Dau Veikauaitaki

NIDA vakamacalataka na ka dina mai na iVolatabu, eda sega ni via vakasavu itukutuku wale ga. Eda vinakata me tara sara ga na lomadra na rogoci keda na noda itukutuku. E dua na sala eda vakayacora kina oqo na noda veikauaitaki. Ia, eda na cakava vakacava oqo?

Kauaitaka na Nodra Nanuma na Vakarorogo. O Paula e dau vakasamataka na kedra ituvaki kei na ka era nanuma na vakarogoci koya. A kaya: “Ia ka’u sa yaco me’u vaka e dua na Jiu vei ira na Jiu, me’u rawai ira kina na Jiu; vei ira sa vauci e na vunau, me’u vaka e dua sa vauci e na vunau, ia kau sa sega ni vauci e na vunau, me’u rawai ira kina era sa vauci e na vunau; vei ira sa sega kina na vunau, me’u vaka e dua sa sega vua na vunau, me’u rawai ira kina sa sega vei ira na vunau, ia ka sa sega ni yali vei au na vunau ni Kalou, au sa muria ga na vunau i Karisito; vei ira era sa malumalumu ka’u sa yaco me’u vaka e dua sa malumalumu, me’u rawai ira kina era sa malumalumu: au sa yaco me’u ka kecega vei ira kecega na tamata, me’u vakabula eso e na ka kecega. Ia ka’u sa cakava na ka kecega e na vuku ni tukutuku-vinaka, me’u rawata vata kina kei kemudou na kenai sau.” (1 Kor. 9:20-23) Ena gauna oqo, e rawa vakacava nida “ka kecega vei ira kecega na tamata”?

Ke rawa, dikeva vakalekaleka na veika e baleti koya e dua ni bera ni o vosa vua, de dua o na kila rawa kina na kena ituvaki. O na rawa ni kila na nona cakacaka. Dua beka na ka o raica o kila rawa kina se lotu cava. O na rawa ni kila se vakacava tu nona vuvale. Mai na ka o raica rawa, e rawa beka ni o qai moica nomu ivakamacala me ganiti koya.

E dodonu mo na vakasamataki ira rawa na tamata ena nomu yalava ke o vinakata me tara na lomadra nomu ivakamacala. Oqo e okati kina ena so na gauna o ira na mai tiko vulagi ena nomu itikotiko. Ke ra tiko voleka e so era lako mai vanua tani, o sa raica beka e dua na sala o rawa ni vunau kina vei ira? E inaki ni Kalou mera “bula na tamata kecega, ka mai kila sara nai vakavuvuli dina,” o koya gona, me nomu isausau mada ga me laulau na nomu vunautaka na itukutuku ni Matanitu ni Kalou vei ira kece o sotavi ira.—1 Tim. 2:4.

Vakatudaliga Matua. E rawa ni kila o Jiova na ka kece ga e via kila, ia e dau vakarorogo. A raica ena raivotu na parofita o Maikaia nona uqeti ira na agilosi o Jiova mera vakaraitaka na ka era nanuma me caka ena dua na ituvaki. E rogoca na Kalou na ka e vakatura e dua na agilosi, tala sara me lai cakava. (1 Tui 22:19-22) Ni kauai o Eparama ena lewa me tau vei Sotoma, a yalololoma o Jiova me rogoci koya. (Vkte. 18:23-33) E dau vakarorogo o Jiova, ia eda na ucui koya vakacava ena noda cakacaka vakavunau?

Uqeti ira na tani mera talaucaka mai na lomadra. Taroga e dua na taro veiganiti, qai waraki ira mera sauma. Nira vosa, vakarorogo vinaka. Nomu vakarorogo ena vakauqeti ira mera talaucaki ira mai. Ke o rogoca ena nodra ivakamacala e dua na ka era kauai tiko kina vakalevu, saga ena sala maqosa mera vakamatatataka mai. Saga mo kilai ira vinaka, ena gauna vata oqori, qarauna mo kua ni lai via kila na ka e sega ni dodonu mo kila. Vakavinavinakataki ira nira talaucaka mai na lomadra. Ke o sega mada ga ni duavata kei na ka era tukuna, vakaraitaka ga ni o doka nodra ivakamacala.—Kolo. 4:6.

Ia, me qarauni na noda veikauaitaki me kua ni lai yaco sara ena noda via kila na ka e sega ni kilikili meda kila. Noda veikauaitaki e sega ni kena ibalebale meda lai via siova na ka e baleti ira ga. (1 Pita 4:15) Meda qarauna me kua ni lai taura vakatani na noda veikauaitaki na tagane eda veivosaki ke da yalewa, se yalewa ke da tagane. E bibi oqo baleta ni duidui na itovo ni veikauaitaki ena dui vanua, duidui tale ga na rai ni tamata yadua me baleta na veikauaitaki.—Luke 6:31.

Ena vakarawarawataka noda vakarorogo kevaka eda sa vakavakarau vinaka. Eda na sega ni nuiqawaqawa voli ke sa matata vei keda na noda itukutuku, eda na vakacegu, eda na vakarorogo matua vei koya e vosa. Oqo era na lai vakacegu tale ga kina o ira era vosa tiko, ra taleitaka tale ga meda veivosaki.

Noda dau vakarorogo e vakaraitaka nida dau veirokovi. (Roma 12:10) E vakaraitaka nida doka na nodra nanuma kei na nodra rai. De dua ena uqeti ira mera vakatudaliga nida vosa. Sa rauta me vakasalataki keda na Vosa ni Kalou meda ‘kusarawa yadua meda vakarorogo, meda berabera ni vosa.’—Jeme. 1:19.

Vukei Ira na Rogoci Iko Mera Toso. Eda na nanumi ira tiko ga na tataleitaki kevaka eda kauaitaki ira, da qai saga meda lesuvi ira meda lai wasea vei ira na ka dina mai na iVolatabu ena yaga ena nodra bula. Ni o vakarau sikovi ira lesu, vakasamataka mada na ka o sa kila me baleti ira. Vakarautaka yani na ka o kila nira a kauaitaka vakalevu. Vakabibitaka na tikina yaga mai na tikinivolatabu se ivola o vakaraitaka vei ira, mera raica na sala e yaga kina vei ira na ka era vulica tiko.—Aisea 48:17.

Ke dua o vosa tiko vua e vakaraitaka na ituvaki se leqa e ora voli kina na lomana, vakayagataka sara oqo mo wasea kina vua na itukutuku vinaka. Vakatotomuri Jisu ni dau tu vakarau me vakacegui ira na rarawa. (Mari. 6:31-34) Kua ni totolo mo sa tukuna ga yani na iwali ni nona leqa se sauma ga na nona taro. Rawa ni kila kina o koya ni o sega ni kauaitaki koya dina. Vakaraitaka sara ga ni o duavata kei koya ena lolosi se leqa e sotava tiko. (1 Pita 3:8) Oti mo qai lai vakekeli ena ivoladusidusi vakaivolatabu, qai wasea vua e so na itukutuku veivakayaloqaqataki me vakacegui koya se me vosota rawa kina na leqa e sotava tiko. Ia, mo nanuma tiko ni nomu lomani koya drau veivosaki o na sega kina ni lai tukuna tale vua e dua na ka e baleti koya, vaka vo ke tiko na vuna vinaka.—Vkai. 25:9.

E dodonu meda kauaitaki ira vakalevu sara na noda vuli iVolatabu. Ni o vakarautaka na ka mo lai vakavulica vei ira, masulaka, vakasamataka tale ga na ka e gadrevi me yaga kina vei ira yadua na nodra vuli. Tarogi iko mada, ‘Cava beka me cakava me toso tiko ga kina vakayalo?’ Vakaraitaka vakayalololoma vua na ka me cakava mai na iVolatabu kei na ivola e vakarautaka na “dauveiqaravi yalo dina ka vuku.” (Maciu 24:45, VV) So na gauna ena sega ni veirauti na ivakamacala. Ena veiganiti beka mo vakaraitaka sara ga vei gonevuli na ivakavakayagataki ni dua na ivakavuvuli vakaivolatabu, ena nomudrau cakava vata e dua na ka me salavata kei na ivakavuvuli oya.—Joni 13:1-15.

E bibi na yalomatua kei na lewa matau nida vukei ira tiko e so mera moica nodra bula me salasalavata kei na ka e vinakata o Jiova. Eda duidui, duidui tale ga na ka eda dui rawata, duidui noda toso, so e totolo so e berabera. O koya gona, kua ni namaka vakasivia na ka vei ira e so. (Fpai. 4:5, NW) Kua ni vakasaurarataki ira mera veisautaka nodra bula. Laiva me qai veisautaki ira ga na Vosa ni Kalou kei na yalona tabu. E vinakata o Jiova me vu mai lomadra nodra qaravi koya, me kua nira cakava ena voraki. (Same 110:3) Kua ni vakalewa na ka era cakava veitalia sara mada ga ke ra kere ivakasala vei iko, kua sara ga ni vakatulewa vei ira.—Kala. 6:5.

Vukei Ira ena So Tale na Ka. E macala ni bibi duadua vei Jisu na nodra bula vakayalo na vakarogoci koya, ia e kauaitaka tale ga na veika tale e so era gadreva. (Maciu 15:32) Ke lailai mada ga na ka eda taukena, ena tiko ga e so na sala e rawa nida veivuke kina.

Eda na dau veinanumi ke tiko vei keda na yalo ni veikauaitaki. Kena ivakaraitaki, ke tikotiko ca o koya e vakarogoci iko ena vuku ni uca se katakata ni siga, o na raica mo drau toki ina dua tale na vanua se lokuca mo drau qai veivosaki ena dua tale na gauna. Ke o veisiko yani ena dua na gauna e sega toka ni veiganiti, o na lokuca mo qai lesu malua tale. Ke tauvimate se curu e valenibula e dua e vakaitikotiko e nomu yasa ni vale se dua na tataleitaki, vakaraitaka nomu nanumi koya ena nomu vakauta vua e dua na card, dua na ivola lekaleka, se sikovi koya. De dua o rawa ni vakarautaka e dua na ka me kania, se cakava e dua tale na ka.

Nira toso tiko na gonevuli iVolatabu, e rawa nira vakila na galili nira sa na sega soti ni gadivi ira nodra ilala. Vakavolekati iko sara vei ira. Bau toka tale vakalailai ni oti na vuli, se gade vei ira ena so tale na gauna. Uqeti ira mera digitaka ga na ilala vinaka. (Vkai. 13:20) Raica na veivuke o rawa ni solia mera tiko rawa kina ena soqoni. Dabe vata kei ira ena soqoni, raica na ka o rawa ni cakava vei ira kei ira na luvedra, me yaga kina vei ira na porokaramu kece.

Kauaitaki Ira Dina. Na veikauaitaki e dua na ka e vu sara ga mai lomada, e sega ni vulici. Levu na sala ena kilai kina se da veikauaitaki dina se sega. Ena kilai ena ivakarau ni noda vakarorogo kei na ka eda tukuna. Ena kilai ena noda yalololoma kei na ka eda cakava. Nida sega mada ga ni vosa se cakava e dua na ka, ena kilai ena noda ivalavala kei na irairai ni matada. Era na kila vinaka na tani ke da kauaitaki ira dina.

Na vuna levu duadua meda dau veikauaitaki kina oya nida vakatotomuria kina na loloma kei na yalovinaka i koya na Tamada vakalomalagi. Oqo ena vakavuna mera torovi Jiova, ra taleitaka tale ga na noda itukutuku o ira eda veivosaki. O koya gona, ni o kacivaka yani na itukutuku vinaka, ‘kua ni nanuma ga na ka e baleti iko, nanuma tale ga na ka e baleti ira na tani.’—Fpai. 2:4.