Veivolekati kei na Kalou Nida Painia

“Sa ka vinaka me seretaka na vakavinavinaka vua na noda Kalou.”​—SAME 147:1.

TARO MO VAKASAMATAKA

E rawa vakacava ni vaqaqacotaka nomu veiwekani kei Jiova na cakacaka vakapainia?

Ke o dua na painia, na cava e rawa ni vukei iko mo tomana tiko ga na nomu veiqaravi?

Ke o se bera ni painia, na veiveisau cava mo cakava mo painia kina?

1, 2. (a) Na cava ena yaco ke o vakasamataka qai talanoataka e dua o lomana? (Raica na imatai ni iyaloyalo.) (b) Na taro cava soti eda na dikeva?

NIDA talanoataka qai vakananuma na veika vinaka me baleta e dua eda lomana ena vakavolekati keda vua. E va qori tale ga na noda veiwekani kei na Kalou o Jiova. Ni dua na dau vakatawasipi o Tevita, e levu na gauna e dagava na lomalagi ena bogi qai dau vakasamataka vakatitobu na nona vakasakiti na Dauveibuli. A vola: “Ni’u sa vakananuma na nomuni lomalagi, na cakacaka ni qaqalo ni ligamuni, na vula kei na kalokalo ko ni sa lesia; a cava na tamata mo ni nanumi koya kina? Kei na luve ni tamata, mo ni dautalevi koya kina?” (Same 8:​3, 4) O Paula tale ga a dua a vakasamataka na sala vakasakiti a vakayacora kina o Jiova na nona inaki me baleti Isireli vakayalo, a kaya: “Sa uasivi dina ga na veivakalougatataki ni Kalou, na nona vuku kei na nona kilaka!”​—Roma 11:​17-26, 33.

² Nida vakaitavi ena cakacaka vakaitalatala, eda vakasamataki Jiova, eda talanoataki koya tale ga. Qori ena vakaukauataka na noda veiwekani kei koya. Levu era vakaitavi ena cakacaka vakaitalatala vakatabakidua, era vakila na veivakalougatataki, dua oya ni titobu na nodra lomana na Kalou. Ke o sa veiqaravi tiko vakatabakidua se o sasaga tiko mo sauva na isausau qori, e vinaka mo taroga: E rawa vakacava ni vakaukauataka noqu veiwekani kei Jiova na cakacaka vakaitalatala vakatabakidua? Ke o painia tiko, e vinaka mo taroga, ‘Na cava ena vukei au meu qarava tiko ga na itavi lavotaki qo?’ Ke o se bera ni painia, taroga, ‘Na veiveisau cava au rawa ni cakava meu rawa ni painia?’ Meda raica mada na sala ena vakaukauataka kina noda veiwekani kei na Kalou na veiqaravi vakatabakidua.

VEIQARAVI VAKATABAKIDUA KEI NA NODA VEIWEKANI KEI NA KALOU

3. Ena yaga vakacava vei keda na noda dau kacivaka na veivakalougatataki ena kauta mai na Matanitu ni Kalou?

³ Ena vakavolekati keda vei Jiova na noda kacivaka na veivakalougatataki ena kauta mai na Matanitu ni Kalou. Na tikinivolatabu cava o dau via vakayagataka ni o vunau e veivale? O dau taleitaka na Same 37:​10, 11; Taniela 2:44; Joni 5:​28, 29; se Vakatakila 21:​3, 4? Ena gauna kece eda tukuna kina na yalayala qori, eda na vakadeitaka ni Kalou daulomasoli eda qarava e dau vakarautaka na “iloloma vinaka kece kei na isolisoli uasivi kece e vu mai cake.” Qori ena vakavolekati keda sara ga vua.​—Jeme. 1:17.

4. Na cava eda vakavinavinakataka kina vakalevu na vinaka ni Kalou nida raica na vakaloloma ni nodra bula vakayalo na tiko ena yalava?

⁴ Nida raica na vakaloloma ni nodra bula vakayalo na tiko ena yalava, eda na vakavinavinakataka kina vakalevu na ka dina eda sa mai kila. E levu nikua era lekata na veidusimaki me vakainaki qai marautaki kina na nodra bula. Levu era leqataka na nodra veisiga ni mataka qai sega na nodra inuinui. Era via kila se cava na inaki ni bula. E levu mada ga na daulotu, e lailai na ka era kila mai na iVolatabu. Era vakataki ira na kai Ninive makawa. (Wilika Jona 4:11.) Nida vakaitavi vakalevu ena cakacaka vakaitalatala, eda na kila kina vakavinaka na duidui ni kedra ituvaki vakayalo na tamata ni vuravura kei ira era qaravi Jiova. (Aisea 65:13) E vakadeitaka tale ga vei keda na vinaka i Jiova, ni sega wale ga ni vakarautaka o koya na veika eda gadreva vakayalo, ia e sureti keda kece meda vakacegui vakayalo, meda rawata tale ga na inuinui dina.​—Vkta. 22:17.

5. Nida vukei ira vakayalo na so tale, ena vukei keda vakacava ena leqa eda sotava tiko?

⁵ Nida vukei ira vakayalo na so tale ena vukei keda meda kua ni lomaleqataka vakalevu na ka eda sotava. Qori na ka e vakadinadinataka o Trisha e dua na painia tudei ena gauna erau veisere kina nona itubutubu. E kaya: “Qori e dua na gauna rarawataki duadua ena noqu bula.” Dua na siga ena levu ni nona rarawa, a via tu ga e vale. Ia sa qai nanuma me lai vakavulica e tolu na gone ena iVolatabu, e vakaloloma sara na kedratou ituvaki. Sa biuti ratou na tamadratou, qai dau vakalolomataki ratou na tuakadratou. E tukuna o Trisha: “E lailai sara na mosi ni yalo kei na rarawa au sotava ni vakatauvatani kei na ka eratou sotava na gone qo. Ni keitou vuli tiko, e laurai ni ratou marautaka qai taleitaka na ka eratou vulica tiko. O Jiova e vakayagataki ratou sara ga na gone qori ena siga ya meu guilecava kina na rarawa au sotava tiko.”

6, 7. (a) E vaqaqacotaki vakacava na noda vakabauta nida vakavulica e dua ena iVolatabu? (b) Na cava e yaco nida raica na nodra veisau na gonevuli nira muria na ivakavuvuli vakaivolatabu?

⁶ Ena vaqaqacotaki na noda vakabauta nida vakavulica na ka dina mai na iVolatabu. E vola na yapositolo o Paula me baleta eso na Jiu ena nona gauna era sega ni cakava na ka era vakatavulica: “O iko o vakavulica tiko e dua tale, o sa bau vakavulici iko mada?” (Roma 2:21) Era duidui sara nikua na painia! E levu na gauna era vunautaka na ka dina vei ira na so tale, era caka vuli iVolatabu tale ga. Me rawa nira cakava vinaka qori, ena vinakati mera vakavakarau vinaka, qai so na gauna era na vakadidike mera sauma kina eso na vakatataro. E tukuna e dua na painia o Janeen: “Na gauna kece au vakavulica kina e dua ena ka dina, au vakila ni dei sara ga ena noqu vakasama kei na lomaqu na ka dina qori. Qori sa qai kaukaua ga kina na noqu vakabauta.”

⁷ Nida raica ni sa veisautaka na nodra bula na gonevuli nodra muria na ivakavuvuli vakaivolatabu, eda na vakavinavinakataka kina vakalevu na vuku ni Kalou. (Aisea 48:​17, 18) Qori e vakadeitaka vei keda meda muria tiko ga na ivakavuvuli vakaivolatabu. E tukuna o Adrianna, e dua tale na painia: “Ke ra nuitaka ga na tamata na nodra vuku, era na sotava e levu na leqa. Ia nira sa nuitaka na vuku i Jiova, era na vakila sara ga na kena yaga.” E tukuna tale ga o Phil: “E vakatubuqoroqoro nida raica na nona veisautaka o Jiova na nodra bula e levu, vakabibi o ira era saga mera veisautaka ga vakataki ira nodra bula.”

8. E yaga vakacava na noda dau cakacaka vata kei ira na tacida ena cakacaka vakaitalatala?

⁸ Noda cakacaka vata kei ira na tacida ena cakacaka vakaitalatala e vaqaqacotaka na noda bula vakayalo. (Vkai. 13:20) Levu na painia era dau cakacaka vakalevu kei ira na dautukutuku ena cakacaka vakaitalatala. Qo e rawa kina nira “veivakayaloqaqataki.” (Roma 1:12; wilika Vosa Vakaibalebale 27:17.) E tukuna e dua na painia o Lisa: “E laurai vakalevu ena vanua ni cakacaka na yalo ni veisisivi kei na veisisivotaki. E veisiga o na rogoca na kakase kei na vosavosa ca. E caka qori nira dauveiqati. Ena so na gauna o na vakalialiai ena vuku ni nomu itovo vaKarisito. Ia nida cakacaka vata kei ira na tacida ena cakacaka vakaitalatala, eda na vakayaloqaqataki sara ga. Ni cava e dua na siga ni qaravi itavi, se mani vakacava na levu ni noqu wawale, au vakabulabulataki tu ga.”

9. Ni rau painia vata na veiwatini, ena yaga vakacava ina dali turai tolu ni vakawati?

⁹ Nida painia vakaveiwatini ena vaqaqacotaka na dali turai tolu ni vakawati. (Dauv. 4:12) A tukuna o Madeline, a painia kei watina: “Keirau rawa ni veitalanoataka vakaveiwatini na ka keirau sotava ena cakacaka vakaitalatala se dua na ka keirau wilika mai na iVolatabu e rawa ni vakayagataki ena cakacaka vakaitalatala. Na neirau dau painia vakaveiwatini e vakavolekatitaki keirau sara ga.” E va qori tale ga na ka e tukuna o Trisha: “Keirau vakatulewataka me keirau kua ni dinau, keirau sega kina ni lomaleqataka vakalevu na ilavo. E dua ga na neirau ituvatuva ni cakacaka vakavunau, keirau cakava vata na neirau veisikovi lesu kei na vuli iVolatabu, qori sa qai vakaduavatataki keirau vakayago, vakayalo tale ga.”

10. Nida vakaliuca na Matanitu ni Kalou da qai vakila na nona veitokoni, ena vakacava na noda nuitaki Jiova?

¹⁰ Eda nuitaki Jiova vakalevu nida vakaliuca na nona Matanitu, eda na vakila na nona veitokoni kei na nona dau sauma na noda masu. Eda kila ni o ira kece na lotu vaKarisito yalodina era dau nuitaki Jiova. Ia era vakadinadinataka o ira na veiqaravi vakatabakidua ni rawa nira painia tiko ga ke ra nuitaki Jiova. (Wilika Maciu 6:​30-34.) O Curt e dua na painia, eso na gauna e dau veisosomitaki me ivakatawa ni tabacakacaka, a vakadonuya me sikova e dua na ivavakoso e rauta ni rua veimama na aua na kena yawa mai na nona vale. E painia tale tiko ga o watina, ia e sega ni veirauti na nodrau waiwai ni motoka, e rawa ni kauti rau ga ena ivavakoso erau gole tiko kina, qai vo tale tu e dua na macawa me taura kina na nona veisaumi. E tukuna o Curt, “Au lomatarotarotaka na vakatulewa au cakava qo.” Ni rau masu oti ga, rau vakadeitaka me rau na ciqoma na ilesilesi ya, erau nuidei ni na vakayacora o Jiova na ka erau gadreva. Ni rau vakarau gole, a qiriti rau e dua na tacida yalewa ni via solia e dua nodrau iloloma. Na ilavo e lolomataki vei rau e veirauti sara ga me vakacavari kina na ilakolako ya. E tukuna o Curt, “Nida sotava e veigauna na ituvaki va qori, eda dau raica sara ga na veivuke i Jiova.”

11. Na cava eso na veivakalougatataki era sotava na painia?

¹¹ Era vakadinata na painia ni nodra vakarabailevutaka na nodra qaravi Jiova kei na nodra guta mera veivolekati kei na Kalou, era vakalougatataki kina vakalevu. (Vkru. 28:2) Ia e sega ni ka rawarawa na painia. Eda sotava kece na dauveiqaravi ni Kalou na leqa e vakavuna o Atama. Eso na gauna, eso na ituvaki e vakavuna mera cegu kina eso na painia. Ia e levu na gauna e rawa sara ga ni wali na ituvaki qori. Na cava ena rawa ni vukei ira na painia mera marautaka tiko ga na nodra veiqaravi?

VEIQARAVI VAKATABAKIDUA TIKO GA

12, 13. (a) Na cava mera cakava na painia ke dredre mera yacova na aua e lavaki? (b) Na cava e bibi kina me dua na ituvatuva ni wili iVolatabu e veisiga, vuli vakataki keda, kei na noda vakasama vakatitobu?

¹² Levu na painia era dau osooso vakalevu. Ena sega ni rawarawa mera cakava kece na ka, e bibi gona me tiko na nodra ituvatuva. (1 Kor. 14:​33, 40) Ke dredre vua na painia me rawata na aua e lavaki, e vinaka me dikeva tale na nona dau vakayagataki gauna. (Efeso 5:​15, 16) Ena rawa ni taroga: ‘Vakacava na levu ni gauna au vakayagataka tiko ena ka ni veivakamarautaki se ena veika au dau taleitaka? Ena vinakati meu lewai au vinaka? Au rawa ni veisautaka na gauna ni noqu cakacaka saumi?’ Eda vakadinata kece ni rawarawa meda dau okata eso na ka ena noda ituvatuva; koya gona ena vinakati vei ira na veiqaravi vakatabakidua mera dikeva wasoma qori ra qai cakava na veiveisau ke gadrevi.

¹³ E dodonu me tiki ni nona ituvatuva na painia na wili iVolatabu e veisiga, vuli vakataki koya, kei na nona vakasama vakatitobu. Ena vinakati vua na painia me lewai koya vinaka, me kua kina ni vakaleqa na nona ituvatuva vakayalo na veika e sega soti ni bibi. (Fpai. 1:10) Kena ivakaraitaki, vakasamataka mada ke lesu mai vale e dua na painia ni oti e dua na siga ni cakacaka vakaitalatala. E nona ituvatuva me vakayagataka na yakavi ya me vakavakarau kina ena soqoni. Ia e via raica na nona imeli, mani raica sara nona kompiuta me wilika qai sauma tale ga. Oti sa qai gole ena dua na site me raica se sa lutu na isau ni dua na iyaya e via volia tiko. E sega ni kila ni sa oti e rua na aua, e se bera tale ga ni tekivu nona vakavakarau. Cava e rivarivabitaki kina qori? Vakasamataki ira mada na dauqito, ena vinakati mera dau maroroya na yagodra ke ra vinakata me balavu nodra gauna ni qito. E vinakati tale ga vei ira na painia me tiko e dua na nodra ituvatuva ni vuli vakataki ira mera vakatawani ira kina vakayalo ke ra vinakata mera gumatua tiko ga ena cakacaka vakaitalatala.​—1 Tim. 4:16.

14, 15. (a) Na cava me rawarawa kina nodra bula na painia? (b) Na cava me cakava na painia ni sotava e dua na ituvaki dredre?

¹⁴ O ira na painia gugumatua era na saga me rawarawa nodra bula. O Jisu a uqeti ira na nona tisaipeli me rawarawa na matadra. (Maciu 6:22) A rawarawa mada ga na nona bula o Jisu, me rawa ni vakacavara kina na nona cakacaka vakaitalatala, me kua tale ga ni dua na ka me vakawelei koya. Oya na vuna e tukuna kina: “Era vaqara na fokisi, era vakasova na manumanuvuka, ia na Luve ni tamata e sega na vanua me kotora kina na uluna.” (Maciu 8:20) Ke ra via vakatotomuria na painia na ivakaraitaki i Jisu, mera nanuma tiko, na levu ga ni iyau era taukena, na levu tale ga ni sasaga ena caka kina ena kena vakavinakataki, se sosomitaki.

¹⁵ Era kila na painia ni talei na nodra veiqaravi, ia era sega ni dokadokataka qori. Era kila ni itavi dokai kece e soli vei keda e vu ga mai nona loloma soli wale na Kalou. Koya gona, me rawa nira painia tiko ga, ena vinakati mera nuitaki Jiova. (Fpai. 4:13) Ena basika ga na ituvaki dredre. (Same 34:19) Ni yaco qori, mera qara na painia na veidusimaki i Jiova, mera laivi koya tale ga me vukei ira, me kua ga ni totolo nodra via cegu mai na itavi dokai qori. (Wilika Same 37:5.) Nira vakila na veitokoni vakayalololoma i Jiova, era na veivolekati kei na Tamada vakalomalagi.​—Aisea 41:10.

VAKACAVA MO PAINIA?

16. Na cava mo cakava ke o via painia?

¹⁶ Ke o via vakila tale ga na marau era vakila o ira na veiqaravi vakatabakidua, talaucaka sara qori vei Jiova. (1 Joni 5:​14, 15) Mo veitalanoa kei ira na painia, navuca tale ga eso na isausau mo rawa ni painia. Qori sara ga na ka erau cakava o Keith kei Erika. Erau cakacaka saumi me vakataki ira ga e levu na veiwatini. Ni rau vakamau oti ga erau volia e dua na vale kei na dua na motoka vou. Erau tukuna: “Keirau nanuma ni na vakamarautaki keirau qori​—ia e sega sara ga.” A vakacegui mai na nona cakacaka o Keith, a mani painia veivuke sara. E nanuma lesu: “Au raica ena cakacaka vakapainia ni ka marautaki na noda vakaitavi ena cakacaka vakatalatala.” Erau mani veitokani kei na dua na veiwatini painia, o rau na veiwatini qori sa qai vukei rau me rau raica na marau ena vakilai ke rau cakacaka vakapainia, me rau bula rawarawa tale ga. Na cava a qai cakava o Keith kei Erika? “Keirau mani vakavola na neirau isausau vakayalo qai vakabira ena katoniwaililiwa me keirau toqa na kena keirau sa sauva.” Toso na gauna, sa rawa ni rau painia.

17. Na cava e ka vakavuku kina mo vakasamataka eso na veiveisau o rawa ni vakayacora ena nomu ituvatuva se ena nomu bula mo rawa ni painia kina?

¹⁷ Vakacava mo painia? Ke sega ni vakatara na kemu ituvaki mo painia ena gauna qo, saga ena nomu igu taucoko mo toro volekati Jiova ena nomu vakaitavi vakalevu ena cakacaka vakaitalatala. Ia ke o masuti Jiova qai vakasamataka vinaka na kemu ituvaki, o na raica ni o rawa ni vakayacora eso na veiveisau ena nomu ituvatuva se na nomu bula mo painia kina. Ke o painia, na marau o na vakila kina ena uasivita na veika o na vakila ena nomu vakuai iko ena so tale na ka. O na marau vakalevu ni o vakaliuca na Matanitu ni Kalou kei na nomu dau vakaraitaka na yalo ni solika. (Maciu 6:33) Ena levu kina na gauna mo vakasama qai talanoataka na veika me baleti Jiova, qori ena titobu kina na nomu lomani koya, ena vakamarautaki koya tale ga.

[iYaloyalo ena tabana e 27]

[iYaloyalo ena tabana e 29]

Ena marautaki na nomu bula ke o gugumatua ena veiqaravi vakatabakidua (Raica na parakaravu 9)