LESONI 24
E Vakailavotaki Vakacava na Neimami Cakacaka e Vuravura Raraba?
Nepal
Togo
Peritania
Neimami isoqosoqo e tabaka qai veisoliyaka wale e veiyabaki e vica na drau na milioni na iVolatabu kei na so tale na ivola. Keimami tara qai vakavinakataka na neimami Vale ni Soqoni kei na valenivolavola ni tabana. Keimami tokoni ira na vica na udolu na lewe ni vuvale e Peceli kei ira na daukaulotu, keimami vakarautaka tale ga na iyaya ni vakacoko ena gauna ni leqa tubukoso. O na rairai vaqaqa, ‘E vakailavotaki vakacava na ka kece ya?’
Keimami sega ni lavaka na duanaikatini, se soli. E vinakati e levu na ilavo ena kena tokoni na cakacaka vakaitalatala, ia keimami sega ni kere ilavo. E vakamacalataki ena ikarua ni itabataba ni Watchtower ena duanadrau vakacaca na yabaki sa oti ni keimami vakabauta ni tokoni keimami tiko o Jiova. Keimami “na sega gona ni kerekere se vakamasuta e dua tale me tokoni keimami.” Me yacova mai qo, keimami se sega vakadua ni cakava ya!—Maciu 10:8.
Na neimami cakacaka e tokoni ena cau. E levu era dau cau nira vakavinavinakataka na cakacaka ni veivakavulici ena iVolatabu keimami vakayacora. O ira mada ga na iVakadinadina era marau mera solia na nodra gauna, igu, iyau, kei na so tale na ka me vakayacori kina na loma ni Kalou e vuravura. (1 Veigauna 29:9) E tiko ena neimami Vale ni Soqoni kei na vanua ni neimami soqo lelevu na kato ni cau, ke dua e via cau e rawa ni cakava vaka kina se rai ena website, jw.org. Ia vakalevu ga na ilavo e cautaki, era solia o ira e sega ni levu na ka era taukena, me vaka na yada dravudravua a vakacaucautaka o Jisu ni cautaka e rua na ilavo lailai sara ena kato ni cau ena valenisoro. (Luke 21:1-4) Koya gona, ke dua e via “biuta vakatikitiki” me solia “na ka e vakadeitaka e lomana,” e rawa ni cakava vaka kina.—1 Korinica 16:2; 2 Korinica 9:7.
Keimami vakadeitaka ni o Jiova ena uqeta na lomadra o ira era via ‘rokovi koya ena nodra iyau’ mera tokona na cakacaka ni Matanitu ni Kalou, me rawa ni vakayacori kina na lomana.—Vosa Vakaibalebale 3:9.
Na cava e duidui kina na neimami isoqosoqo mai na veimatalotu tale eso?
E vakayagataki vakacava na cau?