Tudei ena Yalomatua Kei na Lomadei

Na New World Translation Vica Vata na Milioni e Vuravura Raraba Era Taleitaka

E TAURA e 12 na yabaki, 3 na vula, qai 11 na siga ni sasaga. Ena 13 Maji, 1960, e vakacavari kina na iotioti ni tiki ni ivakadewa ni iVolatabu vou. E vakatokai na New World Translation of the Holy Scriptures.

Oti ga e dua na yabaki, e tabaka na iVakadinadina i Jiova na ivakadewa oqo me sa dua ga na ivola. Mai na itabataba oqo ni 1961, e tabaki kina e duanamilioni na ilavelave. Nikua, sa tabaki e sivia e duanadrau na milioni na ilavelave ni New World Translation, e dua kina vei ira na iVolatabu e veisoliyaki levu duadua. Na cava e uqeti ira na iVakadinadina mera vakarautaka kina na ivakadewa oqo?

Cava me Dua Kina na iVakadewa Vou ni iVolatabu?

Mera kila na iVolatabu ra qai kacivaka na kena itukutuku, era vakayagataka tu mai kina ena vica vata na yabaki sa oti na iVakadinadina i Jiova e levu na ivakadewa ni iVolatabu Vakavalagi. Era yaga na ivakavakadewa kece oqo, ia e vakabibitaki kina vakalevu na ivakarau ni sokalou kei na ivakavuvuli ni lotu ni Veivanua Vakarisito. (Maciu 15:6) Era gadreva kina na iVakadinadina i Jiova na ivakadewa ni iVolatabu e muria vakavoleka sara na vosa e volai taumada mai kina.

Na imatai ni kalawa me rawati kina na gagadre oqo e tekivu ena Okotova 1946, na gauna e kaya kina o Nathan H. Knorr, e lewe ni iLawalawa Dauvakatulewa ni iVakadinadina i Jiova me tabaki na ivakadewa vou ni iVolatabu. Ena 2 Tiseba, 1947, sa tekivu vakarautaka na New World Bible Translation Committee na ivakadewa ena muria sara vakavoleka na vosa taumada a volai kina, ena taurivaka na itukutuku ena ilavelave ni iVolatabu era se qai kune ga, qai vakayagataka na vosa e kilai rawarawa vei ira na dauwiliwili nikua.

Era sauva na dauvakadewa nodra isausau, ni tabaki na imatai ni itabataba—⁠ni New World Translation of the Christian Greek Scriptures—⁠ena 1950. Sa qai matata vakasigalevu na veitikinivolatabu era a buawa tu ena dua na gauna. Kena ivakaraitaki, dikeva mada na tikinivolatabu kilakilai dredre na Maciu 5:3: “Sa kalougata ko ira sa yalomalumalumu.” (King James Version) E biu me: “Era marau o ira era kauaitaka na nodra gagadre vakayalo.” Na Luke 17:21, “Sa tu e na lomamudou na matanitu ni Kalou,” (King James Version) e vakadewataki me: “Na matanitu ni Kalou sa tu ena kemudou maliwa.” Vaka kina na nodratou taro na tisaipeli vei Jisu ena Maciu 24:3: “Ia ka cava nai vakatakilakila ni nomuni lako mai?” (King James Version) E veisau me: “Ia na cava na ivakatakilakila ni nomuni tiko?” E vaka e dolava na New World Translation e dua na katuba vou ni kilaka.

Era druka sara ga kina e levu na vuku. Kena ivakaraitaki, e kaya na vuku ni iVolatabu mai Peritania o Alexander Thomson ni kilai tani na New World Translation ni vakadewataka vakadodonu na vosa vakirisi e vakamacalataka na ka e caka sara tiko ga ena dua na tiki ni gauna. Kena ivakaraitaki: E kaya na Efeso 5:25 “Kemuni na tagane vakawati, ni lomani ira tiko ga na watimuni” mai na kena tukuni tu ga “Oi kemudou na tagane vakawati, lomani ira na watimudou.” (King James Version) E kuria o Thomson me baleta na New World Translation ni “sega tale ni dua na ivakadewa me bau vakayagataka vakawasoma qai vakavinaka na ivakarau ni vosa vaka oqo.”

Dua tale na ka e duatani sara kina vakalevu na New World Translation oya ni vakayagataka na yaca ni Kalou, na Jiova, ena iVolatabu Vakaiperiu kei na iVolatabu Vakirisi. Ni basika vaka7,000 na yaca ni Kalou vakaiperiu ena iwase ni iVolatabu e dau vakatokai na Veiyalayalati Makawa, e macala kina ni vinakata na Dauveibuli vei ira na qaravi koya mera vakayagataka na yacana ra qai kilai koya vakavoleka. (Lako Yani 34:6, 7) Na New World Translation sa vukei ira e vica vata na milioni mera cakava vaka kina.

Tabaki na New World Translation ena So Tale na Vosa

Ni sa tabaki na kena vakavalagi, e tiko na vuna vinaka era diva kina na iVakadinadina i Jiova e veiyasa i vuravura me dua nodra New World Translation ena nodra vosa. Ena so na vanua, e dredre me taukeni na iVolatabu ena nodra vosa, nira sega ni taleitaka na mata mai na Bible Societies me laurai nodra iVolatabu vei ira na iVakadinadina i Jiova. Ia, vakalevu mera vunia na ivakavuvuli yaga na itabataba ni iVolatabu oqo. Dua na kena ivakaraitaki na ivakadewa ena vosa ni ceva kei Urope e vunia na vosa e dusia na yaca ni Kalou ni sosomitaka na vosa i Jisu “Me vakarokorokotaki na yacamuni” ena “Mo dokai vei ira na tamata.”​—Maciu 6:9.

Ena 1961 tiko ga, sa tekivu vakadewataki na New World Translation vakavalagi ina so tale na vosa. Oti ga e rua na yabaki, sa vakadewataki na New World Translation of the Christian Greek Scriptures ena ono tale na vosa. Tekivu mai kea, sa rawa nira wilika na iVolatabu oqo ena nodra vosa e tolu mai na veiyava na iVakadinadina e vuravura raraba. Ia e levu tale na cakacaka mera cakava na iVakadinadina i Jiova me dua kina nodra ilavelave ni iVolatabu oqo e vica vata tale na milioni na tamata.

E vaka ni sa na sauvi na isausau oqo ni tauyavu ena 1989 na tabana ni vakadewa na Translation Services ena itikotiko liu ni iVakadinadina i Jiova. E tauyavutaka na tabana oqo na ivakarau ni vakadewa e vakacurumi kina ena kompiuta na macala kece ni vakadidike vakaivolatabu. Na vakayagataki ni iwalewale vou oqo e tabaki rawa kina na iVolatabu Vakirisi Vakarisito ena so tale na vosa ena loma ga ni dua na yabaki kei na iVolatabu Vakaiperiu ena loma ni rua na yabaki—e lekaleka sara mai na gauna e dau vakadewataki kina na iVolatabu e liu. Mai na gauna e tekivu kina na iwalewale oqo, sa vakadewataki e 29 na itabataba ni New World Translation vakavalagi ina vosa era vosataka e sivia e ruanabilioni na tamata. Sa vakacagau tiko na vakadewa ena 12 tale na vosa. Me yacova mai nikua, sa vakadewataki taucoko se vakatikina na New World Translation vakavalagi ena 41 na vosa.

Sa oti oqo e 50 na yabaki mai na kena soli na imatai ni itabataba ni New World Translation ena 3 Okosita, 1950, ena Soqo ni Tikina ni iVakadinadina i Jiova na Theocracy’s Increase ena korolevu o Niu Yoka. Ena soqo oya, e uqeti ira na tiko kina o Nathan H. Knorr: “Ni taura na ivakadewa oqo. Wilika tasevu, oni na marautaka. Vulica, ena vukei kemuni mo ni kila vinaka na Vosa ni Kalou. Veisoliyaka vei ira tale na so.” Oni uqeti mo ni wilika na iVolatabu e veisiga, ni na vukei kemuni na itukutuku e tu kina mo ni “tudei e na yalomatua kei na lomadei e na nomuni muria taucoko na lomana [na Kalou].”—Kolosa 4:12, VV.

[Graph/iYaloyalo ena tabana e 8, 9]

(Raica tale na ivola)

“Vakarautaki ni New World Translation”

E vakarautaki taumada na New World Translation ena vosa vakavalagi. Ia, nikua sa tu taucoko se vakatikina ena 41 na vosa

iVolatabu Vakirisi Vakarisito iVolatabu Taucoko

1950 1

1960-69 6 5

1970-79 4 2

1980-89 2 2

1990-Nikua 29 19