Ra iTabagone​—Oni na Vakayagataka Vakacava Nomuni Bula?

“MEU sotava mada ga na ka vinaka ena noqu bula.” Oqo na ka e kaya e dua na goneyalewa. Sega ni vakabekataki ni na vakatale ga oqo nomu rai. Ia ena “vinaka” vakacava nomu bula? Na tabana ni itukutuku, o ira na nomu itokani, ira beka nomu qasenivuli, era na rairai kaya ni na vinaka na bula ke levu na ilavo qai dua na nomu cakacaka dokai—mo rawaka!

Ia na iVolatabu e vakasalataki ira na itabagone ni qarai ni veika vakayago e “ka ni oca wale.” (Dauvunau 4:4) Dua na vuna, ni vica ga na itabagone era na lai vutuniyau sara se rogo mai muri. O ira na rawata, era na vakanuinuikara ena levu na gauna. “E vaka e dua na kato lala,” e kaya na gone ni Peritania a saga na vuli torocake. “Ni o iro e loma, o qai kila ni lala tu.” Dina ni cakacaka e rawa ni rawati kina na ilavo kei na rogo, ia e sega ni rawa ni vakaceguya na noda “gagadre vakayalo.” (Maciu 5:3, NW) Kena ikuri, e kaya na 1 Joni 2:17, (VV), ni sa “takali tiko yani na vuravura.” Kevaka mada ga o rawaka ena vuravura oqo, ena lekaleka wale.

Na Dauvunau 12:1 e uqeti ira na itabagone: “Mo nanumi koya ka Buli iko ni ko sa cauravou tiko.” Io, na sala vinaka duadua mo vakayagataka kina nomu bula, mo qarava na Kalou. Matai mada, mo rawata na kena ivakatagedegede. O na rawata vakacava? Cava e vauci ena bula ni veiqaravi vua na Kalou?

Ka Mo Cakava Mo iVakadinadina Kina i Jiova

Kena imatai, bucina na yalo ni qaravi Kalou. E sega ni tutu ga sa vure mai na yalo vaka oqo, kevaka mada ga erau lotu Vakarisito nomu itubutubu. Mo drau veiwekani sara ga kei Jiova. E kaya e dua na goneyalewa: “Na masu ena vukea nomudrau veiwekani kei Jiova.”—Same 62:8; Jemesa 4:8.

Na Roma 12:2, e tukuna e dua tale na ikalawa. E kaya: “Dou kila [se, “vakadeitaka,” NW] na loma ni Kalou, sa yaga, ka vinaka, ka dodonu sara.” O sa bau vakatitiqataka e so na ka o vulica? Muria na ivakasala ena iVolatabu, qai “vakadeitaka” nira ka dina! Vakekeli. Wilika na iVolatabu kei na ivola yavutaki vakaivolatabu. Na vulici Jiova e sega ni ka wale ga ni vakasama. Tikica na gauna mo nanuma lesu kina na veika o wilika me rawa ni tara na lomamu. O na lomana vakalevu kina na Kalou.—Same 1:2, 3.

Kena ikuri, saga mo wasea na ka o vulica tiko, vei ira beka nomu itokani e koronivuli. Dua tale, na vunau e veivalevale. O na rairai sota kei nomu itokani ni o vunau tiko, o na rairai madua kina. Ia e uqeti keda na iVolatabu meda kua ni “maduataka nai tukutuku-vinaka.” (Roma 1:16) O kauta tiko na itukutuku ni veivakabulai kei na inuinui! Cava mo maduataka kina?

Ke rau lotu Vakarisito nomu itubutubu, o sa na rairai tomani rau tiko ena cakacaka oqo. Sa so tale beka na ka o rawata, mai na nomu duri tu ga vakadirorogo e katuba se soli ivoladraudrau kei na ivolacebaceba? Sa rawa beka ni o vosa duadua e katuba, ni o taurivaka na iVolatabu me dusimaka na itaukeinivale? Ke se bera, kerea nodrau veivuke nomu itubutubu se dua na lewe ni ivavakoso matua. Me nomu isausau mo rawata na ivakatagedegede mo dautukutuku ni itukutuku vinaka bera ni papitaiso!

Dua na gauna o na via yalayala, mo bubului vua na Kalou mo qaravi koya. (Roma 12:1) Ia, e sega ni yalayala wale ga. E vinakati keda kece na Kalou meda ‘vakatutusa meda bula.’ (Roma 10:10) Ena gauna ni papitaiso, o na sauma taumada na taro me vakadinata nomu vakabauta. Oti oya o sa na qai papitaiso. (Maciu 28:19, 20) E ikalawa bibi na papitaiso. Ia kua ni tu vakasuka ni o nanuma ni o na sikalutu. Ke o vakararavi vua na Kalou me vakaukauataki iko, ena solia “na kaukauwa mana levu” mo tudei kina.—2 Korinica 4:7; 1 Pita 5:10.

Ni o papitaiso, o sa na iVakadinadina i Jiova. (Aisea 43:10) E dodonu me vakayacoka vakalevu oqo ina ivakavakayagataki ni nomu bula. Na yalayala e vauci kina noda ‘kua ni muri lomada.’ (Maciu 16:24) O na rairai vakuai iko mai na so na nomu isausau se gagadre mo ‘vakasaqara taumada kina na Matanitu ni Kalou.’ (Maciu 6:33) Na yalayala kei na papitaiso ena dolava e levu na sala mo cakava kina. Meda dikeva mada e vica.

Sala e So Mo Qarava Kina Vakatabakidua na Kalou

● Na painia e dua vei ira. Na dautukutuku e painia, e lotu Vakarisito yalayala oti ivakaraitaki vinaka, e tuvanaka me vakayagataka e 70 na aua e veivula me vunautaka kina na itukutuku vinaka. Na levu ni gauna o vakayagataka ena cakacaka oqo ena vakavinakataka na ivakarau ni nomu vunau kei na veivakavulici. Levu na painia era marau nira sa vukea nodra gonevuli iVolatabu mera iVakadinadina papitaiso. Na cakacaka saumi cava ena marautaki qai veivakacegui vaka oqo?

Me vukea nodra bula, e levu na painia era cakacaka saumi vagauna. Levu era tuvatuvanaki vakailiu nira vulica e dua na taba ni cakacaka e koronivuli se vuli vei ira nodra itubutubu. Kevaka dou duavata kei rau nomu itubutubu ni yaga mo kuria nomu vuli ni o sa biu vuli, tovolea me nomu inaki mo kua ni kocova na ilavo, ia me tokoni iko ena cakacaka vakaitalatala, se mo rawa ni veiqaravi vakatabakidua kina.

E bibi duadua ena bula i koya e painia na cakacaka vakaitalatala, me vukei ira tale na so mera rawata na bula, sega ni nona cakacaka saumi! Vakacava me nomu isausau na painia? Na painia ena dolava na katuba ina so tale na itavi dokai. Kena ivakaraitaki, so na painia era toki ena yalava e gadrevi kina vakalevu na dautukutuku ni Matanitu ni Kalou. So tale era vulica na vosa vou ra qai veiqaravi ena ivavakoso e duatani na kena vosa, e nodra vanua se e vanua tani. Io, e veivakalougatataki dina na ivakarau ni bula ni painia!

● Na Koronivuli ni iTalatala ni Matanitu e dua tale na sala eda rawa ni toso kina vakayalo. E rua na vula na vuli qo, e kena inaki me vakavulici ira na painia matua era tu vakarau mera toki mera veiqaravi ena vanua e vinakati kina vakalevu na veivuke. Era tukuna tiko, “O yau qo! Moni talai au!” nira vakatotomuri koya na Dauvunau levu duadua e veiqaravi e vuravura, o Jisu Karisito. (Aisea 6:8; Joni 7:29) Ena rairai vinakati me rawarawa ga nodra bula nira sa toki sara vakayawa. De dua e sega ni matau vei ira na itovo, draki, kei na kakana. De vinakati mera vulica e dua tale na vosa. Na koronivuli qo e yaga vei ira na mataveitacini dawai kei ira na veiwatini, era yabaki 23 ina 65. Ena vukei ira mera bulataka na itovo vakayalo ena yaga ena nodra ilesilesi, kei na nodra qaravi Jiova kei na nona isoqosoqo.

● Na veiqaravi e Peceli oya na bolecakacaka ena dua na valenitabana ni iVakadinadina i Jiova. So na lewenivuvale e Peceli era qarava sara ga na tabaki ni ivola vakaivolatabu. So tale era veiqaravi ena tabana e tokona na tabaki ni ivola, me vaka na vakavinakataki ni vale kei na kena iyaya, se veika e gadrevi vakayago ena vuvale. Na ilesilesi kece era itavi dokai ni veiqaravi vei Jiova. Kena ikuri, o ira e Peceli era marau nira kila ni veika cava ga era cakava, e yaga raraba vei ira na mataveitacini e veiyasa i vuravura.

So na gauna era sureti i Peceli na tacida era kenadau ena so na taba ni cakacaka. Levu era vakavulici nira sa tiko rawa. O ira e Peceli era sega ni veiqaravi mera rawaka kina ia era lomavakacegu ena ka e tu mera kania, nodra icili, kei na ilavo lailai ga me vukei ira. Oqo na ka e kaya e dua na itabagone e lewenivuvale e Peceli me baleta nona veiqaravi: “E wananavu! E ka toka ni bolebole na cakacaka, ia au vakalougatataki vakalevu niu veiqaravi e ke.”

● Na veiqaravi ena cakacaka ni tarataravaki e rawa ni vakaitavi kina e dua ena taravaki ni valenitabana kei na Kingdom Hall. O ira na dauveiqaravi ena cakacaka ni tarataravaki, ra vakatokai mera construction servants, era dau gole e vanua tani mera veivuke ena tarataravaki vaka oqo. Oqo e tiki ni veiqaravi tabu, e tautauvata kei na ka era cakava o ira era tara na valenisoro i Solomoni. (1 Tui 8:13-18) Na ituvatuva era qaravi kina na dauveiqaravi oqo e tautauvata kei ira na lewenivuvale e Peceli. Sa dua na ka dokai vei ira na tacida tagane kei na yalewa oqo mera veiqaravi ena taba ni cakacaka oqo e vakalagilagi kina o Jiova!

Qaravi Jiova ena Yalomu Taucoko

Na qaravi Jiova e sala vinaka duadua mo vakayagataka kina nomu bula. Vakacava me nomu isausau mo qarava vakatabakidua na Kalou? Veivosakitaka na cakacaka vakaitalatala vakatabakidua kei rau nomu itubutubu, ira na qase ena nomu ivavakoso, kei na ivakatawa ni tabacakacaka. Ke o taleitaka mo veiqaravi e Peceli, se lai vuli ena Koronivuli ni iTalatala ni Matanitu, tiko ena bose era dau tiko kina na lalawa ina cakacaka oqo ena gauna ni soqo ni tabacakacaka kei na soqo ni tikina.

Sa macala ni sega ni itabagone kece era na rawa ni veiqaravi vaka oqo, se mera cakacaka vakaitalatala vakatabakidua. So na gauna, na tauvimate, leqa vakailavo, kei na itavi ena vuvale ena tarova na ka e rawa ni cakava e dua. Ia, o ira na lotu Vakarisito kece era sa yalayala oti e dodonu mera muria na ivakasala ni iVolatabu: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kece ga.” (Maciu 22:37) E gadreva o Jiova mo cakava ena kena vinaka duadua na ka o rawa ni cakava. Se mani vakacava na kemu ituvaki, me bibi duadua na qaravi Kalou ena nomu bula. Tekia na isausau vakalou o rawa ni sauva. Io, “nanumi koya ka Buli iko ni ko sa cauravou tiko,” o na vakalougatataki kina me tawamudu!

Na tikinivolatabu kece e lavetaki mai na iVolatabu-Vakadewa ni Vuravura Vou, vakavo ga ke vakatakilai toka.