Vuna Era Sega ni Vakayagataka Kina na Lotu vaKarisito na Kauveilatai ena Nodra Sokalou

ERA doka na kauveilatai e vica vata na milioni ena veiyasa i vuravura. E kaya na Encyclopædia Britannica ni kauveilatai “e ivakatakilakila ni lotu vaKarisito.” Ia o ira na lotu vaKarisito dina era sega ni dau vakayagataka na kauveilatai ena nodra sokalou. Cava na vuna?

Dua na vuna bibi, oya ni a sega ni mate o Jisu Karisito ena kauveilatai. E dau vakadewataki vakalevu na vosa vaKirisi na stau·rosʹ me “kauveilatai.” Ia na kena ibalebale dina na vosa qo “na tolonikau se na duru kau.” E kaya na Companion Bible ni vosa na “[stau·rosʹ] e sega ni vakaibalebaletaka e rua na tolonikau erau veilatai . . .  E sega vakadua ni dusia e rua na tolonikau na vosa vaKirisi e vakayagataki ena [Veiyalayalati Vou].”

E dua tale na vosa vaKirisi e vakayagataki ena so na tikinivolatabu me vakamacalataka na sala a vakamatei kina o Jisu. Qo na vosa xyʹlon. (Cakacaka 5:30; 10:39; 13:29; Kalatia 3:13; 1 Pita 2:24) E kena ibalebale na “kauvaro” se “tolonikau, iwau, se kau.”

E vakamacalataka o Hermann Fulda ena nona ivola Das Kreuz und die Kreuzigung (Na Kauveilatai kei na Mate Vakararawa i Jisu) na vuna a dau vakayagataki kina na tolonikau mera vakamatei kina o ira era caka cala. E kaya: “Nodra vakamatei na caka cala ena gauna e liu e dau caka e matanalevu. O koya gona, ni sega ni levu na vunikau ena vanua era dau vakamatei kina, sa mani dau vakaduri e dua na tolonikau ke vinakati me vakarubeci e dua na tamata e caka cala, me vesu se vako kina e cake na ligana, vesu tale ga se vako na yavana.”

Matata vinaka na ivakamacala oya, ia e volai tu ena iVolatabu na yavu bibi duadua ni nodra sega ni vakayagataka na kauveilatai ena nodra sokalou na lotu vaKarisito dina. E kaya na yapositolo o Paula: “E voli keda o Karisito me sereki keda mai na cudru e vu mai na Lawa ni a cudruvi ena vukuda, ni volai: ‘E cudruvi o koya e vakaliligi ena kau.’” (Kalatia 3:13) E tokaruataka eke o Paula na vosa e volai ena Vakarua 21:22, 23, na tikinivolatabu e vakamacalataki kina nona vakamatei e dua ena kau, sega ni kauveilatai. Ke okati e dua e vakamatei ena kau me “cudruvi,” ena sega ni vinaka vei keda na lotu vaKarisito meda ukutaka na noda vale ena iyaloyalo se ivakatakarakara kei Jisu ena kauveilatai.

E sega ni dua na ivakadinadina e vakaraitaka nira vakayagataka na kauveilatai ena nodra sokalou o ira na kaya tiko nira lotu vaKarisito ena imatai, ikarua, kei na ikatolu ni senitiuri ni oti na mate i Karisito. Ia ena ikava ni senitiuri sa tavuki ina lotu vaKarisito e dua na empara a susu ena lotu butobuto, mani uqeta na vakayagataki ni kauveilatai me ivakatakilakila ni lotu vaKarisito. Eda sega ni kila na vu ni nona cakava qo o Empara Constantine, eda kila ga ni kauveilatai a sega ni tiki ni lotu vaKarisito e tauyavutaka o Jisu. Kena veibasai ga ni vu sara ga mai na lotu butobuto na vakayagataki ni kauveilatai. E kaya na New Catholic Encyclopedia: “E laurai nira vakayagataka na kauveilatai eso na matatamata ni bera na gauna vaKarisito, vaka kina vei ira na veimatatamata era muria na veimatalotu e sega ni lotu vaKarisito.” Era kaya tale eso na vuku ni a dau vakayagataki na kauveilatai ena sokalou e okati kina na qaravi ni veikabula, kei na nodra sokalou vakasisila na lotu butobuto.

Na cava gona e ciqomi kina na kauveilatai ena lotu e tukuni tiko ni lotu vaKarisito? Kena irairai ni a nanumi ni na vakarawarawataka nodra tavuki na lotu butobuto. Ia e vakacala na iVolatabu na qaravi ni ivakatakarakara se dua ga na ka e vu mai na lotu butobuto. (2 Korinica 6:14-18) E vakatabuya tale ga na iVolatabu na ivalavala kece ga ni qaravi matakau. (Lako Yani 20:4, 5; 1 Korinica 10:14) E matata gona na vuna era sega ni dau vakayagataka kina na lotu vaKarisito dina na kauveilatai ena nodra sokalou.a