LESONI 4

Na Cava Keimami Vakarautaka Kina na iVakadewa ni Vuravura Vou?

Sevutaki na imatai ni itabataba ni New World Translation of the Holy Scriptures

Eso era vakaraica tu na New World Translation of the Holy Scriptures e Congo (Kinshasa) — Congo (Kinshasa)

Sevutaki na New World Translation of the Holy Scriptures e Rwanda — Rwanda

Tiki ni ivolavivigi ni vakadewa i Symmachus e volai kina na yaca ni Kalou — Tiki ni ivolavivigi ni vakadewa vaKirisi nei Symmachus, e vola kina na yaca ni Kalou ena Same 69:31, ena ikatolu se ikava ni senitiuri G.V.

Sa vicasagavulu na yabaki na neimami vakayagataka, tabaka, qai veisoliyaka na iVakadinadina i Jiova e levu na itabataba ni iVolatabu. Ia keimami raica ni gadrevi me vakarautaki e dua na ivakadewa vou ni iVolatabu me vukei ira na lewenivanua mera kila “na ka dina,” ni qori na inaki ni Kalou vei keda kece. (1 Timoci 2:3, 4) Oya na vuna e sevutaki kina ena 1950 e vica na iwase ni iVolatabu vou na New World Translation (iVakadewa ni Vuravura Vou) e vakadewataki ena vosa ni gauna qo. Sa vakadewataki donu na iVolatabu qori ena sivia na 130 na vosa.

Bibi me dua na iVolatabu e kilai rawarawa. E dau veiveisau na vosa ni toso na gauna, e levu tale ga na ivakadewa ni iVolatabu e dau vakayagataka eso na vosa e sega ni matata qai dredre me kilai. Sa kune tale ga e levu na ivolavivigi makawa era muria vakavoleka sara na ivakadewa taumada ni iVolatabu, e kilai vinaka kina na iVolatabu vakaIperiu, vakaArame, kei na vaKirisi.

Bibi me dua na vakadewa e tukuna dina na Vosa ni Kalou. Mera kua ni veisautaka na dauvakadewa iVolatabu na vosa uqeti ni Kalou, e dodonu ga mera muria vinaka na kena ilavelave taumada. Ia e levu na ivakadewa ni iVolatabu era sega ni vakayagataka na yaca ni Kalou o Jiova.

Bibi me dua na iVolatabu e vakacaucautaki koya e vakavuna na kena volai. (2 Samuela 23:2) Na iVakadewa ni Vuravura Vou e vakalesuya tale vaka7,000 na yaca i Jiova ena vanua ga a volai kina ena ivolavivigi makawa ni iVolatabu, me vaka e laurai ena itaba e toka e ra. (Same 83:18) Ena vuku ni vakadidike vagumatua a caka ena loma ni vica na yabaki, e tabaki rawa kina e dua na iVolatabu e marautaki nida wilika qai vakatakila na rai ni Kalou. Ke sa tabaki se sega ena nomu vosa na New World Translation, o uqeti mo dau wilika e veisiga na Vosa i Jiova.—Josua 1:8; Same 1:2, 3.

Na cava keimami vakatulewataka kina me dua na vakadewa vou ni iVolatabu?
Na cava me cakava e veisiga e dua e via vulica na loma ni Kalou?