Veivakamasuti e Mana

O IRA na qase ni ivavakoso vakarisito e dodonu mera “vakayagataka na ivakavuvuli dina nira veivakamasuti.” (Taito 1:9, NW) So na gauna era na tauca nodra veivakamasuti vei ira era sotava sara tu ga na leqa. E bibi gona me salasalavata kei na ka e tukuna na iVolatabu na nodra ivakasala. O koya gona, mera rogoca na qase na ivakasala oqo: “Mo gumatua e na . . . dauveivakaroti [se, “veivakamasuti,” NW].” (1 Tim. 4:13) E vakamuai vakatabakidua na lesoni oqo vei ira na qase se o ira era tadolova tiko yani na itavi vaqase, ia e tiko na gauna era na vakamasuti ira kina na luvedra na itubutubu, se ra vakamasuti ira nodra vuli iVolatabu o ira nodra qasenivuli. Ena yaga ena ituvaki kece oqo na veika ena kovuti ena lesoni oqo.

Gauna e Gadrevi Kina na Veivakamasuti. Me vakarawarawataka noda kila na gauna meda veivakamasuti kina, e yaga meda dikeva mada e so na gauna ena iVolatabu a tau kina na veivakamasuti. A vakamasuti ira na qase na yapositolo o Pita mera qarauna nodra itavi vaka ivakatawa ni sipi ni Kalou. (1 Pita 5:1, 2, NW) A vakasalataki Taito na yapositolo o Paula me vakamasuti ira na cauravou “me ra lewai ira vakavinaka.” (Taito 2:6, VV) A vakauqeti ira nona itokani lotu Vakarisito na yapositolo o Paula me ‘duavata ga na ka era kaya’ mera qai qarauni ira na dau vakavu veisei ena kedra maliwa. (1 Kor. 1:10, VV; Roma 16:17; Fpai. 4:2) E dina ni vakacaucautaki ira na lewe ni ivavakoso mai Cesalonaika o Paula ena vuku ni veika vinaka sa ra cakava tiko, e vakamasuti ira tale ga mera saga mera muria taucoko sara na ka era dau vakasalataki kina. (1 Ces. 4:1, 10) O Pita a vakamasuti ira na tacina lotu Vakarisito mera ‘tarovi ira tiko ga mai na gagadre ca ni yago.’ (1 Pita 2:11) A vakamasuti ira na tacina vakayalo o Juta mera ‘taqomaka na vakabauta’ baleta nira sa basika tiko mai e so era sega ni doka na Kalou ena nodra dau vakayacora na ivalavala vakasisila. (Juta 3, 4, VV) Na lotu Vakarisito yadua sara mada ga e uqeti me dau veivakamasuti me kua kina ni dua e vakaukauataki na lomana ena veivakacalai ni ivalavala ca. (Iper. 3:13, NW) A vakamasuti ira na Jiu era se sega ni vakabauti Karisito o Pita: “Dou vakabulai kemudou mai nai tabatamata takelo oqo.”—Caka. 2:40.

Na cava meda cakava me mana kina noda veivakamasuti ena ituvaki vaka oqo? Me na tau vakacava na veivakamasuti me kua kina ni rogorogo kaukaua se veivakasaurarataki?

Me Yavutaki ena Loloma. Ena rawa ni rogorogo vakatani na veivakamasuti ke sega ni yavutaki ena loloma. (Fmon. 9) Ena yasana adua, e dodonu me vakilai ena domo i koya e vosa na bibi ni ka e tukuna, ke vinakata me caka kina vakatotolo e dua na ka. Ena rawa ni sega ni mana nona veivakamasuti ke rui malumu tale na kena itautau. Ena gauna vata oqori, e dodonu me tau ena yalo dina ni veikauaitaki, kei na loloma. Na veivakamasuti e tau ena dela ni loloma e sega ni vakatitiqataki ni na vakauqeti ira dina ga na vakarorogo. E kaya vei ira na kai Cesalonaika na yapositolo o Paula ni vosa tiko ena vukuna kei iratou na nona itokani: ‘Ni dou sa kila keitou sa vakamasuti kemudou yadua.’ (1 Ces. 2:11) O ira na ivakatawa lotu Vakarisito oya era vakamasuti ira dina na veitacini ena levu ni nodra loloma. Me yavutaki mada ga na ka o tukuna ena nomu kauaitaki ira dina na vakarogoci iko.

Qarauna na itautau ni nomu vosa. Me kua ni veivakayalolailaitaki vei ira o via vakauqeti ira tiko. Ia, kua ni tu vakasuka ena nomu tukuna vei ira na rogoci iko “na loma ni Kalou taucoko.” (Caka. 20:27) O ira na dau via rogoca dina na ivakasala era na sega ni cati iko ke o tukuna vakadodonu vei ira na ka dodonu.—Same 141:5.

Ia, e vinaka me tekivu na veivakamasuti ena nomu veivakacaucautaki. Vakasamataka na ka vinaka era cakava tiko na tacimu—na veika e rairai vakamarautaki Jiova sara ga: na vakaraitaki ni vakabauta ena ka era cakava, na loloma e uqeti ira mera gumatua, kei na nodra vosota nira sotava na veika dredre. (1 Ces. 1:2-8; 2 Ces. 1:3-5) Ni o cakava oqo, era na vakila na tacimu ni kauaitaki na nodra sasaga, oqo ena lai dolava na lomadra mera rogoca na veika ena talaucaki.

Me Lako Vata kei na “Vosota.” Na veivakamasuti e dodonu me lako vata kei na “vosota.” (2 Tim. 4:2) Cava e kena ibalebale oqo? O koya e vosota ena sega ni vakayalolailaitaki koya na cala e caka se kena votivoti. Ena nuidei tu ga ni na rogoci nona ivakasala. Ni tiko vei iko na yalo oqo ena gauna o veivakamasuti kina, era na raica o ira na vakamasuti ni o sega ni yalolailai ena vukudra. Ena gu na lomadra na tacimu mera cakava na ka e dodonu ke ra raica ni o nuidei nira na via qaravi Jiova tiko ga ena nodra vinaka taucoko.—Iper. 6:9.

Me Lako Vata kei “na i Vakavuvuli Dina.” Na cava me cakava e dua na qase me lako vata kina kei “na i vakavuvuli dina” na nona veivakamasuti? Me “taura dei na i vakavuvuli dina sa vakatavulici kina ka me rawa kina ni vakatavuvulitaka.” (Taito 1:9, VV) Ke o qase ni ivavakoso, oqo e kena ibalebale mo na kua ni tukuna na ka o nanuma, mo vakayagataka ga na Vosa ni Kalou me yavu ni nomu veivakamasuti. Kena ibalebale, na ka kece o tukuna me salavata kei na ivakavuvuli vakaivolatabu. Mo vakaraitaka na yaga ni kena muri na ka e kaya me baleta na tikina o vakamacalataka tiko. Nanuma tale ga na leqa e rawa ni yaco—ena gauna oqo kei na gauna se bera mai—ke sega ni muri na Vosa ni Kalou, oqo na ka mo na vakatakila sara ga vei ira na vakarorogo mera raica kina vakabibi na nomu veivakamasuti, ra cakava sara kina e dua na ka.

Me matata vei ira o vakamasuti ira na ka mera cakava, kei na kena icakacaka. Me matata tale ga vei ira ni nomu ivakamacala momona e yavutaki ga mai na iVolatabu. Ke macala ena so na ivakavuvuli vakaivolatabu ni tu e so na galala e rawa nida digidigi kina, vakamatatataka na iyalayala ni galala vaka oya. Ena itinitini ni nomu vosa, qai tauca nomu veivakamasuti me rawa ni vakayaloqaqataki ira na vakarorogo mera cakava na ka e dodonu.

Ena “Doudou.” Me qai rawa ni mana nona veivakamasuti e dua, e dodonu me “doudou” ena vosa. Kena ibalebale me na kua ni beitaki ena dua na ka. (1 Tim. 3:13) Ena rawa ga oqo kevaka e “i vakaraitaki vinaka” mada ga o koya ena ka e vakauqeti ira tiko kina na tacina. (Taito 2:6, 7, VV; 1 Pita 5:3) Ni yaco oqo, era na raica na vakarorogo ni o koya e veivakamasuti e sega ni veivunauci vaka i Ra Kasala. Era na raica ni rawa nira vakatotomuria nona vakabauta, me vaka ga na nona vakatotomuria o koya na vakabauta i Karisito.—1 Kor. 11:1; Fpai. 3:17.

E rawa ni yaga vakalevu sara na veivakamasuti e yavutaki ena Vosa ni Kalou qai tau ena loloma. Nira lesi na qase mera dau veivakamasuti, e dodonu mera vakayacora sara vakavinaka.—Roma 12:8, NW.