Wase Tinikatolu

Tu ena Mata ni iTikotiko Vakaturaga i Jiova e Dua na iSoqosoqo Levu

1. (a) Na cava me yaco mada e liu vei ira na tamata ni Kalou ni se bera na gauna vakarisito kei ira na le 144,000 me qai rawa nira taura na nodra icovi? (b) Na cava e rawa mera nuitaka “nai soqosoqo levu” era bula tiko ena gauna oqo?

ERA vakaliuca na loma ni Kalou ena nodra bula na nona tamata yalodina, me tekivu mai vei Epeli me yacovi Joni na Dauveipapitaiso. Ia era a mate kece, qai waraki tu na siga mera na vakaturi kina ena vuravura vou ni Kalou. Mera na mate tale ga o ira kece na le 144,000 me qai rawa nira taura na nodra icovi ni lai veiliutaki mai kei Karisito ena Matanitu vakalomalagi ni Kalou. Ia, e tukuni ena Vakatakila 7:9 ni “dua nai soqosoqo levu sara” mai na veimatanitu kece ena basika mai ena iotioti ni veisiga oqo. O ira na lewe ni ilawalawa oqo ena sega tale ni gadrevi mera mate mera qai taura nodra icovi, e rawa sara mada ga nira bula tu ga e vuravura me sega ni mudu. Vakaevei o iko, o dua vei ira?

iSoqosoqo Levu​—O Cei o Ira?

2. E mai matata cake vakacava na ka e kilai me baleta na isoqosoqo levu e cavuti ena Vakatakila 7:9?

² Na “sipi” a cavuti ira o Jisu ena nona vosa vakatautauvata ena Maciu 25:31-46 kei ira na ‘so tani tale na sipi’ era vakamacalataki ena Joni 10:16 e dusi ira na tamata era na vakanuinui mera bula tawamudu e vuravura. Na tikina oqo era qai liaca na tamata ni Kalou ena 1923. E raici rawa tale ga ena 1931 ni o ira na cavuti ena Isikeli 9:1-11 e vakatakilakilataki na yadredra, oqo o ira na vakanuinuitaka na bula e vuravura. Oti, sa qai kilai ena 1935 ni o ira na isoqosoqo levu era dua tiko na iwase ni so tani tale na sipi a cavuta o Jisu. Sa ra le vica toka na milioni nikua na isoqosoqo levu oqo e vakadonui ira na Kalou.

3. E dina ni tukuni ni so era “tu e na mata ni tikotiko-vakaturaga,” na cava ga e sega ni nodra inuinui kina na bula i lomalagi?

³ Ena Vakatakila 7:9, era sega ni cavuti kina na isoqosoqo levu nira tiko mai lomalagi. Na nodra “tu e na mata ni tikotiko-vakaturaga” e sega ni tukuni mera lai tiko sara i lomalagi. E kena ibalebale ga ni raici ira na Kalou. (Same 11:4) Ke da vakatauvatana na kedra iwiliwili tawakilai na isoqosoqo levu e “sega e dua na tamata e wilika rawa,” kei na veika e volai ena Vakatakila 7:4-8 kei na Vakatakila 14:1-4, eda na kila sara kina nira na sega ni lai bula i lomalagi o ira oqo. Baleta ni tukuni e kea ni kedra levu na kau yani e vuravura mera lai bula i lomalagi e 144,000.

4. (a) Na cava na “veivakararawataki levu” e bula mai kina na isoqosoqo levu? (b) Me vaka e tukuni ena Vakatakila 7:11, 12, o cei e raici ira na isoqosoqo levu ra qai tomani ira ena sokalou?

⁴ E kaya na Vakatakila 7:14 me baleta na isoqosoqo levu: “O ira oqo era sa lako mai na veivakararawataki levu.” Era bula rawa mai na veivakarusai levu duadua e se sega ni bau sotava na kawatamata. (Maciu 24:21) Era vagolea vua na Kalou kei Karisito na nodra vakavinavinaka me baleta na nodra vakabulai, ra qai duavata kina kei ira na veika bula yalodina kece ga mai lomalagi ena nodra kaya: “Emeni: Na vakamolimoli, kei nai ukuuku, kei na vuku, kei na vakavinavinaka, kei na vakarokoroko, kei na kaukauwa, kei na qaqa, me nona ga na noda Kalou ka sega ni mudu. Emeni.”​—Vakatakila 7:11, 12.

E Ganiti Cei me Vakabulai?

5. E tukuni tu evei na ka me cakava e dua me lewe kina ni isoqosoqo levu?

⁵ Era vakabulai na isoqosoqo levu ena veivakararawataki levu baleta ni laurai vei ira na ivalavala dodonu e vinakata o Jiova. E tukuni tu vakamatata ena iVolatabu na nodra ivalavala na vakabulai. Mera se tei cakava gona oqo o ira na vinakata na ivalavala dodonu na ka me ganiti ira kina mera vakabulai. Na cava mera cakava?

6. Na cava e veiganiti kina me tukuni ni o ira na isoqosoqo levu era vaka na sipi?

⁶ Na sipi e manumanu malua qai dau vakarorogo. O koya gona, ena gauna e kaya tiko kina o Jisu ni tiko e so tani tale na nona sipi era sega ni wili vata kei ira na lai bula i lomalagi, a tukuni ira tiko na tamata e sega wale ga nira na via bula tawamudu e vuravura, ia era na via vakarorogo tale ga ina nona ivakavuvuli. “Sa rogoca na noqu vosa ko ira na noqu sipi, ia ka’u sa kilai ira, ka ra sa muri au,” e kaya. (Joni 10:16, 27) Oqo o ira na sa mai tisaipeli i Jisu, era vakarorogo dina ra qai talairawarawa ina nona vosa.

7. Na itovo cava soti mera guta ni bulataka na imuri i Jisu?

⁷ Na cava e so tale na ivalavala ena vinakati me laurai vei ira kece na imuri i Jisu? E sauma na Vosa ni Kalou: “E na vuku ni valavala eliu, mo dou biuta tani kina na tamata makawa . . . ka mo dou vakaisulu e na tamata vou, o koya sa caka me vaka na Kalou e na yalododonu kei na yalosavasava ni dina.” (Efeso 4:22-24) Era guta mera bulataka na itovo e vaqaqacotaka na duavata vei ira na tamata ni Kalou me vaka na “loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua.”​—Kalatia 5:22, 23.

8. Na cava ena yacovi ira na isoqosoqo levu nira tokoni ira na kena vo?

⁸ E dua na iwiliwili lailai vei ira era nuitaka na bula i lomalagi era liutaka sara tiko ga na cakacaka vakavunau ra qai veitokoni kina na isoqosoqo levu. (Maciu 24:14; 25:40) Ena nodra veitokoni oqo na so tani tale na sipi, era kila nira na tusaqati kina, baleta ni sa kolotaki Setani oti mai kei ira nona timoni o Karisito Jisu kei ira nona agilosi ena itekitekivu ni iotioti ni veisiga eda sa bula donuya tu. Kena ibalebale oqo nira na ‘ca o ira sa tiko e vuravura ni sa lako sobu kina na Tevoro, sa cudru vakalevu ni kila o koya ni na sega ni dede na nona gauna.’ (Vakatakila 12:7-12) O koya gona, ni sa toro voleka mai na siga me muduki kina na ivakarau ni veika e tu nikua, e sa qai bukana ga vakalevu o Setani mera saqati na tamata ni Kalou.

9. E vakaevei na toso ni nodra vunautaka na itukutuku vinaka na tamata ni Kalou? Baleta na cava?

⁹ E dina ni kaukaua sara na veivakacacani, e toso ga na cakacaka vakavunau. Sa tubu na kedra iwiliwili na dau vunautaka na Matanitu ni Kalou mai na le vica ga na udolu era vunau tiko ena icavacava ni iMatai ni iValu Levu ina vica na milioni nikua, ni a yalataka o Jiova: “Nai yaragi kecega sa caka me kemu ena sega ga ni yaco.” (Aisea 54:17) Bau vakadinata e dua na lewe ni mataveilewai levu vakajiu, na Sanadrini, ni na sega ni tarovi rawa na cakacaka ni Kalou. A kaya me baleti ira na tisaipeli vei ira na Farisi ena imatai ni senitiuri: “Dou kakua soti ni kitaki iratou na tamata oqo, dou laivi iratou ga: ia kevaka e ka mai na tamata nai naki oqo se na cakacaka oqo, ena vakarusai ga: ia kevaka e ka mai vua na Kalou, dou sa sega ni vakarusa rawa; de dou na kunei beka ni dou sa veivala kei na Kalou.”​—Cakacaka 5:38, 39.

10. (a) Na nodra ‘vakatakilakilataki’ na isoqosoqo levu e dusia na cava? (b) Era muria vakacava na “vosa mai lomalagi” o ira na tamata ni Kalou?

¹⁰ E tukuni ena iVolatabu ni o ira na isoqosoqo levu era na vakatakilakilataki mera vakabulai. (Isikeli 9:4-6) Na nodra ‘vakatakilakilataki’ e dusia nira sa yalataki ira vei Jiova, ra papitaiso mera tisaipeli i Jisu, ra qai saga tiko ga mera bulataka na itovo Vakarisito. Era muria na “vosa mai lomalagi” e tauca na ivakaro oqo me baleta na isoqosoqo ni lotu lasu kece kei vuravura i Setani: “Dou lako tani mai vua, oi kemudou na noqu tamata, mo do kakua ni cala vata kaya, ka me kakua ni tauvi kemudou na nona mate ca.”​—Vakatakila 18:1-5.

11. Era vakaraitaka vakacava na isoqosoqo levu nira tamata i Jiova?

¹¹ A tukuna tale ga o Jisu vei ira na nona imuri: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” (Joni 13:35) Ia nida raici ira na lewe ni lotu kei vuravura, dua na ka na nodra dau veimecaki vakamatatamata ra qai tini veivakamatematei sara kina vakataki ira! E kaya na Vosa ni Kalou: “Sa vakatakilai e na ka oqo ko ira na luve ni Kalou kei ira na luve ni tevoro: ko koya yadua sa sega ni i valavala dodonu tiko, ka sega ni lomana na wekana, sa sega ni luve ni Kalou. . . . Me da sa veilomani vaka i keda. Me da kakua ni vakataki Keni, na luve ni Vunica, ka a labati tacina.”​—1 Joni 3:10-12, VV.

12. Na cava ena cakava o Jiova ena veivakararawataki levu vei ira na veilotu era vaka tu na “kau” e tawayaga na vuadra?

¹² A kaya o Jisu: “Sa vuataka na vua vinaka na kau vinaka kecega, a sa vuataka na vua ca na kau ca. E sega na kau vinaka me vuataka rawa na vua ca, se na kau ca me vuataka rawa na vua vinaka. Na kau vakaaduaga sa sega ni vuataka na vua vinaka sa ta laivi, ka biu ki na buka waqa. E dina ga, dou na kilai ira e na vuadra.” (Maciu 7:17-20) Na vua ni lotu kei vuravura e tukuni ira vinaka nira “kau” ca, sa voleka ni vakarusai ira o Jiova ena veivakararawataki levu.​—Vakatakila 17:16.

13. Era vakaraitaka vakacava na isoqosoqo levu nira duri tu ena duavata ena “mata ni tikotiko-vakaturaga” i Jiova?

¹³ E so na tikina bibi ena Vakatakila 7:9-15 e dusia na vu ni nodra vakabulai na isoqosoqo levu. E vakaraitaki e kea nira duri vata tu ena duavata ena “mata ni tikotiko-vakaturaga” i Jiova ra qai tutaka voli ena yalodina na nona veiliutaki cecere. Era sa “sava nodrai sulu, ka vakavulavulataka e na dra ni Lami,” oqo e dusia nira ciqoma na isoro i Jisu me bokoci kina na ivalavala ca. (Joni 1:29) Era sa yalataki ira oti vua na Kalou ra qai vakadinadinataka oqori ena nodra tabadromuci e wai. Na nodra isulu vulavula e dusia ni vakadonui ira na Kalou mera savasava e matana, ra qai “qaravi koya e na siga kei na bogi.” E tiko beka e so na ka mo cakava me rawa ni salasala vata vinaka kina na nomu bula kei na veika e vakamacalataki e ke?

Veivakalougatataki Edaidai

14. Na cava e so na sala era sa vakalougatataki tiko kina ena gauna sara ga oqo o ira na tamata i Jiova?

¹⁴ De dua o sa raica na nodra vakalougatataki ena gauna sara mada ga oqo o ira na qaravi Jiova tiko. Me kena ivakaraitaki, ni o sa mai vulica na inaki uasivi i Jiova, o kila sara ni rawa ni o nuitaka na bula totoka mai muri. O koya gona, sa mai vakainaki ena gauna oqo na nomu bula​—oya mo qarava na Kalou dina mo qai nuitaka dei ni dua na siga o na marautaka na bula tawamudu ena vuravura parataisi. Io, ena “tuberi ira [na isoqosoqo levu] ki nai vurevure ni wai bula” na Tui o Jisu Karisito.”​—Vakatakila 7:17.

15. E yaga vakacava vei ira na iVakadinadina i Jiova na nodra guta mera muria na ivakavuvuli ni iVolatabu ena ka e baleta na politiki kei na itovo kilikili?

¹⁵ Dua na ka era kalougata dina kina na isoqosoqo levu era qaravi Jiova tiko e vuravura taucoko oya ni kune vei ira na loloma, duavata, kei na veiyaloni. E tautauvata vinaka na lawa kei na ivakavuvuli mai na Vosa ni Kalou eda muria tiko baleta ni kakana vakayalo eda vakayagataka e sega ni duidui. Oqori na vuna e sega ni yaco kina ena keda maliwa na veisei vakapolitiki se vakaduikaikai. Kena ikarua, eda dau guta kece meda muria na ivakatagedegede savasava e vinakata o Jiova vei ira na nona tamata. (1 Korinica 6:9-11) Oya na vuna era vakila tu kina nikua na tamata i Jiova na ituvaki e vaka na parataisi vakayalo, sega ni bula ni veisei, veileti, kei na ivakarau tawakilikili e takalevu tu e vuravura. Raica mada se vakamacalataki vakacava oqori ena Aisea 65:13, 14.

16. E dina nira sotava tale ga na isoqosoqo levu na leqa e tarai vuravura tu e veisiga, na cava ga e nodra inuinui?

¹⁶ Sega, era sega ni tamata uasivi na tamata i Jiova. E tarai ira tale ga na bula leqaleqa ni veisiga, se ra dau vakaleqai ena nodra veivaluvaluti na veimatanitu dina ga era sega ni vakaitavi kina. E yacovi ira tale ga na tauvimate, rarawa, kei na mate. Ia era vakabauta na vuravura vou, “ena tavoya tani” kina na Kalou “na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu.”​—Vakatakila 21:4.

17. Se mani cava e yacovi keda nikua, na bula totoka cava sa waraki ira tu mai era sokaloutaki koya tiko na Kalou dina?

¹⁷ Ke o mani mate sara baleta ni o sa qase, se o tauvimate, se o mate vakacalaka, se o vakacacani, ena vakaturi iko e Parataisi o Jiova. (Cakacaka 24:15) E kea, o sa na qai marautaka tiko ga na magiti vakayalo ena vakarautaki ena yabaki duanaudolu ni veiliutaki i Karisito. E sa na qai titobu ga na nomu lomana na Kalou ni o sa raica ni sa vakayacori na nona inaki lagilagi. Ia na veivakalougatataki vakayago ena vakarautaka o Jiova ena gauna oqori e sa na qai kuria ga na levu ni nomu lomani koya. (Aisea 25:6-9) Na bula totoka dina sa waraki ira tu mai na tamata ni Kalou!

Railesuvi

• Me vaka e tukuna na iVolatabu, era vakabulai mai na ituvaki vakadomobula cava na isoqosoqo levu?

• Na cava meda se tei cakava rawa oqo ke da via maliwai ira na isoqosoqo levu oya e vakadonuya na Kalou?

• Na cava na nomu rai me baleta na veivakalougatataki era marautaka tiko na isoqosoqo levu ena gauna sara ga oqo vaka kina ena vuravura vou ni Kalou?

[iYaloyalo ena tabana e 123]

Era qarava vata tiko na Kalou dina e vica na milioni na lewe ni isoqosoqo levu