Wase Lima

Era Bula Vakacegu Dina na Qaravi Jiova

1, 2. (a) Na galala cava a solia na Kalou vei rau na imatai ni veiwatini me rau bula vakacegu kina? (b) Tukuna mada e so na lawa e vauca na nodrau bula o Atama kei Ivi.

NA BULA vakacegu e sega ni vakila na tamata nikua erau a vakila na imatai ni tagane kei na yalewa ni se qai buli rau o Jiova. Na Parataisi ga na nodrau itikotiko, oya na were totoka o Iteni. Sega ni bau vakaleqa na nodrau bula na tauvimate, ni vinaka vakaoti na nodrau vakasama kei na yagodrau. A sega ni waraki rau tu mai na mate me vakataki keda. Rau sega tale ga ni vaka na misini, me rau sega ni lewa rawa vakataki rau na ka, ia a soli vei rau na galala uasivi me rau dau vakatulewa. Ia ena vakatau na nodrau bula vakacegu tiko ga ena nodrau rokova na lawa sa vakadavora tu na Kalou.

² Vakasamataka mada e so na lawa oqori. A sega beka ni volai na lawa kece oqori, ia erau sa na muria ga o Atama kei Ivi ni na vinakata oya na yagodrau. Erau na kila ni dodonu me rau kana ni sa tuburi rau mai na viakana; me rau gunu ni rau sa karamaca; erau na kila tale ga ni dodonu me rau moce ni sa dromu na matanisiga. Tiko tale ga na itavi e vakacolati rau kina o Jiova. Sa vaka sara tiko ga na lawa na itavi oya ni na lewai kina na ka me rau cakava. Me rau na vakaluveni rau qai lewa na veika bula kei vuravura, me rau vakatetea tale ga na Parataisi me roboti vuravura. (Vakatekivu 1:28; 2:15) Sa lawa yaga dina qai vakavumarau! Ena veivakacegui dina na cakacaka kece erau cakava, ni rawa ni vakayagataki vinaka kina na nodrau vakasama kei na nodrau igu. A soli tale ga vei rau na galala e veiganiti me rau vakatulewataka na ka me caka. Sa tu tu na bula totoka!

3. Erau na kila vakacava o Atama kei Ivi na ivalavala me rau vakayagataka kina vakayalomatua na nodrau galala ni vakatulewa?

³ E dina ni soli vei rau o Atama kei Ivi na galala me rau vakatulewataka na ka, ia a sega ni kena ibalebale ni na tini vinaka na ka kece ga erau na vakatulewataka. Na galala e soli vei rau oqo me na kua ni ulabaleta na lawa kei na ivakavuvuli sa virikotora na Kalou. Ia erau na kila vakacava na ivakavuvuli kei na lawa oya? Ena nodrau dau vakarorogo vei koya e buli rau kei na nodrau dikeva na veika e bulia rau qai vuli mai kina. E solia na Kalou vei Atama kei Ivi na lomavuku me rau vakayagataka kina na ka erau sa vulica. Ni rau buli me rau vinaka vakaoti, ena sega ni sega ni rau na via vakatulewataka na ka ena sala ga e vakalou. Ia, ena lomadrau ga me rau vakayacora oya kevaka erau taleitaka dina na veika e sa vakayacora oti na Kalou ena vukudrau, kevaka tale ga erau via vakamarautaki koya dina.​—Vakatekivu 1:26, 27; Joni 8:29.

4. (a) Dina ni vakaroti o Atama kei Ivi me rau kua ni kania na vuata mai na dua na vunikau, kena ibalebale beka ni sa kau tani kina na nodrau galala ni vakatulewa? (b) Na cava e kilikili kina na ivakaro oya?

⁴ Ni a solia vei rau na bula, e kilikili kina vua na Kalou me qaqa se rau lomani koya dina se sega, me raica tale ga se vu dina mai lomadrau na nodrau vakamalumalumu ina nona veidusimaki. A vakaroti Atama kina o Jiova: “E tara mo kana mai na kau kecega sa tu e na were: ia mai na kau sa kilai kina na ka vinaka kei na ka ca, mo kakua ga ni kana kina: ni ko na mate vakaidina e na siga ko sa kana kina.” (Vakatekivu 2:16, 17) A vakamacalataki tale ga vei Ivi na lawa oya ni sa buli oti. (Vakatekivu 3:2, 3) Kena ibalebale beka ni sa kau tani kina na nodrau galala? Sega sara. Kevaka mada ga erau na sega ni kania na vuata mai na dua na vunikau oya, ia e levu tale tu na kakana vakatitiweli me rau vakayagataka. (Vakatekivu 2:8, 9) E kilikili ga me rau ciqoma ni vuravura kece e nona na Kalou ni a bulia. E tiko gona vua na dodonu me bulia na lawa ena lakolakovata kei na nona inaki, ra qai vakila na kawatamata na kena yaga.​—Same 24:1, 10.

5. (a) E mai oti vakacava na nodrau bula vakacegu o Atama kei Ivi? (b) Na cava e sa qai isosomi ni nodrau bula vakacegu o Atama kei Ivi, ia e mai tarai keda vakacava oya?

⁵ Ia na cava e qai yaco? Ni tuburi koya na dokadoka, e vakatanitaka kina e dua na agilosi na nona galala ni vakatulewa, mani yacana sara o Setani, e kena ibalebale “Dauveivorati.” A vakacalai Ivi ena nona yalataka vua na ka e veicoqacoqa kei na loma ni Kalou. (Vakatekivu 3:4, 5) Tomani Ivi o Atama ena kena beci na lawa ni Kalou. Mai oti vakadua e kea na nodrau bula vakacegu lagilagi baleta ni rau yatova na ka e sega ni nodrau. Sa lewai rau na ivalavala ca, rau a qai mate me vaka ga sa kaya oti na Kalou. Rau vakadewa na ivalavala ca vei ira na nodrau kawa​—oya na vuna era sa dau galeleta ga kina na ca. Na ivalavala ca tale ga e basika kina na malumalumu e vakavuna na tauvimate, qase, kei na mate. Sa galeleta tu mada ga na ca na tamata, oti oya, sa qai bukana tale o Setani mera ca sara. Oqori na vuna e laurai levu kina ena ivolatukutuku ni veigauna na veicati, basulawa, veivakatotogani, kei na ivalu era mate kina e vica vata na milioni. Sa bau duidui dina kei na bula vakacegu a solia na Kalou mai na ivakatekivu!​—Vakarua 32:4, 5; Jope 14:1, 2; Roma 5:12; Vakatakila 12:9.

Na Vakacegu Dina

6. (a) E kune e vei na vakacegu dina? (b) Na veisereki vakacava a kaya tiko o Jisu?

⁶ E ca vakalevu na bula ena vanua kece ga eda rai kina nikua. Sa rauta mera vaqara e levu na bula vakacegu. Ia ena kune e vei? E kaya o Jisu: “Kevaka dou sa muria tikoga na noqu vosa, dou sa qai noqu tisaipeli dina; ia dou na kila na ka dina, ia na ka dina ena sereki kemudou.” (Joni 8:31, 32) Oqo e sega ni veisereki se vakacegu e nuitaki ni na rawati kevaka e vuaviritaki mada e dua na veiliutaki se matanitu me qai dua tale na kena isosomi. Na vakacegu dina oqo, ena walia na leqa taucoko ni kawatamata. A vakaibalebaletaka tiko e ke o Jisu na noda sereki se na noda vagalalataki mai na ca ni ivalavala ca. (Joni 8:24, 34-36) O koya gona, ke sa mai tisaipeli dina i Jisu Karisito e dua, e sa na vakila na veisau levu ena nona bula, e sa kunea na vakacegu dina!

7. (a) Ena vakasama cava eda rawa ni sereki kina mai na ivalavala ca ena gauna sara ga oqo? (b) Na cava meda cakava meda rawata kina na veisereki oya?

⁷ Sega ni kena ibalebale oqo nira sa sega tale ni qai vakila nikua na lotu Vakarisito dina na idre mera galeleta na itovo ca. Nira sucukaya mai na ivalavala ca, ena sega ni oti na nodra valuta. (Roma 7:21-25) Ia kevaka e bulataka dina na ivakavuvuli i Jisu e dua na tamata, ena sega ni lai bobula tale tiko ni ivalavala ca. Sa na sega ni dau muria vakamataboko na idre ni ivalavala ca. Ena sega ni vesuki ena ivakarau ni bula e sega ni vakainaki, e vakavuna me ca na nona lewaeloma. Sa na vinaka na nona lewaeloma baleta ni kila ni sa vosota na Kalou na nona veicala makawa ena yavu ni isoro i Karisito. De na via kaukaua mai na gagadre cala, ia ni vorata ena nona vakananuma na ivakavuvuli savasava i Karisito, sa vakaraitaka tiko e keri ni sa sega ni qai lewai koya tale na ivalavala ca.​—Roma 6:12-17.

8. (a) Eda vakacegui vakacava nida mai lotu Vakarisito dina? (b) Meda raici ira vakacava na iliuliu vakamatanitu?

⁸ Vakasamataka mada na veika eda vakacegui kina nida lotu Vakarisito. Eda sa sereki mai na ivakavuvuli lasu, na rere vakalialia, kei na bobula ina ivalavala ca. Na itukutuku dina uasivi me baleta na kedra ituvaki na mate kei na veivakaturi e sereki keda mai na noda rerevaka vakalialia na mate. E vakacegui keda na noda kila ni Matanitu uasivi ni Kalou e sa na vakarau sosomitaka na veimatanitu vakatamata. (Taniela 2:44; Maciu 6:10) Ia e sega ni kena ibalebale meda sa beci ira kina na veiliutaki vakamatanitu kei na lawa era virikotora.​—Taito 3:1, 2; 1 Pita 2:16, 17.

9. (a) Ena nona loloma, e vukei keda vakacava o Jiova meda marautaka ena gauna oqo na vakacegu ena kena levu duadua? (b) Meda vakatulewa vakayalomatua, na cava meda cakava?

⁹ E sega ni biuti keda tu ga o Jiova meda sotava na dredre ena noda qara vakataki keda ga na bula vakacegu. E kila o koya na keda ibulicaki, na ka ena vakacegui keda dina, kei na ka ena yaga tawamudu vei keda. E sega ni lecava ni na votu vei keda na vakasama kei na itovo ena vakaleqa na noda veiwekani kei koya kei ira na wekada, de dua ena vakavuna meda sega ni vakadonui kina meda bula ena vuravura vou. Ena nona loloma, e dusimaki keda o Jiova ena iVolatabu kei na nona isoqosoqo rairai meda kila kina na veika kece oqo. (Marika 13:10; Kalatia 5:19-23; 1 Timoci 1:12, 13) Oti, e sa na qai vakatau vei keda se da na vakayagataka vakacava na noda galala soli vakalou. Kevaka eda sa ciqoma mai vu ni yaloda na ka e tukuna na iVolatabu, eda na vakatulewa vakayalomatua. Eda na sega ni ucui Atama. Eda na via vakaraitaka ni ka e bibi duadua me vinaka tiko ga na noda veiwekani kei Jiova.

Qarai e Dua Tani Tale na Vakacegu

10. Na vakacegu vakacava era lai galeleta e so na iVakadinadina i Jiova?

¹⁰ So na gauna, era nanuma e so na itabagone iVakadinadina i Jiova kei na so era qase cake ni na vinaka mera lai qara e dua tani tale na vakacegu. De na rairai totoka na veika e tu e vuravura, ia na levu ga ni nodra vakasamataka, na levu tale ga ni nodra galeleta na veika tawavakarisito e lasavi tu kina. A sega beka ni lomadra mera lai tovolea sara na wainimate gaga, mera gunu vakasivia, se mera veidauci. Ia nira sa lai veilasamaki tiko kei na so era sega ni lotu Vakarisito dina, de dua era via cakava na ka mera na vakadonui kina vei ira oya. Era sa lai vakamurimuria sara beka na nodra ivosavosa kei na nodra itovo.​—3 Joni 11.

11. So na gauna, e dau vu mai vei na veitemaki?

¹¹ So na gauna era dau veitemaki ena ka e ca e so sara ga era kaya nira qaravi Jiova. Sa yaco oti oya vei ira na lotu Vakarisito taumada, e rawa tale ga ni yaco nikua. Era sa beca tiko na lawa ni Kalou o ira vaka oya e lomadra mera qara ga na ka mera marau kina. Nodra ile ni ka era cakava tiko na “lasa wale ga.” Era ‘yalataka na galala, ia era vakabobulataki ena ca o ira.’​—2 Pita 2:19.

12. Na cava na itinitini ca ni ivalavala e saqata na lawa kei na ivakavuvuli ni Kalou?

¹² Ena dau tini ca ga na veika vaka oya e nanumi tu ni kauta mai na vakacegu, baleta ni beci kina na lawa ni Kalou. Me kena ivakaraitaki, na veidauci e rawa ni vakaleqa na vakasama, e kauta mai na mate ca, rawa ni yaco sara kina na mate, na buketeisala, rawa tale ga ni rau tawase kina e dua na veiwatini. (1 Korinica 6:18; 1 Cesalonaika 4:3-8) Na wainimate gaga e rawa ni lako vakaca vei koya e vakayagataka, ena vosa berabera, buawa nona rai, ena via rebo, viavia tasogo nona icegu, ena veilecayaki na nona vakasama, rawa ni mate sara kina. De dua ena bobula ena wainimate gaga, qai tini ena butako me rawa tiko ga kina na kena ivoli. Na vakayagataki sivia ni yaqona ni valagi se yaqona ni viti e rawa ni vaka tale ga oqo na kena itinitini. (Vosa Vakaibalebale 23:29-35) De ra nanuma o ira na cakava na veika vaka oya nira sa kunea na vakacegu, ia e muri, era qai liaca nira sa bobula ni ivalavala ca. Qai ca sara na vanua e dau veivakamuai kina na ivalavala ca! Noda dikeva vakayalomatua na tikina oqori ena gauna sara ga oqo ena taqomaki keda meda kua ni sotava na ka mosimosi.​—Kalatia 6:7, 8.

iTekitekivu ni Leqa

13. (a) Dau basika vakacava na garogaro ca? (b) Na rai i cei e yaga meda kila meda taura rawa kina se o cei o ira meda kua ni “dautiko vata kei ira”? (c) Ni o sauma na taro era volai toka ena parakaravu e 13, vakabibitaka na rai i Jiova.

¹³ Vakasamataka mada na itekitekivu ni leqa. E kaya na iVolatabu: “Sa dauveretaki na tamata yadua, ni sa vecei koya na nona garogaro ca ka bacani koya. Ni sa qai kunekune na garogaro ca, sa vakasucuma kina nai valavala ca: a sa oti nai valavala ca, sa qai vakasucuma na mate.” (Jemesa 1:14, 15) Na cava e vakavuna na garogaro ca? Na ka e vakasamataki. Dau vu vakalevu oqo mai na noda lasavi ira na tamata era sega ni vakaitovotaka na ivakavuvuli vakaivolatabu. Io, eda kila kece ni bibi meda kua ni “dautiko vata kei ira era sa ca.” (1 Korinica 15:33) Ia eda na kila ga vakacava se o cei era sega ni noda ilala vinaka? Na cava na rai i Jiova me baleta na tikina oqo? Sauma na taro era tiko oqo, wilika tale ga na tikinivolatabu era sega ni lavetaki, mo vakalewa kina se cava na rai dodonu me tiko vei keda.

Dina beka nira tamata vakaturaga e so, ia me sa lai nanumi sara kina nira noda ilala vinaka? (Vakatekivu 34:1, 2, 18, 19)

Ena rawa beka nida kila mai na nodra ivosavosa kei nodra dau veiwali se ra itokani vinaka se sega? (Efeso 5:3, 4)

Ena raici keda vakacava o Jiova kevaka eda via lai vakailala kei ira era sega ni lomani koya? (2 Veigauna 19:1, 2)

Eda na cakacaka se vuli kei ira eda sega ni vakabauta vata, ia na cava meda na qaqarauni kina? (1 Pita 4:3, 4)

Nida sara retioyaloyalo se iyaloyalo yavala, vakayagataka na internet, wili ivola se wili niusiveva, oqori tale ga na vakailala. O koya gona, na mataqali iyaloyalo se itukutuku vakacava meda qarauna? (Vosa Vakaibalebale 3:31; Aisea 8:19; Efeso 4:17-19)

Na ilala eda digia, ena tukuni keda vei Jiova nida tamata vakacava? (Same 26:1, 4, 5; 97:10)

14. Na bula vakacegu lagilagi cava sa waraki ira tu mai era muria edaidai ena yalodina na ivakasala ni Vosa ni Kalou?

¹⁴ Sa toka ga oqo e matada na vuravura vou ni Kalou. Ena vakacegui na kawatamata ni sa vesu o Setani qai vakarusai na ivakarau ni veika ca kece e lewa tu o koya. Oqori na ka ena vakayacora na Matanitu vakalomalagi ni Kalou. Ni toso na gauna, sa na qai kau tani kece vei ira na tamata talairawarawa na revurevu ni ivalavala ca, sa na vinaka vakaoti kina na nodra vakasama kei na yagodra, ra bula tawamudu sara e Parataisi. Sa ra na qai marautaka na veika buli kece na bula vakacegu kei na galala e salasala vata vinaka kei na “Yalo ni Turaga.” (2 Korinica 3:17) Sa na dua dina na ka vakalialia kevaka meda sega ni qai vakadonui tale meda rawata na bula oya baleta wale ga nida beca nikua na ivakasala ni Vosa ni Kalou! Mai na noda vakayagataka vakayalomatua edaidai na noda galala vakarisito, meda vakaraitaka mada ga ni noda gagadre dina meda “vakaivotavota e na nodra galala lagilagi na luve ni Kalou.”​—Roma 8:21, VV.

Railesuvi

• A vakacava tu na nodrau bula vakacegu na imatai ni veiwatini? E duidui vakacava oya kei na bula ni kawatamata edaidai?

• E vakaevei tu na nodra vakacegu na lotu Vakarisito dina? E duidui vakacava oqori kei na vakacegu e solia o vuravura?

• Na cava e rui bibi kina meda kua ni vakailala kei ira na tamata ca? Na lewa i cei me baleta na ka e ca, a sega ni rogoca o Atama, eda rogoca o keda?

[iYaloyalo ena tabana e 46]

Eda vakasalataki ena Vosa ni Kalou: “Dou kakua ni vakaisini kemudou vakataki kemudou: sa vakacala nai valavala vinaka na dautiko vata kei ira era sa ca”