Laiva Vei Jiova me Solia Vei Iko na Galala Dina

“Dikeva na lawa uasivi ni veisereki.”​—JEME. 1:25.

O RAWA NI VAKAMACALATAKA?

Na lawa cava ena vakilai kina na galala dina, ena yaga vei cei na lawa qori?

Na cava meda cakava me rawa nida vakila na galala dina?

Na galala cava era na vakila na kawatamata talairawarawa?

1, 2. (a) Na cava sa yaco tiko ena galala ni tamata, na cava na vuna? (b) Na galala cava sa voleka nira vakila na tamata i Jiova?

NIKUA era sa qai kocokoco ga vakalevu na tamata, era voravora ra qai dau beca na lawa. (2 Tim. 3:1-5) Ena nodra saga e levu na matanitu me wali na ituvaki qori, era bulia kina e levu na lawa, era vakavinakataka na nodra veiqaravi na ovisa, ra qai biuta na vidio e veivanua me kilai na ka era cakava na lewenivanua. Ena so na vanua, ena nodra vinakata na lewenivanua mera taqomaki, era biuta kina na alamu ena nodra itikotiko, vakalevutaka na loka ra qai vakabai livaliva. Levu era sega ni via veilakoyaki ena bogi se mera laivi luvedra mera qito duadua e tuba ena siga kei na bogi. Io, sa yalani tiko ga mai na galala e soli vei keda, de dua ena sega tale ga ni wali rawa na ituvaki qori.

² A tukuna o Setani ena were o Iteni, ni na rawati ga na galala dina ke sega ni lewai keda o Jiova. Sa bau veivakacalai dina qori! Na levu ga ni nodra raica vakamamada na tamata na ivakatagedegede ni Kalou me baleta na itovo kei na ka e vinakata me caka, na levu tale ga ni leqa era sotava. E tarai keda tale ga na tamata i Jiova na torosobu ni bula nikua. Ia eda vakanuinui ni dua na siga eda na sereki mai na veivakabobulataki ni ivalavala ca kei na veika ca, meda marautaka kina na ka e vakatoka na iVolatabu me “galala lagilagi era vakila tu na luve ni Kalou.” (Roma 8:21) Nikua, sa vakarautaki ira tiko na nona tamata o Jiova mera vakila na galala qori. E cakava vakacava ya?

3. Na lawa cava e solia o Jiova vei ira na nona dauveiqaravi, na taro cava eda na veivosakitaka?

³ Me vakarautaki ira na nona tamata o Jiova ina galala mera vakila ena gauna e se bera mai, e solia kina vei keda na ka e vakatoka o Jemesa me “lawa uasivi ni veisereki.” (Wilika Jemesa 1:25.) Eso tale na ivakadewa ni iVolatabu e tukuna “na lawa e sereki keda” (The New English Bible) kei na “lawa uasivi e veivagalalataki” (The New American Bible). Nira rogoca e levu na vosa na lawa era vakasamataka ga na vakatatabu, sega ni galala. Na cava gona na “lawa uasivi ni veisereki”? Ena sereki keda vakacava?

NA LAWA E VEISEREKI

4. Na cava na “lawa uasivi ni veisereki,” ena yaga vei cei?

⁴ Na Lawa a soli vei Mosese e sega ni “lawa uasivi ni veisereki.” Na lawa a soli vei Mosese e vakaraitaka ga vei ira na Isireli nira ivalavala ca, sa qai mai vakayacora o Karisito na lawa ya. (Maciu 5:17; Kala. 3:19) Ia na lawa cava e tukuna tiko o Jemesa? A vakaibalebaletaka tiko na “lawa i Karisito,” e vakatokai tale ga me “lawa ga ni vakabauta” kei na “nodra lawa na tamata galala.” (Kala. 6:2; Roma 3:27; Jeme. 2:12) “Na lawa uasivi” e vakaibalebaletaka gona na ka kece e vinakata o Jiova meda cakava. Na lawa qori ena yaga vei ira na lumuti kei na ‘so tale na sipi.’—Joni 10:16.

5. Na cava e sega ni vakaicolacola kina na lawa ni veisereki?

⁵ E duidui vakalevu na “lawa uasivi” ni vakatauvatani kei na lawa ni veimatanitu, e sega ni vereverea se vakaicolacola. Ia e ivakaro qai ivakavuvuli rawarawa ga. (1 Joni 5:3) E tukuna o Jisu: “E veivakacegui na noqu ivua, e mamada tale ga na noqu icolacola.” (Maciu 11:29, 30) Kena ikuri, “na lawa uasivi” e sega ni gadrevi me dua na kena lisi ni vakatatabu se itotogi, e sega ni volai ena vatu, e yavutaki ga ena loloma qai tugani ena nodra vakasama kei na lomadra na tamata.​—Wilika Iperiu 8:6, 10.

SALA E VAGALALATAKI KEDA KINA “NA LAWA UASIVI”

6, 7. Na cava e rawa ni tukuni me baleta na ivakatagedegede i Jiova? Na cava e veivagalalataki kina na lawa ni veisereki?

⁶ E yaga qai itataqomaki na lawa e dau vakarautaka o Jiova vei keda. Kena ivakaraitaki, na lawa e lewa na lomalagi kei na vuravura me vaka na lawa ni idre kei vuravura. Era sega ni dau vosavosa na lewenivanua ke vakaleqai ira na lawa qori. Era marautaka ga nira kila ni yaga vakalevu ena nodra bula. E yaga tale ga ena noda bula na ivakatagedegede ni Kalou eda vulica ena “lawa uasivi” i Karisito.

⁷ E itataqomaki na lawa ni veisereki, e rawa tale ga nida vakayacora kina na veika vinaka eda taleitaka qai sega ni vakaleqai keda se na nodra dodonu eso tale. Me rawa gona na galala dina, e bibi meda bucina na veika vinaka me salavata kei na itovo i Jiova kei na nona ivakatagedegede, se noda vulica meda taleitaka na ka e taleitaka o Jiova, meda cata na ka e cata. Na lawa ni veisereki e vukei keda meda cakava qori.​—Emosi 5:15.

8, 9. Na veivakalougatataki cava era na vakila o ira na talairawarawa ina lawa ni veisereki? Tukuna na kena ivakaraitaki.

⁸ Nida sega ni uasivi, e ka ni sasaga toka meda dau tarova na noda gagadre ca. Ia ke da yalodina ni talairawarawa ina lawa ni veisereki, eda na vakila mada ga vakalailai na galala nikua. Kena ivakaraitaki: E se qai vuli iVolatabu ga o Jay, e bobula tale ga ena vakatavako. A vinakati me vakatulewa ena gauna e vulica kina ni sega ni taleitaka o Jiova na vakatavako. Ena vakalaiva me lewai koya tiko ga na nona gagadre vakayago se na talairawarawa vei Jiova? E donu na nona vakatulewa me qarava na Kalou, ia e sega ni rawarawa ni tiko na gauna e dau via vakatavako sara ga kina. Na cava e tukuna o Jay ni sa valuta na ituvaki qori? E kaya: “Au sa galala sara ga, au marau vakalevu.”

⁹ Na galala e solia tu o vuravura e uqeti ira na tamata mera “vakabibitaka ga na ka vakayago.” A qai kila o Jay ni o ira qori era vakabobulataki ina ivalavala ca. O ira era talairawarawa ina lawa ni veisereki ni Kalou era “vakabibitaka ga na ka vakayalo,” e veivagalalataki qai “vu ni bula kei na vakacegu.” (Roma 8:5, 6) A sereki vakacava o Jay ena nona bobula ena vakatavako? E sega ni rawata ena nona kaukaua ga, ena kaukaua ga ni Kalou. A kaya: “Au vulica wasoma na iVolatabu, kerea na veidusimaki ni yalo tabu, qai qara na nodra veivuke na lewe ni ivavakoso.” Na isolisoli kece qori e rawa tale ga ni vukei keda meda vakila na galala dina. Meda raica mada se na vukei keda vakacava na isolisoli qori.

DIKEVA NA VOSA NI KALOU

10. Na cava na ibalebale ni noda “dikeva” na lawa ni Kalou?

¹⁰ E tukuni ena Jemesa 1:25: “O koya e dikeva na lawa uasivi ni veisereki qai muria tiko ga, ena marau ni cakava tiko.” Na vosa taumada vaKirisi e vakadewataki me “dikeva” e kena ibalebale “lolou mo vakaraica vinaka e dua na ka,” qori e vinakati kina na sasaga. Io, me rawa ni uqeta na noda vakasama kei na lomada na lawa ni veisereki, ena vinakati meda vulica vagumatua na iVolatabu da qai vakasamataka vakatitobu na ka eda wilika.​—1 Tim. 4:15.

11, 12. (a) A vakabibitaka vakacava o Jisu ni vinakati me ivakarau sara ga ni noda bula na ka dina? (b) Me vaka e laurai ena ivakaraitaki, na cava mera qarauna na itabagone?

¹¹ Ena vinakati tale ga meda ‘muria tiko ga’ se meda kua ni cegu ni talairawarawa ina Vosa ni Kalou, oya me ivakarau sara ga ni noda bula na ka dina. A tukuna tale ga o Jisu e dua na vakasama va qori vei ira era vakabauti koya: “Oni noqu tisaipeli dina ke oni muria tiko ga na noqu vosa, oni na kila na ka dina, na ka dina ena qai sereki kemuni.” (Joni 8:31, 32) E tukuni ena dua na ivola, na vosa “kila” ena tikinivolatabu qori e vakaibalebaletaka tale ga na vakavinavinaka, baleta na “ka e kilai e talei se bibi vei koya e kila.” Eda rawa ni “kila” vakavinaka na ka dina ke ivakarau sara ga ni noda bula na ka dina. Nida cakava qori sa rawa nida kaya nida “vakila tiko na . . . yaga” ni “vosa ni Kalou” ena noda bula, e veisautaka tiko na noda itovo me rawa nida vakatotomuria voleka na nona itovo na Tamada vakalomalagi.​—1 Ces. 2:13.

¹² E vinaka mo taroga, ‘Au kila vinaka na ka dina? E ivakarau sara ga ni noqu bula na ka dina? Se au galeleta ena so na gauna na “galala” e solia tu o vuravura?’ Ni raica lesu e dua na tacida yalewa a susu ena dina na gauna e se itabagone kina, e kaya: “Ni o susu ena dina, o na vakabauta ni bula tiko o Jiova. Ia au sega sara ga ni kilai koya vinaka. Au sega sara ni cata na ka e cata o koya. Au nanuma ni na sega ni kauaitaka na ka au na cakava. Au sega ni bau torovi koya niu sotava na ituvaki dredre. Au nuitaka ga na ka au kila, ia au liaca ni ka vakalialia qori baleta niu sega ga ni kila e dua na ka.” E kalougata ni qai liaca na tacida yalewa qori ni cala na nona rai, a mani cakava e levu na veiveisau ena nona bula. A dua sara na painia tudei.

VEISEREKI NA YALO TABU

13. E sereki keda vakacava na yalo tabu ni Kalou?

¹³ Eda wilika ena 2 Korinica 3:17: “Na vanua e tiko kina na yalo i Jiova, e vakilai kina na galala.” E sereki keda vakacava na yalo tabu? E vukei keda meda vakaraitaka na itovo me vaka na “loloma, marau, vakacegu, vosota vakadede, yalololoma, yalovinaka, vakabauta, yalomalua, lewai koya vinaka.” (Kala. 5:22, 23) Me vaka ga e vakadinadinataki tu nikua, ena sega ni rawati na galala dina ke sega ni tiko vei keda na itovo kece qori, vakabibi na loloma. Ni cavuta oti na yapositolo o Paula na itovo kece qori, sa qai tomana: “E sega na lawa e vakacala na ka kece qo.” Na cava mada e vakaibalebaletaka? E sega ni dua na lawa ena tarova na noda bucina vakalevu na itovo e umani ena vua ni yalo tabu. (Kala. 5:18) Ena sega ni yaga me dua na lawa va qori baleta e inaki sara ga i Jiova meda bucina tiko ga me tawamudu na itovo e umani ena vua ni yalo tabu, me kua tale ga ni dua na ka me vakataotaka.

14. Na sala cava e veivakabobulataki kina na yalo ni vuravura?

¹⁴ De dua era na nanuma o ira e lewai ira tu na yalo ni vuravura nira galala, baleta nira dau vakaceguya ga na gagadre ni yagodra. (Wilika 2 Pita 2:18, 19.) Ia era sega ni kila nira vakabobulataki tu. Dua na ka na levu ni lawa kei na ivakaro era bulia na veimatanitu me rawa nira tarova nodra vakaceguya nodra gagadre ca na tamata. E tukuna o Paula: “A sega ni buli na lawa me baleta na tamata yalododonu, me baleti ira ga era beca na lawa kei ira na tamata itovo ca.” (1 Tim. 1:9, 10) O ira qori era bobula ina gagadre ni yagodra ivalavala ca, era uqeti mera ‘cakava na ka e vinakata na yagodra,’ e lewai ira tale ga na yagodra me vaka e dua na turaga ca. (Efeso 2:1-3) Me vaka ga na manumanu lalai era yatova e dua na boulu oni ra qai tao kina, na nodra via vakaceguya tale ga na nodra gagadre eso e dau vakavuna tale mera bobula kina.​—Jeme. 1:14, 15.

SEREKI KEDA NA IVAVAKOSO

15, 16. E yaga vakacava na noda mai lewena na ivavakoso? Na galala cava eda vakila kina?

¹⁵ Na nomu veimaliwai ena ivavakoso e sega ni vaka na nomu lewena e dua na kalavo. O mai lewena na ivavakoso ni vagolei iko mai o Jiova. (Joni 6:44) Na cava e digitaki iko kina? Baleta beka ni o yalododonu, o rerevaka na Kalou? De dua o na kaya, “sega!” Ia na cava a raica na Kalou? A raica ni o rawa ni muria na nona lawa ni veisereki, o rawa tale ga ni ciqoma na nona veidusimaki yalololoma. Ni o mai lewena na ivavakoso, e karoni iko voli mai o Jiova ena nona vakavulici iko ena nona Vosa. E sereki iko mai na ivakavuvuli ni lotu lasu kei na vakabauta vakatevoro. E vakavulici iko tale ga ena sala mo vakatotomuria kina na itovo i Karisito. (Wilika Efeso 4:22-24.) Nikua, o kalougata vakalevu ni o lewena na ilawalawa duadua ga e vuravura era okati mera “tamata galala.”—Jeme. 2:12.

¹⁶ Vakasamataka mada qo: Ni o maliwai ira na tamata era lomani Jiova mai vu ni lomadra, vakacava o dau rere? O dau veiraiyaki ni o lomaleqa? Ni o veitalanoa tiko ena soqoni, o dau taura tiko ga na nomu iyaya ni o leqataka ni na butakoci? Sega! O na sega ni leqataka e dua na ka, o galala sara ga. Vakacava ke o tiko ena dua na soqo vakavuravura? Macala ga ni na yaco na kena veibasai! Io, na galala eda vakila na dauveiqaravi i Jiova nikua e ivakaraitaki lailai ga ni galala eda na vakila ena veigauna e se bera mai.

“GALALA LAGILAGI ERA VAKILA TU NA LUVE NI KALOU”

17. E yaga vakacava ena noda galala na kawatamata na nodra ‘vakaraitaki na luve ni Kalou’?

¹⁷ Ni vakamacalataka tiko Paula na galala ena solia o Jiova vei ira na nona tamata e vuravura, e vola: “Nira sa nanamaki tu na kabuli kece ina gauna mera vakaraitaki kina na luve ni Kalou.” Sa qai tomana: “Mera sereki na kabuli mai na nodra bobula tu ina ca, mera qai vakila na galala lagilagi era vakila tu na luve ni Kalou.” (Roma 8:19-21) “Na kabuli” e vakaibalebaletaki ira na kawatamata e nodra inuinui na bula e vuravura, ena yaga vei ira qori na nodra “vakaraitaki” na luve ni Kalou era lumuti ena yalo tabu. Na nodra vakaraitaki ena tekivu nira sa vakaturi mera lai bula e lomalagi na “luve” ni Kalou, era na tokoni Karisito ena kena vakasavasavataki na veika ca e vuravura mera qai vakabulai “na isoqosoqo levu” ena vuravura vou.​—Vkta. 7:9, 14.

18. Na cava tale era na vagalalataki mai kina na kawatamata talairawarawa? Na galala uasivi cava era na qai vakila?

¹⁸ Dua tale na ka era na vagalalataki mai kina o ira na kawatamata talairawarawa—era na galala mai na veivakamuai i Setani kei na nona timoni. (Vkta. 20:1-3) Ena veivakacegui dina qori! O ira na 144,000 era veiliutaki vakatui, vakabete tale ga kei Karisito, era na vakayagataka tiko ga na isoro ni veivoli ena vukuda me yacova nida sa galala vakadua mai na ivalavala ca a vakadewa o Atama. (Vkta. 5:9, 10) Ke da yalodina tiko ga ena gauna eda vakatovolei kina, eda na rawata na galala uasivi a nakita taumada o Jiova—“na galala lagilagi era vakila tu na luve ni Kalou.” Vakasamataka mada! Sa na sega ni vinakati mo sasaga vakaukaua mo cakava na ka e vinakata na Kalou, ni sa na uasivi na yagomu, lomamu, kei na nomu vakasama. O na vakatotomuria vinaka sara na itovo ni Kalou.

19. Na cava meda cakava tiko ga nikua ke da vinakata meda vakila na galala dina?

¹⁹ Vakacava o na via vakila na “galala lagilagi era vakila tu na luve ni Kalou”? Ke vaka kina, me uqeta tiko mada ga na nomu vakasama kei na lomamu na “lawa uasivi ni veisereki.” Mo vulica vagumatua na iVolatabu. Muria na ka dina, me nomu ivakarau sara ga ni bula. Kerea na veidusimaki ni yalo tabu. Mo maliwai ira wasoma na lewe ni ivavakoso, kua ni vakawaletaka na kakana vakayalo e vakarautaka o Jiova. A vakacalai Ivi o Setani, ia me kua ni vakacalai iko mo nanuma ni sala i Jiova e levu na kena vakatatabu. E macala ga ni qaseqase na Tevoro. Ia eda na veivosakitaka ena ulutaga tarava na sala me kua ni “rawai keda kina o Setani nida sega ni lecava na nona ilawaki.”—2 Kor. 2:11.

[iYaloyalo ena tabana e 9]

Au se galeleta tiko ga eso na “galala” e solia tu o vuravura?

[iYaloyalo ena tabana e 9]

E ivakarau ni noqu bula na ka dina?