LESONI 21

Na Cava na Peceli?

Rua na iVakadinadina i Jiova erau veiqaravi ena Tabana ni Droini e Peceli — Tabana ni Droini, Merika

Cakacaka tiko e dua na iVakadinadina i Jiova ena vanua ni tabaivola e Jamani — Jamani

Dua na iVakadinadina i Jiova e veiqaravi ena tabana ni savasava ena Peceli e Kenya — Kenya

Vakarautaki tiko na teveli ena valenikana ena Peceli e Colombia — Colombia

Na ibalebale ni Peceli ena vosa vakaIperiu na “Vale ni Kalou.” (Vakatekivu 28:17, 19, ivakamacala e ra) Na yaca qori e veiganiti me vakayacani kina na valenivolavola ni tabana kece ni iVakadinadina i Jiova e veiyasa i vuravura, e liutaki se dusimaki kina na nodra cakacaka vakavunau. Na iLawalawa Dauvakatulewa e veiqaravi ena itikotiko liu e Niu Yoka e Merika, eratou dusimaka mai keri na cakacaka e vakayacori ena valenivolavola ni tabana e veiyasa i vuravura. O ira na veiqaravi ena valenivolavola ni tabana qori era kilai mera lewenivuvale e Peceli. Me vaka ga e dua na vuvale, era tiko vata ga qai cakacaka vata ena dua na itikotiko, era kana vata, ra qai vulica vata na iVolatabu.—Same 133:1.

Era vakuai ira na lewenivuvale e Peceli. Ena Peceli kece, era tiko kina na tagane kei na yalewa lotu vaKarisito era soli ira vakatabakidua mera cakava na loma ni Kalou qai tokona na nona Matanitu. (Maciu 6:33) Era sega ni saumi na veiqaravi e Peceli, ia e tiko na nodra icili se rumu lalai qai soli eso na ilavo me vukei ira. E tiko kece na nodra ilesilesi, eso era cakacaka ena ofisi, valenikuro se valenikana. So era veiqaravi ena vanua ni tabaivola se tawa ivola. So era dau sasamaki ena rumu, savasava, vakavinakataka na iyaya, se so tale na cakacaka.

E oga vakalevu ena tokoni ni vunautaki ni Matanitu ni Kalou. Na itavi e qaravi ena Peceli e veiyasa i vuravura e kena inaki me vakatetei kina na ka dina vakaivolatabu vei ira e levu. Dua sara ga na kena ivakaraitaki na brochure qo. E volai ena nodratou veidusimaki na iLawalawa Dauvakatulewa, sa qai vakau ena imeli vei ira na vica vata na drau na timi ni vakadewa e veiyasa i vuravura. Oti ena lai tabaki ena misini totolo ni tabaivola ena vica na Peceli e dau caka kina na tabaivola, qai vakau vei ira na sivia na 110,000 na ivavakoso. Era veitokoni na lewe i Peceli ena ikalawa kece qori mera tokona kina na cakacaka bibi duadua—na vunautaki ni itukutuku vinaka.—Marika 13:10.

O cei era veiqaravi e Peceli? Na cava eso na ka e vakarautaki vei ira?
Na cakacaka bibi cava e tokona vakalevu na Peceli?