Wase Tinikaono

“Dou Dauveilomani Vakalevu”

1. Na cava e dau lauti ira na vulagi yani ina nodra soqoni na iVakadinadina i Jiova?

DUA na ka e dau lauti ira na vulagi yani ina nodra soqoni na iVakadinadina i Jiova na nodra raica na veilomani. Oqo ena ivalavala era kidavaki kina kei na totoka ni veimaliwai. Era raica tale ga na veilomani o ira na vulagi yani ina noda soqo ni tikina. E vola e dua na dauvolaitukutuku ena ka a raica ena dua na soqo ni tikina: ‘Sega ni dua me mateni ena waigaga se yaqona ni valagi. Sega ni rogoci na kaikaila se domo ni veicudruvi. Sega na veisugusugu. Sega na veibili. Sega na vosavosa ca. Sega na vosa velavela se na veiwali ca. Sega ni dua e vakatavako. Sega na butako. Sega ni dua me kolotaka vakaveitalia na tavaya palasitika ni wainimoli. E duatani sara ga.’ Oqo kece e dusia na mataqali loloma e “sega ni cakava na ka sa sega ni kilikili kaya, sa sega ni qara na ka me nona ga.”​—1 Korinica 13:4-8.

2. (a) Ni toso na gauna, na cava e dodonu me laurai me baleta na noda loloma? (b) Meda saga meda na vakatotomuri Karisito ena mataqali loloma vakacava?

² Dua na ka era kilai tani kina na lotu Vakarisito dina na nodra dau veilomani. (Joni 13:35) Nida tubu cake vakayalo, eda vulica na sala e so meda vakarabailevutaka kina na noda loloma. A masulaka na yapositolo o Paula ni na “tubu cake vakalevu” na nodra loloma na nona itokani lotu Vakarisito. (Filipai 1:9) Kevaka eda lomani ira na tacida, e vakaraitaka na yapositolo o Joni ni dodonu meda tu vakarau ni soli keda ena vukudra. A vola: “Sa solia na nona bula na Karisito e na vukuda eda sa kila rawa kina se cava na loloma. Sa dodonu vaka tale ga kina me da solia na noda bula e na vukudra na wekada.” (1 Joni 3:16, VV; Joni 15:12, 13) Vakacava, eda na solia dina na noda bula ena vukudra na tacida? Sa macala ni na sega ni gadrevi sara meda cakava oqori, ia eda na gu beka meda vukei ira ena gauna mada ga e sega ni rawarawa kina vei keda meda cakava oqori?

3. (a) Meda lomani ira vakacava na tacida? (b) Na cava e rui bibi kina meda veilomani vakalevu ena gauna oqo?

³ Na veika eda cakava mai vu ni yaloda vei ira na tacida e dodonu me salavata kei na noda nanumi ira kei na noda kauaitaki ira dina. E uqeti keda na Vosa ni Kalou: “Dou veilomani sara e na veilomani ni veitacini.” (Roma 12:10) Rawarawa vei keda meda cakava oqori vei ira ga eda veivolekati. Ia, e rawa beka nida vakaraitaka na yalo ni veinanumi oqori vei ira tale e so? Ni sa toro voleka mai na icavacava ni vuravura makawa oqo, sa qai bibi ga meda vakavolekati keda vakalevu vei ira na noda itokani lotu Vakarisito. E kaya na iVolatabu: “Sa voleka nai vakataotioti ni ka kecega. . . . Ia na ka me liu oqo mo dou dauveilomani vakalevu vakai kemudou; ni na ubia nai valavala ca e vuqa na loloma.”​—1 Pita 4:7, 8.

Ni Tubu na Leqa

4. (a) Na cava e rawa ni tubu kina na veileqaleqati ena kedra maliwa na lewe ni ivavakoso? (b) Na ivakasala vakaivolatabu ena sega beka ni vaka sara na ka e tu e lomada, ia na cava ena yaco ke da saga meda muria oqori?

⁴ Nida tamata ivalavala ca, e tiko na gauna ena veivakacudrui kina na ka eda cakava. De dua era na vakacudrui keda tale ga na tacida vakayalo. (1 Joni 1:8) Na cava mo cakava ke yaco oqori? E tiko na ivakasala yaga ena iVolatabu. Na ka e kaya ena sega beka ni sota sara kei na ka eda via cakava, nida tamata ivalavala ca. (Roma 7:21-23) Ia na noda sasagataka dina meda muria na ivakasala vakaivolatabu ena vakaraitaka ni lomada dina meda vakamarautaki Jiova. Nida cakava oqori, ena qaqaco tale ga kina na noda lomani ira na tacida.

5. Na cava meda kua ni sauma kina na ca e caka vei keda?

⁵ So na gauna eda dau via sauma sara ga na ca e caka vei keda. Ia ena vakalevutaka ga na leqa. Ena vinaka meda biuta ga vua na Kalou me qai sauma ke ganita oya. (Vosa Vakaibalebale 24:29; Roma 12:17-21) So tale era na levaci koya e vakacudrui ira ra qai sega ni via vosa vua. Ia e sega ni vinaka meda cakava oqori vei ira eda sokalou vata tiko, ni dua na yavu ena vakadonui kina na noda sokalou oya na noda lomani ira na tacida. (1 Joni 4:20) A vola gona o Paula: “Dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua: me vaka sa sega ni cudruvi kemudou na Karisito, mo dou vaka talega kina.” (Kolosa 3:13) Vakaevei, o rawa ni vakayacora oya?

6. (a) Meda vosoti ira vaka vica na tacida? (b) Eda na walia rawa na nona cala vei keda e dua kevaka eda nanuma tiko na cava?

⁶ Vakacava ke cala vakavica vei keda e dua, ia e sega ga ni mataqali cala e ganita me sivo kina mai na ivavakoso? A nona vakasama na yapositolo o Pita ni cala lalai vaka oya me vosoti “vakavitu.” Ia a kaya vua o Jisu: “Au sa sega ni kaya vei iko, me vakavitu walega: me vakavitusagavulu na vitu.” Sa qai vakavotuya ni sega wale ni dua na ka na ca e dau caka vei keda ni raici vata kei na noda dinau vakaitamera vua na Kalou. (Maciu 18:21-35) E veisiga, eda valavala ca vua na Kalou ena levu na sala​—ena ka eda cakava eda nanumi keda ga kina, ena ka eda tukuna se nanuma, se na noda sega ga ni cakava na ka e dodonu meda cakava​—da qai sega mada ga ni liaca nida sa valavala ca tiko. (Roma 3:23) Ia, e yalovosovoso tiko ga vei keda na Kalou. (Same 103:10-14; 130:3, 4) E vinakata meda dau veivosovosoti tale ga vaka oqori. (Maciu 6:14, 15; Efeso 4:1-3) Ke vaka kina, eda sa vakaitovotaka tiko na mataqali loloma “sa sega ni daulomaca.”​—1 Korinica 13:4, 5; 1 Pita 3:8, 9.

7. Na cava meda cakava ke cudruvi keda tiko e dua na tacida?

⁷ So na gauna eda na siqema ni cudruvi keda tiko na tacida ena dua na ka, dina ga nida sega ni vakasamataki koya tu vakaca. E rawa ni noda lewa meda sa ‘ubia ga ena loloma,’ me vaka e vakaturi ena 1 Pita 4:8. Se rawa nida vakaliuliu sara ga meda lai vosa vua meda veivakameautaki.​—Maciu 5:23, 24.

8. Na cava e rawa nida cakava ke vakacudrui keda e dua eda vakabauta vata?

⁸ De vakacudrui iko kei na so tale e dua na tacimu vakayalo ena ka e cakava. De vinaka meda vosa sara ga vei koya, se vakaevei? Ke o vakamacalataka vakayalovinaka vua na leqa, ena rawa ni vinaka na kena itinitini. Ia, taumada mo tarogi iko: ‘E cakava dina tiko na ka e sega ni vakaivolatabu? Se vu vakalevu ga na leqa baleta ni duidui na vanua keirau cavutu mai kina kei na ivalavala ni neirau susugi?’ Qarauna mo kua ni vakalelewa mai na ka o nanuma ga o iko ni dodonu. (Jemesa 4:11, 12) O Jiova e sega ni vakaduiduitaka e dua, e ciqoma na veimataqali tamata kece ga, qai dau yalovosovoso ena vukudra nira tubu cake tiko vakayalo.

9. (a) O cei e dau raica na cala bibi ena ivavakoso? (b) Ena mataqali cala vakacava e qai nona itavi kina e dua me vakaliuliu me walia na leqa, ia na cava me nona inaki?

⁹ Ke valavala ca bibi e dua na lewe ni ivavakoso, e veidauci beka, ena dikevi totolo oqori. O cei e dikeva? O ira na qase ni ivavakoso. (Jemesa 5:14, 15) Ia kevaka erau veileqaleqati ga e rua, ena dua beka na nodrau ka vakabisinisi se baleta ni dua vei rau e kakase, taumada me tovolea o koya e vakaleqai kina me torovi koya e vakavuna na leqa, me rau veivosaki taurua ga. (Maciu 18:15) Ke sega ni wali e keri na nodrau leqa, e tiko e so tale na ikalawa me tauri me vaka e vakamacalataki ena Maciu 18:16, 17. Na noda lomani koya na tacida e cala kei na noda gadreva meda “rawai” koya ena uqeti keda meda vosa vakayalovinaka vua meda tara kina na lomana.​—Vosa Vakaibalebale 16:23.

10. Ke mani basika na leqa, na rai vakayalomatua cava me tiko vei keda meda walia kina oqori?

¹⁰ Se mani levu se lailai na leqa e basika, ena yaga ga me tiko vei keda na rai i Jiova. Ni sega ni vakadonuya o koya na ivalavala ca cava ga e caka, ena tiko ga na gauna era na taviraki laivi kina mai na nona isoqosoqo o ira na cakava tiko na ivalavala ca bibi ena yalo tawaveivutuni. Meda kua tale ga ni guilecava nida dau valavala ca kece vei koya ena so na ka lalai, da qai dau vinakata meda vosoti meda lomani tale ga. Ena tikina oqo, e ivakaraitaki vinaka vei keda o Jiova ena ka meda cakava ke ra valavala ca vei keda e so. Nida yalovosovoso, eda sa vakatotomuria tiko e keri na nona loloma.​—Efeso 5:1, 2.

Qara na Sala Meda ‘Dolava Vakalevu Kina na Lomada’

11. Na cava a uqeti ira kina na kai Korinica o Paula mera “dolava vakalevu” na lomadra?

¹¹ Vula vica vata na nona vakataudeitaka tiko o Paula na ivavakoso mai Korinica ena vanua o Kirisi. A cakacaka vakaukaua me vukei ira na mataveitacini mai kea qai lomani ira vakalevu. Ia e so e kea era sega ni taleitaki koya dina. Era vakalewai koya vakaca. A uqeti ira kina mera “dolava vakalevu” na lomadra, mera dau veinanumi. (2 Korinica 6:11-13; 12:15) De vinaka meda lialiaci ena ka oqo da qai vaqara na sala e so meda vakarabailevutaka kina na noda loloma.​—1 Joni 3:14.

12. Na cava meda cakava me qaqaco cake ga kina na noda lomani ira kece ena ivavakoso?

¹² Era tiko beka e so ena ivavakoso eda sega ni dau veivolekati? Ke da saga vakaukaua meda vosota na nodra malumalumu​—me vaka ga na noda nuitaka nira na vosota na noda​—oqo ena uqeta na yalo ni veinanumi ena keda maliwa. Eda na vakila tale ga ni vaka meda taleitaki ira cake vakalevu nida saga meda raica da qai vakabibitaka ga na nodra itovo vinaka. Sega ni sega ni oqo ena qai vaqaqacotaka ga na noda lomani ira.​—Luke 6:32, 33, 36.

13. Na cava meda cakava meda rawa ni lomani ira kina e levu tale ena noda ivavakoso?

¹³ Macala tu ga ni na vakaiyalayala na ka eda rawa ni cakava vei ira na tacida. Ena vica ga eda na rawa ni vakabula vei ira ena gauna ni soqoni. Kena irairai ni na sega ni rawa nida sureti ira kece na tacida mera mai kana vata kei keda kei na so na noda itokani. Ni sega ni rawa oya, vakacava meda vakayagataka e vica ga na miniti meda na veikilai vinaka kina kei na dua tale ena noda ivavakoso. De rawa nida sureti koya eda sega ni veikilai vinaka me keda isa ena cakacaka vakavunau.

14. Nida maliwai ira na lotu Vakarisito eda se sega ni sota vakadua, eda na vakaraitaka vakacava na levu ni noda lomani ira?

¹⁴ Na soqo ni tikina e dua na vanua eda rawa ni veikilai kina kei na levu tale. Vica na udolu era dau tiko ena soqo. Ena sega ni rawa nida vosa vei ira kece, ia ena ka eda vakayacora, eda rawa ni vakaraitaka kina na noda veinanumi kei na veikauaitaki vei ira. Ena gauna e sega ni vakacagau tiko kina na porokaramu, meda vakaliuliu meda veivosaki kei na so era tiko tikivi keda. Dua na siga, sa ra na veitacini kece o ira na bula e vuravura, era na qaravi koya vata na Kalou dina, na Tamada kece ga. Sa na rekitaki dina na noda na lai veikilai e kea! Na loloma levu ga ena uqeti keda meda vakayacora oya. Ia vakacava meda se tei tekivu rawa yani oqo?

Railesuvi

• Ke tubu na leqa ena keda maliwa na lotu Vakarisito, me wali vakacava? Ena vuku ni cava?

• Nida tubu cake vakayalo, me tubu tale ga vakacava na noda loloma?

• Na cava meda cakava me kua ni yalani kina na noda loloma vei ira ga na noda itokani voleka?

[iYaloyalo ena tabana e 148]

Levu na ituvaki e dau raici kina na veilomani vakarisito, me vaka beka ena soqoni vakaivavakoso