Na Cava e Dau Caka ena Neimami Soqoni?

Na nodra soqoni na lotu vaKarisito taumada e dau caka ga kina na lagasere, masu, wiliki kei na veivosakitaki ni tikinivolatabu. (1 Korinica 14:26) O na raica ni tautauvata tale ga qori kei na neimami soqoni.

E yavutaki vakaivolatabu qai yaga na veidusimaki. Ena muanimacawa, ena soqoni vata na ivavakoso yadua mera rogoca ena loma ni 30 na miniti e dua na ivunau vakaivolatabu. E dau vakamacalataki kina na yaga ni iVolatabu ena neimami bula kei na gauna eda donuya tu qo. Keimami dau uqeti me keimami raica tiko neimami iVolatabu qai vakamuri koya e vunau. Ni oti na ivunau, ena tarava sara na Vuli “Vale ni Vakatawa” ena loma ni dua na aua. Era na vakaitavi na lewe ni ivavakoso ena kena veivosakitaki e dua na ulutaga mai na itabataba ni Vale ni Vakatawa e vulici. E vukei keimami na soqoni qori me keimami bulataka na ivakavuvuli vakaivolatabu. Na ulutaga vata ga qori e vulici ena sivia na 110,000 na ivavakoso e veiyasa i vuravura.

E vakavinakataka na iwalewale ni neimami veivakavulici. Ena loma ni macawa keimami na dau soqoni vata ena dua na yakavi, ena caka kina e tolu na iwasewase ni soqoni ena Noda Bula vaKarisito kei na Cakacaka Vakaitalatala, yavutaki ena iVola ni Soqoni. Na kena imatai na iYau Mai na Vosa ni Kalou. Ena veivosakitaki kina vakalekaleka e vica na wase ni iVolatabu era sa wilika oti mai na lewe ni ivavakoso. Ena tarava sara na Gumatua ena Cakacaka Vakaitalatala, okati kina na vakatasuasua ni kena veivosakitaki na iVolatabu. Ena tiko e dua na dauveivakasalataki, ena raica eso na vanua me vakavinakataka o gonevuli, vakabibi ena nona wilivola kei na iwalewale ni nona vosa. (1 Timoci 4:13) Na iotioti ni iwasewase na Noda Bula vaKarisito, e veivosakitaki kina na yaga ni ivakavuvuli vakaivolatabu ena noda bula e veisiga. E okati tale ga kina na veitarotarogi me vakatitobutaka neimami kila na iVolatabu.

Ni o tiko ena neimami soqoni, o na qoroya na matata ni kena vakamacalataki na iVolatabu.​—Aisea 54:13.

• Na cava o na rogoca ena neimami soqoni na iVakadinadina i Jiova?

• Na neimami soqoni cava ena loma ni macawa o na via tiko kina?