Vakavinakataka Noda Veilomani Vakaveitacini

“Dou ia tikoga nai valavala ni loloma, me vaka sa loloma talega na Karisito vei kemudou.”​—EFESO 5:2.

1. Na cava e tukuna o Jisu nira na kilaitani kina nona imuri?

ERA kilai tani na iVakadinadina i Jiova nira dau vunautaka na itukutuku vinaka ni Matanitu ni Kalou e veivale. E tiko na yavu e digitaki ira kina na lotu vaKarisito o Jisu mera nona tisaipeli dina. E kaya: “E dua na vunau vou ka’u sa solia vei kemudou, Mo dou veilomani; me vaka ka’u sa lomani kemudou, mo dou veilomani talega vakakina. A ka oqo era na kila kina na tamata kecega ni dou sa noqu tisaipeli, kevaka dou sa veilomani.”​—Joni 13:34, 35.

2, 3. E yaga vakacava na loloma vakamataveitacini vei ira na tiko ena soqoni vaKarisito?

² E sega ni vakatauvatani rawa kei na dua na isoqosoqo vakatamata na nodra veilomani na mataveitacini lotu vaKarisito dina. Me vaka na kena dau kabita na aironi na makeneta, e vakaduavatataki ira na dauveiqaravi i Jiova na loloma, ra uqeti tale ga kina na yalomalumalumu mera mai veitomani ena sokalou dina. Wilika mada na ka e yacovi Marcelino, e dua na turaga mai Cameroon. E yaco ena nona valenicakacaka e dua na leqa vakacalaka, mani vu ni nona mataboko. Oti ga na vakacalaka qori sa tete na kena italanoa ni dauvakadraunikau, ya na vuna e mataboko kina. E sega ni vakacegui koya na nona italatala kei ira na lewenilotu, era vakasivoi koya ga mai na ivavakoso. Ni sureti koya e dua na iVakadinadina i Jiova ina soqoni e lomalomarua na lako. A sega ni via sotava na ka a caka vua ena nona lotu.

³ Ia e kurabuitaka sara o Marcelino ena ka a yaco ena Kingdom Hall. A kidavaki vakayalololoma, qai vakacegui koya na ivakavuvuli vakaivolatabu e rogoca. A tekivu tiko ena soqoni kece ni ivavakoso, toso vinaka nona vuli iVolatabu, a papitaiso sara ena 2006. Na gauna qo sa wasea tiko o koya na ka dina vei ira na lewe ni nona vuvale kei ira na tiko tikivi koya, sa vica toka nona vuli iVolatabu. E vinakata o Marcelino mera vakila tale ga o ira na nona vuli iVolatabu na loloma era vakaraitaka vua na dauveiqaravi ni Kalou.

4. Na cava meda muria kina na veiuqeti i Paula meda ‘vakaitovotaka tiko ga na loloma’?

⁴ E macala ni sa bau totoka dina na noda veilomani va qori, ia me kua ni vakawaleni. Vakasamataka na buka e caudre tiko ena bogi batabata, macala ga ni levu era na torova yani mera vakatakata kina. Ena boko ke ra sega ni utura tiko na kena buka. E va tale ga qori na ivau totoka ni loloma ena ivavakoso, ena batabata ke da sega ni cakacaka vata na lotu vaKarisito yadua meda veivakayaloqaqataki. Na cava gona meda cakava? E sauma na yapositolo o Paula: “Dou ia tikoga nai valavala ni loloma, me vaka sa loloma talega na Karisito vei kemudou, a sa soli koya e na vukuda mei madrali kai soro vua na Kalou me ka boivinaka.” (Efeso 5:2) Na taro meda na veivosakitaka qo, Sala cava au na vakaitovotaka tiko ga kina na loloma?

“Moni Lomasavu Tale Ga”

5, 6. Na cava e uqeti ira kina na lotu vaKarisito e Korinica o Paula mera dau “lomasavu”?

⁵ E vola na yapositolo o Paula vei ira na lotu vaKarisito e Korinica makawa: “Keitou sa vosa sara ga vakadodonu vei kemuni e Korinica, dua na ka neitou lomasavu. E sega ni qiqo na loma i keitou ena vukumuni, o kemuni ga e qiqo na lomamuni ena nomuni vakaraitaka na loloma. O koya gona, moni cakava vaka kina vei keitou, au vosa vei kemuni me vaka au vosa vei ira na luvequ, moni lomasavu tale ga.” (2 Kor. 6:11-13, NW) Na cava e uqeti ira kina mai Korinica o Paula mera dau lomasavu ena nodra loloma?

⁶ Vakasamataka na kena tauyavutaki na ivavakoso e Korinica makawa. A gole yani Korinica o Paula ena icavacava ni 50 S.K. A dredre nona tekivu cakacaka vakavunau ena vanua qori, ia a sega ga ni soro. Sega ni dede era sa vakabauta na itukutuku vinaka e levu ena koro qori. A veivakavulici qai vakayaloqaqataka tiko na ivavakoso vou qori o Paula me “yabaki dua ka vula ono.” E titobu dina nona lomani ira na lotu vaKarisito e Korinica. (Caka. 18:5, 6, 9-11) Qori e vuna vinaka mera lomani koya kina ra qai dokai koya. Ia era vakayawaki koya eso ena ivavakoso. De dua era sega ni taleitaka na nona dau veivunauci vakadodonu. (1 Kor. 5:1–5; 6:1-10) So tale era rairai vakarogoca nodra kakase ‘na yapositolo era viavia uasivi.’ (2 Kor. 11:5, 6) E vinakata o Paula mera lomani koya dina na mataveitacini. Uqeti ira gona mera dau “lomasavu,” qori ena nodra toro volekati koya kei na vo ni mataveitacini.

7. Ena laurai vakacava noda “lomasavu” nida vakaraitaka na loloma vaKarisito?

⁷ Vakacava o keda? Eda na vakaraitaka vakacava na “lomasavu” ena noda veilomani vakamataveitacini? Ena rairai rawarawa mera veilomani na mataveitacini era itabavata era matatamata vata tale ga. E va tale ga qori o ira e tautauvata na ka ni veivakamarautaki era taleitaka, nira dau veimaliwai vakalevu. Ke da via tiko ga kei ira na lotu vaKarisito eda taleitaka, e bibi meda dau “lomasavu” ena noda veimaliwai. E ka vakayalomatua meda taroga: ‘Vakacava o ira na mataveitacini au sega ni dau maliwai ira vakalevu, de lailai ga na gauna au cakacaka vakavunau seu veimaliwai kina kei ira? Vakacava ena Kingdom Hall, au dau yalana beka noqu kauaitaki ira na lako vou yani niu nanuma mera rawata mada eso na ka mera noqu itokani kina? Au dau kidavaki ira na itabagone kei ira na itabaqase ena ivavakoso?’

8, 9. E yaga vakacava na ivakasala i Paula ena Roma 15:7 ena noda dau veikidavaki meda vakalevutaka kina noda veilomani vakamataveitacini?

⁸ Nida veikidavaki se da vakacegui ira tiko eso tale, ena yaga vei keda na vosa i Paula vei ira e Roma me tiko vei keda na rai donu baleti ira eda sokalou vata. (Wilika Roma 15:7.) Na vosa vaKirisi “veivakacegui” ena tikinivolatabu qori e kena ibalebale na nona “ciqomi vakayalololoma e dua ina itikotiko se ra ciqomi koya eso na veitokani.” Ena gauna vakaivolatabu, ni dua na itaukeinivale e ciqomi ira nona itokani ina nona vale, e dau tukuna ni marautaka na nodra gole yani. E ciqomi keda o Karisito ena ivavakoso vaKarisito, eda uqeti gona meda vakatotomuri koya ena noda dau vakacegui ira na tacida vakayalo.

⁹ Nida kidavaki ira tiko na tacida qori ena Kingdom Hall kei na so tale na vanua, meda dau kauaitaki ira tale ga eda sega ni dau raica vakalevu se sa dede sara na gauna eda a veivosaki kina. Vakacava meda bau veivosaki vakalekaleka kei ira. Eda rawa ni cakava tale ga qori ena noda soqoni e tarava. Sega ni dede eda sa na marautaka na veivosaki kei na levu na mataveitacini ena ivavakoso. Me kua ni leqataki ke da sega ni veivosaki kei ira kece ena dua na siga. Me kua tale ga ni dua e lule ke sega ni kidavaki ena gauna kece ni soqoni.

10. Na ka talei cava eda rawa ni cakava kece ena ivavakoso, ena yaga vakacava?

¹⁰ Na noda vakabula vei ira tale eso e imatai ni kalawa meda kidavaki ira kina. Ena rawati na veitalanoa vinaka qai tauyavu kina na veitokani dredre. Kena ivakaraitaki, nira tekivu veikilai ga ra qai veitalanoa na mataveitacini ena soqo ni tikina kei na soqo ni tabacakacaka, era na vakanamata tu mera na sota tale. O ira na bolecakacaka ena tara ni Kingdom Hall kei ira na vakaitavi ena cakacaka ni vakacoko era dau veitokani dredre sara nira sa kila na nodra itovo vinaka na tacidra ena gauna era veimaliwai voli kina. Levu sara na veitokani dredre e rawa ni tauyavutaki ena isoqosoqo i Jiova. Ena levu na noda itokani ke da dau “lomasavu,” ena vinaka cake tale ga na ivau ni loloma e vakaduavatataki keda na dau sokalou dina.

Mo Dau Torovi Rawarawa

11. Na ivakaraitaki vinaka cava i Jisu e vakamacalataki ena Marika 10:13-16?

¹¹ E rawa nida saga na lotu vaKarisito kece meda torovi rawarawa, me vakataki Jisu ga. Vakasamataka mada na ka e tukuna o Jisu nira via tarovi ira na itubutubu na tisaipeli mera kua ni kauti ira na luvedra vua. “Dou laivi ira na gone lalai me ra lako mai vei au,” e kaya. “Dou kakua ni tarovi ira: ni sa vakataki ira na lewe ni matanitu ni Kalou.” Oti sa qai “keveti ira, ka tabaki ira e na ligana, ka vosavakalougatataki ira.” (Mari. 10:13-16) Vakasamataka mada nodra marau na lalai qo ni kauaitaki ira vakayalololoma na Qasenivuli Levu!

12. Na cava ena vakadredretaka noda veivosaki kei ira eso tale?

¹² Mera taroga na lotu vaKarisito kece, ‘Au dau torovi rawarawa, seu dau osooso?’ So na gauna e dau vakalatilati ina noda veivosaki na veika eda dau cakava tiko, dina nira sega ni ka ca. Me kena ivakaraitaki, ke da dau vakayagataka vakalevu na mobail se meda vakarogo sere ni coba toka na wa e daligada ena gauna eda veimaliwai tiko kina kei ira eso, de dua era na nanuma nida sega ni taleitaka na tiko kei ira. Ke ra dau raica eso nida digova tiko ga na kompiuta lailai eda taura toka ga e ligada, era na rairai nanuma nida sega ni via vosa vei ira. Dina ni tiko na gauna meda na “tiko lo kina,” ia nira tiko maliwai keda eso, qori e gauna meda “vosa kina.” (Dauv. 3:7) Era na rairai kaya eso, “Au sega ni via vosa” se “Au sega ni dau via vosa vakalevu ena veimataka.” Ia, nida saga meda tukuna eso na ka ena gauna sara ga eda sega ni via vosa kina, eda sa vakaraitaka tiko na loloma e “sega ni qara na ka me nona ga.”​—1 Kor. 13:5.

13. Na rai cava me baleti ira na mataveitacini lotu vaKarisito a uqeti Timoci kina o Paula?

¹³ A uqeti Timoci o Paula me dokai ira kece na lewe ni ivavakoso. (Wilika 1 Timoci 5:1, 2.) Meda dau raici ira tale ga na lotu vaKarisito era qase cake mera tinada, tamada, kei ira na gone mera tacida se ganeda. Ni va qori na noda rai, era na sega ni vaka na vulagi na mataveitacini.

14. E yaga vakacava na nomu dau veitalanoataka na ka e veiuqeti?

¹⁴ Nida okati ira eso tale ena noda veitalanoa, eda na vakaukauataki ira vakayalo, vakayago tale ga. E nanuma vinaka e dua na tacida tagane e veiqaravi tiko ena valenitabana nodra dau vosa vua na tacina era qase cake e Peceli ena gauna e lako vou yani kina. Nodra veiuqeti e vakila kina o koya ni taleitaki, me vaka sara ga e dua na lewenivuvale i Peceli. Ena gauna qo e saga me vakamuria na nodra ivakaraitaki ena nona veivosaki kei ira na lewe i Peceli.

Rawati na Veiyaloni Nida Yalomalumalumu

15. Eda kila vakacava nida na veileqaleqati ena so na gauna?

¹⁵ Erau a tiko e Filipai e rua na yalewa lotu vaKarisito o Uotia kei Sainitiki, a dredre toka me rau walia na nodrau veileqaleqati. (Fpai. 4:2, 3) A sega tale ga ni vunitaki rawa nodrau veiba o Paula kei Panapasa, rau mani dui lakolako kina ena dua na gauna. (Caka. 15:37-39) E vakadinadinataki ena itukutuku qori nira dau veileqaleqati tale ga ena so na gauna na dausokalou dina. E vakarautaka o Jiova na ivukevuke meda walia kina na veileqaleqati da qai veiyaloni tale. Ia taumada, e vinakata meda cakava e dua na ka.

16, 17. (a) E bibi vakacava na yalomalumalumu ena wali ni veileqaleqati? (b) E yaga vakacava na yalomalumalumu ena nona torovi Iso o Jekope?

¹⁶ Vakasamataka mada ni o vodo motoka kei na nomu itokani ina dua na vanua. Ni bera ni drau lako o na yavalata na motoka ena nomu wirica na ki. E tiko tale ga na ki me na wali kina na veileqaleqati. Qori na yalomalumalumu. (Wilika Jemesa 4:10.) E vakaraitaki ena vica na itukutuku vakaivolatabu e tarava ni a vakayagataki sara ga na ki se na itovo qori, mera muria kina na ivakavuvuli vakaivolatabu o ira na veileqaleqati tiko.

¹⁷ Sa sivi e 20 na yabaki na nona via vakamatei Jekope o Iso baleta ni a soli vei nona isa ni drua na itutu vakaulumatua. Rau sa vakarau sota tale, e “rere vakalevu ko Jekope, a sa kidroa.” E nanuma ni na vakamavoataki koya o Iso. Ia na gauna rau sota kina, a cakava o Jekope e dua na ka a sega ni namaka o Iso. E ‘cuva ina qele’ ni torovi tuakana yani. Na cava qai yaco? “Sa cici ko Iso me veitata kaya, a sa mokota, ka baleta na domona, ka reguca: a rau sa tagi.” Sega gona ni yaco na veivakamavoataki a nanumi taumada. Nona yalomalumalumu o Jekope a sega kina ni yalokatakata o Iso se vakaraitaka na cudru a rairai katona voli mai.​—Vkte. 27:41; 32:3-8; 33:3, 4.

18, 19. (a) Na cava e bibi kina meda muria na ivakasala vakaivolatabu ni yaco na veileqaleqati? (b) Na cava meda kua kina ni soro ke dredre nona veiyaloni totolo kei keda e dua?

¹⁸ E tiko ena iVolatabu na ivakasala momona me wali kina na veileqaleqati. (Maciu 5:23, 24; 18:15-17; Efeso 4:26, 27)a Ke da sega ni muria na ivakasala qori, ena dredre meda veiyaloni. E sega ni kena iwali meda waraka tiko me yalomalumalumu o koya eda veileqaleqati, nida rawa sara ga ni cakava qori eliu.

¹⁹ Ke da saga tiko meda veiyaloni kei na dua qai so na ka e vakadredretaka tiko, meda kua ni soro. De dua mo solia vua na gauna me vakasamataka vinaka na ituvaki ni lomana. Eratou a sega ni caka vinaka vei Josefa na tacina. Dua na gauna dede ratou qai veirai tale ni sa paraiminisita tu kei Ijipita. Ia sa veisau ena gauna qori na lomadratou, ratou qai kerea nona veivosoti. E vosoti ratou o Josefa, ra qai vakalougatataki na luvei Jekope me dua na matanitu e kilai ena yaca i Jiova. (Vkte. 50:15-21) Noda saga gona meda veiyaloni tiko ga kei ira na mataveitacini eda sa tokona tiko na duavata kei na marau ena ivavakoso.​—Wilika Kolosa 3:12-14.

Meda Veilomani ena ‘Cakacaka kei na Lomadina’

20, 21. Na cava eda vulica ena nona vuya na yavadratou na nona yapositolo o Jisu?

²⁰ Ni bera ni mate o Jisu, a tukuna vei ratou nona yapositolo: “Ni’u sa solia e dua nai vakarau vei kemudou, mo dou kitaka me vaka ka’u sa kitaka oti vei kemudou.” (Joni 13:15) Se qai vuya oti ga na yavadratou na le 12. A sega ni cakava qori baleta ga ni ivalavala vakavanua, se ni yalovinaka. Ni bera ni volatukutukutaka o Joni na nona savata na yavadratou o Jisu, e vola taumada: “Ni sa lomani ira na nona era sa tiko e vuravura, sa lomani ira ki nai otioti.” (Joni 13:1) Nona lomani ratou nona tisaipeli a uqeti koya me cakava na itavi e qarava ga na tamata cakacaka. Me ratou yalomalumalumu gona ni dau veivukei ena loloma. Na loloma dina vakamataveitacini ena uqeti keda meda dau kauaitaki ira na tacida vaKarisito da qai nanumi ira kece.

²¹ E kila rawa na ibalebale ni ka e cakava o Jisu na yapositolo o Pita, e dua a vuya tale ga na yavana na Luve ni Kalou. E vola: “Ni ko ni sa vakasavasavataka na yalomuni e na nomuni talairawarawa ki na ka dina e na kaukauwa ni Yalo Tabu, ka sa lomani ira na wekamuni vakabauta, ni veilomani dina sara e na vu ni yalomuni taucoko.” (1 Pita 1:22, VV) A vuya tale ga na yavai Joni na Turaga, a vola gona na yapositolo qo: “Kemudou na luvequ lomani, me da kakua ni loloma e na vosa ga, se e na yameda; e na cakacaka ga kei na lomadina.” (1 Joni 3:18) Me laurai mada ga ena ka eda cakava ni vu mai lomada noda lomani ira na tacida.

[iVakamacala e ra]

O se Nanuma Tiko?

• Eda na “lomasavu” vakacava ena noda loloma?

• Eda na torovi rawarawa vakacava?

• E yaga vakacava na yalomalumalumu nida saga na veiyaloni?

• Cava ena uqeti keda meda dau nanumi ira kina na tacida?

[iYaloyalo ena tabana e 21]

Dau kidavaki ira vakayalololoma na tacida

[iYaloyalo ena tabana e 23]

Me tiko na gauna mo veimaliwai kina