Noda Bula vaKarisito kei na Cakacaka Vakaitalatala

DUA na itukutuku a kacivaka o Anthony Morris e lewe ni iLawalawa Dauvakatulewa, ena bose vakayabaki ni isoqosoqo ena ika3 ni Okotova, 2015. Na itukutuku cava ya? Na soqoni vou e vakatokai me Noda Bula vaKarisito kei na Cakacaka Vakaitalatala, sa na sosomitaka na Koronivuli ni Vuli Vunau, Soqoni ni Cakacaka, kei na Vuli iVolatabu ni iVavakoso. A kaya o Brother Morris ni na sosomitaka na tikidua Noda Cakacaka Vakaitalatala, na ivola ni soqoni e vakatokai tale ga me Noda Bula vaKarisito kei na Cakacaka Vakaitalatala. E walu na tabana na ivola ni soqoni qori qai rokataki vinaka. O na raica e kea na ituvatuva ni soqoni, kei na iyaloyalo ena yaga vakalevu ena nomu wili iVolatabu.

E wasei vakatolu na soqoni vou:

1. iYau Mai na Vosa ni Kalou. Na iwasewase qo e tini na miniti, qai yavutaki na ivakamacala ena wili iVolatabu vakamacawa kei na iyaloyalo ena ivola ni soqoni. E walu na miniti e dua tale na iwasewase e vakatokai “Vakekeli ena Vosa ni Kalou,” e caka kina na veitarotarogi ena wili iVolatabu vakamacawa, qai tarava na wili iVolatabu me va na miniti.

2. Gumatua ena Cakacaka Vakaitalatala. Na iwasewase qo eratou na vakaraitaka kina e tolu na gonevuli na iwalewale ni veivakavulici ena imatai ni veisiko, veisikovi lesu, kei na vuli iVolatabu.

3. Noda Bula vaKarisito. E veivosakitaki ena iwasewase qo na sala me muri kina e veisiga na ivakavuvuli vakaivolatabu. E okati tale ga kina na Vuli iVolatabu ni iVavakoso.

Era vakavinavinakataka na dautukutuku e veiyasa i vuravura na soqoni vou qo ra qai kaya ni yaga vakalevu na veika era vulica kina. A vola e dua na tacida tagane mai Ositerelia: “Sa totoka dina na soqoni Noda Bula vaKarisito kei na Cakacaka Vakaitalatala! Na veika e vakamacalataki kina e ganita vinaka noda bula nikua, qai rawarawa na vakatutu. Eda kidacala ga sa oti tale na soqoni nira lekaleka ga na itavi, e sega na talimagimagi, e totoka vakaoti na vidio kei na nodra vakaitavi tale ga na gone.”

Eratou vola e dua na ilawalawa qase mai Itali: “E uqeti keitou na soqoni vou qo me keitou vakavakarau vakavinaka, me keitou vakavinakataka tale ga na neitou iwalewale ni veivakavulici. Na soqoni vou qo e dua tale na veisau totoka e vakayacora o Jiova ena noda vakavulici na nona tamata. A kaya e dua na dautukutuku goneyalewa e yabaki 15: ‘E dau dredre e liu meu vakarorogo vinaka ena soqoni. Ia na soqoni vou qo e vukei au meu vakarorogo vinaka, meu vakavakarau vinaka tale ga mai vale.’”

Eratou kaya e dua na vuvale mai Austria: “Sega ni toso vinaka sara e liu neirau wili iVolatabu vakamacawa kei na neirau goneyalewa yabaki tini. Ia e veiuqeti na iwasewase ‘iYau Mai na Vosa ni Kalou’ me keitou dau vakamacala. Keitou sa qai marautaka ena gauna qo na wili iVolatabu vakamacawa. Keirau raica tale ga na nona toso vakayalo na luvei keirau.”

E kaya o Ines mai Jamani: “Au vakila sara ga na yaga ni vakavakarau, kei na noqu vakasamataka vakatitobu na veika ena vulici. Na levu ni vakekeli au cakava ena gauna qo, au se sega ni bau cakava e liu. Sa vinaka sara noqu veiwekani kei Jiova ena gauna qo. E veivakaocai na bula ena vuravura i Setani. Ia na soqoni e vakabulabulataki au, e vukei au meu kua ni soro.”

Era marautaka tiko na veivavakoso mai na Yatu Solomoni na soqoni vou, dua tale ga na ka nodra sasaga me yaga kina vei ira na soqoni qo. Levu na ivavakoso era tu ena vanua e sega kina na livaliva se na internet ra qai bula rawarawa ga na mataveitacini. Kena ibalebale ya nira sa sega ni rawa ni sarava na vidio e veivula? Era yalovata na dautukutuku ena dua na ivavakoso ena yanuyanu o Malaita me volitaki na niu. Era cautaka ina ivavakoso na ilavo era rawata, me voli kina e dua na misini ni sara vidio e vakalivalivataki ena matanisiga. Era dau gole na tacida tagane e veivula ina vanua voleka duadua e tiko kina na internet, e dau download na vidio se so tale na ka e gadrevi qai veisoliyaki vei ira na mataveitacini ena ivavakoso.

E kaya e dua na tacida tagane mai Merika: “E vinaka cake vei au na vuli e vakayagataki kina na iyaloyalo, vidio, se droini. E 40 vakacaca na yabaki noqu sasaga voli. Au dau wilika vaka vica vata e dua na ka me yacova ni sa matata vei au, ni bera niu vakamacalataka vua e dua tale. Au vakavinavinakataka gona na iLawalawa Dauvakatulewa ena iyaragi kece ni veivakavulici e vakarautaka. E wananavu na ikau ni ivola ena iVolatabu e dau saravi ena vidio, na iyaloyalo tale ga au dau diva tu me vakayagataki ena vuli sa tu sara ga ena ivola ni soqoni! Sa laurai ga kina ni vakalougatataka tiko o Jiova na veika dou vakarautaka ena vukudra na nona tamata. Vinaka vakalevu.”