Matau ena Vosa kei na iVukivuki

ENA vakabauti na ka o tukuna ke o vosa me vaka ga na nomu dau vosa e veisiga. O na vakabauta beka e dua e vosa mai vei iko qai vunitaka vei iko na matana, e sega ni via vakaraitaki koya? Sega sara. O koya gona, me kua ni duatani na domomu se mo vakatotomuria tale e dua ni o vosa, vosa me vaka ga o dau cakava e veisiga.

Kena vinakati meda vosa me vaka ga noda dau vosa e veisiga e sega ni kena ibalebale meda vakawaletaka noda vosa. E rogorogo ca na vosa e sega ni taladrodro, e vakarogotaki cala, qai vaka e kana uvi katakata o koya e cavuta. E sega tale ga ni kilikili na vosa ni saqata. Ena veigauna kece, e dodonu me rakorako na noda vosa kei na noda ivukivuki. Me kua ga ni vakarokoroko tale vakasivia noda vosa, meda kua tale ga ni kauaitaki ira vakasivia na tani se ra na vakabauta noda ivakamacala se sega.

Ena Cakacaka Vakavunau. Ni o volekata yani e dua na vale, se o vakarau vakamacala vua e dua drau sota, o dau taqaya? Levu vei keda eda dau vakila oqo, ia e so era vakila vakalevu cake. Noda taqaya e rawa ni vakilai ena irogorogo ni domoda ni na vaka e duatani se ninini, e rawa ni laurai tale ga ena ligada kei na uluda ni vaka e lewa na tani na kena yavala.

E levu na vuna e rawa ni yaco kina oqo vua e dua na dautukutuku. De dua e kauaitaki ira tiko na itaukeinivale se ra na ciqomi koya se sega. E dau yacovi keda kece oqo, ia ena basika na leqa ke sa sivia tale noda kauaitaka na ka vaka oqo. Ke o dau taqaya ni o vakarau vosa vua e dua ena cakacaka vakavunau, na cava mo cakava? Vakavakarau vinaka, dau kerea na veivuke i Jiova. (Caka. 4:29) Vakasamataka na loloma levu i Jiova ena nona solia na galala vei keda meda digia na bula uasivi kei na bula tawamudu ena Parataisi. Vakasamataki ira o vinakata tiko mo vukei ira, kei na kena bibi mera rogoca na itukutuku vinaka.

Kua tale ga ni guilecava ni vakatau vua na tamata yadua na nona ciqoma na itukutuku vinaka se sega. E kila vinaka na ka oqo o Jisu ena gauna a vunau voli kina e Isireli makawa. O koya gona, e nomu itavi ga mo vunau. (Maciu 24:14) Nomu lako mada ga yani ena cakacaka vakavunau e sa ivakadinadina tiko, se o vosa rawa vua e dua se sega. O sa vakayacora ga na nomu itavi ni o sa soli iko vei Jiova me vakayagataki iko mo cakava na nona inaki. Ia, ni soli vei iko na galala mo vosa, ena vakaevei na nomu ivakamacala? Ena rogo matau, ena taleitaki tale ga na nomu vosa ke o dau kauaitaka na nodra lomaleqa na itaukeinivale.

Ena taleitaki tale ga nomu ivakamacala ke o vosa ena ivakarau ga ni veivosaki o dau cakava e veisiga. De dua era na lai taleitaka tale ga kina mera rogoca na vakasama vakaivolatabu o via wasea vei ira. Kua ni vunau vei ira, veivosaki vata kei ira. Matamamarau, kauaitaki ira, rogoci ira nira vosa. E tu na ivalavala ni dui vanua me baleta na veivosaki kei ira na vulagi, oqo tale ga ena vinaka mo nanuma tiko. Ia, na kena ilutua ga na matamamarau.

Ena Buturara. Ni o vosa vei ira e lewe vica, e vinaka mo vosa me vaka ga na nomu dau vosa e veisiga. E macala ni na gadrevi mo vosa i cake kevaka era lewe levu toka o vosa vei ira. Ke o nanuma mo na wiligusutaka na ka mo na lai cavuta, se o vola vakamatailalai na ka mo na tukuna, de dua e sa rui sivia tale na nomu vinakata me rogo vinaka nomu vosa. E bibi me rogo vinaka, ia ena rawa ni lai rogo ca tale ke o sa rui kauaitaka vakasivia. Ena rogo mawi vei ira na vakarorogo, era na rawa ni nanuma kina ni sega ni vu sara mai lomamu nomu ivakamacala. E dodonu me matata vinaka ga vei iko na tikina bibi kece ena nomu itavi, oqo ga na ka mo kauaitaka vakalevu, kua ni leqataka soti na vosa mo cavuta.

Nanuma tale ga oqo ni o vakatarogi ena soqoni. Vakavakarau vinaka, kua ga ni wilika se wiligusutaka nomu isaunitaro. Tukuna ga mai ena tiki ni gauna o tarogi kina na ka e tu e lomamu, oqo ena tarai ira na vakarorogo.

E so na iwalewale vinaka ni vosa e rawa ni lai mawi tale ke taurivaki cala. Kena ivakaraitaki, e dodonu mo cavuta yadua na vosa mo vakarogotaka vinaka kina, ia mo kua ni nanuma cala ni kena ibalebale mo yaraka nomu vosa. Ena bulabula nomu vosa ni o matanataka vinaka, ia ke rui lailai nomu yavala, se o sa rui yavavala tale vakasivia, era na kauaitaki iko ga na vakarorogo, ra sega ni kauaitaka na ka o tukuna. Me veiganiti na rorogo ni domomu, me kua ga ni rogo levu tale vakasivia. So na gauna e vinaka me kaukaua cake mai na rorogo ni domomu, ia qarauna ga mo kua ni kurau tale. Lewa vinaka na veitubuyaki ni domomu, bulabula ni nomu vosa, kei na nomu matanataka na ka o tukuna, baleta ke o sega ni lewa vinaka, era na vakaraici iko tiko ga na vakarorogo ra sega ni kauaitaka na ka o tukuna, e rawa ni vakavuna tale ga mera tikotiko vakaca.

Eda duidui, duidui tale ga na ivakarau ni noda vosa. Nida veivosaki sara mada ga, so era qarauna vakamatailalai na vosa era cavuta, so era tabaka ga yani. Vei iko, na ka ga e bibi mo vosa vakavinaka, me rakorako nomu ivukivuki ni o lotu Vakarisito. Ni o qai lai duri mai na buturara, sa na matau ga na nomu ivosavosa kei na nomu ivukivuki ni oqori ga na ka o dau cakava e veisiga.

Ni O Wilivola e Matanalevu. E ka ni sasaga me qai rogo matau noda wilivola e matanalevu. Ia, o na rawata oqo kevaka o raica rawa na tikina bibi mai na ka o na wilika, o qai dikeva na sereki ni veitikina bibi oqori. Me matata vei iko na tikina bibi kece; ke sega, o sa na wilika wale sara tiko ga na vosa, sega ni vakilai na ka o wilika. Ni o raica e so na vosa dredre, vakadeitaka na kedra icavucavuti. Vakatovotovotaka ena nomu wiliwili i cake mo rawa ni vakila na kaukaua ni domomu kei na kena rorogo. Wilika vata tale ga na vosa era vakavotuya e dua taucoko na vakasama. Vakatovotovotaka tiko ga me yacova sara ni sa taladrodro na nomu wiliwili. Mo kila vinaka na ka o wilika me rawa ni bula na nomu wiliwili, me vakilai sara na ka o wilika. Ena rogo matau qai rogo vinaka ni o cakava oqo.

Na ivola eda wilika e matanalevu e yavutaki ga vakalevu mai na iVolatabu. Me ikuri ni wilivola eda dau cakava ena Koronivuli ni Vuli Vunau, eda dau wilivola tale ga ena cakacaka vakavunau, vaka kina nida vosa mai na buturara. Era dau lesi na tagane ena ivavakoso mera wiliwili ena Vuli Vale ni Vakatawa se Vulivola ni iVavakoso. E so na qase matua era dau lesi mera wilika na vunau e vakarautaki vakatabakidua me wiliki ena soqo lelevu. Se o wili iVolatabu se ivola cava tale, wilika na vosa lavetaki me vaka sara ga e dua e vosa dina tiko, me vakaibalebale kina na ka o wilika. Ke vica toka e lavetaki nodra vosa, veiveisautaka na domomu me vakilai kina na kedra duidui. Qarauna ga mo kua ni cakava tale vakasivia, ia me bula nomu wilivola, me vakaibalebale.

E rogo matau na wilivola e sega ni kilai ni wiliki. E vu mai lomada, e tau ena yalodina.