ena veva, ena sega ni kurabuitaki ni na duatani na itautau ni nomu vosa. Mo rawa ni vosa me vaka ga nomu ivosavosa e veisiga, tovolea mo vakadewataka nomu itukutuku ena ivakarau dina ga ni nomu vosa, me leleka ga nomu iyatuvosa, me kua ni babalavu qai vereverea.

Nanuma tale ga me veitubuyaki na rorogo ni domomu. E sega ni rogo vinaka na vosa e dua tu ga na kena rorogo kei na kena totolo, e sega ni veitubuyaki. Nida veivosaki e veisiga, e rawa ni totolo noda vosa se berabera sara, rawa ni rogolevu se rogo lailai sobu.

Ni o vosa ina dua na ilawalawa levu, vosa me vaka ga na nomu dau veivosaki e veisiga. Ia, me kena ikuri na nomu saga me rogolevu cake na domomu, me kaukaua, me bulabula tale ga me rawa nira vakatudaliga tiko ga vei iko na vakarorogo.

Na nomu qarauna mo dau vosa vakadodonu ni o veivosaki e veisiga ena vakarawarawataka nomu saga me rogo matau nomu ivakamacala ena cakacaka vakaitalatala. Sega ni kena ibalebale oqo mo vuli vinaka sara. Ia e vinaka mo bucina na ivakarau ni vosa ena vakavuna me taleitaki na ka o tukuna, mo dokai tale ga. Me salavata kei na tikina oya, raica mada kevaka ena gadrevi mo na cakacaka ena vica na tikina oqo mo vakavinakataka kina nomu dau veivosaki e veisiga.

1. Kua ni vakayagataka na vosa ni varada se na mataqali iyatuvosa era dau kilai tani kina o ira era cata na ivalavala savasava. Me salavata kei na Kolosa 3:8, kua ni cavuta na vosa velavela qai vakasisila. Ena yasana adua, e sega ni dua na ca ni nomu vakayagataka na vosa e dau cavuti e veisiga. E sega beka ni rogo bibi sara, ia e sa vosa ciqomi me dau vakayagataki ena veivosaki.

2. Me matata nomu vakamacalataka na itukutuku o vakasavuya. Vulica mo vakayagataka na vosa e ganita na dui ulutaga e lesi vei iko. Kua ni vakayagataka na vosa se iyatuvosa vata ga ena veika kece o vakamacalataka.

3. Me matata rawa ena nomu vakasama na ka mo tukuna mo qai vosa, mo kua kina ni lai lesuva tiko vakavica e dua na ka ni sa seva vei iko na kena ivakamacala.

4. Me kua ni sivia nomu vosa, de buawa tale na ka vinaka o via tukuna. Saga mo dau tukuna ga vakalekaleka na tikina e bibi mera nanuma na vakarorogo.

5. Vakaraitaka ena nomu vosa ni o dau veidokai.