Na Cava na Painia?

Na vosa “painia” e dau vakaibalebaletaki vei ira na dauvakasaqara na yalava vovou mera qai cakacaka kina na vo ni iVakadinadina i Jiova. O Jisu e vaka e dua na painia, ena nona talai mai vuravura me vunautaka na itukutuku ni veivakabulai qai dolava tale ga na sala me rawati kina na bula. (Maciu 20:28) Era vakatotomuri koya tale ga nikua na nona imuri ena nodra vakayagataka e levu na gauna ena ‘veivakatisaipelitaki.’ (Maciu 28:19, 20) Eso era vakaitavi sara ena ka keimami vakatoka nikua me veiqaravi vakapainia.

O ira na painia era cakacaka vakaitalatala vakatabakidua. Era dautukutuku kece ni itukutuku vinaka na iVakadinadina i Jiova. Ia eso era cakava na veiveisau mera painia tudei, oya ena nodra vakayagataka e 70 na aua e veivula ena cakacaka vakavunau. Eso era cakacaka ga vagauna mera painia kina. Eso era lesi mera painia lavotaki ena vanua e vinakati vakalevu kina na daukacivaka na Matanitu ni Kalou, nira vakayagataka e 130 na aua se sivia ena cakacaka vakaitalatala e veivula. Era bula rawarawa ga na painia, era nuidei ni o Jiova ena vakarautaka na ka mera bula kina e veisiga. (Maciu 6:31-33; 1 Timoci 6:6-8) O ira era sega ni rawa ni painia lavotaki se painia tudei e rawa nira painia veivuke, ena nodra rawata ga e 30 se 50 na aua e veivula.

O koya e painia e lomana na Kalou kei ira na tamata. Me vakataki Jisu, keimami raica tale ga nira vinakata e levu nikua mera kila na Kalou kei na nona inaki. (Marika 6:34) Ia na ka keimami kila e rawa ni vukei ira ena gauna qo, era na nuidei tale ga kina ena veigauna se bera mai. Na nona lomana na wekana e dua na painia e uqeti koya me solia na nona gauna kei na igu me vukei ira vakayalo eso tale. (Maciu 22:39; 1 Cesalonaika 2:8) Nona cakava qori e vakaukauataka na nona vakabauta, e vakavolekati koya vua na Kalou, qai marau kina vakalevu.​—Cakacaka 20:35.

• Na cava na painia?

• Na cava e uqeti ira eso me nodra cakacaka vakatabakidua na painia?